Kerala UV Index Alert 10/03/26 : കേരളത്തിൽ ഉയർന്ന അൾട്രാവയലറ്റ് സൂചിക, ഓറഞ്ച് അലർട്ട്, ജാഗ്രതാ നിർദേശം

സംസ്ഥാനത്ത് വേനൽച്ചൂട് ശക്തമാകുന്നതിനിടെ വിവിധ ജില്ലകളിൽ അൾട്രാവയലറ്റ് (UV) കിരണങ്ങളുടെ തീവ്രത ഉയർന്ന നിലയിൽ തുടരുന്നതായി മുന്നറിയിപ്പ്. ചില ജില്ലകളിൽ മിതമായതിൽ നിന്ന് ഓറഞ്ച് അലർട്ട് വരെ UV നില രേഖപ്പെടുത്തിയിട്ടുണ്ട്.

വിവരങ്ങൾ പ്രകാരം ഇടുക്കി(മൂന്നാർ)ജില്ലയിൽ UV സൂചിക 8 ആയി രേഖപ്പെടുത്തിയതോടെ ഓറഞ്ച് അലർട്ട് പ്രഖ്യാപിച്ചിട്ടുണ്ട്. ഇത് ആരോഗ്യത്തിന് കൂടുതൽ ബാധകമായ നിലയാണെന്ന് അധികൃതർ അറിയിച്ചു.

അതേസമയം കോട്ടയം, കാസർഗോഡ്, പത്തനംതിട്ട, പാലക്കാട്, വയനാട് ജില്ലകളിൽ UV സൂചിക 6 ആയി രേഖപ്പെടുത്തിയിട്ടുണ്ട്. ഈ ജില്ലകളിൽ മഞ്ഞ അലർട്ട് പ്രഖ്യാപിച്ചിരിക്കുകയാണ്. ഈ നിലയിൽ നേരിട്ട് സൂര്യപ്രകാശത്തിൽ കൂടുതൽ സമയം നിൽക്കുന്നത് ആരോഗ്യപ്രശ്നങ്ങൾക്ക് കാരണമാകാമെന്ന് മുന്നറിയിപ്പുണ്ട്.

ഇതിനൊപ്പം ആലപ്പുഴ, എറണാകുളം, തൃശൂർ, മലപ്പുറം, കോഴിക്കോട് ജില്ലകളിൽ UV സൂചിക 5 ആയി രേഖപ്പെടുത്തിയപ്പോൾ തിരുവനന്തപുരം, കണ്ണൂർ, കാസർഗോഡ് തുടങ്ങിയ ചില പ്രദേശങ്ങളിൽ സൂചിക 4 നിലവാരത്തിലാണ്.

അൾട്രാവയലറ്റ് സൂചിക 6 മുതൽ 7 വരെ ആയാൽ മഞ്ഞ അലർട്ടും 8 മുതൽ 10 വരെ ആയാൽ ഓറഞ്ച് അലർട്ടും പ്രഖ്യാപിക്കാറുണ്ട്. ഈ സാഹചര്യത്തിൽ സൂര്യപ്രകാശം നേരിട്ട് ഏൽക്കുന്നത് പരമാവധി ഒഴിവാക്കുകയും പുറത്ത് പോകുമ്പോൾ സംരക്ഷണ നടപടികൾ സ്വീകരിക്കുകയും ചെയ്യണമെന്ന് വിദഗ്ധർ നിർദേശിക്കുന്നു.

പ്രത്യേകിച്ച് ഉച്ച സമയങ്ങളിൽ സൂര്യപ്രകാശം ശക്തമായതിനാൽ പുറത്തിറങ്ങുമ്പോൾ തൊപ്പി, കുട, സൺഗ്ലാസ് എന്നിവ ഉപയോഗിക്കണമെന്നും ധാരാളം വെള്ളം കുടിക്കണമെന്നും അധികൃതർ നിർദേശിച്ചു. കുട്ടികൾ, വയോധികർ, പുറത്ത് ജോലി ചെയ്യുന്നവർ എന്നിവർ കൂടുതൽ ജാഗ്രത പാലിക്കണമെന്നും മുന്നറിയിപ്പുണ്ട്.

സംസ്ഥാനത്ത് നിലവിൽ ചൂട് കൂടുന്ന സാഹചര്യത്തിൽ UV കിരണങ്ങളുടെ ദോഷഫലങ്ങളിൽ നിന്ന് സംരക്ഷണം ഉറപ്പാക്കാൻ പൊതുജനങ്ങൾ മുൻകരുതൽ സ്വീകരിക്കണമെന്ന് ദുരന്തനിവാരണ അതോറിറ്റിയും കാലാവസ്ഥാ വിദഗ്ധരും അറിയിച്ചു.

English Summary : As summer intensifies across Kerala, authorities have issued a stern warning regarding rising Ultra Violet (UV) radiation levels. A high UV Index has been recorded across several districts, prompting the Disaster Management Authority to issue safety protocols to prevent heat-related health issues.