തമിഴ്‌നാട്ടിൽ ഉടനീളം വരണ്ട കാലാവസ്ഥ അനുഭവപ്പെടുന്ന സാഹചര്യത്തിൽ പലയിടങ്ങളിലും താപനില വലിയ തോതിൽ കുറയുന്നതായി റിപ്പോർട്ടുകൾ. ചെന്നൈ ഉൾപ്പെടെയുള്ള നഗരങ്ങളിലും മലയോര മേഖലകളിലും തണുപ്പ് വർധിച്ചിട്ടുണ്ട്.

ചെന്നൈ നിവാസികൾ കഠിനമായ തണുപ്പിലേക്കാണ് കഴിഞ്ഞ ദിവസങ്ങളിൽ ഉണർന്നത്. നുങ്കംപാക്കം കാലാവസ്ഥാ നിരീക്ഷണ കേന്ദ്രത്തിൽ 19.7 ഡിഗ്രി സെൽഷ്യസും, മീനമ്പാക്കത്ത് 19 ഡിഗ്രി സെൽഷ്യസുമാണ് കുറഞ്ഞ താപനില രേഖപ്പെടുത്തിയത്.

തിരുവള്ളൂർ ജില്ലയിലെ തിരുത്തണിയിൽ 15.5 ഡിഗ്രി സെൽഷ്യസ് തണുപ്പ് രേഖപ്പെടുത്തി. ധർമ്മപുരിയിലാണ് സമതല പ്രദേശങ്ങളിൽ വെച്ച് ഏറ്റവും കുറഞ്ഞ താപനില (15.2 ഡിഗ്രി സെൽഷ്യസ്) രേഖപ്പെടുത്തിയത്.

കൊടും തണുപ്പിലാണ് മലയോര മേഖലകൾ. വാൽപ്പാറ, കുന്നൂർ എന്നിവിടങ്ങളിൽ 8 ഡിഗ്രി സെൽഷ്യസും, ഊട്ടി (ഉദഗമണ്ഡലം), കൊടൈക്കനാൽ എന്നിവിടങ്ങളിൽ 7 ഡിഗ്രി സെൽഷ്യസ് വരെയും താപനില താഴ്ന്നു.

മൺസൂൺ പിൻവാങ്ങുന്നു

വടക്കുകിഴക്കൻ മൺസൂൺ (തുലാവർഷം) തമിഴ്‌നാട്, പുതുച്ചേരി, കേരളം തുടങ്ങിയ ഇടങ്ങളിൽ നിന്ന് അടുത്ത 48 മണിക്കൂറിനുള്ളിൽ പൂർണ്ണമായും പിൻവാങ്ങാൻ അനുകൂലമായ സാഹചര്യമാണുള്ളതെന്ന് പ്രാദേശിക കാലാവസ്ഥാ കേന്ദ്രം (RMC) അറിയിച്ചു.

വരുന്ന ആറ് ദിവസത്തേക്ക് തമിഴ്‌നാട്ടിൽ വരണ്ട കാലാവസ്ഥ തുടരുമെന്നും, പലയിടങ്ങളിലും കുറഞ്ഞ താപനില സാധാരണയേക്കാൾ 1 മുതൽ 3 ഡിഗ്രി വരെ താഴാൻ സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം പ്രവചിക്കുന്നു.

Metbeat news