എണ്ണി തുടങ്ങാം മഴ ദിനങ്ങൾക്കായി, മെയ് രണ്ടാം വാരം ന്യൂനമർദ്ദ സാധ്യതയും

കേരളത്തിൽ വോട്ടെണ്ണൽ ദിനത്തിൽ ഉച്ചക്കുശേഷം ഇടിയോടുകൂടെ മഴ സാധ്യത. വിജയാഹ്ലാദ പ്രകടനങ്ങൾ ചിലയിടങ്ങളിലെങ്കിലും മഴയിൽ കുതിരും. ഇന്ന് ഉച്ചയ്ക്ക് ശേഷം തെക്കൻ കേരളത്തിലാണ് ഇടിയോടെ മഴ സാധ്യതയുള്ളത്. രാത്രി വൈകി വടക്കൻ കേരളത്തിലും മഴ സാധ്യതയുണ്ട്. കോഴിക്കോട് നഗരത്തിലും മലപ്പുറം ജില്ലയിലും മഴ ലഭിക്കാൻ സാധ്യത.

ഈ ആഴ്ച അവസാനത്തോടെ കേരളത്തിൽ മഴ നൽകുന്ന രീതിയിൽ ന്യൂനമർദ്ദ സാധ്യതയും നില നിൽക്കുന്നു. ബംഗാൾ ഉൾക്കടലിൽ ന്യൂനമർദ്ദം രൂപപ്പെട്ട് അറബിക്കടലിലേക്ക് നീങ്ങാനാണ് സാധ്യത. ഈ ന്യൂനമർദ്ദം കേരളത്തിൽ വേനൽ മഴ നൽകും. മെയ് 8 മുതൽ 13 വരെയുള്ള തീയതികളിൽ കേരളത്തിൽ മഴ ലഭിക്കാനാണ് സാധ്യത. ഈ സമയം കടലിൽ ചക്രവാത ചുഴി (cyclonic circulation) രൂപപ്പെടാൻ സാധ്യതയുണ്ട്. മെയ് 15 ഓടെ ന്യൂനമർദ്ദമായി മാറി ഒമാൻ തീരം ലക്ഷ്യമാക്കി നീങ്ങിയേക്കും .

മെയ് മാസം രണ്ടാം വാരത്തിലേക്ക് കടക്കുമ്പോൾ തന്നെ കഴിഞ്ഞമാസം അനുഭവിച്ച കൊടുംചൂടിന് ആശ്വാസമാകുന്ന രീതിയിലുള്ള മഴ കേരളത്തിൽ വ്യാപകമായി ലഭിക്കും. മെയ് രണ്ടാം വാരത്തിലും മൂന്നാം വാരത്തിലും നാലാമത്തെ ആഴ്ചയിലും സാധാരണയേക്കാൾ കൂടുതൽ മഴ പ്രതീക്ഷിക്കാം.

എൽനിനോ സാധ്യത ഉള്ളതുകൊണ്ട് കർഷകർക്ക് വളമിടുകയും മറ്റും ജൂൺ ആദ്യം തന്നെ ചെയ്യുന്നതായിരിക്കും നല്ലത്. കർക്കിടകത്തിലേക്ക് ഇത്തരം കൃഷിപ്പണികൾ മാറ്റിവയ്ക്കരുത്. ആ സമയം മഴ കുറയാനുള്ള സാധ്യത വളരെ കൂടുതലാണ്. ജൂലൈ മുതൽ El Nino എഫക്ട് കണ്ടു തുടങ്ങാം.

ജൂണിൽ സാധാരണ പോലെ മഴയുണ്ടാകും എന്നാണ് പ്രതീക്ഷ. മെയ് അവസാനം തന്നെ പ്രീ മൺസൂൺ മഴ ശക്തിപ്പെടും.

ഇതനുസരിച്ച് കർഷകർക്ക് കാര്യങ്ങൾ പ്ലാൻ ചെയ്യാം. പുതിയ ന്യൂനമർദ്ദത്തിനൊപ്പം ആഗോള പാത്തി എന്നറിയപ്പെടുന്ന (MJO) സാധ്യതയും ഉള്ളതിനാൽ മഴ ശക്തിപ്പെട്ടേക്കും . വടക്കൻ കേരളത്തിൽ ഉൾപ്പെടെ ശക്തമായ മഴ ലഭിക്കാനാണ് സാധ്യത.

കൂടുതൽ വിവരങ്ങൾ അറിയാൻ Metbeat News ഫേസ്ബുക്ക് ചാനൽ Follow ചെയ്യുക.

English Summary : May 8–13: A low-pressure system is expected to form in the Bay of Bengal and move towards the Arabian Sea, bringing widespread summer rains to Kerala.