ഇന്ന് ഓസോൺ ദിനം : ഭൂമിയുടെ കവചം തിരിച്ചുപിടിച്ച കഥ

ലോകം സെപ്റ്റംബർ 16-ന് ഓസോൺ ദിനം ആചരിക്കുന്നു. സൂര്യനിൽ നിന്നുള്ള അപകടകരമായ അൾട്രാവയലറ്റ് (UV) കിരണങ്ങളിൽനിന്ന് ജീവജാലങ്ങളെ സംരക്ഷിക്കുന്ന പ്രകൃതിദത്ത പ്രതിരോധ കവചമാണ് ഓസോൺ പാളി.

ഭൂമിയുടെ അന്തരീക്ഷത്തിലെ സ്ട്രാറ്റോസ്ഫിയർ മേഖലയിൽ, ഏകദേശം 15 മുതൽ 30 കിലോമീറ്റർ വരെ ഉയരത്തിലാണ് ഇത് സ്ഥിതി ചെയ്യുന്നത്. ഓസോൺ ഇല്ലാതായാൽ ഭൂമിയിലെ ജീവൻ തന്നെ ഗുരുതര ഭീഷണിയിലാകും. ഓസോൺ പാളി ദുർബലമായാൽ ചർമ്മാർബുദ കേസുകൾ 70 ശതമാനം വരെ വർധിക്കും, തിമിരം കൂടും. പ്രതിരോധ ശേഷി കുറയും.

1980കളിൽ അന്റാർട്ടിക്കയുടെ മുകളിലെ ഓസോൺ പാളിയിൽ വലിയൊരു വിള്ളൽ (Ozone Hole) രൂപപ്പെട്ടതായി ശാസ്ത്രജ്ഞർ കണ്ടെത്തി. റഫ്രിജറേറ്ററുകളും മറ്റും പുറന്തള്ളുന്ന ക്ലോറോ ഫ്ലൂറോ കാർബണുകൾ, ഹാലോൺസ് പോലുള്ള രാസവസ്തുക്കൾ ഓസോൺ പാളിയിൽ വിള്ളലുകൾ വീഴ്ത്തി.

മോൺട്രിയൽ പ്രോട്ടോക്കോൾ: ലോകത്തിന്റെ കൂട്ടായ്മ

പ്രതിസന്ധി നേരിടാൻ ലോക രാഷ്ട്രങ്ങൾ ഒരുമിച്ചുചേർന്നു. 1987-ൽ 46 രാജ്യങ്ങൾ ചേർന്ന് ഒപ്പുവച്ച മോൺട്രിയൽ പ്രോട്ടോക്കോൾ പിന്നീട് 200-ത്തിലധികം രാജ്യങ്ങൾ അംഗീകരിച്ചു. ചരിത്രത്തിലെ ഏറ്റവും വിജയകരമായ പരിസ്ഥിതി കരാറായി. ഫ്രിഡ്ജുകൾ, എയർ കണ്ടീഷനുകൾ, സ്പ്രേ കാനുകൾ, തീ അണയ്ക്കുന്ന ഉപകരണങ്ങൾ തുടങ്ങിയവയിൽ ഉപയോഗിച്ചിരുന്ന ഓസോൺ നശിപ്പിക്കുന്ന രാസവസ്തുക്കൾ ക്രമാതീതമായി ഒഴിവാക്കാൻ തീരുമാനിച്ചു. കഴിഞ്ഞ നൽപ്പത് വർഷമായി 99 ശതമാനം വരെ ഇത്തരം രാസവസ്തുക്കളുടെ ഉപയോഗം അവസാനിപ്പിക്കാനായി.

ഐക്യരാഷ്ട്രസഭയുടെ 2024ലെ റിപ്പോർട്ട് പ്രകാരം 2040ഓടെ ഭൂമിയുടെ ഭൂരിഭാഗം ഭാഗങ്ങളിലും 2045ഓടെ ആർട്ടിക്കിലും 2066ഓടെ അന്റാർട്ടിക്കിലും
ഓസോൺ പാളി പൂർണമായും പൂർവാവസ്ഥയിൽ എത്തുമെന്ന് ശാസ്ത്രജ്ഞർ പറയുന്നു.

ഓസോൺ പാളിയുടെ ദ്വാരം ഇന്നത് ചെറിയ തോതിൽ ചുരുങ്ങിക്കൊണ്ടിരിക്കുകയാണ്. ഒരു കാലത്ത് ദുർഘടമായി തോന്നിയ പ്രശ്നം അന്താരാഷ്ട്ര സഹകരണത്താൽ പരിഹരിക്കപ്പെട്ടുവെന്നത് പരിസ്ഥിതി ചരിത്രത്തിലെ വലിയ വിജയം തന്നെയാണ്.

ഇന്ത്യയുടെ പങ്ക്

1991ൽ തന്നെ ഇന്ത്യ ഓസോൺ സംരക്ഷണ പദ്ധതി ആരംഭിച്ചു. വ്യവസായ മേഖലയിൽനിന്നു സിഫിക്, ഹാലോൺസ് പോലുള്ള വസ്തുക്കളുടെ ഉപയോഗം പൂർണമായും ഒഴിവാക്കി. പരിസ്ഥിതി സൗഹൃദ സാങ്കേതിക വിദ്യകൾക്ക് പ്രോത്സാഹനം നൽകി. സ്കൂളുകളിലും കോളജുകളിലും വിദ്യാർഥികൾക്കായി ബോധവൽക്കരണ പരിപാടികൾ സംഘടിപ്പിക്കുകയും പൊതുജനങ്ങളിൽ പരിസ്ഥിതി സൗഹൃദ ജീവിതരീതികൾ പ്രചരിപ്പിക്കുകയും ചെയ്തു.

ഭൂമിയുടെ പ്രതിരോധ കവചം വരും തലമുറകൾക്കായി ഉറപ്പാക്കേണ്ടത് നമ്മുടെ ഉത്തരവാദിത്വമാണ്. അതിനാൽ, ഓസോൺ ദിനാഘോഷം ഒരു ഓർമപ്പെടുത്തലാണ് – ഭൂമിയെ സ്നേഹിക്കാനും സംരക്ഷിക്കാനും പുതുതലമുറ മുന്നോട്ട് വരണമെന്ന്.

English Summary: Today is Ozone Day: The story of the Earth's shield being reclaimed