വാഷിങ്ടണ്‍: എച്ച്1-ബി വിസയ്ക്ക് യു.എസ് ഏര്‍പ്പെടുത്തിയ വന്‍ ഫീസില്‍ ചില വിഭാഗങ്ങള്‍ക്ക് ഇളവ് നല്‍കാന്‍ ട്രംപ് ഭരണകൂടത്തിന്റെ തീരുമാനം. നിലവില്‍ യു.എസില്‍ എച്ച്1-ബി സാധുത വിസയുള്ളവര്‍ വിസ പുതുക്കാന്‍ ട്രംപ് ഭരണകൂടം തീരുമാനിച്ച ഒരു ലക്ഷം ഡോളര്‍ നല്‍കേണ്ടതില്ല. എന്നാല്‍ യു.എസിന് പുറത്തു കഴിയുന്നവരും ഇതുവരെ സാധുത വിസ കൈവശമില്ലാത്തവരും പുതുതായി അപേക്ഷിക്കുമ്പോള്‍ ഒരു ലക്ഷം ഡോളര്‍ ഫീ അടയ്‌ക്കേണ്ടിവരും.

2025 സെപ്റ്റംബര്‍ 21 ന് പുലര്‍ച്ചെ 12.01 ന് മുന്‍പ് സമര്‍പ്പിച്ച അപേക്ഷകള്‍ക്കും ഫീ വര്‍ധന ബാധകമാകില്ലെന്ന് യു.എസ് സിറ്റിസണ്‍ഷിപ്പ് ആന്റ് ഇമിഗ്രേഷന്‍ സര്‍വീസസ് അറിയിച്ചു. ഇന്ത്യന്‍ ടെക്കികള്‍ക്ക് ആശ്വാസമാകുന്നതാണ് തീരുമാനം. ഇപ്പോള്‍ വിസ കൈയിലുള്ളവര്‍ക്ക് യു.എസില്‍ നിന്ന് അകത്തേക്കും പുറത്തേക്കും തടസ്സമില്ലാതെ യാത്ര ചെയ്യാനാകും.

മൂന്നുവര്‍ഷത്തേക്ക് ഇപ്പോള്‍ വിസയുള്ളവര്‍ക്ക് നിരക്ക് വര്‍ധിപ്പിക്കേണ്ടെന്നാണ് തീരുമാനം. എച്ച്1 ബി വിസ പദ്ധതിയുടെ നട്ടെല്ല് ഇന്ത്യയില്‍ നിന്നുള്ള ടെക്കികളാണ്. യു.എസില്‍ 3 ലക്ഷം പേര്‍ ഈ വിസയില്‍ ഇന്ത്യയില്‍ നിന്ന് ജോലി ചെയ്യുന്നുണ്ട്. എച്ച് 1 ബി വിസ നല്‍കപ്പെട്ടവരില്‍ 70 % വും ഇന്ത്യക്കാരാണ്. ലോട്ടറി സിസ്റ്റത്തിലൂടെ 85,000 പേര്‍ക്കാണ് പ്രതിവര്‍ഷം യു.എസ് ഈ വിസ അനുവദിക്കുന്നത്.

കുടിയേറ്റം തടയനാണ് യു.എസ് എച്ച്1 ബി വിസയില്‍ വന്‍ നിരക്ക് വര്‍ധനവ് കൊണ്ടുവന്നത്. 215 നും 5000 ഡോളറിനും ഇടയിലായിരുന്നു നേരത്തെ എച്ച് 1 ബി വിസയുടെ ഫീസ്. ഇതാണ് ഒറ്റയടിക്ക് 100000 ഡോളറാക്കി ഉയര്‍ത്തിയത്. 20 മുതല്‍ 100 മടങ്ങാണ് നിരക്ക് വര്‍ധിപ്പിച്ചത്.

Metbeat news