കാണാതായ സജിതയുടെ കുടുംബത്തെ സന്ദർശിച്ച് മുഖ്യമന്ത്രി, റീൽസു കണ്ട് പോവേണ്ട കടുത്ത നിയന്ത്രണം, ദുരന്തനിവാരണ മാതൃക നടപ്പാക്കും

മലവെള്ളപ്പാച്ചിലിൽ അഞ്ച് പേർ മരിച്ച മലപ്പുറം ചോക്കാട് ടി.കെ നഗർ സന്ദർശിച്ച് മുഖ്യമന്ത്രി വി.ഡി. സതീശൻ. അപകടത്തിൽ കാണാതായ സജിതയുടെ വീട്ടിലെത്തിയ മുഖ്യമന്ത്രി കുടുംബാംഗങ്ങളെ ആശ്വസിപ്പിച്ചു. മന്ത്രി പി.കെ. കുഞ്ഞാലിക്കുട്ടി, സാദിഖലി തങ്ങൾ എന്നിവരും മുഖ്യമന്ത്രിക്കൊപ്പമുണ്ടായിരുന്നു. അപകടസ്ഥലവും മുഖ്യമന്ത്രി സന്ദർശിച്ചു.

ആവശ്യമായ എല്ലാ സഹായവും സർക്കാർ നടപ്പാക്കുമെന്നും കുടുംബങ്ങൾക്ക് നഷ്ടപരിഹാരം ഉൾപ്പെടെയുള്ള കാര്യങ്ങളിൽ അടുത്ത മന്ത്രിസഭാ യോഗത്തിന് ശേഷം അന്തിമ തീരുമാനമെടുക്കുമെന്നും മുഖ്യമന്ത്രി അറിയിച്ചു. കാണാതായ സജിതയ്ക്കായുള്ള തിരച്ചിൽ അവസാനിപ്പിക്കില്ലെന്നും, തെരച്ചിൽ തുടരുമെന്നും മുഖ്യമന്ത്രി കൂട്ടിച്ചേർത്തു.

കാണാതായ സജിതയ്ക്കായുള്ള തിരച്ചിൽ എൻ.ഡി.ആർ.എഫ്, അഗ്നിരക്ഷാസേന, പൊലീസ്, ദുരന്തനിവാരണ അതോറിറ്റി എന്നിവരുടെ നേതൃത്വത്തിൽ വൈകീട്ടുവരെ തുടർന്നിരുന്നു.
അനൗദ്യോഗിക വിനോദസഞ്ചാര കേന്ദ്രങ്ങളിൽ നിയന്ത്രണം

സുരക്ഷാ നിയന്ത്രണങ്ങൾ കർശനമാക്കും

റീൽസുകളിലൂടെ പ്രചാരം നേടി പ്രകൃതി സൗന്ദര്യമാർന്ന സ്ഥലങ്ങൾ ആസ്വദിക്കാൻ ആളുകൾ കൂട്ടമായി എത്തുന്ന അനൗദ്യോഗിക വിനോദസഞ്ചാര കേന്ദ്രങ്ങളിൽ സുരക്ഷാ നിയന്ത്രണങ്ങൾ കർശനമാക്കുമെന്ന് മുഖ്യമന്ത്രി പറഞ്ഞു. ഇവിടെ അപകടസാധ്യത ഏറെയാണ്. ഇത്തരം പ്രദേശങ്ങളിലേക്കുള്ള ജനങ്ങളുടെ പ്രവേശനത്തിന് നിയന്ത്രണം ഏർപ്പെടുത്തും. അപകടങ്ങൾ ഒഴിവാക്കാൻ അടിയന്തര നടപടികൾ സ്വീകരിക്കുമെന്നും മുഖ്യമന്ത്രി വ്യക്തമാക്കി.

