കർഷകർക്ക് ആശ്വാസം: കൃഷിനാശത്തിന്‌  ഇൻഷുറൻസ്‌ പരിരക്ഷ

കർഷകർ നേരിടുന്ന ഏറ്റവും വലിയ ഭീഷണിയാണ് വന്യജീവി ആക്രമണം. ദിനം പ്രതിയെന്നോണം വന്യജീവി ആക്രമണങ്ങൾ വർദ്ധിച്ചുവരികയാണ്. ഒറ്റരാത്രി കൊണ്ടാണ് മാസങ്ങളുടെ അദ്ധ്വാനം വന്യജീവി ആക്രമണം കൊണ്ട് തകരുന്നത്. പലപ്പോഴും കണ്ടു നിൽക്കാൻ പോലും കഴിയാത്ത കാഴ്ചയാകാറുണ്ട് ഇത്. അതുപോലെ തന്നെയാണ് വെള്ളം കയറി കൃഷി നശിക്കുന്നതും. എന്നാൽ ഇതിനൊരു പരിഹാരമെന്നോണം ചില പദ്ധതികൾ കൊണ്ടു വന്നിരിക്കുകയാണ് പ്രധാനമന്ത്രി.

കർഷകർക്ക് വിള ഇൻഷുറൻസ് നൽകും

വന്യജീവി ആക്രമണത്തിൽ വിളനാശം, വെള്ളം കയറി നെൽകൃഷി നാശം എന്നിവ സംഭവിച്ചാൽ കർഷകർക്ക്‌ ഇൻഷുറൻസ്‌ പരിരക്ഷ ലഭിക്കും. ഇതിനായി പ്രധാനമന്ത്രി വിള ഇൻഷുറൻസ്‌ പദ്ധതിയുടെ (ഫസൽ ബീമാ യോജന) വ്യവസ്ഥകൾ പരിഷ്‌കരിച്ചു. 2026 ഖാരിഫ്‌ സീസൺ മുതൽ പ്രാബല്യത്തിൽ വരുമെന്ന്‌ കേന്ദ്ര കൃഷി മന്ത്രാലയം വാർത്താക്കുറിപ്പിൽ അറിയിച്ചു. കേരളം അടക്കമുള്ള സംസ്ഥാനങ്ങൾ മുന്നോട്ടുവെച്ച ആവശ്യമാണിത്‌.

വെള്ളം കയറിയുള്ള നെൽകൃഷി നാശത്തിന്‌ 2018 വരെ പരിരക്ഷയുണ്ടായിരുന്നു. വെള്ളത്തിൽ മുങ്ങിയ വിളയുടെ നഷ്ടം കണക്കാക്കൽ എളുപ്പമല്ലെന്ന കാരണത്താൽ നേരത്തെ ഒഴിവാക്കുകയായിരുന്നു. അതേസമയം വിള ഇൻഷുറൻസ്‌ പദ്ധതിയുടെ മേഖലാതല അപകട വിഭാഗത്തിലാണ്‌ വന്യജീവി ആക്രമണത്തെ തുടർന്നുള്ള വിളനാശം ഉൾപ്പെടുത്തിയിരിക്കുന്നത്.

നഷ്‌ടപരിഹാരം ലഭിക്കണമെങ്കിൽ 72 മണികൂറിനുള്ളിൽ റിപ്പോർട്ട് ചെയ്യണം

നഷ്ടപരിഹാരം ലഭിക്കണമെങ്കിൽ വിളനാശം സംഭവിച്ച്‌ 72 മണിക്കൂറിനുള്ളിൽ വിള ഇൻഷുറൻസ്‌ ആപ്പിൽ ജിയോടാഗ്‌ ചെയ്ത ഫോട്ടോകൾ സഹിതം കർഷകർ റിപ്പോർട്ട്‌ നൽകണം. വിളനാശത്തിന്‌ ഇടയാക്കുന്ന വന്യജീവികളുടെയും ആക്രമണസാധ്യതയുള്ള ജില്ലകളുടെയും പട്ടിക സംസ്ഥാനങ്ങൾ തയ്യാറാക്കണം. ഇത്തരത്തിലുള്ള വിളനാശത്തിന്‌ ഇൻഷുറൻസ്‌ പരിരക്ഷ വേണമെന്ന വിവിധ സംസ്ഥാനങ്ങളുടെ ആവശ്യം പരിഗണിച്ച്‌ ഒരു സമിതിക്ക്‌ മന്ത്രാലയം രൂപം നൽകിയിരുന്നു. സമിതിയുടെ ശുപാർശകൾ അംഗീകരിച്ചാണ്‌ ഈ തീരുമാനം.

English Summary: Report crop loss within 72 hours with photos via the crop insurance app. Learn about state-specific wildlife threats and insurance requirements for farmers.