താറാവിനെ അറുക്കുന്നതിനിടയിൽ വയറ്റിൽ നിന്ന് 1. 65 ലക്ഷം രൂപയുടെ സ്വർണ്ണകണങ്ങൾ കണ്ടെത്തി
ചൈനയിലെ ഹുനാൻ പ്രവിശ്യയിലെ ലോങ്ഹുയി കൗണ്ടിയിൽ താറാവിനെ അറുക്കുന്നതിനിടെ അതിന്റെ വയറ്റിൽ നിന്ന് സ്വർണക്കണങ്ങൾ കണ്ടെത്തിയ സംഭവം കൗതുകമുണർത്തുന്നു. കഴിഞ്ഞ മാസം ഗ്രാമവാസിയായ ലിയു എന്ന വ്യക്തിയാണ് താറാവിനെ അറുക്കുന്നതിനിടെ വയറ്റിൽ നിന്ന് ചെറിയ സ്വർണ്ണക്കണങ്ങൾ കണ്ടെത്തിയത്.
ശേഷം ഈ കണങ്ങൾ പരിശോധിച്ചപ്പോൾ യഥാർത്ഥ സ്വർണ്ണമാണെന്ന് സ്ഥിരീകരിച്ചു. ഏകദേശം 10 ഗ്രാം ഭാരമുള്ള ഈ സ്വർണ്ണത്തിന് 12,000 യുവാൻ (ഏകദേശം 1.65 ലക്ഷം രൂപ) വിലവരുമെന്നാണ് ചൈനീസ് മാധ്യമങ്ങൾ റിപ്പോർട്ട് ചെയ്യുന്നത്.
സ്വർണം താറാവിന്റെ വയറ്റിലെത്തിയത് എങ്ങനെയെന്നതാണ് ഇപ്പോൾ പ്രദേശവാസികൾക്കിടയിൽ ചർച്ചയായിരിക്കുന്നത്. ഗ്രാമത്തിൽ താറാവുകളെ പൊതുവെ തുറന്നുവിട്ടാണ് വളർത്തുന്നത്. സ്വർണ്ണ നിക്ഷേപങ്ങൾക്ക് ഒരുകാലത്ത് പ്രശസ്തമായിരുന്ന ഒരു നദിക്കരയിലാണ് അവ സാധാരണയായി ഭക്ഷണം തേടുന്നത്. നദിക്കരയിലെ ചെളിയിൽ നിന്ന് ഭക്ഷണം തേടുന്നതിനിടെ സ്വർണക്കണങ്ങൾ വയറ്റിൽ എത്തിയിരിക്കാമെന്നാണ് ലിയുവിന്റെയും നാട്ടുകാരുടെയും നിഗമനം.
സാധാരണയായി സ്വർണം മനുഷ്യർക്കോ മൃഗങ്ങൾക്കോ ദഹിക്കാത്തതാണെന്നും അത് ദഹനനാളത്തിലൂടെ കേടുപാടില്ലാതെ കടന്നുപോകുന്നതാണെന്നും വിദഗ്ധർ പറയുന്നു. എന്നാൽ വലിയ കഷണങ്ങളോ മലിനതകളോ ഉണ്ടെങ്കിൽ കുടൽതടസ്സം പോലുള്ള പ്രശ്നങ്ങൾക്ക് കാരണമായേക്കാമെന്നും അവർ മുന്നറിയിപ്പ് നൽകുന്നു.
വലിയ അളവിൽ സ്വർണം ലഭിച്ചത് അപൂർവം
ഇത്തരത്തിലുള്ള സംഭവം ഇതാദ്യമല്ലെന്നും ലിയു പറയുന്നു. മുമ്പും ഗ്രാമത്തിലെ ചിലർ താറാവുകളുടെ വയറ്റിൽ നിന്ന് ചെറിയ അളവിൽ സ്വർണം കണ്ടെത്തിയിട്ടുണ്ടെന്നാണ് വിവരം. എന്നാൽ ഇത്രയും വലിയ അളവിൽ സ്വർണം ലഭിച്ചത് അപൂർവമാണെന്നും അദ്ദേഹം കൂട്ടിച്ചേർത്തു.
അതേസമയം, കണ്ടെത്തിയ കണങ്ങൾ യഥാർത്ഥത്തിൽ സ്വർണമാണോ എന്ന് ഔദ്യോഗികമായി സ്ഥിരീകരിക്കാൻ കൂടുതൽ പരിശോധന ആവശ്യമാണെന്ന് ലോങ്ഹുയി കൗണ്ടിയിലെ പ്രകൃതി വിഭവ വകുപ്പ് അറിയിച്ചു. കഴിഞ്ഞ വർഷം ഇതേ പ്രദേശത്തെ ചെൻഷുയി നദിയിൽ മണൽ കഴുകുന്നതിനിടെ ഗ്രാമവാസികൾക്ക് 10 ഗ്രാമിലധികം സ്വർണം ലഭിച്ച സംഭവവും അധികൃതർ ചൂണ്ടിക്കാട്ടുന്നു.
1970 മുതൽ 1990 വരെ ഈ നദിക്കര സ്വർണ്ണാന്വേഷണത്തിന് പ്രസിദ്ധമായിരുന്നുവെങ്കിലും പിന്നീട് സർക്കാർ സ്വകാര്യ ഖനന പ്രവർത്തനങ്ങൾക്ക് നിരോധനം ഏർപ്പെടുത്തി. ചൈനീസ് നിയമപ്രകാരം ഭൂഗർഭ ധാതുക്കൾ സംസ്ഥാനത്തിന്റെ സ്വത്തായതിനാൽ താറാവിന്റെ വയറ്റിൽ നിന്ന് കണ്ടെത്തിയ സ്വർണ്ണത്തിന്റെ ഉടമസ്ഥാവകാശം സംബന്ധിച്ച് അന്തിമ തീരുമാനം അധികൃതർ പിന്നീട് കൈക്കൊള്ളും.
English Summary : A routine chore turned into a windfall for a villager named Liu in Longhui County, Hunan Province, when he discovered approximately 10 grams of authentic gold inside a duck's stomach while preparing it for a meal. The find, valued at roughly 12,000 Yuan ($1,650 USD / ₹1.40 Lakh), has sparked a wave of curiosity across the region.