പ്രതീക്ഷിക്കാതെ വരുന്ന കാലാവസ്ഥ, ചർമ്മസംരക്ഷണത്തിൽ കൂടുതൽ ജാഗ്രത ആവശ്യമാണ്

ഒരു ദിവസം കനത്തമഴയും പിറ്റേദിവസം കഠിനമായ ചുട്ടുപൊള്ളുന്ന വെയിലും അല്ലെങ്കിൽ മൂടികെട്ടിയ അന്തരീക്ഷവും. ഇതാണ് ഇപ്പോഴത്തെ കാലവസ്ഥയുടെ ഒരു രീതി. എന്നാൽ കാലാവസ്ഥയ്ക്കനുസരിച്ച് നമ്മളിലും ചില മാറ്റങ്ങൾ വരുത്തേണ്ടത് അത്യാവശ്യമാണ്. പ്രത്യേകിച്ച് ചർമ്മത്തിൻ്റെ കാര്യത്തിൽ.

ഇന്ത്യയിലെ കാലാവസ്ഥയിലെ ഈ വേഗത്തിലുള്ള മാറ്റങ്ങൾ ആരോഗ്യത്തെപ്പോലെ തന്നെ ചർമത്തെയും പെട്ടെന്ന് ബാധിക്കുന്നുണ്ട്. ചൂടിനോട് പൊരുത്തപ്പെടും മുമ്പേ അന്തരീക്ഷത്തിൽ തണുപ്പോ ഈർപ്പമോ കൂടുന്നതോടെ ചർമം ക്ഷീണിക്കുന്ന അവസ്ഥയാണ് ഉണ്ടാകുന്നത്.

ചർമ്മത്തെ സംരക്ഷിക്കൂ

ഡെർമറ്റോളജിസ്റ്റുകൾ(Dermatologist) പറയുന്നത്, മാറിവരുന്ന കാലാവസ്ഥ വ്യതിയാനങ്ങൾ മൂലം നിർജ്ജലീകരണം, മുഖക്കുരു, സ്കിൻ ടോണിലെ അസമത്വം, സെൻസിറ്റിവിറ്റി എന്നിവ വർധിക്കുന്നതായി കാണപ്പെടുന്നു എന്നാണ്. അതുകൊണ്ട് തന്നെ പരിസ്ഥിതി മാറ്റങ്ങളോട് പൊരുത്തപ്പെടുന്ന രീതിയിലുള്ള സ്കിൻ കെയർ ദിനചര്യ പിന്തുടരുന്നതാണ് ഉചിതമെന്ന് വിദഗ്ധർ നിർദേശിക്കുന്നു.

മൃദുവായ ക്ലെൻസർ തിരഞ്ഞെടുക്കണം

ചർമത്തിന്റെ സ്വാഭാവിക പ്രതിരോധശേഷി നിലനിർത്താൻ പി.എച്ച് ബാലൻസ് കൃത്യമായ മൃദുവായ ക്ലെൻസർ ഉപയോഗിക്കുന്നത് നിർണായകമാണ്. സൾഫേറ്റ് രഹിതവും വീര്യം കുറഞ്ഞതുമായ ഫേസ് വാഷുകൾ ഉപയോഗിക്കുക. ഇതുമൂലം ചർമത്തിലെ അവശ്യ ഈർപ്പം നഷ്ടപ്പെടുന്നത് തടയും. അമിതമായ ഫോമിങ് ഫോർമുലകൾ ഒഴിവാക്കണമെന്നും, ദിവസത്തിൽ രണ്ടുതവണയിൽ കൂടുതൽ മുഖം കഴുകേണ്ടതില്ലെന്നും വിദഗ്ധർ പറയുന്നു.

ലൈറ്റ് വെയിറ്റ് മോയിസ്ചറൈസറുകൾ

ചൂടും ഈർപ്പവും കൂടിയ സാഹചര്യങ്ങളിൽ വെള്ളം അടിസ്ഥാനമാക്കിയുള്ള ലൈറ്റ് വെയിറ്റ് മോയിസ്ചറൈസറുകൾ ഉപയോഗിക്കുന്നത് ഉചിതമാണ്. തണുപ്പും വരണ്ടതുമായ കാലാവസ്ഥയിൽ കട്ടിയേറിയ ക്രീമുകൾ തിരഞ്ഞെടുക്കാം. ഹൈലുറോണിക് ആസിഡ്, സെറാമൈഡുകൾ, ഗ്ലിസറിൻ എന്നിവ അടങ്ങിയ ഉൽപ്പന്നങ്ങൾ തിരഞ്ഞെടുക്കാം. കാരണം ഇത് ജലാംശം നിലനിർത്താൻ സഹായിക്കും.

സൺസ്‌ക്രീം നിർബന്ധം

മൂടൽമഞ്ഞോ തണുപ്പോ ഉണ്ടായാലും അൾട്രാവയലറ്റ് കിരണങ്ങളുടെ അളവ് കുറയണമെന്നില്ല. അതിനാൽ SPF 30 അല്ലെങ്കിൽ അതിൽ കൂടുതലുള്ള സൺസ്ക്രീം ഉപയോഗിക്കുന്നത് നിർബന്ധമാണെന്ന് വിദഗ്ധർ ചൂണ്ടികാട്ടുന്നു. സൺടാൻ, പിഗ്മെൻറേഷൻ തുടങ്ങിയ പ്രശ്നങ്ങൾ ഒഴിവാക്കാൻ ഇത് സഹായിക്കും. അതിനാൽ ഏതു കാലാവസ്ഥയിലും പുറത്തിറങ്ങുമ്പോൾ സൺസ്ക്രീം പുരട്ടുന്നത് അത്യുത്തമമാണ്.

എക്സ്ഫോളിയേഷൻ

കാലാവസ്ഥയെ ആശ്രയിച്ചാണ് എക്സ്ഫോളിയേഷൻ ചെയ്യേണ്ടത്. ഈർപ്പം കൂടുതലുള്ള സമയത്ത് ആഴ്ചയിൽ ഒന്നോ രണ്ടോ തവണ മൃതകോശങ്ങൾ നീക്കം ചെയ്യാം. എന്നാൽ വരണ്ട കാലാവസ്ഥയിൽ അതിരുകടന്ന എക്സ്ഫോളിയേഷൻ ചർമത്തിന്റെ സംരക്ഷണ പാളി ദുർബലമാക്കും. സെൻസിറ്റിവ് ചർമമുള്ളവർ രാസവസ്തുക്കൾ കുറവുള്ള ഉൽപ്പന്നങ്ങൾ തിരഞ്ഞെടുക്കണമെന്ന് വിദഗ്ധർ നിർദേശിക്കുന്നു.

മാറിമാറി വരുന്ന കാലാവസ്ഥയിൽ ചർമസംരക്ഷണം ഒരേ രീതിയിൽ തുടരുന്നത് നല്ലതല്ല. സാഹചര്യത്തിന് അനുയോജ്യമായ ഉൽപ്പന്നങ്ങളും ദിനചര്യയും പിന്തുടരുന്നതിലൂടെ മാത്രമേ ആരോഗ്യകരമായ ചർമ്മം നിലനിർത്താൻ സാധിക്കൂ. ഇതുമൂലം ഏതൊരു കാലാവസ്ഥയേയും നമുക്ക് അതിജീവിക്കാം.

English Summary : Rapid transitions between extreme heat, high humidity, and sudden cold can lead to dehydration, acne flare-ups, and skin sensitivity. To maintain a healthy glow, dermatologists recommend a flexible skincare routine rather than a "one-size-fits-all" approach.