ഒറ്റ രാത്രി കൊണ്ട് കാട്ടാന ചവിട്ടിയരച്ചത് 600 നേന്ത്രവാഴ,ആർക്കും കാണാനാകില്ല ഈ കാഴ്ച

ദിനംപ്രതി വർദ്ധിച്ചു വരുന്ന കാട്ടാനകളുടെ ആക്രമണത്തിന് മുൻപിൽ ഒന്നും ചെയ്യാൻ കഴിയാതെ അക്ഷമരായി നിൽക്കുകയാണ് കർഷകർ.രാപകലില്ലാതെ അദ്ധ്വാനിച്ച് കൃഷി ചെയ്യുന്ന വിളവുകൾ ഒറ്റരാത്രി കൊണ്ടാണ് കാട്ടാന കൂട്ടം നിലംപരിശാക്കുന്നത്.കഴിഞ്ഞ ദിവസം ഇരിട്ടിയിൽ ഇത്തരം സമാന സംഭവത്തിന് സാക്ഷ്യം വഹിച്ചിരിക്കുകയാണ് കർഷകർ.വിളവെടുക്കാറായ 600 നേന്ത്രവാഴ ഒറ്റരാത്രികൊണ്ട്‌ കാട്ടാനകൾ ചവിട്ടിമെതിച്ചു.മുഴക്കുന്ന് പാലപ്പുഴ കൂടലാട്ടെ കർഷകൻ ബാബു ജോസഫ് ചുണ്ടൻതടത്തിലിന്റെ മാസങ്ങൾ നീണ്ട അദ്ധ്വാനനമാണ് കാട്ടാനകൾ ചവിട്ടിയരച്ചത്.

കാഴ്ച കണ്ട് വനം വകുപ്പ ജീവനക്കാർ ഞെട്ടി.

ശനിയാഴ്ച്ച രാത്രി നടന്ന ഈ സംഭവം കണ്ട് വനംവകുപ്പ് ജീവനക്കാർ പോലും ഞെട്ടിപോയി.എട്ട് ഏക്കറിൽ തീറ്റപ്പുൽക്കൃഷിയും പുഴയോട് ചേർന്ന രണ്ട് ഏക്കറിൽ നേന്ത്രവാഴയും പച്ചക്കറിയുമായിരുന്നു.1600-ഓളം വാഴകളിൽ പകുതിയിലധികവും കുലച്ച് വിളവെടുക്കാൻ പാകത്തിലായിരുന്നു.ശനിയാഴ്ച മൂത്തുപഴുക്കറായ മുപ്പതോളം കുല കൊത്തിയെടുക്കുന്നതിന് ആവശ്യക്കാരൻ കൃഷിയിടത്തിൽ എത്താമെന്ന് ഏറ്റിരുന്നു. ആ കുലയും ആനക്കൂട്ടം നശിപ്പിച്ചു. സാധാരണ കാട്ടാന വാഴ ചവിട്ടിക്കൂട്ടി അതിന്റെ പിണ്ടിതിന്നുകയാണ് പതിവ്. ഇവിടെ മൂത്തുപഴുക്കാറായ കുലതന്നെ ആന തിന്നുവെന്നാണ്‌ സ്ഥലം സന്ദർശിച്ച ഇരിട്ടി സെക്ഷൻ ഫോറസ്റ്റർ സി. സുനിൽകുമാർ പറഞ്ഞത്.

ആനകൂട്ടം എത്തിയത് പാലപ്പുഴ കടന്ന്

ആറളം ഫാമിൽനിന്ന്‌ പാലപ്പുഴ പുഴ കടന്ന് എത്തിയ മൂന്ന്‌ കാട്ടാനകളാണ് വാഴതോട്ടം ചവിട്ടിമെതിച്ചത്. പുന്നാട് സ്വദേശിയുടെ പത്ത് ഏക്കർ പാട്ടത്തിനെടുത്താണ് ബാബു ജോസഫ് കൃഷി നടത്തുന്നത്.അത്യുത്പാദനശേഷിയുള്ളതും വിളവിന്‌ ഒരു വർഷത്തോളം പരിപാലനം ആവശ്യമുള്ളതുമായ സ്വർണമുഖി ഇനത്തിൽപ്പെട്ട നേന്ത്രവാഴകളാണ് നശിപ്പിക്കപ്പെട്ടത്.20 മുതൽ 35 കിലോവരെ തൂക്കം വരുന്ന കുലകളാണ് പിഴുതെറിയപ്പെട്ടത്‌. വായ്പ എടുത്താണ് കൃഷിയിറക്കിയതെന്നും മൂന്ന് ലക്ഷം രൂപയുടെ നഷ്ടം ഉണ്ടായെന്നും ബാബു ജോസഫ് പറഞ്ഞു.ആനകൾ കണികാ ജലസേചനത്തിനായി സ്ഥാപിച്ച പൈപ്പുകളും പൊട്ടിച്ചിട്ടുണ്ട്‌. കൃഷിയിടത്തിൽ നിറയെ ആനകളുടെ കാല്പാടുകളാണ്.

പരിപാലകന് വേതനം നൽകിയില്ല,പരിപാലനം നിലച്ചു

അതേസമയം പുഴകടന്ന് എത്തുന്ന കാട്ടനകളെ പ്രതിരോധിക്കാൻ നാട്ടുകാർ പണമെടുത്ത് തൂക്കുവേലി സ്ഥാപിച്ചിരുന്നു. അതോടെ ആനശല്യവും ഉണ്ടായിരുന്നില്ല. തൂക്കുവേലിയുടെ പരിപാലകന് വനംവകുപ്പ് നൽകിയിരുന്ന വേതനം ആറുമാസത്തിലധികമായി നൽകിയിട്ടില്ല.അതോടെ പരിപാലനം നിലച്ചതാണ്‌ വീണ്ടും ആനയെത്താൻ കാരണമെന്ന്‌ നാട്ടുകാർ കുറ്റപ്പെടുത്തി.

English Summary:Witness the shocking incident that left forest department staff stunned on Saturday night, featuring eight acres of fodder and two acres of banana and vegetables.