ഇറാനിൽ ‘കരിമഴ’, ബോംബാക്രമണങ്ങൾക്ക് പിന്നാലെ വിഷപുക മഴയായി, ആരോഗ്യ മുന്നറിയിപ്പ്

ഇറാനിലെ ചില പ്രദേശങ്ങളിൽ പെയ്യുന്ന കറുത്ത നിറത്തിലുള്ള മഴ ജനങ്ങളിൽ വലിയ ആശങ്കയുണ്ടാക്കുകയാണ്. രാജ്യത്ത് തുടരുന്ന സൈനിക സംഘർഷത്തിനിടെ പരിസ്ഥിതിയിലും പൊതുജനാരോഗ്യത്തിലും പുതിയ ഭീഷണി ഉയരുന്നതായാണ് റിപ്പോർട്ടുകൾ സൂചിപ്പിക്കുന്നത്. കഴിഞ്ഞ ദിവസങ്ങളിൽ ഇറാനിലെ എണ്ണ ഡിപ്പോകളിൽ നടന്ന വ്യോമാക്രമണങ്ങൾക്ക് പിന്നാലെയാണ് ഈ അസാധാരണമായ ‘കരിമഴ’ അനുഭവപ്പെടാൻ തുടങ്ങിയത്.

വ്യോമാക്രമണത്തെ തുടർന്ന് എണ്ണ സംഭരണ കേന്ദ്രങ്ങളിൽ ഉണ്ടായ വൻ തീപിടിത്തങ്ങളിൽ നിന്ന് കട്ടിയുള്ള കറുത്ത പുകമേഘങ്ങൾ ആകാശത്തേക്ക് ഉയർന്നു. ഈ പുകമേഘങ്ങൾ മഴമേഘങ്ങളുമായി കലർന്നതോടെയാണ് ചില പ്രദേശങ്ങളിൽ കറുത്ത നിറത്തിലുള്ള മഴ പെയ്തതെന്ന് റിപ്പോർട്ടുകൾ പറയുന്നു. പല ഇടങ്ങളിലും കെട്ടിടങ്ങൾക്കും വാഹനങ്ങൾക്കും മേൽ എണ്ണ കലർന്ന മഴത്തുള്ളികൾ പതിച്ചതായി നാട്ടുകാർ വ്യക്തമാക്കുന്നു. ഇതിന് പിന്നാലെ ചിലർക്ക് തലവേദന, ശ്വാസതടസം തുടങ്ങിയ ആരോഗ്യ പ്രശ്നങ്ങളും അനുഭവപ്പെട്ടതായി റിപ്പോർട്ടുകളുണ്ട്.

ആസിഡ് മഴ’യെക്കാൾ അപകടസാധ്യത.

വിദഗ്ധരുടെ വിലയിരുത്തലനുസരിച്ച്, സാധാരണയായി പറയുന്ന ‘ആസിഡ് മഴ’യെക്കാൾ അപകടകരമായ മലിനീകരണ ഘടകങ്ങൾ ഇതിൽ ഉണ്ടായിരിക്കാമെന്നാണ് ആശങ്ക. ബോംബാക്രമണത്തിന് ഇരയായ എണ്ണ ഡിപ്പോകളിൽ നിന്നുയരുന്ന പുകയിൽ സൾഫർ ഡൈഓക്സൈഡും നൈട്രജൻ ഡൈഓക്സൈഡും പോലുള്ള വാതകങ്ങൾ അടങ്ങിയിരിക്കും. ഇവ വായുവിൽ സൾഫ്യൂറിക് ആസിഡും നൈട്രിക് ആസിഡും രൂപപ്പെടാൻ ഇടയാക്കും. പിന്നീട് ഈ രാസവസ്തുക്കൾ മഴത്തുള്ളികളിൽ കലരുമ്പോൾ ആസിഡ് സ്വഭാവമുള്ള മഴ രൂപപ്പെടാൻ സാധ്യതയുണ്ട്.

