കാലവർഷം കേരളത്തിലേക്ക് പ്രവേശിക്കാൻ തയ്യാറെടുക്കുന്നു, ജൂൺ നാലിനകം എത്തും

തെക്കുപടിഞ്ഞാറൻ മൺസൂൺ ((കാലവർഷം) കേരളത്തിൽ പ്രവേശിക്കാനുളള ഒരുക്കങ്ങൾ തുടങ്ങി. അറബിക്കടലിൽ ഏതാനും ദിവസങ്ങൾക്ക് മുമ്പ് എത്തി നിൽക്കുന്ന കാലവർഷം ഇന്നലെ ലക്ഷദ്വീപിന്റെ കൂടുതൽ മേഖലകളിലേക്ക് കൂടി വ്യാപിച്ചു. കേരളത്തിലേക്ക് കര കയറാൻ കാറ്റിന്റെ ശക്തി ഇപ്പോഴും കുറവാണ്. കേരളതീരത്ത് എത്തുമ്പോൾ കാലവർഷക്കാറ്റ് ശക്തി കുറയുകയും ഏതാനും മേഘങ്ങൾ കരകയറുകയും ചെയ്യുന്ന സ്ഥിതിയാണ് ഇപ്പോൾ ദൃശ്യമാകുന്നത്.

ഇക്കാരണത്താൽ കേരളത്തിൻറെ മധ്യഭാഗങ്ങളിലും തെക്കൻ ഭാഗങ്ങളിലും കാലവർഷമേഘങ്ങൾ കരകയറി ഒറ്റപ്പെട്ട മഴ പെയ്യുന്നുണ്ട്. എന്നാൽ വടക്കൻ കേരളം ഇപ്പോഴും വേനൽക്കാലത്തിന്റെ അന്തരീക്ഷ സ്ഥിതിയിൽ ആണുള്ളത്. ആകാശത്ത് മേഘങ്ങൾ കാണുന്നുണ്ടെങ്കിലും അവ പെയ്യിക്കാൻ മാത്രം ശക്തിയുള്ള കാറ്റ് ഉണ്ടാകുന്നില്ല.

അതിനാൽ കാർമേഘങ്ങൾ വടക്കൻ കേരളത്തിലെ വിവിധ പ്രദേശങ്ങളിൽ കാണാൻ കഴിയുമെങ്കിലും മഴ ലഭിക്കുന്നില്ല. ഈ സാഹചര്യത്തിന് ജൂൺ 3 ന് മാറ്റം വരും. കേന്ദ്ര കാലാവസ്ഥാവകുപ്പിന്റെ കാലവർഷം കേരളത്തിൽ എത്തിയതായുള്ള സ്ഥിരീകരണം (monsoon onset) ജൂൺ 3 നോ നാലിനോ ഉണ്ടായേക്കും .

അതിനുമുമ്പ് കേരളത്തിൽ വിവിധ പ്രദേശങ്ങളിൽ മഴ മാനദണ്ഡം പൂർത്തിയാക്കാൻ കഴിയും. കാറ്റിന്റെ മാനദണ്ഡവും ഇതിനകം പൂർത്തിയാകും എന്നാണ് പ്രതീക്ഷിക്കുന്നത്. അടുത്ത അഞ്ചു ദിവസത്തിനകം കേരളത്തിൻ്റെ വിവിധ ഭാഗങ്ങളിൽ കാലവർഷം എത്തും എന്നാണ് കാലാവസ്ഥാ വകുപ്പ് പറയുന്നത്.

എന്നാൽ മഴയെത്തിയശേഷം വീണ്ടും മഴ ദുർബലമാകാനുള്ള സാധ്യതയും തള്ളിക്കളയാൻ കഴിയില്ല. വടക്കൻ ജില്ലകളിൽ ഉൾപ്പെടെ ഇന്ന് രാവിലെ മുതൽ വെയിൽ അനുഭവപ്പെടുന്നുണ്ട്. രാത്രി താപനിലയിൽ മാറ്റം ഉണ്ടെങ്കിലും പകൽ താപനില ഉയർന്നുനിൽക്കുന്നു. ഒറ്റപ്പെട്ട മഴയും ലഭിക്കുന്നുണ്ട്.

English Summary : Southwest Monsoon Prepares to Enter Kerala; Expected by June 4 . The southwest monsoon is gearing up to make landfall in Kerala, having already advanced further into the Lakshadweep region. While monsoon clouds are moving into central and southern Kerala