2025ൽ കാലാവസ്ഥ ദുരന്തങ്ങൾ ലോകത്തിനു വരുത്തിവെച്ചത് 120 ബില്യൺ ഡോളറിന്റെ നഷ്ടം. യുകെ ആസ്ഥാനമായുള്ള ക്രിസ്ത്യൻ എയ്ഡ് എന്ന സംഘടന പുറത്തുവിട്ട പുതിയ റിപ്പോർട്ട് പ്രകാരമാണ് ഇത്. ഉഷ്ണ തരംഗങ്ങൾ, കാട്ടുതീ, വരൾച്ച, കൊടുങ്കാറ്റ് വെള്ളപ്പൊക്കം എന്നിവ 2025 ലോകത്തിന് വലിയ നാശനഷ്ടമാണ് ഉണ്ടാക്കിയത്.

ഏറ്റവും വലിയ നഷ്ടം അമേരിക്കയിലെ കാലിഫോർണിയയിൽ ഉണ്ടായ കാട്ടുതീയിലാണ്. ഈ കാട്ടുതീയിൽ 400 മരണങ്ങൾ സംഭവിച്ചു, കൂടാതെ 60 ബില്യൺ ഡോളറിന്റെ നാശനഷ്ടങ്ങളും ഉണ്ടായിരുന്നു.

അതേസമയം ലോകത്തിലെ ഏറ്റവും വലിയ ആറ് ദുരന്തങ്ങളിൽ നാലെണ്ണം നടന്നത് ഏഷ്യയിലാണ്. ഇന്ത്യയിലും പാക്കിസ്ഥാനിലും ഉണ്ടായ വെള്ളപ്പൊക്കത്തിൽ 1860 അധികം ആളുകൾ മരിച്ചു. പാക്കിസ്ഥാനിൽ മാത്രം 70 ദശലക്ഷം ആളുകളെ ഇത് ബാധിക്കുകയും ആറ് ബില്യൺ ഡോളറിന്റെ നഷ്ടം ഉണ്ടാവുകയും ചെയ്തു. നവംബറിൽ തെക്ക് കിഴക്കൻ ഏഷ്യയിൽ ഉണ്ടായ ചുഴലിക്കാറ്റിലും വെള്ളപ്പൊക്കത്തിലും 25 ബില്ല്യൺ ഡോളറിന്റെ നഷ്ടവും 1750ലധികം മരണങ്ങളും ഉണ്ടായി. തായ്‌ലാൻഡ് ഇൻഡോനേഷ്യ മലേഷ്യ തുടങ്ങിയ രാജ്യങ്ങളിലാണ് ഈ ദുരന്തങ്ങൾ ഉണ്ടായത്.

കൂടാതെ ചൈനയിൽ വെള്ളപ്പൊക്കത്തിൽ 11.7 ബില്യൺ ഡോളറിന്റെ നഷ്ടം ഉണ്ടായതായും റിപ്പോർട്ടിൽ പറയുന്നു. ബ്രസീലിലെ വരൾച്ച സ്പെയിനിലെയും പോർച്ചുഗലിലെയും കാട്ടുതീ എന്നിവയും റിപ്പോർട്ടിൽ എടുത്തുപറയുന്നുണ്ട്. കാരണം ഫോസിൽ ഇന്ധനങ്ങളുടെ അമിതമായ ഉപയോഗവും ഹരിതഗൃഹ വാതകങ്ങൾ കുറയ്ക്കുന്നതിൽ ഉണ്ടാവുന്ന രാഷ്ട്രീയ കാലതാമസവും ആണ് ഇത്തരം ദുരന്തങ്ങൾക്ക് പ്രധാന കാരണമെന്ന് വിദഗ്ധർ ചൂണ്ടിക്കാണിക്കുന്നു.

ദരിദ്ര രാജ്യങ്ങളെയാണ് കാലാവസ്ഥ വ്യതിയാനം ഏറ്റവും കൂടുതൽ ബാധിക്കുന്നതെന്നും കാർബൺ പുറന്തള്ളൽ കുറയ്ക്കുന്നതിനും പുനരുപയോഗ ഊർജത്തിലേക്ക് മാറ്റുന്നതിനും അടിയന്തര നടപടികൾ വേണമെന്നും റിപ്പോർട്ടിൽ മുന്നറിയിപ്പ് നൽകുന്നുണ്ട്.

Metbeat news