വായു മലിനീകരണത്തിന്റെ തോത് ഡൽഹിയിൽ വർധിച്ചു വരുന്നതിനാൽ ജനജീവിതം ദിനംപ്രതി ദുഷ്കരമായികൊണ്ടിരിക്കുകയാണ്. ഈ സാഹചര്യത്തിൽ ക്ലൗഡ് സീഡിങ് വഴി കൃത്രിമ മഴ പെയ്യിക്കാൻ ഒരുങ്ങി സർക്കാർ. ഇതിനായി ഈ വർഷം ഒക്ടോബർ ഒന്നിനും നവംബർ 30നും ഇടയിൽ നഗരത്തിൽ ക്ലൗഡ് സീഡിങ് പരീക്ഷണങ്ങൾ നടത്താൻ ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡി.ജി.സി.എ) അനുമതി നൽകി കഴിഞ്ഞു.

രാജ്യ തലസ്ഥാനത്തെ പുകമഞ്ഞ് നിറഞ്ഞ ശൈത്യകാലത്ത് മലിനീകരണ തോത് കുറക്കുക എന്നതാണ് പദ്ധതി പ്രധാനമായും ലക്ഷ്യം വയ്ക്കുന്നത്. പ്രത്യേകം അംഗീകരിച്ച വിമാനം ഉപയോഗിച്ച് ഐ.ഐ.ടി കാൺപൂരാണ് ഇതിന് നേതൃത്വം നൽകുക. കാലാവസ്ഥ അനുയോജ്യമായാൽ സർക്കാർ പദ്ധതി ആരംഭിക്കുമെന്ന് പരിസ്ഥിതി മന്ത്രി മഞ്ജീന്ദർ സിങ് സിർസ.

'വിമാനങ്ങൾ സജ്ജമായിരിക്കാൻ നിർദ്ദേശം നൽകി കഴിഞ്ഞു. കാലാവസ്ഥയും ശാസ്ത്രീയ മാനദണ്ഡങ്ങളും അനുകൂലമായാലുടൻ, മലിനീകരണത്തിൽനിന്ന് മുക്തി നേടുന്നതിനായി ആദ്യമായി ഡൽഹിയിൽ ക്ലൗഡ് സീഡിങ് പരീക്ഷണങ്ങൾ നടത്തുമെന്നും മന്ത്രി പറഞ്ഞു.

കൃത്രിമ മഴ പെയ്യിക്കുന്നതിനായി ഏകദേശം 3.21 കോടി രൂപ ചെലവാകുമെന്നാണ് പ്രതീക്ഷിക്കുന്നത്. ഓരോ പരീക്ഷണവും 90 മിനിറ്റ് നീണ്ടുനിൽക്കുന്നതായിരിക്കും. വടക്കുപടിഞ്ഞാറൻ, ഔട്ടർ ഡൽഹി എന്നിവിടങ്ങളിലേക്കും കുറഞ്ഞ സുരക്ഷാ വ്യോമമേഖലകളിലുമായി അഞ്ച് വിമാനങ്ങൾ ഇതിനായി സജ്ജീകരിക്കുന്നുണ്ട്.

അംഗീകൃത വിമാനമായ വി.ടി-ഐ.ഐ.ടി, സെസ്ന 206എച്ച്, ഡി.ജി.സി.എ എന്നിവയുടെ മേൽനോട്ടത്തിലാണ് പദ്ധതി നടപ്പിലാക്കുന്നത്. വിഷ്വൽ ഫ്ലൈറ്റ് നിയമങ്ങൾ (വി.എഫ്.ആർ) പ്രകാരം മാത്രം പറക്കുക, എയർ ട്രാഫിക് കൺട്രോൾ (എ.ടി.സി) ക്ലിയറൻസ് നേടുക, എയർമാൻമാർക്കുള്ള നോട്ടീസുകൾക്കായി എയർപോർട്ട് അതോറിറ്റി ഓഫ് ഇന്ത്യയുമായി ഏകോപിപ്പിക്കുക എന്നിവ ഉൾപ്പെടെയുള്ള കർശനമായ സുരക്ഷാ മാർഗനിർദേശങ്ങൾ അനുസരിച്ചായിരിക്കും പ്രവർത്തനങ്ങൾ നടത്തുകയെന്ന് അധികൃതർ .

നിയന്ത്രിത മേഖലകളിലോ നിരോധിത മേഖലകളിലോ പ്രവേശിക്കാൻ വിമാനത്തിന് അനുവാദം ഉണ്ടായിരിക്കില്ല, ആകാശ ഫോട്ടോഗ്രാഫി, വിദേശ ക്രൂ അംഗങ്ങളെ ഉൾപ്പെടുത്തുക തുടങ്ങിയ കാര്യങ്ങൾക്ക് നിരോധനം ഉണ്ടാകും. പൈലറ്റുമാർക്ക് സാധുവായ പ്രൊഫഷനൽ ലൈസൻസുകളും മെഡിക്കൽ ഫിറ്റ്നസ് സർട്ടിഫിക്കറ്റുകളും നിർബന്ധമാക്കിയിട്ടുണ്ട്, കൂടാതെ സമാനമായ പ്രവർത്തനങ്ങളിൽ മുൻ പരിചയവും ഉണ്ടായിരിക്കണം തുടങ്ങിയ കാര്യങ്ങളെല്ലാം മാനദണ്ഡങ്ങളിൽ ഉൾപ്പെടുന്നുണ്ട്.

ഒക്ടോബർ, നവംബർ മാസങ്ങളെയാണ് അനുമതിയിൽ ഉൾപ്പെടുത്തിയിരിക്കുന്നതെങ്കിലും കാലാവസ്ഥയുടെയും ശാസ്ത്രീയ വിലയിരുത്തലുകളെയും ആശ്രയിച്ചായിരിക്കും പരീക്ഷമങ്ങൾ നടത്തുന്നതെന്ന അധികൃതർ വ്യക്തമാക്കുന്നു. കഴിഞ്ഞ ജൂലൈയിൽ നടത്താൻ തീരുമാനിച്ചിരുന്നെങ്കിലും പ്രതികൂല സാഹചര്യങ്ങൾ കാരണം പദ്ധതി മാറ്റിവെക്കേണ്ട സാഹചര്യമായിരുന്നു.

Metbeat news