കൊടുംചൂടിൽ ആറു കുട്ടികളെ കാറിൽ തനിച്ചാക്കി; മാതാപിതാക്കൾ അറസ്റ്റിൽ

അമേരിക്കയിലെ (USA) കാൻസസ് (Kansas) സംസ്ഥാനത്ത് കൊടുംചൂടിനിടെ ആറു മക്കളെ കാറിൽ തനിച്ചാക്കി ചിക്കൻ വിങ്സ് (Chicken Wings) കഴിക്കാൻ റസ്റ്ററന്റിലേക്ക് പോയ ദമ്പതികൾ അറസ്റ്റിൽ. മൈക്കൽ ക്രൂഗർ (Michael Kruger-53), ഭാര്യ ടിഫനി ക്രൂഗർ (Tiffany Kruger-40) എന്നിവരെയാണ് സലിന (Salina) പൊലീസ് അറസ്റ്റ് ചെയ്തത്.

ഏഴ് മാസം പ്രായമുള്ള രണ്ട് ശിശുക്കൾ, രണ്ടും നാലും അഞ്ചും വയസ്സുള്ള മൂന്ന് കുട്ടികൾ, 13 വയസ്സുകാരൻ എന്നിവരടക്കം ആറു മക്കളെയാണ് ദമ്പതികൾ കാറിൽ തനിച്ചാക്കി റസ്റ്ററന്റിനുള്ളിലേക്ക് പോയതെന്ന് പൊലീസ് അറിയിച്ചു.
ബുധനാഴ്ച ഉച്ചയ്ക്ക് രണ്ടുമണിയോടെയായിരുന്നു സംഭവം. ഒരു ജനൽ മാത്രം അൽപം തുറന്ന നിലയിലായിരുന്ന വാഹനത്തിൽ എയർ കണ്ടിഷൻ (Air Conditioner) പ്രവർത്തിച്ചിരുന്നില്ല. കുട്ടികളെ കാറിൽ ഉപേക്ഷിച്ചെന്ന വിവരത്തെ തുടർന്ന് പൊലീസ് ഉടൻ സ്ഥലത്തെത്തി.

New York Heatwave Alert:പൊള്ളുന്ന ന്യൂയോർക്ക്; എസി 78°F-ൽ ക്രമീകരിക്കൂ; ജനങ്ങളോട് മേയറുടെ അഭ്യർഥന
കഴിഞ്ഞ പത്ത് വർഷത്തിനിടയിൽ ന്യൂയോർക്ക് (New York) അനുഭവിക്കാത്തവിധം അതിശക്തമായ ഉഷ്ണതരംഗം (Heatwave) നഗരത്തെ പൊള്ളിച്ചുകൊണ്ടിരിക്കുകയാണ്.
https://metbeatnews.com/mayor-zohran-mamdani-urges-residents-to-set-ac

20 മുതൽ 30 മിനിറ്റ് വരെ കുട്ടികൾ കാറിൽ

സംഭവസമയത്ത് പുറത്തെ താപനില 97 ഡിഗ്രി ഫാരൻഹീറ്റും (97°F), ഹീറ്റ് ഇൻഡെക്സ് (Heat Index) 100 ഡിഗ്രി ഫാരൻഹീറ്റിന് മുകളിലുമായിരുന്നു. ഏകദേശം 20 മുതൽ 30 മിനിറ്റ് വരെ കുട്ടികൾ കാറിൽ മേൽനോട്ടമില്ലാതെ കഴിഞ്ഞിരുന്നതായി അന്വേഷണത്തിൽ കണ്ടെത്തി. അതേസമയം, സമീപത്തെ വിങ്സ്റ്റോപ്പ് (Wingstop) റസ്റ്ററന്റിനുള്ളിലായിരുന്ന മാതാപിതാക്കളെ പൊലീസ് സംഭവസ്ഥലത്തുനിന്ന് കസ്റ്റഡിയിലെടുത്തു.

കുട്ടികൾ സുരക്ഷിതർ; മാതാപിതാക്കൾക്കെതിരെ ഗുരുതര കുറ്റങ്ങൾ

എമർജൻസി മെഡിക്കൽ സംഘം (Emergency Medical Team) കുട്ടികളെ പരിശോധിച്ച ശേഷം സംരക്ഷണ കസ്റ്റഡിയിലേക്ക് (Protective Custody) മാറ്റി. കുട്ടികൾക്ക് ഗുരുതര ആരോഗ്യപ്രശ്നങ്ങളൊന്നും കണ്ടെത്തിയിട്ടില്ലെന്ന് സലിന പൊലീസ് അറിയിച്ചു.

മൈക്കൽ ക്രൂഗർക്കും ടിഫനി ക്രൂഗർക്കുമെതിരെ കുട്ടികളുടെ ജീവൻ അപകടത്തിലാക്കിയെന്ന കുറ്റം ഉൾപ്പെടെ ഗുരുതര വകുപ്പുകൾ ചുമത്തിയിട്ടുണ്ട്. ഇരുവരെയും സലൈൻ കൗണ്ടി (Saline County) ജയിലിൽ റിമാൻഡ് ചെയ്തിരിക്കുകയാണ്.

വാഹനത്തിനുള്ളിലെ ചൂട് ജീവന് ഭീഷണി

ചൂടുള്ള വാഹനങ്ങളിൽ കുട്ടികളെ തനിച്ചാക്കുന്നത് അതീവ അപകടകരമാണെന്ന് സലിന ഫയർ ഡിപ്പാർട്ട്മെന്റ് (Salina Fire Department) മുന്നറിയിപ്പ് നൽകി. മുതിർന്നവരെ അപേക്ഷിച്ച് കുട്ടികളുടെ ശരീരതാപനില മൂന്നുമുതൽ അഞ്ചിരട്ടി വരെ വേഗത്തിൽ ഉയരുന്നതിനാൽ ഏതാനും മിനിറ്റുകൾക്കുള്ളിൽ തന്നെ വാഹനത്തിനുള്ളിലെ ചൂട് ജീവന് ഭീഷണിയാകുന്ന നിലയിലെത്താമെന്നാണ് അധികൃതരുടെ മുന്നറിയിപ്പ്.

അമേരിക്കൻ നാഷണൽ ഹൈവേ ട്രാഫിക് സേഫ്റ്റി അഡ്മിനിസ്ട്രേഷൻ (National Highway Traffic Safety Administration - NHTSA) പുറത്തുവിട്ട കണക്കുകൾ പ്രകാരം, ചൂടുള്ള വാഹനങ്ങളിൽ കുടുങ്ങുകയോ ഉപേക്ഷിക്കപ്പെടുകയോ ചെയ്യുന്നതിനെ തുടർന്ന് പ്രതിവർഷം ശരാശരി 37 കുട്ടികളാണ് ഹീറ്റ് സ്ട്രോക്ക് (Heat Stroke) മൂലം മരിക്കുന്നത്.

English Summary : Kansas parents Michael and Tiffany Kruger were arrested after leaving six young children locked in a scorching car to eat chicken wings in 97°F heat.