അബൂദബിയിൽ ആളില്ലാ ആകാശ വാഹനങ്ങൾ (ഡ്രോണുകൾ) ഉപയോഗിച്ചുള്ള പാഴ്സൽ ഡെലിവറിയുടെ പരീക്ഷണം വിജയകരം. സ്മാർട്ട് ഡെലിവറി സൊല്യൂഷനുകളിലും ഓട്ടോണമസ് ഏരിയൽ ലോജിസ്റ്റിക്സ് സാങ്കേതിക വിദ്യകളിലും വൈദഗ്ധ്യമുള്ള എൽ.ഒ.ഡി.ഡി ഓട്ടോണമസ് എന്ന കമ്പനിയുമായി സഹകരിച്ച് ആണ് പരീക്ഷണം നടത്തിയിരുന്നത്.
പരീക്ഷണ വേളയിൽ റോബോട്ടിക് കൈ ഘടിപ്പിച്ച ഡ്രോൺ, ഡെലിവറി പ്രവർത്തനങ്ങളിൽ ഉയർന്ന നിലവാരത്തിലുള്ള കൃത്യതയും കാര്യക്ഷമതയും ഉറപ്പാക്കുന്ന നൂതന നാവിഗേഷൻ സംവിധാനത്തെ ആശ്രയിച്ച് അബൂദബി അൽ സംഹയിൽ നിന്ന് ഖലീഫ ഇൻഡസ്ട്രിയൽ സോണി(കിസാദ്)ലേക്ക് പാഴ്സൽ എത്തിച്ചു നൽകി . സ്മാർട്ട് മൊബിലിറ്റിയുടെ മുൻനിര കേന്ദ്രമെന്ന നിലയിൽ അബൂദബിയുടെ സ്ഥാനം ശക്തിപ്പെടുത്താനുള്ള സ്മാർട്ട് ആൻഡ് ഓട്ടോണമസ് സിസ്റ്റംസ് കൗൺസിലിന്റെ (എസ്.എ.എസ്.സി) തന്ത്രത്തിന്റെ ഭാഗമായി സേവന കാര്യക്ഷമത വർധിപ്പിക്കാനും, സുസ്ഥിര അടിസ്ഥാന സൗകര്യങ്ങൾ പ്രാപ്തമാക്കാനും, എമിറേറ്റിലുടനീളം ജീവിത നിലവാരം മെച്ചപ്പെടുത്താനുമുള്ള ആധുനിക ഗതാഗത സംവിധാനങ്ങൾ സ്വീകരിക്കാൻ ഐ.ടി.സി നടത്തി വരുന്ന ശ്രമങ്ങളെ അടിസ്ഥാനമാക്കിയാണ് ഈ പരീക്ഷണം നടത്തിയത്.
ആളില്ലാ വിമാന സംവിധാനങ്ങൾ (യു.എ.എസ്)ക്കായുള്ള ഏകീകൃത ദേശീയ പ്ലാറ്റ്ഫോം വഴി ഡ്രോൺ പ്രവർത്തനങ്ങൾ നിയന്ത്രിക്കുകയും കൈകാര്യം ചെയ്യുകയും ചെയ്യും. വേഗത്തിലുള്ള അംഗീകാരങ്ങളും, നിയമങ്ങൾ, സുരക്ഷാ മാനദണ്ഡങ്ങൾ, സ്വകാര്യതാ ആവശ്യകതകൾ, വ്യോമാതിർത്തി സംരക്ഷണം എന്നിവയും ഇതു ഉറപ്പാക്കും. എൽ.ഒ.ഡി.ഡി ഓട്ടോണമസ് അതിന്റെ സ്വയം നിയന്ത്രിത ഹൈബ്രിഡ് എയർക്രാഫ്റ്റ് ഡെവലപ്മെന്റ് പ്രോഗ്രാമായ 'ഹിലി' വിടോൾ (വെർട്ടിക്കൽ ടേക്ക്-ഓഫ് ആൻഡ് ലാൻഡിംഗ്) സംബന്ധമായുള്ള ഏറ്റവും പുതിയ അപ്ഡേറ്റുകളും അവതരിപ്പിച്ചിട്ടുണ്ട്. ഇത് ഹെവി എയർ കാർഗോയ്ക്കായി രൂപകൽപന ചെയ്തിട്ടുള്ളതാണ്.
