ചൊവ്വാഴ്ച പെയ്ത ശക്തമായ മഴ ചതിച്ചു, കർഷകരുടെ സ്വപ്നങ്ങൾ വെള്ളത്തിലായി
പ്രതീക്ഷിക്കാതെയെത്തിയ മഴ വെല്ലുവിളിയായത് കർഷകർക്കാണ്. ചൊവ്വാഴ്ചയും ബുധനാഴ്ചയുമൊക്കെ ജില്ലയുടെ പലഭാഗത്തും പെയ്ത ശക്തമായ മഴ കർഷകർക്കു വൻ തിരിച്ചടിയായി. മാവും കശുമാവും പൂക്കുന്ന സമയത്തെ മഴ വൻ നഷ്ടമുണ്ടാക്കി. പച്ചക്കറിക്കൃഷിയെയും ദോഷമായി ഈ മഴ ബാധിച്ചു. ഉണക്കാനിട്ട അടയ്ക്ക മഴയിൽ നനഞ്ഞും ലക്ഷങ്ങളുടെ നഷ്ടമുണ്ടായി.
അടയ്ക്കയും, കപ്പയും, മഞ്ഞളും നനഞ്ഞു കുതിർന്നു
ഉണങ്ങാനിട്ട അടയ്ക്ക, മഞ്ഞൾ, വാട്ടുകപ്പ, കാപ്പി തുടങ്ങിയ വിളകൾ മഴയിൽ കുതിർന്നു നശിച്ചു. ഇനി ഇവ സൂക്ഷിച്ചു വയ്ക്കാനും പറ്റില്ല. മഴക്കാലം മാസങ്ങളോളം നീണ്ടതിനാൽ ഈ സീസണിൽ അടയ്ക്ക ഉൽപാദനം പൊതുവേ കുറവാണ്. എന്നാൽ വിപണിയിൽ നല്ല വിലയുമുണ്ട്. അടയ്ക്ക നന്നായി ഉണക്കി സൂക്ഷിക്കാനുള്ള തയാറെടുപ്പ് നടത്തി വരുന്നതിനിടയിലാണ് ഇപ്പോൾ അപ്രതീക്ഷിത മഴ എത്തിയത്. കെട്ടിടങ്ങളുടെ മുകളിലും പറമ്പുകളിലും ഉണങ്ങാനിട്ട അടയ്ക്ക മുഴുവൻ വെള്ളത്തിലായിതോടെ കർഷകരുടെ പ്രതീക്ഷയും അസ്തമിച്ചു.
അതേസമയം വാട്ടുകപ്പയുടെയും മഞ്ഞളിന്റെയും സ്ഥിതി ഇതു തന്നെയാണ്. കാപ്പിക്കുരു പറിച്ചെടുക്കുന്ന സമയത്തു പെയ്ത മഴ കർഷകർക്ക് കനത്ത പ്രഹരമാണുണ്ടാക്കിയത്. മഴ പെയ്തതോടെ കാപ്പിച്ചെടികൾ പൂവിടാനുള്ള സാധ്യതയുണ്ടെന്നാണു കർഷകർ പറയുന്നത്. എന്നാൽ ചൂടു കനക്കുമ്പോൾ ഉണങ്ങും. ഇത് അടുത്ത വർഷം കാപ്പി ഉൽപാദനത്തിൽ കുറവുണ്ടാക്കുമെന്നാണ് കർഷകർ പറയുന്നത്.
പച്ചക്കറി കർഷകരും ദുരിതത്തിൽ
മഴ കൂടുതലായി ബാധിച്ച മറ്റൊരു കൂട്ടരാണ് പച്ചക്കറി കർഷകർ. തൈകളിൽ പൂവിടുകയും കായ്ക്കുകയും ചെയ്യുന്ന സമയമാണിപ്പോൾ. മഴ പെയ്താൽ ഉൽപാദനത്തെ ബാധിക്കും. കൂടാതെ വെള്ളം കെട്ടി നിന്നതിനാൽ തൈകൾ ചീഞ്ഞുപോകുമെന്ന ആശങ്കയുമുണ്ട്. നെൽച്ചെടിക്ക് കതിരുവരുന്ന സമയത്തുള്ള മഴ നെൽക്കർഷകരെയും ആശങ്കയിലാക്കിയിട്ടുണ്ട്. കതിരു വിളയാൻ കൂടുതൽ സമയമെടുത്തേക്കും.
രണ്ടുദിവസത്തെ മഴ കശുമാവിനും ദോഷമായി. രാത്രി മഴയും പകൽ മൂടിക്കെട്ടിയ അന്തരീക്ഷവും പൂക്കൾ വിരിയുന്നതിനു തടസ്സമാണ്. ജനുവരി മുതൽ മേയ് വരെ തുടരുന്ന കശുവണ്ടി സീസണിന്റെ തുടക്കത്തിൽ തന്നെ കാലാവസ്ഥ പ്രതികൂലമായി.
English Summary : Vegetable farmers are another group that has been affected more by the rains. Now is the time for flowering and fruiting in seedlings. If it rains, production will be affected.