ഇന്ത്യയുടെ മിക്ക ഭാഗങ്ങളിലും കടുത്ത ശൈത്യം തുടരുകയാണെന്നും വരും ദിവസങ്ങളിൽ കഠിനമായ മൂടൽമഞ്ഞ്, ശീതതരംഗം, മഴ അല്ലെങ്കിൽ മഞ്ഞുവീഴ്ച എന്നിവയ്ക്ക് സാധ്യതയുണ്ടെന്നും കാലാവസ്ഥാ വകുപ്പ് (IMD) മുന്നറിയിപ്പ് നൽകുന്നു.
മഞ്ഞുവീഴ്ചയും മഴയും
പടിഞ്ഞാറൻ ഹിമാലയൻ മേഖലകളായ ഹിമാചൽ പ്രദേശ്, ഉത്തരാഖണ്ഡ് എന്നിവിടങ്ങളിൽ നേരിയതോ മിതമായതോ ആയ മഴയ്ക്കും മഞ്ഞുവീഴ്ചയ്ക്കും സാധ്യതയുണ്ട്. ഇത് ഗതാഗത തടസ്സങ്ങൾക്കും കാഴ്ചപരിധി കുറയാനും കാരണമായേക്കാം.
കനത്ത മൂടൽമഞ്ഞ് തുടരുന്നു
ഉത്തരേന്ത്യയിലും കിഴക്കൻ ഇന്ത്യയിലും വരും ദിവസങ്ങളിൽ കനത്ത മൂടൽമഞ്ഞ് അനുഭവപ്പെടും. പഞ്ചാബ്, ഹരിയാന, ചണ്ഡീഗഡ്, ഡൽഹി എന്നിവിടങ്ങളിൽ ജനുവരി 6 വരെയും, ബീഹാർ, ഉത്തർപ്രദേശ് എന്നിവിടങ്ങളിൽ ജനുവരി 3 വരെയും കഠിനമായ മൂടൽമഞ്ഞ് തുടരാൻ സാധ്യതയുണ്ട്. ഒഡീഷ, രാജസ്ഥാൻ, മധ്യപ്രദേശ്, വടക്കുകിഴക്കൻ സംസ്ഥാനങ്ങൾ എന്നിവിടങ്ങളിലും മൂടൽമഞ്ഞ് അനുഭവപ്പെടും.
ശീതതരംഗം (Cold Wave)
ഹിമാചൽ പ്രദേശ്, പഞ്ചാബ്, ഹരിയാന, ഡൽഹി എന്നിവിടങ്ങളിൽ ജനുവരി 2 മുതൽ 6 വരെ ശീതതരംഗത്തിന് സാധ്യതയുണ്ട്. രാജസ്ഥാനിൽ ജനുവരി 4 മുതൽ 7 വരെയായിരിക്കും ശീത തരംഗത്തിന് സാധ്യത എന്നും കാലാവസ്ഥ വകുപ്പ്.
ദക്ഷിണേന്ത്യയിൽ മഴ
തമിഴ്നാട്ടിൽ ഒറ്റപ്പെട്ടയിടങ്ങളിൽ ഇടിമിന്നലോടു കൂടിയ മഴയ്ക്കും ശക്തമായ കാറ്റിനും (മണിക്കൂറിൽ 30-40 കി.മീ) സാധ്യതയുണ്ട്. ശ്രീലങ്കൻ തീരത്തെ അന്തരീക്ഷ ചുഴിയും ലക്ഷദ്വീപിന് സമീപത്തെ പാത്തിയും (trough) കാരണമാണിത്.
ജാഗ്രതാ നിർദ്ദേശങ്ങൾ
മൂടൽമഞ്ഞ് കാരണം വിമാന, ട്രെയിൻ, റോഡ് ഗതാഗതങ്ങളിൽ തടസ്സമുണ്ടാകാൻ സാധ്യതയുള്ളതിനാൽ യാത്രക്കാർ മുൻകരുതലെടുക്കണം. വാഹനങ്ങൾ ഓടിക്കുമ്പോൾ ഫോഗ് ലൈറ്റുകൾ ഉപയോഗിക്കാനും വേഗത കുറയ്ക്കാനും നിർദ്ദേശമുണ്ട്. ആരോഗ്യപ്രശ്നങ്ങൾ ഒഴിവാക്കാൻ അനാവശ്യമായി പുറത്തിറങ്ങുന്നത് ഒഴിവാക്കാനും കാലാവസ്ഥാ വകുപ്പ് നിർദ്ദേശിക്കുന്നുണ്ട്.