അറബിക്കടലില്‍ തീവ്ര ന്യൂനമര്‍ദം: തീരദേശത്ത് കാറ്റും മഴയും തുടങ്ങി

അറബിക്കടലിലെ തീവ്ര ന്യൂനമര്‍ദത്തെ തുടര്‍ന്ന് കേരളത്തില്‍ തീരദേശത്തും ഇടനാട് പ്രദേശത്തും ഇന്ന് രാത്രിയോടെ മഴ സാധ്യത. മഴക്കൊപ്പം ശക്തമായ കാറ്റും പ്രതീക്ഷിക്കണം. എന്നാല്‍ ഇടിയോടെ മഴ സാധ്യത താരതമ്യേന കുറവാണ്. പടിഞ്ഞാറന്‍ തീരത്ത് കടലില്‍ നിന്ന് മേഘങ്ങള്‍ കയറുന്നതാണ് മഴക്ക് കാരണം.

തണുത്ത കാറ്റും അന്തരീക്ഷവും

മഴക്കൊപ്പം തണുത്ത കാറ്റും തീരദേശത്തും തീരത്തു നിന്ന് 15 കി.മി കിഴക്കു മാറിയുള്ള പ്രദേശങഅങളിലും ഉണ്ടാകും. പലയിടത്തും മേഘങ്ങള്‍ വ്യാപകമായി കാണുമെങ്കിലും മഴയുടെ ശക്തി കുറവാകും. ഇന്നു വൈകിട്ടു മുതല്‍ വടക്കന്‍ കേരളത്തില്‍ മഴ ശക്തിപ്പെട്ടു. ശക്തമായ കാറ്റും വീശി. വടകരയില്‍ മണിക്കൂറില്‍ 54 കി.മി വേഗത്തിലുള്ള കാറഅറും കാസര്‍കോട് പാണത്തൂരില്‍ 46 കി.മി വേഗതയിലുള്ള കാറ്റും കണ്ണൂര്‍ പിണറായിയില്‍ 37 കി.മി വേഗത്തിലുള്ള കാറ്റും ഇന്ന് വൈകിട്ട് റിപ്പോര്‍ട്ട് ചെയ്തു.

തെക്കു കിഴക്കന്‍ അറബിക്കടലില്‍ രൂപപ്പെട്ട തീവ്ര ന്യൂനമര്‍ദം (Depression) വടക്കു വടക്കു കിഴക്ക് ദിശയില്‍ നീങ്ങുകയാണ്. ന്യൂനമര്‍ദത്തിലേക്ക് പ്രവഹിക്കുന്ന മേഘങ്ങളാണ് കേരളത്തില്‍ പ്രവേശിക്കുന്നതും മഴയും കാറ്റും നല്‍കുന്നതും.

വിവിധ ജില്ലകളില്‍ കേന്ദ്ര കാലാവസ്ഥാ വകുപ്പ് അലര്‍ട്ടുകള്‍ പുതുക്കി

ഓറഞ്ച് അലര്‍ട്ട്
23/10/2025: കോഴിക്കോട്, വയനാട്, കണ്ണൂര്‍, കാസറഗോഡ്
24/10/2025: മലപ്പുറം, കോഴിക്കോട്, വയനാട്, കണ്ണൂര്‍, കാസറഗോഡ്
ജില്ലകളില്‍ കേന്ദ്ര കാലാവസ്ഥ വകുപ്പ് ഓറഞ്ച് അലര്‍ട്ട് പ്രഖ്യാപിച്ചിരിക്കുന്നു. ഒറ്റപ്പെട്ടയിടങ്ങളില്‍ അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്. 24 മണിക്കൂറില്‍ 115.6 mm മുതല്‍ 204.4 mm വരെ മഴ ലഭിക്കുമെന്നാണ് അതിശക്തമായ മഴ (Very Heavy Rainfall) എന്നത് കൊണ്ട് കേന്ദ്ര കാലാവസ്ഥ വകുപ്പ് അര്‍ത്ഥമാക്കുന്നത്.

മഞ്ഞ അലര്‍ട്ട്
23/10/2025: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം
24/10/2025: തിരുവനന്തപുരം, ഇടുക്കി, എറണാകുളം, തൃശ്ശൂര്‍, പാലക്കാട്
27/10/2025: കോഴിക്കോട്, വയനാട്, കണ്ണൂര്‍, കാസറഗോഡ്
എന്നീ ജില്ലകളില്‍ കേന്ദ്ര കാലാവസ്ഥ വകുപ്പ് മഞ്ഞ അലര്‍ട്ട് പ്രഖ്യാപിച്ചിരിക്കുന്നു. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില്‍ 64.5 മില്ലിമീറ്ററില്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ (ISOL H) എന്നത് കൊണ്ട് കേന്ദ്ര കാലാവസ്ഥ വകുപ്പ് അര്‍ത്ഥമാക്കുന്നത്. ഇടിമിന്നലോടു കൂടിയ മഴയാണ് പ്രതീക്ഷിക്കുന്നത്.

English summary : Severe low pressure in the Arabian Sea: Wind and rain have begun in the coastal areas