മഞ്ഞുമൂടിയ ബുർജ് ഖലീഫ, യുഎഇ നഗരം മുഴുവൻ മഞ്ഞു പുതച്ചു, എങ്ങും വെളുത്ത നിറം ചിത്രം പങ്കു വെച്ച് ദുബൈ കിരീടാവകാശി

മഞ്ഞുമൂടിയ ബുർജ് ഖലീഫ, യുഎഇ നഗരം മുഴുവൻ മഞ്ഞു പുതച്ചു, എങ്ങും വെളുത്ത നിറം ചിത്രം പങ്കു വെച്ച് ദുബൈ കിരീടാവകാശി

ദുബൈയുടെ അംബരചുംബിയും ആകാശരേഖയും ലോകത്തിലെ ഏറ്റവും ഉയരം കൂടിയ കെട്ടിടവുമായ ബുർജ് ഖലീഫയുടെ മനോഹരമായതും അഭ്ഭുതപെടുത്തുന്നതുമായ ഫോട്ടോ പങ്കുവച്ചിരിക്കുകയാണ് ദുബൈ കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം. ബുർജ് ഖലീഫ മഞ്ഞുമൂടി കിടക്കുന്ന അമ്പരപ്പിക്കുന്ന ചിത്രം തൻ്റെ ഇൻസ്റ്റാഗ്രാം സ്റ്റോറിയിലൂടെയാണ് അദ്ദേഹം പങ്കുവെച്ചത്. നിമിഷങ്ങൾക്കകം സോഷ്യൽ മീഡിയയിൽ ഈ ചിത്രം തരംഗമായി മാറി. "നാളെ കാലാവസ്ഥ എങ്ങനെയായിരിക്കും?" എന്ന അടിക്കുറിപ്പോടെയാണ് ഷെയ്‌ഖ് ഹംദാൻ ഈ ചിത്രം പോസ്റ്റ് ചെയ്‌തത്‌. നഗരമധ്യവും ബുർജ് ഖലീഫയും വെളുത്ത മഞ്ഞിനാൽ പുതഞ്ഞുനിൽക്കുന്ന ദൃശ്യവും ചിത്രത്തിൽ കാണാം.

തണുപ്പിൻ്റെ കൊടും തീവ്രത ഈ ചിത്രം കാണിച്ചു തരുന്നു

യഥാർത്ഥ മഞ്ഞുവീഴ്ച‌യെക്കാൾ ഉപരി, നിലവിലെ തണുത്ത കാലാവസ്ഥയെ സൂചിപ്പിക്കുന്ന ഒരു പ്രതീകാത്മക ചിത്രമാണ് കിരീടാവകാശി പങ്കുവെച്ചതെന്നാണ് വിലയിരുത്തപ്പെടുന്നത്. എങ്കിലും, യുഎഇയിൽ കഴിഞ്ഞ കുറച്ച് ദിവസങ്ങളായി അനുഭവപ്പെടുന്ന കൊടും തണുപ്പിന്റെ തീവ്രത ഈ ചിത്രം കൃത്യമായി പ്രതിഫലിപ്പിക്കുന്നുണ്ട്. 

അതി ശക്തമായ തണുത്ത കാറ്റ്

അതിശൈത്യമാണ് യുഎഇയിൽ ഇപ്പോഴുള്ളത്. ഈ ശൈത്യകാലത്തെ ഏറ്റവും കുറഞ്ഞ താപനിലയാണ് കഴിഞ്ഞ ദിവസങ്ങളിൽ രേഖപ്പെടുത്തിയത്. രാജ്യത്തിന്റെ ചില ഭാഗങ്ങളിൽ 0.2°C വരെ താഴ്ന്നതായി ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. ജനുവരി അവസാനത്തോടെ തണുപ്പ് കൂടുമെന്ന പ്രവചനങ്ങൾ ശരിവെക്കുന്ന രീതിയിലാണ് നിലവിലെ മാറ്റങ്ങൾ. ദുബൈ നഗരത്തിൽ ഇപ്പോൾ ശക്തമായ തണുത്ത കാറ്റാണ് അനുഭവപ്പെടുന്നത്. ജാക്കറ്റുകളും സ്കാർഫുകളും ഉൾപ്പെടെയുള്ള ശൈത്യകാല വസ്ത്രങ്ങൾ ധരിച്ചാണ് താമസക്കാർ പുറത്തിറങ്ങുന്നത്. മരുഭൂമിയിലെ ചൂടിൽ നിന്ന് മാറി നഗരം അതിശൈതൃത്തിൽ മുങ്ങിയിരിക്കുകയാണ്. 

കിഴക്ക് നിന്നുള്ള ന്യൂനമർദ്ദവും പടിഞ്ഞാറ് നിന്നുള്ള ഉയർന്ന മർദ്ദവും കൂട്ടിമുട്ടുന്നു

വരും ദിവസങ്ങളിലും താപനിലയിൽ ഗണ്യമായ കുറവുണ്ടാകുമെന്ന് കാലാവസ്ഥാ നിരീക്ഷണ കേന്ദ്രം സ്ഥിരീകരിച്ചു. കിഴക്ക് നിന്നുള്ള ന്യൂനമർദ്ദവും പടിഞ്ഞാറ് നിന്നുള്ള ഉയർന്ന മർദ്ദവും കൂട്ടിമുട്ടുന്നതാണ് ഈ അപ്രതീക്ഷിത തണുപ്പിന് കാരണം. കാറ്റിൽ മണലും പൊടിയും ഉയരുന്നത് മൂലം റോഡുകളിൽ ദൃശ്യപരത കുറയാൻ സാധ്യതയുള്ളതിനാൽ വാഹനയാത്രികർ ജാഗ്രത പാലിക്കണം.

ഉൾപ്രദേശങ്ങളിൽ താപനില 5° മുതൽ 11°C വരെയും, പർവതമേഖലകളിൽ 3°C മുതൽ 8°C വരെയും താഴാൻ സാധ്യതയുണ്ട്. രാത്രികാലങ്ങളിലും പുലർച്ചെയും ഈർപ്പം കൂടുന്നതിനാൽ മൂടൽമഞ്ഞ് രൂപപ്പെടാനും സാധ്യതയുണ്ടെന്ന് അധികൃതർ മുന്നറിയിപ്പ് നൽകി. 

English Summary : Temperatures are likely to drop to 5° to 11°C in interior areas and 3° to 8°C in mountainous areas.