മണ്ണിടിച്ചിൽ പോലുമുണ്ടായില്ല, മുന്നറിയിപ്പില്ലാതെ ഇരച്ചെത്തി

മഴക്കാറോ വലിയ മണ്ണിടിച്ചിലോ സമാനമായ മുന്നറിയിപ്പുകളോ ഇല്ലാതെയാണ് ചോക്കാട്ട് ദുരന്തമുണ്ടായതെന്നും ഇത് സംഭവത്തിന്റെ ഗൗരവം വർധിപ്പിക്കുന്നതാണെന്നും മുഖ്യമന്ത്രി പറഞ്ഞു.

പ്രാദേശിക കാലാവസ്ഥാ നിരീക്ഷണം

കേന്ദ്ര കാലാവസ്ഥാ വകുപ്പിന്റെ മുന്നറിയിപ്പുകൾക്ക് പുറമേ, പ്രാദേശികമായി 20 മുതൽ 25 കിലോമീറ്റർ വരെ ചുറ്റളവിൽ ഉണ്ടാകുന്ന കാലാവസ്ഥാ മാറ്റങ്ങളും അതിതീവ്ര മഴയും മുൻകൂട്ടി പ്രവചിക്കാൻ പ്രത്യേക സംവിധാനം ഒരുക്കും. രാജ്യത്തെ തന്നെ ഏറ്റവും മികച്ച ദുരന്തനിവാരണ മാതൃക സംസ്ഥാനത്ത് നടപ്പാക്കുകയാണ് ലക്ഷ്യമെന്നും മുഖ്യമന്ത്രി പറഞ്ഞു.
കുസാറ്റ് ഉൾപ്പെടെയുള്ള ഗവേഷണ സ്ഥാപനങ്ങൾ, സന്നദ്ധ സംഘടനകൾ, കേന്ദ്ര സർക്കാർ എന്നിവയുടെ സഹകരണം ഇതിനായി പ്രയോജനപ്പെടുത്തും.

കാലാവസ്ഥാ പ്രവചനം കൃത്യമായി മനസ്സിലാക്കുക, വേഗത്തിൽ മുന്നറിയിപ്പ് നൽകുക, അപകടസാധ്യതയുള്ള ഘട്ടത്തിൽ ആളുകളെ ഉടൻ സുരക്ഷിത സ്ഥാനങ്ങളിലേക്ക് മാറ്റുക എന്നിങ്ങനെ മൂന്ന് ഘട്ടങ്ങളിലായുള്ള പ്രവർത്തനങ്ങൾ ഏകോപിപ്പിക്കാൻ കർശനമായ പ്രോട്ടോക്കോൾ തയ്യാറാക്കും.

ജില്ലകൾക്ക് പ്രത്യേക ദുരന്തനിവാരണ സംവിധാനം

ഓരോ ജില്ലയിലെയും ദുരന്തസാധ്യത വ്യത്യസ്തമായതിനാൽ ജില്ലാ അടിസ്ഥാനത്തിൽ പ്രത്യേക ദുരന്തനിവാരണ സംവിധാനം രൂപീകരിക്കേണ്ടതുണ്ടെന്നും മുഖ്യമന്ത്രി പറഞ്ഞു. മുൻകാലങ്ങളെ അപേക്ഷിച്ച് മേഘവിസ്ഫോടനം പോലുള്ള പ്രതിഭാസങ്ങൾ വർധിക്കുന്ന സാഹചര്യത്തിൽ ദുരന്തനിവാരണ പ്രവർത്തനങ്ങൾ കൂടുതൽ ശാസ്ത്രീയവും കാര്യക്ഷമവുമാക്കാനുള്ള നടപടികൾക്ക് സർക്കാർ തുടക്കം കുറിച്ചതായും അദ്ദേഹം വ്യക്തമാക്കി.

English Summary : Kerala Chief Minister visited the Chokkad T.K. Nagar disaster site in Malappuram following a tragic flash flood that claimed five lives. Discover key announcements, including government aid for victims, stricter safety regulations for social media-hyped unofficial tourist spots, and a cutting-edge localized weather forecasting and disaster management protocol.