ഇലക്ട്രിക് മോട്ടോറുകൾ ആന്തരിക ജ്വലന എഞ്ചിനുമായി സംയോജിപ്പിച്ചിരിക്കുന്ന നൂതന സംവിധാനത്താൽ പ്രവർത്തിക്കുന്ന ഈ വിമാനത്തിന് 300 കിലോമീറ്റർ ദൂരത്തേക്ക് 250 കിലോ വരെ ഭാരം വഹിച്ച് സഞ്ചരിക്കാൻ സാധിക്കും . പുറപ്പെടുന്നതിനും ഇറങ്ങുന്നതിനും ലംബ ശേഷി(വിടോൾ) ഉള്ളതിനാൽ, വിമാനത്താവളങ്ങൾ പോലുള്ള പരമ്പരാഗത അടിസ്ഥാന സൗകര്യങ്ങളുടെ ആവശ്യമില്ലാതെ തന്നെ ഇതിന് പ്രവർത്തിക്കാൻ സാധിക്കുന്നുണ്ട്. ലോജിസ്റ്റിക്സ് ഹബ്ബുകളെ പരസ്പരം ബന്ധിപ്പിച്ച്, വിതരണ ശൃംഖലാ കാര്യക്ഷമത വർധിപ്പിച്ച്, ലോജിസ്റ്റിക്സ് മേഖലയുടെ വളർച്ചയെ പിന്തുണയ്ക്കുന്നതിലൂടെ, ഇടത്തരം എയർ കാർഗോയിൽ മുന്നേറ്റത്തെ പ്രതിനിധീകരിക്കാൻ ഹിലിക്ക് സാധിക്കുമെന്നാണ് പ്രതീക്ഷിക്കുന്നത്.
"ഗതാഗതത്തിലും ചരക്കുനീക്കത്തിലും ഏറ്റവും പുതിയ ആഗോള കണ്ടുപിടിത്തങ്ങൾ സ്വീകരിക്കുന്നതിലും, സേവന നിലവാരം മെച്ചപ്പെടുത്താൻ സാങ്കേതികവിദ്യ ഉപയോഗപ്പെടുത്തുന്നതിലും അബൂദബിയുടെ പ്രതിബദ്ധതയാണ് ഈ ഡ്രോണുകളുടെ ഉപയോഗം പ്രതിഫലിപ്പിക്കുന്നത്'' -ഐ.ടി.സി ആക്ടിംഗ് ഡയരക്ടർ ജനറൽ ഡോ. അബ്ദുള്ള ഹമദ് അൽ ഗാഫിലി പറഞ്ഞു. ഇന്റഗ്രേറ്റഡ് ട്രാൻസ്പോർട്ട് സെന്ററിൽ സ്മാർട്ട്, സുസ്ഥിര ഗതാഗത ആവാസ വ്യവസ്ഥ കെട്ടിപ്പടുക്കാനും, പ്രമുഖ ആഗോള ലക്ഷ്യസ്ഥാനമെന്ന നിലയിൽ അബൂദബിയുടെ സ്ഥാനം ശക്തിപ്പെടുത്താനും സംഭാവനയാകുന്ന ഇത്തരത്തിലുള്ള മുൻനിര സംരംഭങ്ങളെ പിന്തുണയ്ക്കാൻ ഞങ്ങൾ താൽപര്യപ്പെടുന്നു" -ഡോ. അൽ ഗാഫിലി വ്യക്തമാക്കി. ഡ്രോൺ അധിഷ്ഠിത ഡെലിവറി സംവിധാനം ഗതാഗത വിതരണ സേവനങ്ങളുടെ കാര്യക്ഷമതയും വേഗതയും മെച്ചപ്പെടുത്തുന്നതാണ്.
ദ്രുത ഗതിയിലുള്ള ഇ-കൊമേഴ്സ് വളർച്ചയ്ക്കും വേഗമേറിയതും കൂടുതൽ ഫലപ്രദവുമായ പരിഹാരങ്ങൾക്കുമായുള്ള നീക്കത്തിനും ഇടയിൽ വിതരണ ശൃംഖലകളുടെയും ലോജിസ്റ്റിക്സിന്റെയും ആവശ്യങ്ങൾ പരിഹരിക്കുന്നുവെന്നും എൽ.ഒ.ഡി.ഡി ഓട്ടോണമസ് സി.ഇ.ഒ റഷീദ് മതാർ അൽ മന്നായ് പറഞ്ഞു. ഡ്രോണുകൾ ഉപയോഗിച്ച്, പരമ്പരാഗത രീതികൾക്ക് ആവശ്യമായ നിരവധി ദിവസങ്ങൾക്ക് പകരം, ഏതാനും മണിക്കൂറുകൾക്കുള്ളിൽ പാഴ്സലുകൾ എത്തിക്കാൻ കഴിയുമെന്നും അദ്ദേഹം കൂട്ടിച്ചേർത്തു.
