തണുത്ത കാലാവസ്ഥയിൽ ചില വാഹനങ്ങൾ ശ്രദ്ധിച്ചില്ലെങ്കിൽ എട്ടിൻ്റെ പണികിട്ടും, പാർക്കിങും പ്രധാനം

തണുത്ത കാലാവസ്ഥയിൽ ചില വാഹനങ്ങൾ ശ്രദ്ധിച്ചില്ലെങ്കിൽ എട്ടിൻ്റെ പണികിട്ടും, പാർക്കിങും പ്രധാനം

തണുപ്പു കാലം വന്നതോടെ അവ പല മേഖലകളിലും വ്യാപിച്ചു എന്നു തന്നെ പറയാം. പ്രകൃതിയേയും മനുഷ്യനേയും ജീവജാലങ്ങളെയൊക്കെ തണുപ്പ് പലരീതിയിൽ ബാധിക്കുന്നുണ്ട്. ചില വാഹനങ്ങൾക്കും തണുപ്പ് വില്ലനാവുകയാണ്. തണുത്ത കാലാവസ്ഥയിൽ ഇലക്ട്രിക് വാഹനങ്ങളിലെ ബാറ്ററികളുടെ റേഞ്ച് കുറയാൻ സാധ്യതയുണ്ടെന്ന കാര്യം EV ഉപയോക്താക്കളെ ഒരുപക്ഷേ അത്ഭുതപ്പെടുത്തിയേക്കാം. ഇത് വാഹനത്തിന്റെ റേഞ്ചും പ്രവർത്തനക്ഷമതയും സംബന്ധിച്ച് ഉടമകൾക്കിടയിൽ ആശങ്കയുണ്ടാക്കുമെന്ന് ഉറപ്പാണ്. സാധാരണയായി ഉപയോഗിക്കുന്ന ലിഥിയം-അയൺ ബാറ്ററികളിലെ രാസപ്രവർത്തനങ്ങൾ താപനില കുറയുന്നതിനനുസരിച്ച് മന്ദഗതിയിലാകുന്നതാണ് ഈ പ്രതിഭാസത്തിന് കാരണമാകുന്നത്. ഇത് കാര്യക്ഷമതയും ശേഷിയും കുറയാൻ ഇടയാക്കും.

ശൈത്യകാലത്ത് വാഹനങ്ങളുടെ കാര്യത്തിൽ കൂടുതൽ ശ്രദ്ധിക്കുക

തണുത്ത താപനില ബാറ്ററിയുടെ പ്രവർത്തനത്തിൽ ചെലുത്തുന്ന സ്വാധീനം വ്യത്യാസപ്പെട്ടിരിക്കും. ചില സന്ദർഭങ്ങളിൽ ഇത് കൂടുതലായിരിക്കാം. തണുത്ത കാലാവസ്ഥയിൽ പ്രവർത്തിക്കുമ്പോൾ ഇവികളിലെ ലിഥിയം-അയൺ ബാറ്ററികൾക്ക് ഊർജ്ജം ഉത്പാദിപ്പിക്കാനുള്ള കഴിവ് കുറയുന്നു. ഫലമായി, വാഹനങ്ങളുടെ മൊത്തത്തിലുള്ള റേഞ്ചിൽ ഒരു കുറവ് ഡ്രൈവർമാർക്ക് അനുഭവപ്പെട്ടേക്കാം. ശൈത്യകാല മാസങ്ങളിൽ ലളിതമായതും എന്നാൽ ഫലപ്രദവുമായ ബാറ്ററി പരിപാലന തന്ത്രങ്ങൾ സ്വീകരിക്കേണ്ടത് വാഹന ഉടമകൾക്ക് അത്യാവശ്യമാകുന്നു. ഇവി ബാറ്ററിയുടെ ശരിയായ പരിപാലനവും ആരോഗ്യവും ഉറപ്പാക്കുന്നതിനൊപ്പം, നിർമാതാക്കൾ വിപുലമായ തെർമൽ മാനേജ്മെന്റ് സംവിധാനങ്ങൾ വികസിപ്പിക്കുന്നതിൽ സ്ഥിരമായി ശ്രദ്ധ കേന്ദ്രീകരിച്ചിട്ടുണ്ട്. ഈ സംവിധാനങ്ങൾ ബാറ്ററിയുടെ ഒപ്റ്റിമൽ താപനില നിലനിർത്താൻ രൂപകൽപന ചെയ്തിട്ടുള്ളതാണ്. 

തണുത്ത താപനില ബാറ്ററിയുടെ പ്രവർത്തനങ്ങളെ കാര്യമായി ബാധിക്കില്ലെന്ന് ഇത് ഉറപ്പാക്കുന്നു. എല്ലാ ഇവികളിലും തെർമൽ മാനേജ്മെന്റ് സംവിധാനം ഉണ്ട്. അത് തണുത്തതും ചൂടുള്ളതുമായ കാലാവസ്ഥകളിൽ ഒപ്റ്റിമൽ പ്രവർത്തന സാഹചര്യങ്ങൾ നിലനിർത്തുന്നു. കൂടാതെ, ഡ്രൈവർമാർക്ക് ബാറ്ററിയുടെ പ്രവർത്തനം മെച്ചപ്പെടുത്താൻ കഴിയുന്ന ചില ഡ്രൈവിങ് രീതികളും സ്വീകരിക്കാൻ സാധിക്കും.

വാഹനം പാർക്ക്ചെയ്യേണ്ട രീതി

വാഹനം ഒരു ഗ്യാരേജിലോ മറ്റോ പാർക്ക് ചെയ്യുന്നത് ബാറ്ററിക്ക് കൂടുതൽ ഊഷ്മളമായ അന്തരീക്ഷം നിലനിർത്താൻ സഹായിക്കും. കൂടാതെ, ഹീറ്റഡ് സീറ്റുകൾ പോലുള്ള ഫീച്ചറുകൾ ഉപയോഗിക്കാതിരിക്കുന്നത് ബാറ്ററിയിലെ ഊർജ ആവശ്യം കുറയ്ക്കാൻ സഹായിക്കും.

ഇതിലൂടെ വാഹനത്തിന്റെ റേഞ്ച് വർധിപ്പിക്കാൻ കഴിക്കും. ഇതിനെല്ലാം പുറമെ, വേഗതയേറിയ ആക്സിലറേഷൻ ഒഴിവാക്കുന്നത് റേഞ്ച് വർധിപ്പിക്കും. പ്രത്യേകിച്ച് തണുത്ത സാഹചര്യങ്ങളിൽ. ഇവികളുടെ സ്വീകാര്യത വർധിച്ചുകൊണ്ടിരിക്കുന്നതിനാൽ, തീവ്രമായ കാലാവസ്ഥ ഉണ്ടാക്കുന്ന വെല്ലുവിളികളെക്കുറിച്ച് മനസ്സിലാക്കേണ്ടത് പ്രാധാന്യമർഹിക്കുന്നുണ്ട്.

English Summary : Parking your vehicle in a garage helps maintain a warmer environment for the battery, reducing energy needs and enhancing performance. Discover more tips here.