അതിശക്തമായ മഴ, മലയിടിഞ്ഞു, റോഡുകൾ തകർന്നു, നിർത്തിയിട്ട വാഹനങ്ങൾ മണ്ണിനടിയിൽ

അതിശക്തമായ മഴ, മലയിടിഞ്ഞു, റോഡുകൾ തകർന്നു, നിർത്തിയിട്ട വാഹനങ്ങൾ മണ്ണിനടിയിൽ

ശൈത്യകാലത്ത്​ യു.എ.ഇയിലെ ഏറ്റവും പ്രധാന വിനോദ ആകർഷണങ്ങളിൽ ഒന്നാണ് ജബൽ ജെയ്​സ്. അവധി ആഘോഷിക്കാൻ ലക്ഷകണക്കിന് വിനോദസഞ്ചാരികളാണ് ഇവിടേക്ക് ഒഴുകിയെത്തുക. എന്നാൽ ജബൽ ജെയ്‌സ് താൽക്കാലികമായി അടച്ചിരിക്കുകയാണിപ്പോൾ. കഴിഞ്ഞ ദിവസങ്ങളിൽ രാജ്യവ്യാപകമായി പെയ്ത അതിശക്​തമായ മഴയിൽ മേഖലയിൽ മലയിടിച്ചിലുണ്ടായ സാഹചര്യത്തിൽ സന്ദർശകരുടെ സുരക്ഷ കണക്കിലെടുത്താണ്​ നടപടിയെന്ന്​ അധികൃതർ അറിയിച്ചു. 

ഈ വർഷം ഏറ്റവും കൂടുതൽ മഴ ലഭിച്ചത് റാസൽഖൈമയിൽ

യു.എ.ഇയിലെ ഏറ്റവും ഉയരം കൂടിയ പർവത നിരകളാണ്​ ജബൽജെയ്​സ്​. ഈ വർഷം ഏറ്റവും കൂടുതൽ മഴ ലഭിച്ചത്​ റാസൽഖൈമയിലായിരുന്നു. മഴക്ക്​ പിന്നാലെയുണ്ടായ മലയിടിച്ചിലിൽ സന്ദർശകരുടെ നിരവധി വാഹനങ്ങൾ മണ്ണിനടിയിലായിരുന്നു. മുന്നറിയിപ്പുകൾ അവഗണിച്ച്​ പർവതങ്ങൾക്ക്​ സമീപം പാർക്ക്​ ചെയ്ത വാഹനങ്ങളാണ്​ അപകടത്തിൽപെട്ടത്​. താമസക്കാരും സന്ദർശകരും ഈ വരുന്ന വാരാന്ത്യങ്ങളിൽ ജബൽജയ്​സിലേക്കുള്ള യാത്ര മുൻകൂട്ടി ആസൂത്രണം ചെയ്യുന്നതിനിടെയാണ്​ അതിശക്​തമായ മഴ പെയ്തത്​. ശൈത്യകാലമായതോടെ ജബൽജെയ്​സ്​ മലനിരകളിൽ താപനില മൂന്ന്​ ഡിഗ്രി സെൽഷ്യസ്​ വരെ​ താഴ്ന്നിരുന്നു. ഇതോടെ ഇവിടങ്ങളിലേക്കുള്ള സന്ദർശകരുടെ ഒഴുക്കും വ്യാപകമാണ്​. ഡിസംബർ, ജനുവരി മാസങ്ങളിൽ താമസക്കാരും സന്ദർശകരും ജബൽ ജയ്​സ്​ മലകമുകളിൽ ക്യാമ്പ്​ ചെയ്യുന്നത്​​ പതിവാണ്​. രാത്രി ക്യാമ്പുകളിൽ കിടന്ന ശേഷം മഞ്ഞുമൂടുന്ന പുലർ​വേളകളിൽ എഴുന്നേൽക്കുന്നത്​ മനോഹരമായ അനുഭവമാണ്​. ഇത്തവണ വിനോദസഞ്ചാരികളുടെ പ്ലാനുകൾ ആകെമൊത്തം തകിടുമറഞ്ഞിരിക്കുകയാണ്.

മഴ, വെള്ളപൊക്കത്തിന് കാരണമായി റോഡുകൾ തകർന്നു

കനത്ത മഴ ഈ​ മേഖലയിൽ വലിയ തോതിലുള്ള മണ്ണിടിച്ചിലും വെള്ളപ്പൊക്കത്തിന്​ കാരണമായിരിക്കുകയാണ്. മലയോര മേഖലയിലേക്കുള്ള റോഡുകൾക്ക്​ തകരാറുകൾ സംഭവിച്ചിരുന്നു. തുടർന്ന്​ റോഡുകളിൽ താൽകാലിക നിയന്ത്രണമേർപ്പെടുത്തിയ ശേഷം സുരക്ഷ സംഘം പരിശോധന നടത്തുകയും അറ്റകുറ്റപണികൾ പൂർത്തിയാക്കുകയുമായിരുന്നു. എന്നാൽ, മലമുകളിലേക്കുള്ള പ്രവേശനം എന്ന്​ പുനസ്ഥാപിക്കുമെന്ന്​ വ്യക്​തമല്ല. ദേശീയ കാലാവസ്ഥ നിരീക്ഷണ കേ​ന്ദ്രത്തിന്‍റെ റിപോർട്ട്​ അനുസരിച്ച്​ അടുത്ത പത്തു ദിവസം കൂടി ജബൽ ജെയ്​സ്​ മലമുകളിൽ പകൽ സമയങ്ങളിൽ താപനില ഒമ്പതിനും 13 ഡിഗ്രി സെൽഷ്യസിനും ഇടയിലായിരിക്കും. രാത്രിയിൽ താപനില മൂന്നിനും നാല്​ ഡിഗ്രി സെൽഷ്യസിനും ഇടയിലേക്ക്​ താഴും. നിലവിൽ തെളിഞ്ഞ അന്തരീക്ഷമാണെങ്കിലും ഈ മാസം 28, 29 തീയതികളിൽ മഴ പ്രതീക്ഷിക്കാമെന്നാണ്​ എൻ.സി.എം പ്രവചിക്കുന്നത്​. 

English Summary : Discover the breathtaking Jebel Jais mountains in the UAE, where recent heavy rains have transformed the landscape. Plan your visit for an unforgettable experience