Kerala Weather 04/03/26 : സംസ്ഥാനത്ത് ഇന്ന് ചൂട് കനക്കും; ചില ഭാഗങ്ങളിൽ വൈകിട്ട് മഴ സാധ്യത

സംസ്ഥാനത്ത് ഇന്ന് ശക്തമായ വേനൽച്ചൂട്. ഉച്ചയോടെ താപനില 35 മുതൽ 36 ഡിഗ്രി സെൽഷ്യസ് വരെ ഉയരാനിടയുണ്ട്. രാവിലെ മുതൽ മിക്ക പ്രദേശങ്ങളിലും തെളിഞ്ഞ ആകാശവും കടുത്ത സൂര്യപ്രകാശവും അനുഭവപ്പെട്ടു.

എന്നാൽ വൈകുന്നേര സമയത്ത് വടക്കൻ, മധ്യ ജില്ലകളിലെ ചില ഭാഗങ്ങളിൽ ഇടിയോടുകൂടിയ ഒറ്റപ്പെട്ട മഴയ്ക്കുള്ള സാധ്യത കാലാവസ്ഥ നിരീക്ഷണങ്ങൾ സൂചിപ്പിക്കുന്നു. ശനി, ഞായർ ദിവസങ്ങളിൽ മേഘാവൃതാവസ്ഥ വർധിക്കാനും ചില ഇടങ്ങളിൽ ചെറുമഴ ലഭിക്കാനും സാധ്യതയുണ്ട്.

ചൂട് ശക്തമായതിനാൽ പൊതുജനങ്ങൾ ഉച്ച സമയങ്ങളിൽ പുറത്തിറങ്ങുന്നത് പരമാവധി ഒഴിവാക്കണമെന്ന് ആരോഗ്യ വകുപ്പ് മുന്നറിയിപ്പ് നൽകിയിരിക്കുകയാണ്. ദാഹം ഒഴിവാക്കാൻ ധാരാളം വെള്ളം കുടിക്കാനും നിർദ്ദേശമുണ്ട്.

മത്സ്യബന്ധനത്തിന് നിലവിൽ വലിയ മുന്നറിയിപ്പുകളില്ലെങ്കിലും കടലിൽ പോകുന്നവർ കാലാവസ്ഥാ അപ്‌ഡേറ്റുകൾ നിരന്തരം പരിശോധിക്കണമെന്ന് അധികൃതർ അറിയിച്ചു.

അതേസമയം സംസ്ഥാനത്തിന്റെ വിവിധ ഭാഗങ്ങളിൽ ഇന്ന് പുലർച്ചെ മഞ്ഞ് വീണു. മലനിരകളിലും താഴ്ന്ന പ്രദേശങ്ങളിലുമാണ് പുലർച്ചെ സമയത്ത് മൂടൽമഞ്ഞ് അനുഭവപ്പെട്ടത്. രാവിലെ 6 മണിവരെ ദൃശ്യപരിധി കുറയുകയും വാഹനഗതാഗതം മന്ദഗതിയിലാകുകയും ചെയ്തു.

തൃശ്ശൂർ എളനാട് മലയോര മേഖലയിൽ രാവിലെ ഉണ്ടായ കോടമഞ്ഞ് Photo Credit: Krishna Prasad

വയനാട്, ഇടുക്കി, തൃശ്ശൂർ, പാലക്കാട് ഉൾനാടൻ മേഖലകൾ, മലപ്പുറം കിഴക്കൻ പ്രദേശങ്ങൾ എന്നിവിടങ്ങളിലാണ് മഞ്ഞ് കൂടുതൽ ശ്രദ്ധിക്കപ്പെട്ടത്. നഗരപ്രദേശങ്ങളിലുള്ള തുറസ്സായ ഇടങ്ങളിൽ നേരിയ മഞ്ഞ് രൂപപ്പെട്ടു.

കാലാവസ്ഥാ നിരീക്ഷണങ്ങൾ പ്രകാരം പുലർച്ചെ കുറഞ്ഞ താപനില 20–22 ഡിഗ്രി സെൽഷ്യസ് വരെ രേഖപ്പെടുത്തി. വേനൽക്കാലത്തിന്റെ തുടക്കത്തിൽ രാത്രിയിലും പുലർച്ചെയുമായി താപനില താഴുന്നത് മൂലമാണ് മഞ്ഞ് രൂപപ്പെടുന്നത്.

പുലർച്ചെ യാത്ര ചെയ്യുന്നവർ പ്രത്യേക ജാഗ്രത പാലിക്കണമെന്ന് ഗതാഗത വകുപ്പ് നിർദേശം നൽകി.

English Summary : Intense Heat Followed by Scattered Rain: Kerala Weather Briefing The Heat Index:
Kerala is experiencing a significant surge in summer temperatures today, March 4, 2026. Experts predict the mercury will climb to 35°C–36°C by midday. Most regions reported clear skies and harsh sunlight starting from the early morning hours.