ബംഗാള്‍ ഉള്‍ക്കടലില്‍ പുതിയ ന്യൂനമര്‍ദം വരുന്നു, ചുഴലിക്കാറ്റായേക്കും, കനത്ത മഴ സാധ്യത

കേരളത്തില്‍ വൃശ്ചിക പുലരിയെ വരവേറ്റ മഴ വരും ദിവസങ്ങളിലും തുടരുമെന്ന് കാലാവസ്ഥ നിരീക്ഷകർ. അറബിക്കടലിലും ബംഗാള്‍ ഉള്‍ക്കടലിലും ന്യൂനമര്‍ദം നിലനില്‍ക്കുന്ന സാഹചര്യം കേരളത്തിലുടനീളം ദുര്‍ബലമായ തുലാവര്‍ഷത്തെ സജീവമാക്കും. കഴിഞ്ഞ ദിവസങ്ങളില്‍ കേരളത്തില്‍ ലഘുമേഘവിസ്‌ഫോടനമുള്‍പ്പെടെ മഴ കനത്തു പെയ്തു. ഇന്നലെയും ഇന്നും ലഭിച്ച മഴയും ശക്തമായിരുന്നു.

മഴയ്ക്ക് കാരണം കന്യാകുമാരി കടലിനു മുകളില്‍ ന്യൂനമര്‍ദം

ഏതാനും ദിവസം മുന്‍പ് ബംഗാള്‍ ഉള്‍ക്കടലില്‍ ശ്രീലങ്കന്‍ തീരത്തിനു സമീപത്തായി രൂപം കൊണ്ട ചക്രവാതച്ചുഴി കന്യാകുമാരി കടലിനു മുകളില്‍ വച്ച് ന്യൂനമര്‍ദമാകുകയായിരുന്നു. പതിയെ വടക്കു പടിഞ്ഞാറ് ദിശയില്‍ നീങ്ങുന്ന സിസ്റ്റം കേരളത്തില്‍ കനത്ത മഴ നല്‍കി. വരും ദിവസങ്ങളില്‍ ഈ സിസ്റ്റം അറബിക്കടലിലെത്തും. തെക്കുപടിഞ്ഞാറന്‍ അറബിക്കടലില്‍ ശ്രീലങ്കക്ക് സമീപമാകും അടുത്ത ദിവസം ന്യൂനമര്‍ദമുണ്ടാകുക.

വ്യാഴം കേരളത്തിലുടനീളം മഴ

വ്യാഴാഴ്ച കേരളത്തില്‍ എല്ലായിടത്തും മഴക്ക് ഈ സിസ്റ്റം കാരണമായേക്കും. വടക്കന്‍ കേരളത്തിലാണ് പ്രധാനമായും മഴ പ്രതീക്ഷിക്കുന്നത്. തെക്ക് മധ്യ അറബിക്കടലില്‍ വച്ച് സിസ്റ്റം വീണ്ടും ശക്തിപ്പെടാനും സാധ്യതയുണ്ട്.

ബംഗാള്‍ ഉള്‍ക്കടലില്‍ പുതിയ ന്യൂനമര്‍ദം

ബംഗാള്‍ ഉള്‍ക്കടലില്‍ തെക്കുകിഴക്കന്‍ മേഖലയില്‍ ഈ മാസം 21 ന് മറ്റൊരു ന്യൂനമര്‍ദം കൂടി രൂപം കൊള്ളും. ഈ സിസ്റ്റം തമിഴ്‌നാട്ടിലും കേരളത്തിലും മഴ നല്‍കുമെന്നാണ് പ്രാഥമിക സൂചനകള്‍. ഈ ന്യൂനമര്‍ദം ശക്തിപ്പെടാനും ചുഴലിക്കാറ്റിലേക്ക് എത്താനുമുള്ള സാധ്യത ഇപ്പോള്‍ തള്ളിക്കളയാനാകില്ല. ക്ലൈമറ്റോളജി പ്രകാരം നവംബര്‍ മാസത്തില്‍ രൂപപ്പെടുന്ന ചുഴലിക്കാറ്റുകള്‍ തമിഴ്‌നാട് തീരത്താണ് കരകയറാറുള്ളത്.

കഴിഞ്ഞ ഒക്ടോബറിലാണ് ബംഗാള്‍ ഉള്‍ക്കടലില്‍ തീവ്ര ചുഴലിക്കാറ്റ് മന്‍ത രൂപപ്പെട്ടത്. ബംഗാള്‍ ഉള്‍ക്കടലിലെ ന്യൂനമര്‍ദങ്ങള്‍ തമിഴ്‌നാട്, ആന്ധ്രാപ്രദേശ്, ഒഡിഷ, പശ്ചിമ ബംഗാള്‍ എന്നീ തീരങ്ങളിലേക്കാണ് സാധ്യത നീങ്ങുക. ഇവയില്‍ തന്നെ ഭൂരിഭാഗവും ആന്ധ്രാപ്രദേശിലേക്കോ, ഒഡിഷയിലേക്കോ ആണ് നീങ്ങാറുള്ളത്.

വരുന്ന ആഴ്ച കേരളത്തില്‍ കനത്ത മഴ സാധ്യത പ്രതീക്ഷിക്കാം. തമിഴ്‌നാട് ഉള്‍പ്പെടെ കിഴക്കന്‍ തീരത്തേക്ക് യാത്ര ചെയ്യുന്നവരും കാലാവസ്ഥാ അപ്‌ഡേറ്റുകള്‍ മനസിലാക്കി യാത്ര പ്ലാന്‍ ചെയ്യണം.

English Summary: A recent depression formed near Sri Lanka is moving northwest, bringing heavy rains to Kerala. Discover the latest updates on this weather system's path.