നല്ലൊരു അടുക്കളത്തോട്ടം എങ്ങനെ തയ്യാറാക്കാം, ജനുവരി മാസം കൃഷിക്ക് കൂടുതൽ അനുയോജ്യം

നല്ലൊരു അടുക്കളത്തോട്ടം എങ്ങനെ തയ്യാറാക്കാം, ജനുവരി മാസം കൃഷിക്ക് കൂടുതൽ അനുയോജ്യം

ആരോഗ്യകരമായ ഭക്ഷണരീതിയും പരിസ്ഥിതി സൗഹൃദ ജീവിതശൈലിയും ലക്ഷ്യമിടുന്ന ഇന്നത്തെ കാലഘട്ടത്തിൽ അടുക്കളത്തോട്ടം അനിവാര്യഘടകമായി മാറിക്കൊണ്ടിരിക്കുന്നു. വീട്ടുവളപ്പിലോ ടെറസിലോ ചെറിയ സ്ഥലമെങ്കിലും ഉപയോഗപ്പെടുത്തി ജൈവകൃഷിരീതികൾ അവലംബിച്ച് സുരക്ഷിത പച്ചക്കറികൾ സ്വന്തമായി ഉൽപ്പാദിപ്പിക്കാൻ അടുക്കളത്തോട്ടം സഹായിക്കുന്നു. അടുക്കളത്തോട്ടം തയ്യാറാക്കുമ്പോൾ ശ്രദ്ധിക്കേണ്ട പ്രധാന ഘടകങ്ങൾ ഇവയൊക്കെയാണ്.

1. സ്ഥലം തിരഞ്ഞെടുക്കൽ

അടുക്കളത്തോട്ടത്തിനായി തിരഞ്ഞെടുക്കുന്ന സ്ഥലത്ത് ദിവസേന കുറഞ്ഞത് 5-6 മണിക്കൂർ നേരിട്ടു സൂര്യപ്രകാശം ലഭിക്കണം. വെള്ളം കെട്ടിനിൽക്കാത്തതും എന്നാൽ അനായാസം ജലസേചനം നടത്താൻ കഴിയുന്ന സ്ഥലമായിരിക്കണം. ടെറസ് കൃഷിയാണെങ്കിൽ ടെറസിന് സംരക്ഷണം ഉറപ്പാക്കുന്ന തരത്തിൽ ക്രമീകരണം നടത്തണം. 

2. മണ്ണ് തയ്യാറാക്കൽ

നല്ല വിളവിന് നല്ല മണ്ണ് അത്യാവശ്യമാണ്. വീട്ടുവളപ്പിലാണെങ്കിലും ടെറസിലാണെങ്കിലും കുമ്മായം സെന്റ് ഒന്നിന് 800 ഗ്രാം എന്ന എളവിൽ മണ്ണിൽ ചേർത്തു കൊടുക്കണം. രണ്ടാഴ്ച്ചയ്ക്കു ശേഷം മണ്ണ് പരുവപ്പെട്ടാൽ വിത്ത്/തൈകൾ നടുന്നതിന് അനുയോജ്യമാകും. ഗ്രോബാഗ് കൃഷിക്ക് മേൽമണ്ണ് തന്നെ എടുക്കാൻ ശ്രദ്ധിക്കേണ്ടതാണ്. ഒരു ഭാഗം മേൽമണ്ണ്, ഒരു ഭാഗം ചകിരിച്ചോറ്, ഒരു ഭാഗം ജൈവവളം എന്നിവ നന്നായി ഇളക്കിച്ചേർത്തു വേണം പോട്ടിങ് മിശ്രിതം തയ്യാറാക്കാൻ. ജൈവവളമായി ചാണകപ്പൊടി, മണ്ണിര കമ്പോസ്റ്റ്, പൊടിഞ്ഞ കരിയില എന്നിവ ഉപയോഗിക്കാം. ഇതോടൊപ്പം അൽപ്പം സൂക്ഷ്മമൂലകലളവും ചേർത്തു കൊടുക്കാം. നിലമൊരുക്കുമ്പോൾ ഒരു സെന്റിന് 200 കിലോ ഗ്രാം വരെ ജൈവവളം നൽകാം. ടെറസ് കൃഷിക്കായി എച്ച്ഡിപിഇ ഗ്രോ ബാഗുകളോ ചട്ടികളോ മൺചട്ടികളോ ഉപയോഗിക്കാം. 12 ഇഞ്ച് വ്യത്യാസമുള്ള ചട്ടിയിൽ 8 -10 കിലോഗ്രാം പോട്ടിങ് മിശ്രിതം നിറയ്ക്കാം.

