Kerala, Tamilnadu Weather 03/12/25 : Cyclone Ditwah ന്യൂനമർദ്ദമായി പടിഞ്ഞാറേക്ക്; കേരളത്തിലും ഇന്ന് മഴ സാധ്യത

വടക്കൻ തമിഴ്നാട് തീരത്ത് ദുർബലമായി നിലകൊള്ളുന്ന ഡിറ്റ് വ ചുഴലിക്കാറ്റ് ശക്തി കൂടിയ ന്യൂനമർദ്ദമായി (well marked low pressure - WML) തുടരുന്നു. വടക്കൻ തമിഴ്നാട് പുതുച്ചേരി തീരത്താണ് ഇന്ന് പുലർച്ചെ 5 മണിക്കുള്ള ഉപഗ്രഹ ചിത്ര പ്രകാരം WML തുടരുന്നത്. ഇത് കരകയറി പടിഞ്ഞാറ് പടിഞ്ഞാറ് ദിശയിൽ സഞ്ചരിക്കാൻ സാധ്യതയുള്ളതിനാൽ കേരളത്തിൽ ഉൾപ്പെടെ ഇന്ന് മൂടിക്കെട്ടിയ അന്തരീക്ഷവും ഒറ്റപ്പെട്ട മഴയും ലഭിക്കുമെന്ന് Metbeat Weather നിരീക്ഷിക്കുന്നു.

വടക്കൻ കേരളം, വടക്കൻ തമിഴ്നാട്, തെക്ക് ഉൾനാടൻ കർണാടക, തീരദേശ ആന്ധ്രപ്രദേശ് എന്നിവിടങ്ങളിലാണ് ഇന്ന് കൂടുതൽ മഴ സാധ്യത. കേരളത്തിൻ്റെ മറ്റു ഭാഗങ്ങളിലും മേഘാവൃതമായ അന്തരീക്ഷവും ഒറ്റപ്പെട്ട മഴയും ലഭിക്കും. ഇന്ന് രാവിലെ വടക്കൻ ജില്ലകളിൽ വിവിധ പ്രദേശങ്ങളിൽ മഴ ലഭിച്ചു. ചിലയിടങ്ങളിൽ ഇടിമുഴക്കവും ഉണ്ടായി.

കേരളത്തിൽ ഏഴ് ജില്ലകളിൽ മഞ്ഞ അലർട്ട്

കേരളത്തിലെ വിവിധ ജില്ലകളിൽ മഴ സാധ്യതയെ തുടർന്ന് കേന്ദ്ര കാലാവസ്ഥാ വകുപ്പ് മഞ്ഞ അലർട്ട് പുറപ്പെടുവിച്ചു. തിരുവനന്തപുരം, കൊല്ലം പത്തനംതിട്ട, കോട്ടയം, ഇടുക്കി, പാലക്കാട്, മലപ്പുറം ജില്ലകളിലാണ് ഇന്ന് മഞ്ഞ അലർട്ട് പ്രഖ്യാപിച്ചത്.

മത്സ്യബന്ധന വിലക്കില്ല

കേരളം - കർണാടക - ലക്ഷദ്വീപ് തീരങ്ങളിൽ ഇന്ന് മത്സ്യബന്ധനത്തിന് വിലക്കില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു.

തുലാ മഴ തിരിച്ചെത്തും

ഡിറ്റ് വ ചുഴലിക്കാറ്റ് ദുർബലമായതോടെ കിഴക്കൻ കാറ്റ് പഴയ രീതിയിലേക്ക് തിരിച്ചെത്തുകയും ശക്തിപ്പെടുകയും ചെയ്യുന്നുണ്ട്. ഇത് കേരളത്തിലും തമിഴ്നാട്ടിലും ഇടിയോടുകൂടെയുള്ള തുലാവർഷമഴയ്ക്ക് കാരണമാകും. അതിനാൽ കേരളത്തിൽ ഇന്ന് മുതൽ കിഴക്കൻ മേഖലകളിൽ വൈകീട്ട് ഇടിയോടുകൂടിയുള്ള മഴ സാധ്യത നിലനിൽക്കുന്നു.

തമിഴ്നാട്ടിൽ ശക്തമായ മഴ തുടരുന്നു

തമിഴ്നാട്ടിലും തീരദേശ ആന്ധ്രപ്രദേശിലും ഇന്ന് ശക്തമായ മഴ ലഭിക്കും. തുടർന്നുള്ള മൂന്നുദിവസം വടക്കൻ കേരളത്തിൽ ഇടിയോടു കൂടെ മഴ ലഭിക്കാൻ സാധ്യത. മധ്യകേരളത്തിലും തെക്കൻ ജില്ലകളിലും കിഴക്കൻ മേഖലകളിൽ ശക്തമായ മഴയും കാറ്റും വരുംദിവസങ്ങളിലും റിപ്പോർട്ട് ചെയ്യാനും സാധ്യതയുണ്ട്.

തമിഴ്നാട്ടിൽ വിദ്യാഭ്യാസ സ്ഥാപനങ്ങൾക്ക് അവധി

തമിഴ്നാട്ടിൽ ഡിറ്റ്‌വ ചുഴലിക്കാറ്റ് ശക്തി കൂടിയ ന്യൂനമർദമായി തുടരുന്നതിന്നാൽ തീരദേശ മേഖലയിലും മലയോര ജില്ലകളിലും ഇടവിട്ട് മഴയ്ക്ക് സാധ്യതയെന്ന് കാലാവസ്ഥാ നിരീക്ഷണ കേന്ദ്രം. ഇന്ന് നീലഗിരി, ഈറോഡ്, കോയമ്പത്തൂർ ജില്ലകളിൽ ഓറഞ്ച് അലർട്ടും എട്ട് ജില്ലകളിൽ യെല്ലോ അലർട്ടും പ്രഖ്യാപിച്ചു.

കനത്ത മഴ ഉണ്ടാകാനുള്ള സാഹചര്യം കണക്കിലെടുത്ത് ചെങ്കൽ പേട്ട് ജില്ലയിലെയും പുതുച്ചേരിയിലെയും സ്കൂളുകൾക്ക് മാത്രം അവധി പ്രഖ്യാപിച്ചു. തീരദേശമേഖലകളിൽ കാറ്റിനും സാധ്യതയുണ്ട്.

ചെന്നൈയിൽ വെള്ളക്കെട്ട് ഒഴിവായി

മോശം കാലാവസ്ഥയെ തുടർന്ന് ചെന്നൈ വിമാനത്താവളത്തിൽ നിന്നുള്ള ആറ് വിമാനങ്ങൾ ഇന്നലെ റദ്ദാക്കിയിരുന്നു. മഴയെ തുടർന്ന് തമിഴ്നാട്ടിൽ ഇതുവരെ നാല് പേരാണ് മരിച്ചത്. ചെന്നൈ നഗരത്തിലെ ഭൂരിഭാഗം ഇടങ്ങളിലെയും വെള്ളക്കെട്ട് ഒഴിവായിട്ടുണ്ട്.

Photo Credit : Anoop Shoranur

English Summary : Stay updated on Kerala and Tamil Nadu weather as Cyclone Ditwah moves westward. Expect rain today in Kerala. Get the latest forecasts and alerts here.