മുല്ലപ്പെരിയാറില്‍ അസാധാരണ സാഹചര്യമെന്ന് മന്ത്രി, പലയിടത്തും കനത്ത മഴ കനത്ത മഴ തുടരുന്ന സാഹചര്യത്തില്‍ മുല്ലപ്പെരിയാര്‍ ഡാമിലേത് അസാധാരണ സാഹചര്യമെന്ന് മന്ത്രി റോഷി അഗസ്റ്റിന്‍. ഇന്നലെ രാത്രിയില്‍ മാത്രം ഡാമില്‍ ഏഴടിയോളം ജലനിരപ്പ് ഉയര്‍ന്നുവെന്നും അപകടസാധ്യതയുള്ള മേഖലകളില്‍ നിന്ന് പരമാവധി ജനങ്ങളെ ഒഴിപ്പിച്ചെന്നും മന്ത്രി മാധ്യമങ്ങളോട് പറഞ്ഞു.

തമിഴ്‌നാട് ജലവിഭവ വകുപ്പുമായി സഹകരിച്ച് പരമാവധി ജലം പുറത്തേക്ക് ഒഴുക്കാനാണ് ജില്ലാ ഭരണകൂടത്തിന്റെ നീക്കം. അതിന്റെ ഭാഗമായി സെക്കന്‍ഡില്‍ 3000 ഘനയടി വെള്ളം പെരിയാറിലേക്ക് ഒഴുക്കിക്കൊണ്ടാണ് 13 ഷട്ടറുകളും തുറന്നുവിട്ടത്.

തമിഴ്‌നാട്ടിലേക്കും പരമാവധി ജലം ഒഴുക്കിവിടുന്നുണ്ടെന്ന് ഇടുക്കി ജില്ലാ ഭരണകൂടം അറിയിച്ചു. കൃത്യമായ ഇടവേളകളില്‍ ജലം ഒഴുക്കിവിട്ടിട്ടും ജലനിരപ്പ് താഴുന്നില്ലെന്നത് ഭീതിയുളവാക്കുന്നുണ്ട്. കേരളം ആവശ്യപ്പെടുന്നത് 132 അടിയില്‍ മുല്ലപ്പെരിയാറിലെ ജലനിരപ്പ് നിയന്ത്രിക്കണമെന്നായിരുന്നെങ്കിലും ഇതിനോടകം 138 അടിക്ക് മുകളിലേക്ക് ജലനിരപ്പ് ഉയര്‍ത്തുന്നുവെന്നത് കടുത്ത ആശങ്കയാണ് സൃഷ്ടിക്കുന്നത്.

കനത്ത മഴ തുടരുന്ന സാഹചര്യത്തില്‍ സംസ്ഥാനത്ത് ഇന്ന് ഇടുക്കി, കോട്ടയം, പത്തനംതിട്ട ജില്ലകളില്‍ ഓറഞ്ച് അലേര്‍ട്ട് പ്രഖ്യാപിച്ചിരുന്നു. തെക്ക് കിഴക്കന്‍ അറബിക്കടലില്‍ സ്ഥിതി ചെയ്തിരുന്ന ചക്രവാതച്ചുഴി കേരള കര്‍ണാടക തീരത്തിന് സമീപം ന്യൂനമര്‍ദമായി ശക്തി പ്രാപിച്ചതിനാല്‍ അടുത്ത ഏഴ് ദിവസം കൂടി മഴ തുടരുമെന്ന് കേന്ദ്ര കാലാവസ്ഥാ വകുപ്പ് അറിയിച്ചിരുന്നു.

അറബിക്കടലിൽ രൂപപ്പെട്ട ന്യൂനമർദ്ദത്തെ തുടർന്ന് മധ്യ, തെക്കൻ കേരളത്തിലെ ജില്ലകളിൽ ശക്തമായ മഴ തുടരുന്നു. ഇന്നലെ ഉച്ചയ്ക്ക് മുതൽ ശക്തിപ്പെട്ട മഴ പുലർച്ചെ വരെ തുടർന്നു. രാത്രിയോടെ വിവിധ ജില്ലകളിൽ റോഡിൽ വെള്ളക്കെട്ടുകൾ ഉണ്ടായി. ഇടുക്കിയിലാണ് ശക്തമായ മഴ ലഭിച്ചത്. 10 സെന്റിമീറ്ററിൽ അധികം മഴ രേഖപ്പെടുത്തി. ഇടുക്കി ജില്ലയിൽ ശക്തമായ മഴയിൽ പലയിടത്തും മണ്ണിടിച്ചിലും മലവെള്ളപ്പാച്ചിലും ഉണ്ടായി.

