യുഎഇയിൽ കാലാവസ്ഥ മാറ്റം തുടരുകയാണ് തണുപ്പും മേഘാവൃതമായ അന്തരീക്ഷവും തുടരുന്നതിനൊപ്പം ചില പ്രദേശങ്ങളിൽ മഴയ്ക്കും സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകുന്നു. മഴ സാധ്യത കൂടുതൽ നിലനിൽക്കുന്നത് കിഴക്കൻ ഭാഗങ്ങളിലേക്കാണ്. കഴിഞ്ഞ ദിവസങ്ങളിലും ഈ പ്രദേശങ്ങളിൽ മഴ ലഭിച്ചിട്ടുണ്ടായിരുന്നു. കൂടുതൽ മഴ ലഭിച്ചത് ഫുജൈറയ്ക്കും അൽ ഐനും ഇടയിലുമാണ്.

അതേസമയം പകൽ സമയങ്ങളിൽ ആകാശം ഭാഗികമായി മേഘാവൃതമായിരിക്കും. ഈ മേഘങ്ങൾ പിന്നീട് മഴമേഘങ്ങളായി മാറാൻ സാധ്യതയുണ്ടെന്ന് എൻ സിഎം. താപനില കുറയുന്നുണ്ടെങ്കിലും ഈർപ്പത്തിന്റെ അളവ് ഉയർന്ന നിലയിൽ തുടരുന്നു. കൂടാതെ തീരദേശ പ്രദേശങ്ങളിൽ രാത്രിയിലും ഇന്ന് രാവിലെയും ഈർപ്പം 90 ശതമാനം വരെ ഉയരാൻ സാധ്യത.

ദുബായ്, ഷാർജ തുടങ്ങിയ തീരപ്രദേശങ്ങളിൽ താപനില 35 ഡിഗ്രി സെൽഷ്യസ് മുതൽ 38 ഡിഗ്രി സെൽഷ്യസ് വരെ ഉയരും. എന്നാൽ ഉൾപ്രദേശങ്ങളിൽ ഇത് 33 ഡിഗ്രി സെൽഷ്യസ് മുതൽ 38 ഡിഗ്രി സെൽഷ്യസ് വരെ ആകും. അതേസമയം പർവതപ്രദേശങ്ങളിൽ തണുപ്പ് കൂടുതലായിരിക്കുമെന്നും അറിയിച്ചു.

ഏറ്റവും കുറവ് താപനില 22 ഡിഗ്രി സെൽഷ്യസ് മുതൽ 28 ഡിഗ്രി സെൽഷ്യസിനും ഇടയിൽ ആയിരിക്കും. രാജ്യത്തിന്റെ പല ഭാഗങ്ങളിലും ശക്തമായ കാറ്റ് വീശാൻ സാധ്യത. മണിക്കൂറിൽ 38 കിലോമീറ്റർ വരെ വേഗതയിൽ കാറ്റ് വീശാൻ സാധ്യതയുള്ളതായാണ് നാഷണൽ സെന്റർ ഓഫ് മെറ്റീരിയോളജി മുന്നറിയിപ്പ് നൽകിയിട്ടുള്ളത്.

കൂടാതെ വരും ആഴ്ചയിലും സമാനമായ കാലാവസ്ഥ തുടരാനാണ് സാധ്യത. അബുദാബി റോഡുകളിൽ ഇന്ന് രാവിലെ 9 മണി വരെ കനത്ത മൂടൽമഞ്ഞ് ഉണ്ടാകാൻ സാധ്യതയുണ്ടെന്നും കാലാവസ്ഥ കേന്ദ്രം. ഇത് കാരണം കാഴ്ചാ പരിധി കുറവായതിനാൽ ഡ്രൈവർമാർ കൂടുതൽ ജാഗ്രത പാലിക്കണമെന്നും അധികൃതർ മുന്നറിയിപ്പു നൽകി.

കൂടാതെ ലൈറ്റുകൾ ഉപയോഗിക്കണമെന്നും, വേഗത കുറയ്ക്കണമെന്നും മുന്നറിയിപ്പുണ്ട്. പൊടിയും മണലും പറക്കാൻ സാധ്യതയുള്ളതിനാൽ തുറന്ന പ്രദേശങ്ങളിൽ കാൽനടയായി പോകുന്നവർ മാസ്ക് ഉപയോഗിക്കണം. മഴ സമയങ്ങളിൽ താഴ്ന്ന പ്രദേശങ്ങളിലോ വെള്ളക്കെട്ടുകളിലോ പോകുന്നത് പൂർണ്ണമായും ഒഴിവാക്കുക.

കാരണം കഴിഞ്ഞ ദിവസങ്ങളിൽ പെയ്ത മഴയിൽ പല സ്ഥലങ്ങളിൽ വെള്ളം കയറിയതിനാൽ പൊതുജനങ്ങൾക്ക് പ്രവേശനം നിരോധിച്ചിരുന്നു. കൂടാതെ മഴ കനക്കുകയാണെങ്കിൽ മുന്നറിയിപ്പുകൾ നൽകുമെന്നും പൊതുജനങ്ങൾ നിർബന്ധമായും അധികൃതർ നൽകുന്ന നിർദേശങ്ങൾ പാലിക്കണമെന്നും നിർദ്ദേശിച്ചിട്ടുണ്ട്.

Metbeat news