കേരളം ഇന്നും തണുക്കും രാത്രി, ദക്ഷിണേന്ത്യയില് താപനില ഒറ്റ അക്കത്തിലേക്ക് കുറഞ്ഞു
ഡിസംബര് പകുതിയായപ്പോഴേക്കും കേരളത്തിലും പതിവില്ലാത്ത തണുപ്പ് അനുഭവപ്പെടുകയാണ്. തീരദേശ ജില്ലകളില് സാധാരണ ഈ സമയത്ത് രാത്രി അനുഭവപ്പെടുന്ന പരമാവധി കുറഞ്ഞ താപനില 20 ഡിഗ്രി സെല്ഷ്യസ് ആയിരുന്നെങ്കില് ഇന്നലെ കോഴിക്കോട്, കണ്ണൂര്, മലപ്പുറം, കാസര്കോട് ജില്ലകളിലെ തീരദേശത്ത് താപനില 18 ഡിഗ്രി വരെ താഴ്ന്നു. ഇന്നും താഴ്ന്ന രാത്രി താപനില രേഖപ്പെടുത്തും. ഈ മാസം 17 ന് ഒറ്റപ്പെട്ട മഴ സാധ്യതയുള്ളതിനാല് അന്ന് തണുപ്പ് താല്ക്കാലികമായി കുറയും.
തണുപ്പിന് കാരണം ഉത്തരേന്ത്യന് ശൈത്യതരംഗത്തിന്റെ സ്വാധീനം
തമിഴ്നാട്ടിലും കര്ണാടകയിലും കേരളത്തിലുമാണ് ഉത്തരേന്ത്യന് ശൈത്യതരംഗത്തിന്റെ സ്വാധീനം മൂലം രാത്രിയും പുലര്ച്ചെയും അതിരാവിലെയും തണുപ്പ് അനുഭവപ്പെടുന്നത്. ഡിസംബര് 14 ന് ഊട്ടിയിലെ താപനില 5.6 ഡിഗ്രി സെല്ഷ്യസിലെത്തി. ആന്ധ്രാപ്രദേശിലെ അരാകു താഴ് വരയിലും താപനില 6.3 ഡിഗ്രി സെല്ഷ്യസ് ആണ് കഴിഞ്ഞ ദിവസം രേഖപ്പെടുത്തിയത്.
കേരളത്തില് വയനാട്ടില് താപനില 11 ഡിഗ്രിയിലേക്ക് കുറഞ്ഞു. കോഴിക്കോട് ജില്ലയുടെ കിഴക്കന് മേഖലയില് താപനില 18 ഡിഗ്രിയാണ്.
ഇടുക്കിയിലെ കുണ്ടള ഡാം മേഖലയില് 7.7 ഡിഗ്രി സെല്ഷ്യസ് ആയിരുന്നു താപനില. കര്ണാടകയിലെ ഹാസനില് 8 ഡിഗ്രിയും രേഖപ്പെടുത്തി. മൂന്നാറിലെ താപനില 8.5 ഡിഗ്രി രേഖപ്പെടുത്തി. തമിഴ്നാട്ടിലെ കൂനൂരില് 8.8 ഡിഗ്രി സെല്ഷ്യസ് ആണ് രാത്രി താപനില രേഖപ്പെടുത്തിയത്. വയനാട്ടിലെ കബനിഗിരിയില് 10.4 ഡിഗ്രിയും വാല്പാറൈയില് 10.5 ഡിഗ്രിയും ആയിരുന്നു താപനില.
തെക്കൻ കേരളത്തിലും താപനില ഇനിയും താഴും
തമിഴ്നാടിന്റെ ഉള്നാടന് മേഖലയിലും താപനില 17-18 ഡിഗ്രിയിലാണ് പലയിടത്തും രേഖപ്പെടുത്തിയത്. തെക്കന് കേരളത്തിലും താപനില വരും ദിവസങ്ങളില് താഴാനാണ് സാധ്യത.
English Summary : Experience the chill of North Indian winter in Tamil Nadu, Karnataka, and Kerala. Discover the latest temperature drops, including 5.6°C in Ooty.