ലോകത്തെ അതിശയിപ്പിച്ച നയാഗ്ര വെള്ളച്ചാട്ടം തണുത്തുറഞ്ഞ് ഐസായി, പാറകളും മരങ്ങളും കല്ലുകളും മഞ്ഞിൽ മൂടി
ലോകാദ്ഭുതങ്ങളിലൊന്നാണ് നയാഗ്ര വെള്ളച്ചാട്ടം. അതുകൊണ്ടാണല്ലോ ലോകത്തിലെ തന്നെ ഏറ്റവും സുന്ദരമായ കാഴ്ചകളിലൊന്ന് എന്ന് നയാഗ്രയിലെ വെള്ളച്ചാട്ടങ്ങളെ സഞ്ചാരികൾ വിശേഷിപ്പിക്കുന്നത്. ലോകമെമ്പാടുനിന്നും ലക്ഷക്കണക്കിന് ആൾക്കാരാണ് ഈ സൗന്ദര്യം ആസ്വദിക്കുവാൻ എല്ലാവർഷവും ഇവിടേക്ക് എത്തുന്നത്. അമേരിക്കയും കാനഡയുമായി അതിർത്തി പങ്കിടുന്ന ഈ മനോഹര പ്രദേശം പക്ഷേ ശൈത്യകാലമായതോടെ മറ്റൊരു അദ്ഭുതമായി മാറിയിരിക്കുകയാണ്.
❄️| Extreme cold freezes the iconic Niagara Falls.
— Earth (@earthcurated) January 26, 2026
pic.twitter.com/oyCw7mlTCe
ശക്തമായ ശീതക്കാറ്റ്
ഇന്ന് ഈ മേഖലയിലെ കാലാവസ്ഥ അതിശൈത്യമാണ്. മനുഷ്യർ പുറത്തിറങ്ങാൻ പോലും ഭയക്കുന്നത്രയും തണുപ്പ്. നയാഗ്ര വെള്ളചാട്ടത്തിനേയും ഈ തണുപ്പ് ബാധിച്ചു. കഠിനമായ തണുപ്പും ശീതക്കാറ്റും വർധിച്ചതോടെ നയാഗ്ര വെള്ളച്ചാട്ടത്തിന് മുകളിലായി വെള്ളം തണുത്തുറഞ്ഞ് ഐസ് പാളികൾ രൂപപ്പെടുകയാണ്. വെള്ളച്ചാട്ടം പൂർണമായും തണുത്തുറയുന്നില്ലെങ്കിലും വെള്ളത്തിന് മുകളിലായി ഐസ് കെട്ടി നിൽക്കുന്നത് വിസ്മയ കാഴ്ചയാണൊരുക്കിയത്. ശക്തമായ ശീതക്കാറ്റ് കൂടി ആകുന്നതോടെ ഈ മേഖലയിലെ താപനില മൈനസ് 20 ഡിഗ്രിയിലേക്ക് താഴുകയാണ്. ഇതോടെ പാറകളും മരങ്ങളുമെല്ലാം മഞ്ഞിൽ മൂടുകയാണ്.
The immense power and volume of water prevent a solid freeze. Photo: niagaraparks.com
കുറഞ്ഞ താപനില ജനുവരി, ഫെബ്രുവരി മാസങ്ങളിൽ
ഏറ്റവുമധികം ശൈത്യമുള്ള കാലയളവിൽ പോലും നയാഗ്ര വെള്ളച്ചാട്ടം തണുത്തുറയുന്നില്ലെന്നത് ശ്രദ്ധേയമാണ്. വലിയ തോതിലുള്ള വെള്ളത്തിന്റെ അളവും ഒഴുക്കിന്റെ ശക്തിയും മൂലമാണ് ഈ പ്രതിഭാസമുണ്ടാകാത്തത്. എന്നാൽ, വെള്ളത്തിന് മുകളിലായി രൂപപ്പെടുന്ന ഐസ് പാളി മൂലം വെള്ളച്ചാട്ടം തണുത്തുറയുന്നതായി തോന്നും. വെള്ളച്ചാട്ടത്തിന് സമീപത്തും മറ്റുമുള്ള ചെടികളും കല്ലുകളുമെല്ലാം പൂർണമായും ഐസ് നിറഞ്ഞതായി മാറി. ജനുവരി, ഫെബ്രുവരി മാസങ്ങളിലാണ് ഈ മേഖലയിൽ ഏറ്റവും കുറഞ്ഞ താപനില റിപ്പോർട്ട് ചെയ്യുന്നത്. പകൽ സമയങ്ങളിൽ മൈനസ് ഒന്ന് ഡിഗ്രി സെൽഷ്യസ് വരെയും രാത്രി കാലങ്ങളിൽ മൈനസ് ആറ് ഡിഗ്രിക്കും താഴെയാണ് ഇവിടുത്തെ സാധാരണ താപനില.
English Summary : The weather in this region is extremely cold today. It is so cold that people are afraid to even go out. This cold has also affected Niagara Falls. With the increase in severe cold and cold winds, the water above Niagara Falls is freezing and forming ice sheets.