ഈ തണുപ്പ് കാലത്ത് അമിതമായി ചായയോ കാപ്പിയോ കുടിക്കുന്നവരാണോ നിങ്ങൾ, സന്ധിവേദന ഓടിയെത്തും, പേശികൾക്ക് ശക്തി കുറയും

ഈ തണുപ്പ് കാലത്ത് അമിതമായി ചായയോ കാപ്പിയോ കുടിക്കുന്നവരാണോ നിങ്ങൾ, സന്ധിവേദന ഓടിയെത്തും, പേശികൾക്ക് ശക്തി കുറയും

നവംബർ, ഡിസംബർ, ജനുവരി മാസങ്ങൾ തണുപ്പു കാലമാണല്ലോ. ഈ തണുപ്പ് കാലത്ത് ഒരു ചൂടുള്ള ചായ പലർക്കും നിർബന്ധമാണ്. സത്യത്തിൽ ദൈനംദിന ജീവിതത്തിൽ നിന്ന് ചായയയും കാപ്പിയും ഒഴിവാക്കാൻ കഴിയാത്തവരാണ് നമ്മളിൽ പലരും. ചായ പലർക്കും ഒരു ലഹരിയാണ്. തണുപ്പായാലുള്ള അവസ്ഥ പറയേണ്ടല്ലോ. തണുപ്പിനെ ചെറുക്കാൻ ദിവസം മുഴുവൻ ഒന്നിലധികം കപ്പുകൾ ചായ കുടിക്കുന്നവരും ഉണ്ട്. എന്നിരുന്നാലും ഈ ശീലം അത്ര നല്ലതല്ല എന്നാണ് ആരോഗ്യ വിദഗ്ദർ പറയുന്നത്. 

ചായകുടിക്കുന്നവർ ഇക്കാര്യങ്ങൾ ശ്രദ്ധിക്കുക

ശൈത്യകാലത്ത് ചായയും കാപ്പിയും അമിതമായി കഴിക്കുന്നത് നിർജ്ജലീകരണത്തിന് കാരണമാവുകയും സന്ധികളുടെ കാഠിന്യം വഷളാക്കുകയും ചെയ്യുന്നു. തണുപ്പ് കാലത്ത് ദാഹം സ്വാഭാവികമായും കുറയുന്നു. അതുകൊണ്ട് വെള്ളം കുടിക്കുന്നത് കുറയുന്നു. അതേസമയം, തണുപ്പിൽ നിന്ന് ആശ്വാസം നേടാൻ പലരും ചായയും കാപ്പിയും ശീലമാക്കുന്നത് വർദ്ധിക്കുന്നതായി വിദഗ്ദർ ചൂണ്ടികാട്ടുന്നു. 

ഇത്തരത്തിൽ കഫീൻ അമിതമായി എത്തുന്നത് പേശികളുടെ ആരോ​ഗ്യത്തെ ബാധിക്കാം. തരുണാസ്ഥിക്ക് നേരിട്ട് കേടുവരുത്തുന്നില്ലെങ്കിലും, വെള്ളം കുടിക്കുന്നത് കുറയ്ക്കുന്നതിനൊപ്പം ഇത് സന്ധി കലകളിലെ വരൾച്ച വർദ്ധിപ്പിക്കും. നിലവിലുള്ള ആർത്രൈറ്റിസ്, ലിഗമെന്റ് പരിക്കുകൾ അല്ലെങ്കിൽ പേശി ബലഹീനത എന്നിവയുള്ള ആളുകൾക്ക് ഇത് പ്രശ്നമാകും. തണുത്ത താപനില സ്വാഭാവികമായും സന്ധികളുടെ ചലനത്തെ ബാധിക്കുന്നു.

ഏക പോംവഴി ഇതു മാത്രം

ഓരോ കപ്പ് ചായയോ കാപ്പിയോ കുടിക്കുമ്പോഴും ദ്രാവക സന്തുലിതാവസ്ഥ നിലനിർത്താൻ ഒരു ഗ്ലാസ് വെള്ളം കുടിക്കാൻ ശ്രമിക്കുക. പുറത്ത് പോകുമ്പോൾ ചായയ്ക്ക് പകരം വെള്ളം കുടിക്കുക. ശൈത്യകാലത്ത് ദാഹം തോന്നുന്നവർക്ക് ഇടയ്ക്കിടെ ഹെർബൽ ടീകളോ കഫീൻ അടങ്ങാത്ത പാനീയങ്ങളോ കുടിക്കാം. അതേസമയം ദൈനംദിന ജീവിതത്തിൽ നിന്ന് ചായയോ കാപ്പിയോ പൂർണമായി ഒഴിവാക്കുക എന്നല്ല ആരോഗ്യ വിദഗ്ദർ ചൂണ്ടികാട്ടുന്നത്. ഇവ അമിതമായി കുടിക്കാതെ നോക്കുകയാണ് വേണ്ടത്.

English Summary : Excessive caffeine can impact muscle health, increasing joint dryness and complicating conditions like arthritis. Learn how to manage your intake effectively.