വാഹനങ്ങൾ ഒലിച്ചുപോയി

ഇന്നലെ രാത്രി 11 മണി മുതല്‍ പുലര്‍ച്ചെ നാല് വരെ ഇടുക്കിയില്‍ ശക്തമായ മഴയാണ് പെയ്തത്. നിലവില്‍ മഴയ്ക്ക് ശമനമുണ്ട്. തൂക്കുപാലം, നെടുങ്കണ്ടം, കല്ലാര്‍, ബാലഗ്രാം എന്നീ മേഖലകളില്‍ വീടുകളില്‍ വെള്ളം കയറി.

२५७ व्ह्यू | Reel by Weatherman Kerala
നെടുംകണ്ടം കൂട്ടാറിൽ കനത്ത മഴയെ തുടർന്നുണ്ടായ മലവെള്ളപ്പാച്ചിലിൽ നിർത്തിയിട്ട ട്രാവലർ ഒലിച്ചുപോയി. ആളപായമില്ല. നെടുങ്കണ്ടം തൂക്കുപാലം മേഖലകളിൽ...
https://www.facebook.com/weathermankl/videos/1522050192155025/

ട്രാവലർ ഒലിച്ചു പോയി

നെടുങ്കണ്ടം തൂക്കുപാലം മേഖലകളിൽ നിർത്തിയിട്ടിരുന്ന വാഹനങ്ങൾ ഒലിച്ചു പോയി. സ്കൂട്ടറും കാറുമാണ് ഒലിച്ചു പോയത്. നെടുംകണ്ടം കൂട്ടാറിൽ നിർത്തിയിട്ട ട്രാവലർ ഒലിച്ചുപോയി. നെടുങ്കണ്ടം കൂട്ടർ പുഴയിൽ ജലനിരപ്പ് ഉയർന്നതോടെയാണ് എസ്.ബി.ഐ ബാങ്കിന് സമീപം റോഡരികിൽ നിർത്തിയിട്ടിരുന്ന ട്രാവലർ ഒഴുക്കിൽപെട്ട് ഒലിച്ചുപോയത്. ആളപായമില്ല. ഇവിടെ 11 സെൻറീമീറ്റർ മഴ രേഖപ്പെടുത്തിയതായാണ് കണക്ക്.

കല്ലാർ ഡാം തുറന്നു

ജലനിരപ്പ് ഉയർന്നതിനെ തുടർന്ന് കല്ലാർ ഡാം തുറന്നു. നാല് ഷട്ടറുകളും ഉയർത്തി.

ഇത്രയും നീരൊഴുക്ക് 2018 ന് ശേഷം ആദ്യം

2018ന് ശേഷമാദ്യമായാണ് ഇത്തരത്തില്‍ ഇത്രയധികം വെള്ളം ഒഴുകിയെത്തിയത്. തുടര്‍ന്നാണ് സ്പില്‍വേ ഷട്ടറുകള്‍ തുറന്ന് ജലനിരപ്പ് ക്രമീകരിക്കാനുള്ള നടപടി സ്വീകരിക്കുമെന്ന് തമിഴ്‌നാട് അറിയിച്ചത്. നിലവിൽ നീരൊഴുക്ക് കുറഞ്ഞിട്ടുണ്ട്.

ഇന്നും ശക്തമായ മഴ തുടരും

കേരളത്തിൽ ഇന്നും ശക്തമായ മഴ തുടരാൻ സാധ്യതയെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. പത്തനംതിട്ട, കോട്ടയം, എറണാകുളം, ഇടുക്കി, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട് ജില്ലകളിൽ യെല്ലോ അലർട്ട് പ്രഖ്യാപിച്ചു. മലയോര മേഖലകളിൽ മഴ കനക്കാൻ സാധ്യതയുണ്ട്. ഉച്ചയ്ക്കു ശേഷമുള്ള ഇടിമിന്നലും കാറ്റോടും കൂടിയ മഴയ്ക്കാണ് സാധ്യത.

കടൽ പ്രക്ഷുബ്ധം, കാറ്റിന് സാധ്യത

ശക്തമായ കാറ്റിനും കടൽ പ്രക്ഷുബ്ധമാകാനും സാധ്യതയുള്ളതിനാൽ കേരള കർണാടക ലക്ഷദ്വീപ് തീരങ്ങളിൽ മീൻപിടുത്തത്തിന് വിലക്കേർപ്പെടുത്തി. തെക്ക് കിഴക്കൻ അറബികടലിനും അതിനോട് ചേർന്നുള്ള ലക്ഷദ്വീപ് പ്രദേശങ്ങൾക്കും മുകളിൽ സ്ഥിതിചെയ്യുന്ന ചക്രവാതചുഴി ന്യൂനമർദ്ദമായി ശക്തി പ്രാപിക്കും.

ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലിമീറ്ററിൽ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അർത്ഥമാക്കുന്നത്. ഇടിമിന്നലോടു കൂടിയ മഴയാണ് പ്രതീക്ഷിക്കുന്നത്.

English Summary: Heavy rains in the south, traveler washed away in Idukki, all 13 shutters of Mullaperiyar will be opened