3. വിളകൾ 

വീട്ടിൽ പതിവായി ഉപയോഗിക്കുന്ന  പച്ചക്കറികൾക്കു മുൻഗണന നൽകണം. ചീര, വെണ്ട, വഴുതന, തക്കാളി, മുളക്, പയർ, മത്തൻ, വെള്ളരി, കുമ്പളം തുടങ്ങിയവ അടുക്കളത്തോട്ടത്തിന് അനുയോജ്യമാണ്. കാലാവസ്ഥയ്ക്കും സ്ഥലത്തിനും യോജിച്ച ഇനങ്ങൾ തിരഞ്ഞെടുക്കാൻ പ്രത്യേകം ശ്രദ്ധിക്കണം. 

4. വിത്ത്/തൈകൾ  

ഗുണമേന്മയുള്ള വിത്തുകൾ അല്ലെങ്കിൽ ആരോഗ്യമുള്ള തൈകൾ തിരഞ്ഞെടുക്കുക. വിത്തുകൾ ആഴത്തിൽ നട്ടാൽ മുളക്കാൻ ബുദ്ധിമുട്ടാകും. ഓരോ ചെടിക്കും ആവശ്യമായ അകലം നൽകുന്നതും വളർച്ചയ്ക്ക് അത്യാവശ്യമാണ്.

5. ജലസേചനം 

ചെടികൾക്ക് ആവശ്യമായ അളവിൽ മാത്രം വെള്ളം നൽകുക. കൂടുതൽ വെള്ളം ഒഴിക്കൽ ഒഴിവാക്കണം. രാവിലെ അല്ലെങ്കിൽ വൈകുന്നേരം നനയ്ക്കുന്നതാണ് ഉത്തമം.

6. ജൈവവളപ്രയോഗം

അടുക്കളത്തോട്ടത്തിൽ ജെവവളം മാത്രം നൽകുന്നതാണ് ഏറ്റവും അഭികാമ്യം. അത്
മണ്ണിന്റെ ആരോഗ്യവും ഘടനയും
മെച്ചപ്പെടുത്താൻ സഹായിക്കും. ചാണകപ്പൊടി, കമ്പോസ്റ്റ്, ജീവാണുവളങ്ങൽ, വേപ്പിൻപിണ്ണാക്ക് എന്നിവ മാസത്തിൽ തണ്ടു തവണ നൽകാം. 

7. കീടരോഗ നിയന്ത്രണം 

വേപ്പെണ്ണ, വേപ്പെണ്ണ-വെളുത്തുള്ളി മിശ്രിതം, പുകയിലക്കഷായം, വേപ്പിൻകുരു സത്ത് എന്നീ ജൈവകീടനാശിനികൾ സുരക്ഷിതമാണ്. കൂടാതെ, സ്യൂഡോമോണസ്, ട്രൈക്കോഡർമ എന്നീ ജൈവനിയന്ത്രണ ഉപാധികളും ബാക്ടീരിയ, കുമിൾ രോഗങ്ങൾക്കെതിരെ ഉപയോഗിക്കാം.

അടുക്കളത്തോട്ടം ഒരു കുഞ്ഞിനെ പോലെ പരിചരിക്കണം. ദിവസേന ശ്രദ്ധ നൽകണം. കളകൾ നീക്കം ചെയ്യുക, രോഗം- കീടം ബാധിച്ച ഇലകൾ നീക്കം ചെയ്യുക, എന്നിവയുടെ വളർച്ച നിരീക്ഷിക്കുക, ഇവ കൃത്യമായി ചെയ്യണം. ഇതു ഭക്ഷ്യസുരക്ഷയ്ക്കൊപ്പം വരുമാനമാർഗ്ഗവുമാണ്. ചെറിയ ശ്രമവും നല്ല പരിപാലനവും ഉണ്ടെങ്കിൽ ഏതൊരു വീടിനും മനോഹരമായ അടുക്കളത്തോട്ടം തയ്യാറാക്കാം.

English Summary : Vegetables that are commonly used at home should be given priority. Spinach, okra, brinjal, tomato, chilli, lentils, pumpkin, cucumber, and pumpkin are suitable for a kitchen garden. Special care should be taken to choose varieties that are suitable for the climate and location.