ഇഞ്ചി കൃഷിക്ക് പുതിയ രോഗ ഭീഷണി: പൈറിക്കുലേറിയ രോഗം

ഇഞ്ചി കർഷകർക്ക് ആശങ്ക സൃഷ്ടിക്കുകയാണ് പുതിയ രോഗം. ഇഞ്ചി വിളയിൽ ആദ്യമായി പൈറിക്കുലേറിയ (Pyricularia spp.) എന്ന ഫംഗസ് ബാധയാണ് പുതിയ വെല്ലുവിയാകുന്നത്. ഈ രോഗം ഇലകളിൽ കറുത്ത പാടുകൾ ഉണ്ടാക്കുകയും പിന്നീട് മുഴുവൻ ഇലയും മഞ്ഞനിറത്തിലാവുകയും ചെയ്യുന്നു.

രോഗബാധിതമായ ഇലകൾ വേഗത്തിൽ ഉണങ്ങുകയും അതുവഴി വിളവിൽ ഗണ്യമായ നഷ്ടം സംഭവിക്കുകയും ചെയ്യുന്നു. അനുയോജ്യമായ കാലാവസ്ഥാ സാഹചര്യങ്ങളിൽ, രോഗം മണിക്കൂറുകൾക്കുള്ളിൽ മുഴുവൻ കൃഷിയിടത്തെയും വ്യാപിക്കുന്ന സ്വഭാവമുള്ളതാണ്.

നിയന്ത്രണ മാർഗങ്ങൾ

വിത്ത് പരിചരണം (Seed Treatment)

രോഗബാധ ഒഴിവാക്കുന്നതിനായി നടുന്നതിന് മുമ്പ് ഇഞ്ചി വിത്ത് പ്രൊപികോണസോൾ (1 മില്ലി/ലിറ്റർ വെള്ളം) അല്ലെങ്കിൽ കാർബെൻഡസിം + മാങ്കോസെബ് (2 ഗ്രാം/ലിറ്റർ വെള്ളം) എന്ന ഫംഗിസൈഡ് മിശ്രിതത്തിൽ 30 മിനിറ്റ് മുക്കി വെക്കണം.

ശേഷം വിത്തുകൾ തണലിൽ ഉണക്കി, വായുസഞ്ചാരം നല്ല രീതിയിൽ ലഭിക്കുന്ന സ്ഥലത്ത് സൂക്ഷിക്കുക.

ജൈവ പ്രതിരോധ സ്പ്രേ

നട്ടതിന് ശേഷം ഇലവളർച്ച ആരംഭിക്കുന്ന ഘട്ടത്തിൽ നിന്നും സ്യുഡോമോണസ് അല്ലെങ്കിൽ ട്രൈക്കോഡർമ പ്രതിമാസം ഒരിക്കൽ വീതം സ്പ്രേ ചെയ്യുക. ഇത് രോഗപ്രതിരോധം വർധിപ്പിക്കുകയും ഫംഗസ് വളർച്ച തടയുകയും ചെയ്യും.

പ്രതിരോധ ഫംഗിസൈഡ് സ്പ്രേ

നട്ട് നാല് മാസം കഴിഞ്ഞപ്പോൾ പ്രൊപികോണസോൾ അല്ലെങ്കിൽ ടിബ്യൂകോണസോൾ (1 മില്ലി/ലിറ്റർ വെള്ളം) പ്രതിരോധമായി സ്പ്രേ ചെയ്യുന്നത് രോഗവ്യാപനം നിയന്ത്രിക്കാൻ സഹായിക്കും.

വെള്ളം കെട്ടിക്കിടക്കുന്നത് ഒഴിവാക്കുക

പൈറിക്കുലേറിയ ഫംഗസ് നനവുള്ള സാഹചര്യങ്ങളിൽ വേഗത്തിൽ വളരുന്നതിനാൽ, കൃഷിയിടങ്ങളിൽ നീർവാർച്ച നല്ലവിധം ഉറപ്പാക്കണം.

മണ്ണ് സോളറൈസേഷൻ (Soil Solarization)

രോഗം വ്യാപകമായ പ്രദേശങ്ങളിൽ കൃഷിക്കിടങ്ങൾ സുതാര്യമായ പോളിതീൻ ഷീറ്റ് കൊണ്ട് 2–4 ആഴ്ച മൂടി വയ്ക്കുക. ഇതിലൂടെ മണ്ണിലുള്ള രോഗാണുക്കളെ ഗണ്യമായി കുറയ്ക്കാം.

വിളമാറ്റം (Crop Rotation)

രോഗബാധിതമായ കൃഷിയിടങ്ങളിൽ തുടർച്ചയായി ഇഞ്ചി കൃഷി ചെയ്യാതെ, മറ്റ് വിളകൾ കൃഷി ചെയ്യുക.

English Summary: New disease threat to ginger cultivation: Pyricularia disease.