മൂന്നു മാസത്തിനു ശേഷമുള്ള പരീക്ഷണം
വിഞ്ച് അധിഷ്ഠിത സംവിധാനം ഉപയോഗിച്ച് എമിറേറ്റിൽ ആദ്യമായി ഒരു ഡ്രോൺ വിജയകരമായി ഒരു പാഴ്സൽ എത്തിച്ചതിന് ഏകദേശം മൂന്ന് മാസത്തിന് ശേഷമാണ് ഇത് വീണ്ടും ആരംഭിച്ചത്.
2026 രണ്ടാം പകുതിയോടെ ആളില്ലാ ആകാശ വാഹനങ്ങളാലുള്ള പാഴ്സൽ, കാർഗോ ഡെലിവറികൾ
ജൂണിൽ ഖലീഫ സിറ്റിയിലാണ് പരീക്ഷണം നടത്തിയത്. അവിടെ ഒരു പ്രാദേശിക പോസ്റ്റ് ഓഫിസിൽ നിന്ന് ഡ്രോപ് സോണിലേക്ക് ഡ്രോൺ ഒരു സിമുലേറ്റഡ് പാക്കേജ് എത്തിച്ചു. അബൂദബി ഇൻവെസ്റ്റ്മെന്റ് ഓഫിസ് (എഡിയോ) യുടെ പിന്തുണയോടെയാണ് ഈ പ്രവർത്തനം നടന്നത്. ഏവിയേഷൻ ടെക്നോളജി സ്ഥാപനമായ എൽ.ഒ.ഡി.ഡിയും ലോജിസ്റ്റിക്സ് ഹോൾഡിംഗ് ഗ്രൂപ്പ് 7X ഉം ചേർന്നാണ് ഈ പ്രവർത്തനം നടപ്പാക്കിയത്.
ആളില്ലാ ആകാശ വാഹനങ്ങൾ 2026 രണ്ടാം പകുതിയോടെ
വിമാന സർവിസുകൾ പതിവായി പരീക്ഷിച്ചു കൊണ്ടിരിക്കുന്നതിനാൽ, അടുത്ത വർഷം രണ്ടാം പകുതിയോടെ ആളില്ലാ ആകാശ വാഹനങ്ങൾ ഉപയോഗിച്ച് പാഴ്സൽ, കാർഗോ ഡെലിവറികൾ ആരംഭിക്കാൻ എൽ.ഒ.ഡി.ഡി ഒരുങ്ങുകയാണ്. , "ചെലവിന്റെ ഒരു ചെറിയ ഭാഗത്തിന്" സേവനങ്ങൾ വാഗ്ദാനം ചെയ്യുമെന്ന് ചീഫ് എക്സിക്യൂട്ടിവ് പറയുന്നു. 2024 ഒക്ടോബറിൽ തന്നെ ദുബൈ ഔദ്യോഗികമായി ഡ്രോണുകൾ വഴി മരുന്നുകളുടെയും പാഴ്സലുകളുടെയും ഡെലിവറി ആരംഭിച്ചിരുന്നു.
ദുബൈ സിവിൽ ഏവിയേഷൻ അതോറിറ്റി (ഡി.സി.എ.എ) ദുബൈ സിലിക്കൺ ഒയാസിസിൽ (ഡി.എസ്.ഒ) ഉൽപന്നങ്ങൾ വിതരണം ചെയ്യാനുള്ള ആദ്യ ലൈസൻസ് കീറ്റ ഡ്രോണിന് നൽകി. പ്രാരംഭ ഘട്ടത്തിൽ ആറ് ഡ്രോണുകൾ ആണുള്ളത്. ഡ്രോണുകളുടെ ആവശ്യകത കൂടുന്നതിനനുസരിച്ച്, ദുബൈ ആസ്ഥാനമായ നിർമ്മാതാക്കളായ ഇ.എ.എൻ.എ.എൻ, യു.എ.ഇയിൽ വാണിജ്യ ആവശ്യങ്ങൾക്കായി ഡ്രോണുകൾ നിർമിക്കുന്ന ആദ്യ ഫാക്ടറി സ്വന്തമാക്കി.
ഘടകങ്ങളുടെ അന്താരാഷ്ട്ര ഉറവിടം ഉടൻ ഒഴിവാക്കുകയും പൂർണമായും പ്രാദേശിക ഉൽപാദനത്തിലേക്ക് മാറുകയും ചെയ്യുക എന്നതാണ് ലക്ഷ്യം. തുടർന്ന് ഡ്രോണുകൾ വ്യത്യസ്ത രാജ്യങ്ങൾക്ക് അവയുടെ തനതായ ആവശ്യങ്ങൾക്കായി വിൽക്കാൻ കഴിയും. ഇത് സ്മാർട്ട് ഏവിയേഷനിൽ യു.എ.ഇയെ നേതാവായി സ്ഥാനപ്പെടുത്തുന്നുവെന്നും ഇതുസംബന്ധിച്ച ഒരു റിപ്പോർട്ടിൽ പറയുന്നു.