വടക്കൻ കേരളത്തിൽ തണുപ്പ് കൂടാൻ പോകുന്നു, വയനാട്ടിൽ അതിശൈത്യം

ഡിസംബർ ആയതോടെ സംസ്ഥാനത്ത് തണുപ്പേറുകയാണ്. പ്രത്യേകിച്ച് മലയോര ജില്ലകളിൽ. വിനോദ സഞ്ചാര കേന്ദ്രങ്ങളായ മൂന്നാറിലും വയനാട്ടിലും താപനില കുറഞ്ഞുതുടങ്ങി. മൂന്നാറിലെ താപനില എട്ട് ഡിഗ്രി സെൽഷ്യസിലെത്തിയിരിക്കുകയാണ്. വയനാട്ടിലെ പലപ്രദേശങ്ങളിലും തണുപ്പ് വർധിച്ച് വരികയാണ്.വയനാട്ടിൽ നാളെ പുലർച്ചെ 12- 14 ഡിഗ്രി വരെ തണുപ്പ് അനുഭവപ്പെടാൻ സാധ്യതയുണ്ട്. അതുപോലെ വടക്കൻ കേരളത്തിൽ ഇനിയുള്ള ദിവസം കൂടുതൽ തണുപ്പനുഭവപ്പെടും. കോഴിക്കോട്, വയനാട്, മലപ്പുറം ജില്ലയിലെ കിഴക്കൻ മേഖലയിലും ഇടനാട്ടിലും ഉത്തരേന്ത്യൻ തണുപ്പ് സ്വാധീനം എത്തും.

മൂന്നാറിൽ വൈകിയെത്തി തണുപ്പ്

നവംബറിൽ തന്നെ മൂന്നാറിൽ തണുപ്പ് കാലം ആരംഭിക്കാറുണ്ടായിരുന്നെങ്കിലും ഈ വർഷം മഴ തുടർന്നതോടെ തണുപ്പെത്താൻ വൈകുകയായിരുന്നു. വടക്കുകിഴക്കൻ കാലവർഷവും 'തീവ്ര' ചുഴലിക്കാറ്റും കാരണം കഴിഞ്ഞ ആഴ്ചവരെ മൂന്നാറിൽ മഴ പെയ്തിരുന്നു. വെയിൽ ഉണ്ടെങ്കിലും പകൽ താപനില ഒൻപത് ഡിഗ്രി സെൽഷ്യസിലാണ്.
കഴിഞ്ഞ ദിവസം രാവിലെ മൂന്നാറിൽ താപനില എട്ട് ഡിഗ്രി സെൽഷ്യസിലെത്തി. കഴിഞ്ഞവർഷം ഡിസംബർ 24ന് മൂന്നാറിലെ താപനില രണ്ട് ഡിഗ്രിയിലെത്തിയിരുന്നു. ആ സമയത്ത് പലയിടങ്ങളിലും മഞ്ഞുവീഴ്ചയും തുടങ്ങി. ഈ വർഷവും മഞ്ഞുവീഴ്ചയുണ്ടാകുമോയെന്നാണ് വിനോദ സഞ്ചാരികൾ ഉറ്റുനോക്കുന്നത്.

വയനാട്ടിലും തണുപ്പ് വൈകി എത്തി

നവംബർ പകുതിയോടെ വയനാട്ടിലും തണുപ്പ് കൂടാറുണ്ടായിരുന്നെങ്കിലും ഇത്തവണ ഡിസംബർ ആദ്യവാരമാണു തണുപ്പ് ആരംഭിച്ചത്. വടുവൻചാൽ, ചുണ്ടേൽ, വൈത്തിരി, അമ്പലവയൽ മേഖലകളിലാണ് കൂടുതൽ തണുപ്പ് നിലവിൽ അനുഭവപ്പെടുന്നത്. വടുവൻചാലിൽ വൈകിട്ട് 3 കഴിയുമ്പോൾ തന്നെ മഞ്ഞിൽ മൂടും. രാവിലെയാണ് എല്ലായിടത്തും തണുപ്പ് ഏറ്റവും കൂടുതൽ അനുഭവപ്പെടുന്നത്. എന്നാൽ പത്ത് മണിയോടെ തണുപ്പ് മാറുകയും വെയിൽ എത്തുകയും ചെയ്യും. വൈകീട്ട നാല് ആകുമ്പോഴേക്കും വീണ്ടും തണുപ്പ് ആരംഭിക്കും.

English summary : Experience the unique weather of Munnar this November, where the chill is delayed by persistent rains. Will snowfall grace the hills this year?