ഇറാനിലെ ദുരിതാശ്വാസ സംഘടനയായ റെഡ് ക്രസന്റ് സൊസൈറ്റി ഈ സാഹചര്യത്തിൽ ജാഗ്രതാ നിർദേശം പുറപ്പെടുവിച്ചിട്ടുണ്ട്. കറുത്ത പുകയും മലിനമായ മഴയും ശ്വസിക്കുന്നത് തലവേദന, ശ്വാസതടസം, ശ്വാസകോശ സംബന്ധമായ അസ്വസ്ഥതകൾ തുടങ്ങിയ പ്രശ്നങ്ങൾ ഉണ്ടാക്കാമെന്ന് സംഘടന മുന്നറിയിപ്പ് നൽകുന്നു. പ്രത്യേകിച്ച് ആസ്ത്മ പോലുള്ള ശ്വാസകോശ രോഗങ്ങളുള്ളവർ, പ്രായമായവർ, കുട്ടികൾ, വൈകല്യമുള്ളവർ എന്നിവർക്കാണ് കൂടുതൽ അപകടസാധ്യത.

ജനങ്ങൾ വീടുകൾക്കുള്ളിൽ തന്നെ കഴിയുക

ഗർഭിണികൾ വിഷവാതകങ്ങൾ ശ്വസിക്കുന്നത് ഗർഭസ്ഥ ശിശുക്കളുടെ ആരോഗ്യത്തെ ബാധിക്കാനും കുഞ്ഞുങ്ങളുടെ ജനനഭാരം കുറയാനും ഇടയാക്കാമെന്ന ആശങ്കയും വിദഗ്ധർ ഉന്നയിക്കുന്നു. ദീർഘകാലമായി ഇത്തരം മലിനീകരണങ്ങളുമായി സമ്പർക്കത്തിൽ കഴിയുന്നത് കാൻസർ പോലുള്ള ഗുരുതര രോഗങ്ങളുടെ സാധ്യതയും വർധിപ്പിക്കാമെന്നാണ് മുന്നറിയിപ്പ്.

വിദഗ്ധർ പറയുന്നതനുസരിച്ച്, ഈ ‘കരിമഴ’യിൽ ഹൈഡ്രോകാർബണുകൾ, പി.എം 2.5 എന്നറിയപ്പെടുന്ന അൾട്രാഫൈൻ കണികകൾ, പോളിസൈക്ലിക് ആരോമാറ്റിക് ഹൈഡ്രോകാർബണുകൾ പോലുള്ള കാർസിനോജെനിക് രാസസംയുക്തങ്ങൾ എന്നിവ അടങ്ങിയിരിക്കാം. കൂടാതെ കെട്ടിടങ്ങൾ നശിച്ചതിലൂടെ പുറത്തുവന്ന ഘനലോഹങ്ങൾ, സ്ഫോടനങ്ങളിലും തീപിടിത്തങ്ങളിലും നിന്നുള്ള മറ്റ് രാസവസ്തുക്കൾ എന്നിവയും മഴയിൽ കലർന്നിരിക്കാമെന്നാണ് വിദഗ്ധർ ചൂണ്ടിക്കാട്ടുന്നത്.

ഇത്തരം സാഹചര്യത്തിൽ ജനങ്ങൾ സാധ്യമെങ്കിൽ വീടുകൾക്കുള്ളിൽ തന്നെ കഴിയുക, വാതിലുകളും ജനലുകളും അടച്ചിടുക, പുറത്തേക്ക് പോകേണ്ടിവന്നാൽ മാസ്ക് ധരിക്കുക തുടങ്ങിയ മുൻകരുതലുകൾ സ്വീകരിക്കണമെന്ന് അധികൃതർ നിർദേശിച്ചിട്ടുണ്ട്.

English Summary : Following recent military escalations and targeted airstrikes on oil storage facilities in Iran, a rare and hazardous phenomenon known as "Black Rain" has been reported. Massive plumes of dense, hydrocarbon-rich smoke from burning oil depots have ascended into the atmosphere, merging with rain clouds. The resulting precipitation is a dark, oily liquid that has coated buildings, vehicles, and streets across several regions.