വായു മലിനീകരണം : പ്രതിഷേധം അടിച്ചൊതുക്കി ഡൽഹി പോലീസ്

വായുമലിനീകരണം രൂക്ഷമായതോടെ ഡൽഹിയിലെ ജീവിതം ദുസ്സഹമായി തുടരുകയാണ്. വേണ്ട നടപടികൾ സ്വീകരിക്കാത്ത ഭരണാധികാരികൾക്കെതിരെ പ്രതിഷേധം ശക്തമാവുകയാണ്. ഭരണാധികാരികളുടെ കെടുകാര്യസ്ഥതയ്ക്കെതിരെ ശക്തമായ സമരത്തിലാണ് വിദ്യാർഥികൾ. സമരം ശക്തമായതോടെ പ്രതിഷേധം അടിച്ചൊതുക്കിയിരിക്കുകയാണ് പോലീസ്. 22 പ്രതിഷേധക്കാരെ ഡൽഹി പൊലീസ് അറസ്റ്റ് ചെയ്തു. പൊലീസ് ഉദ്യോഗസ്ഥര്‍ക്ക് നേരെ പ്രതിഷേധക്കാര്‍ പെപ്പര്‍ സ്പ്രേ പ്രയോഗിച്ചുവെന്നാരോപിച്ചാണ് അറസ്റ്റ്.

കൊല്ലപ്പെട്ട മാവോയിസ്റ്റ് കമാന്‍ഡര്‍ മാദ്‌വി ഹിദ്മയെ പുകഴ്ത്തിയുള്ള മുദ്രാവാക്യങ്ങളും പ്രതിഷേധക്കാര്‍ ഉയര്‍ത്തിയിരുന്നു. ‘കോർഡിനേഷൻ കമ്മിറ്റി ഫോർ ക്ലീൻ എയർ’ എന്ന സംഘടനയിലെ പ്രവർത്തകരാണ് ഡൽഹിയിലെ ഇന്ത്യാഗേറ്റിന് മുന്നിൽ കുത്തിയിരുന്ന് പ്രതിഷേധിച്ചത്. ഡൽഹി സർവകലാശാലയിലെയും ജെഎൻയുവിലെയും വിദ്യാർഥികളാണിവർ.

ഇന്ത്യാഗേറ്റിന് സമീപമുള്ള സീ ഹെക്സഗൺ റോഡിന് കുറുകെ ഗതാഗതം മുടക്കി, സർക്കാരിനും പ്രധാനമന്ത്രിക്കുമെതിരെ മുദ്രാവാക്യങ്ങൾ വിളിച്ചാണ് ഇവർ പ്രതിഷേധം രേഖപ്പെടുത്തിയത്. ആംബുലൻസടക്കമുള്ള അവശ്യസർവ്വീസുകൾ തടസപ്പെട്ടതോടെ പോലീസെത്തി ഇവരെ സ്ഥലത്തുനിന്ന് മാറ്റി.

അതേസമയം സാഹചര്യം വഷളായതോടെ എയർ ക്വാളിറ്റി മാനേജ്‌മെന്റ് കമ്മിഷൻ, ഗ്രേഡഡ് റെസ്പോൺസ് ആക്‌ഷൻപ്ലാൻ (ഗ്രാപ്) ഘട്ടങ്ങൾ ശനിയാഴ്ച കടുപ്പിച്ചിരുന്നു. വായു ഗുണനിലവാരസൂചിക നിശ്ചിതപരിധി കടക്കുമ്പോൾ സ്വീകരിക്കേണ്ട നടപടികളാണിവ.

ഇതുപ്രകാരം സൂചിക 400 കടന്ന് ഗുരുതര വിഭാഗത്തിലെത്തിയാൽ ഓഫീസുകളിലെ പകുതി ജീവനക്കാർക്ക് വർക്ക് ഫ്രം ഹോം നൽകാൻ വ്യവസ്ഥചെയ്തിട്ടുണ്ട്. സൂചിക 301 മുതൽ 400 വരെയുള്ള ‘വളരെ മോശം’ വിഭാഗത്തിലുള്ളപ്പോൾ സർക്കാർ, മുനിസിപ്പൽ ഓഫീസുകളുടെ സമയക്രമം മാറ്റുന്നതിൽ തീരുമാനമെടുക്കണമെന്നാണ് വ്യവസ്ഥ.

പൊതുഗതാഗതം പ്രോത്സാഹിപ്പിക്കാൻ നടപടികൾ വേണമെന്നും നിർദേശത്തിലുണ്ട്. നേരത്തേ, രണ്ടാംഘട്ടത്തിലുണ്ടായിരുന്ന നിയന്ത്രണങ്ങൾ ഇനിമുതൽ സൂചിക 201-ലെത്തുമ്പോഴേ നടപ്പാക്കുമെന്നും കേന്ദ്ര പരിസ്ഥിതിമന്ത്രാലയം അറിയിച്ചു. ശനിയാഴ്ച ഡൽഹിയിൽ വായുനിലവാരം ‘വളരെ മോശം’ വിഭാഗത്തിലായിരുന്നു.

നിലവിൽ ഗ്രാപ് -3 (ഗ്രേഡഡ് റെസ്‌പോൺസ് ആക്ഷൻ പ്ലാൻ) നിയന്ത്രണങ്ങളാണ് നടപ്പാക്കിയിട്ടുള്ളത്. ഇതോടൊപ്പം തന്നെ ഗ്രാപ്-4 നിയന്ത്രണങ്ങൾ കൂടി നടപ്പാക്കാനാണ് കേന്ദ്ര മലിനീകരണ നിയന്ത്രണ ബോർഡ് സർക്കാരിന് നിർദേശം നൽകിയത്. എ.ക്യു.ഐ 400 കടക്കാനുള്ള സാധ്യത മുന്നിൽ കണ്ടാണ് ഗ്രാപ്-4 നിയന്ത്രണങ്ങൾ നടപ്പാക്കാൻ നിർദ്ദേശിച്ചത്.

English Summary: Protests near India Gate escalate as police intervene, disrupting traffic and essential services. Discover the latest updates on air quality management measures.