യുഎഇയിൽ അൽ ശബ്‌ത്' സീസൺ, താപനില കുത്തനെ കുറഞ്ഞു, ധാരാളം വെള്ളം കുടിക്കുക, ജാഗ്രതാ നിർദ്ദേശവുമായി അധികൃതർ 

യുഎഇയിൽ അൽ ശബ്‌ത്' സീസൺ, താപനില കുത്തനെ കുറഞ്ഞു, ധാരാളം വെള്ളം കുടിക്കുക, ജാഗ്രതാ നിർദ്ദേശവുമായി അധികൃതർ 

യുഎഇയിൽ ഏറ്റവും തണുപ്പുള്ള 'അൽ ശബ്‌ത്' സീസൺ ആരംഭിച്ചു കഴിഞ്ഞു. ജനുവരി 15 മുതൽ ഫെബ്രുവരി 10 വരെ നീണ്ടുനിൽക്കുന്ന ഈ കാലയളവിൽ താപനില കുത്തനെ കുറയുന്നതിനാൽ താമസക്കാർ അതീവ ജാഗ്രത പാലിക്കണമെന്ന് ആരോഗ്യ വിദഗ്ധർ മുന്നറിയിപ്പ് നൽകിയിരിക്കുകയാണ്. കാരണം ഏറ്റവും കൂടുതൽ തണുപ്പാണ് ഈ സീസണിൽ അനുഭവപ്പെടുക. പ്രായമായവർ, കൊച്ചുകുട്ടികൾ, ഗർഭിണികൾ, വിട്ടുമാറാത്ത രോഗങ്ങളുള്ളവർ എന്നിവർ ഈ കാലാവസ്ഥയെ കൂടുതൽ കരുതണമെന്നാണ് മുന്നറിയിപ്പ്.  തണുത്ത കാറ്റും താപനിലയിലെ പെട്ടെന്നുള്ള മാറ്റവും കാരണം ശ്വാസകോശ സംബന്ധമായ അസുഖങ്ങൾക്കും പനിക്കും ഈ കാലാവസ്ഥ കാരണമായേക്കും.

വസ്‌ത്രങ്ങളിൽ മാറ്റം വരുത്തുക, ധാരാളം വെള്ളം കുടിക്കുക

ശരീരതാപം നിലനിർത്താൻ  കട്ടിയുള്ള ഒരു വസ്ത്രത്തിന് പകരം ഒന്നിലധികം ലെയറുകളായി വസ്ത്രം ധരിക്കുക. പൊതുജനങ്ങൾ തല, കഴുത്ത്, കൈകാലുകൾ എന്നിവ മറയ്ക്കുന്ന തരത്തിൽ വസ്ത്രം ധരിക്കാൻ ശ്രദ്ധിക്കണമെന്നും അധികൃതർ വ്യക്തമാക്കി. അതേസമയം തണുപ്പുകാലത്ത് ദാഹം കുറവാണെങ്കിലും ധാരാളം വെള്ളം കുടിക്കണമെന്നും ചൂടുള്ള പാനീയങ്ങളും പോഷകസമൃദ്ധമായ ഭക്ഷണവും ശീലമാക്കണമെന്നും നിർദേശമുണ്ട്. കൂടാതെ അതിരാവിലെയും വൈകുന്നേരവും തണുപ്പ് കൂടുതലായതിനാൽ ഈ സമയങ്ങളിൽ ഔട്ട്ഡോർ വ്യായാമങ്ങൾ ഒഴിവാക്കുക.

മാസ്ക് ധരിക്കുക

പനി, ജലദോഷം എന്നിവ പടരാൻ സാധ്യതയുള്ളതിനാൽ കൈകൾ ഇടയ്ക്കിടെ കഴുകുകയും തിരക്കേറിയ സ്ഥലങ്ങളിൽ മാസ്ക് ധരിക്കുകയും ചെയ്യുക. കൂടാതെ സ്കൂളിൽ പോകുന്ന കുട്ടികൾ നിർബന്ധമായും ജാക്കറ്റുകളും സോക്സുകളും ധരിക്കണമെന്നും സ്കൂൾ ബസുകളിലെ എസി നിയന്ത്രിക്കാനും തണുത്ത പാനീയങ്ങൾ ഒഴിവാക്കാനും രക്ഷിതാക്കൾ ശ്രദ്ധിക്കണമെന്നും കടുത്ത നിർദ്ദേശം നൽകിയിരിക്കുകയാണ് അധികൃതർ. 

അൽ ശബ്‌ത് കാലയളവിൽ കനത്ത മൂടൽമഞ്ഞിനും റോഡുകളിൽ വഴുക്കലിനും സാധ്യതയുള്ളതിനാൽ വാഹനമോടിക്കുന്നവർ വേഗത കുറയ്ക്കണമെന്നും ഹെഡ്‌ലൈറ്റുകൾ കൃത്യമായി ഉപയോഗിക്കണമെന്നും അറിയിച്ചു.

English Summary : To maintain body heat, wear multiple layers of clothing instead of one thick layer. The public should also be careful to wear clothing that covers their head, neck, and limbs, officials said.