വർക്കല ബീച്ചിനെ നശിപ്പിക്കരുതെന്ന് കേണപേക്ഷിച്ച് വിനോദ സഞ്ചാരി, കേരളത്തിലെ ഈ കാഴ്ചകണ്ട് ഞെട്ടിപ്പോയി, വൈറലായി വീഡിയോ
മാലിന്യകൂമ്പാരം കൊണ്ട് നിറയുകയാണ് കേരളത്തിലെ ടൂറിസ്റ്റു സ്ഥലങ്ങൾ. വിനോദസഞ്ചാരികൾ ഏറെ ഇഷ്ട്ടപ്പെടുന്ന പച്ചപ്പ് കൊണ്ട് മനോഹരമായ കേരളത്തിലെ മാലിന്യ പ്രശ്നമാണ് മറ്റ് രാജ്യങ്ങളിൽ നിന്നും വരുന്ന ടൂറിസ്റ്റുകളുടെ പ്രധാന പ്രശ്നം. അവർ ഈ പ്രശ്നം സോഷ്യൽ മീഡിയയിലൂടെ പ്രതികരിച്ചു തുടങ്ങിയിരിക്കുന്നു. കേരളത്തിലെ പ്രശസ്തമായ വിനോദ സഞ്ചാര കേന്ദ്രമായ വർക്കല ബീച്ചിൽ വിനോദ സഞ്ചാരികൾ മാലിന്യം വലിച്ചെറിയുന്നതിനെതിരെ രൂക്ഷമായ വിമർശനവുമായി സമൂഹ മാധ്യമ ഇൻഫ്ലുവൻസർ സച്ചിൻ കെ. ധീർ രംഗത്തെത്തിയ വീഡിയോ ആണ് ഇപ്പോൾ വൈറൽ. ഇൻസ്റ്റാഗ്രാമിൽ പങ്കുവെച്ച വീഡിയോയിലൂടെയാണ് അദ്ദേഹം തന്റെ പ്രതിഷേധം അറിയിച്ചത്. ഇങ്ങനെയാണ്
വർക്കലയിലെ മാലിന്യം
സഞ്ചാരികൾ ഉപേക്ഷിച്ച് പോയ പ്ലാസ്റ്റിക് കുപ്പികൾ, ഭക്ഷണപ്പൊതികൾ, മറ്റ് അവശിഷ്ടങ്ങൾ എന്നിവ കൊണ്ട് വർക്കലയിലെ മനോഹരമായ മലയിടുക്കുകളും കടൽത്തീരവും മലിനമായിരിക്കുന്ന കാഴ്ചയാണ് സച്ചിൻ തന്റെ വീഡിയോയിൽ പങ്കുവച്ചത്. പ്രകൃതി ഭംഗിക്ക് പേരുകേട്ട ഈ സ്ഥലത്ത് ഇത്രയധികം മാലിന്യം കണ്ടതിൽ താൻ ഞെട്ടിപ്പോയെന്നാണ് അദ്ദേഹം വീഡിയോയിൽ പറയുന്നത്. "നമ്മൾ ഇന്ത്യക്കാർ ഇപ്പോൾ നമ്മുടെ മനോഹരമായ വർക്കല ക്ലിഫ് ബീച്ചിനെ നശിപ്പിച്ചു തുടങ്ങിയിരിക്കുന്നു," എന്ന് സച്ചിൻ തന്റെ പോസ്റ്റിൽ കുറിച്ചു. എന്തുകൊണ്ടാണ് മാലിന്യം വലിച്ചെറിയുന്നത് പ്രകൃതിയെ നശിപ്പിക്കുമെന്ന് മനസ്സിലാക്കാൻ ഇത്ര പ്രയാസമെന്ന് അദ്ദേഹം വളരെ വിഷമത്തോടെയാണ് വീഡിയോയിൽ ചോദിക്കുന്നത്.
വർക്കല പോലെയുള്ള മനോഹരമായ സ്ഥലങ്ങൾ നശിപ്പിക്കപ്പെടുന്നതിലുള്ള തന്റെ കടുത്ത നിരാശയും ദേഷ്യവുമാണ് ഈ വാക്കുകളിലൂടെ അദ്ദേഹം പ്രകടിപ്പിച്ചത്. പ്രകൃതിയെ സംരക്ഷിക്കേണ്ടത് ഓരോ വ്യക്തിയുടെയും കടമയാണെന്നും, ഇത്തരം അശ്രദ്ധമായ പ്രവർത്തികൾ അവസാനിപ്പിക്കണമെന്നും അദ്ദേഹം വീഡിയോയിലൂടെ ഓർമ്മിപ്പിച്ചു.
വീഡിയോ വൈറലായതോടെ സച്ചിന് പിന്തുണയുമായി രംഗത്തെത്തിയവർ ഏറെ
സച്ചിന്റെ വീഡിയോ സമൂഹ മാധ്യമങ്ങളിൽ അതിവേഗം പ്രചരിക്കുകയും നിരവധി ആളുകൾ അദ്ദേഹത്തിന് പിന്തുണയുമായി രംഗത്തെത്തുകയും ചെയ്തു. വിനോദ സഞ്ചാര മേഖലയിൽ കൂടുതൽ ബോധവൽക്കരണവും കർശനമായ നിയമങ്ങളും വേണമെന്ന് പലരും അഭിപ്രായപ്പെടുന്നുണ്ട്. "ഇന്ത്യയിലെ തന്നെ ഏറ്റവും മികച്ച ബീച്ചുകളിൽ ഒന്നായാണ് ഞാൻ വർക്കലയെ കണ്ടിരുന്നത്. എന്നാൽ ഈ അടുത്ത കാലത്തുണ്ടായ മാറ്റം ഞെട്ടിക്കുന്നതാണ്.
അമിതമായ ടൂറിസവും, പ്രത്യേകിച്ച് ആഭ്യന്തര സഞ്ചാരികളുടെ ഉത്തരവാദിത്തമില്ലാത്ത പെരുമാറ്റവുമാണ് ഈ തകർച്ചയ്ക്ക് കാരണമെന്നാണ് കഴിഞ്ഞ അഞ്ച് വർഷമായി വർക്കല സന്ദർശിക്കുന്ന ഒരാൾ തന്റെ സങ്കടം പങ്കുവെച്ചുകൊണ്ട് പറഞ്ഞ്. സഞ്ചാരികളുടെ മനോഭാവത്തിലും അധികൃതരുടെ പ്രവർത്തനങ്ങളിലും ഒരുപോലെ മാറ്റം വന്നാൽ മാത്രമേ വർക്കലയുടെ പ്രകൃതിഭംഗി സംരക്ഷിക്കാൻ സാധിക്കൂ എന്ന പൊതുവികാരമാണ് ഈ ചർച്ചകളിൽ മുഴുനീളെ ഉയർന്നു വന്നത്. പലരും കേരളത്തിനീ ഗതി വന്നല്ലോ എന്ന ആശങ്കയും പ്രകടിപ്പിച്ചിട്ടുണ്ട്.
English Summary : Garbage in Varkala
In his video, Sachin shared a picture of the beautiful gorges and beach in Varkala littered with plastic bottles, food wrappers, and other debris left behind by tourists.