ഹിമാലയത്തിൽ രണ്ടു വലിയ ഭൂകമ്പങ്ങൾക്ക് സാധ്യതയെന്ന് പഠനം

ഏഷ്യൻ ഭൂഖണ്ഡത്തിലെ പ്രധാനപ്പെട്ട പർവ്വതനിരയാണ് ഹിമാലയം അതവാ മഞ്ഞിൻ്റെ വീട്. ചിലർ ഹിമാലയത്തെ കൈലാസമായും കാണുന്നു. ലോകത്തിൽ വച്ചു തന്നെ ഏറ്റവും ഉയരമുള്ള ഹിമാലയം ഒരൊറ്റ നിരയല്ല, സമാന്തരമായി 200 നാഴികയോളം വീതിയിൽ കിടക്കുന്ന മൂന്നു നിരകളാണ്. ഈ പർവ്വതനിര ഇന്ത്യൻ ഉപഭൂഖണ്ഡത്തെയും ടിബറ്റൻ ഫലകത്തെയും തമ്മിൽ വേർതിരിക്കുന്നു.

ഇന്ത്യൻ ഉപഭൂഖണ്ഡത്തിന്റെ ഭൂമിശാസ്ത്രപരവും സാംസ്കാരികവും ആയ വ്യത്യസ്തതകൾക്കുള്ള മുഖ്യ കാരണമാണ് ഹിമാലയ പർവ്വതനിര.വിനാശം വിതച്ച ഒട്ടേറെ ഭൂകമ്പങ്ങളുടെ ചരിത്രം പറയുന്നതാണ് ഈ പർവ്വത നിര.
ഇപ്പോഴിതാ ഹിമാലയത്തിൽ രണ്ടു വലിയ ഭൂകമ്പങ്ങൾക്ക് സാധ്യതയെന്ന് പഠനത്തിലൂടെ കണ്ടെത്തിയിരിക്കുന്നു. മൊമെന്റ് മാഗ്നിറ്റ്യൂഡ് സ്കെയിലിൽ 8.8 തീവ്രതയുള്ള ഭൂകമ്പങ്ങൾക്ക് സാഹചര്യമുണ്ടെന്നാണ് കണ്ടെത്തൽ. നാസയിലെയും കാൽടെക്കിലെയും ശാസ്ത്രജ്ഞരുമായി സഹകരിച്ച് അഹമ്മദാബാദ് സ്പേസ് ആപ്ലിക്കേഷൻ സെന്റർ നേതൃത്വം നൽകിയ പഠനത്തിന്റെ റിപ്പോർട്ട് ജിയോഫിസിക്കൽ റിസർച്ച് ലെറ്റേഴ്സ് മാസിക പ്രസിദ്ധീകരിച്ചു.

നാലുവർഷത്തെ നീണ്ട പഠനം

ഉത്തരാഖണ്ഡും ഹിമാചൽ പ്രദേശും ഉൾപ്പെടെയുള്ള ഇന്ത്യൻ മേഖലയെ സംബന്ധിച്ച് നാലുവർഷത്തെ പഠനമാണ് നടന്നത്. ഉപഗ്രഹാധിഷ്ഠിത ജിയോഡെറ്റിക് ഡേറ്റയും ഗണിതമാതൃകകളും ഉപയോഗിച്ചായിരുന്നു പഠനം. നേരത്തേ കുസാറ്റ്, ഇന്ത്യൻ ഇൻസ്റ്റിറ്റ്യൂട്ട് ഓഫ് ജിയോമാഗ്നറ്റിസം, സ്പേസ് ആപ്ലിക്കേഷൻസ് സെന്റർ എന്നിവയിലെ ഗവേഷകർ ജിയോഫിസിക്കൽ ജേണൽ ഇന്റർനാഷണൽ മാസികയിൽ പ്രസിദ്ധീകരിച്ച ഒരു ലേഖനവും സമാന നിഗമനങ്ങളിലെത്തിയിരുന്നു.

പഠനങ്ങൾ വിരൽചൂണ്ടിയത് ഭൂകമ്പ സാധ്യതയിലേക്ക്

ഭൂകമ്പസമയം പ്രവചിക്കാൻ കഴിയില്ലെങ്കിലും രണ്ടു പഠനങ്ങളും ഹിമാലയൻ മേഖലയിലെ ഭൂകമ്പസാധ്യതയിലേക്കും തയ്യാറെടുപ്പുകൾക്കുള്ള പ്രാധാന്യത്തിലേക്കുമാണ് വിരൽചൂണ്ടുന്നത്. മധ്യ-ഹിമാലയൻ മേഖലയിൽ അടിഞ്ഞുകൂടിയ ടെക്ടോണിക് സമ്മർദം മുൻപത്തെതിനെക്കാൾ വളരെ കൂടുതലാണെന്നാണ് കണ്ടെത്തിയിരിക്കുന്നത്.

അഹമ്മദാബാദിലെ സ്പേസ് ആപ്ലിക്കേഷൻ സെന്ററിലെ ശാസ്ത്രജ്ഞൻ ഡോ. കെ.എം. ശ്രീജിത്ത്, കുസാറ്റിലെ മറൈൻ ജിയോളജി , ജിയോ ഫിസിക്സ് വിഭാഗം മേധാവി പ്രൊഫ. പി.എസ്. സുനിൽ എന്നിവരാണ് പഠനങ്ങൾക്ക് നേതൃത്വം നൽകിയത്. ഡോ. അജീഷ് പി. സജി, എം.സി.എം. ജാസിർ (ഗവേഷകവിദ്യാർഥി, സ്പേസ് ആപ്ലിക്കേഷൻ സെന്റർ) എന്നിവരും പഠനത്തിൽ പ്രധാന പങ്കുവഹിച്ചു.

ഏറ്റവും വലിയ ഭൂകമ്പമുണ്ടായത് 1991 ൽ, മരിച്ചത് 761 പേർ

ഇന്ത്യയിൽ ഉൾപ്പെടുന്ന ഹിമാലയമേഖലയിൽ ഉത്തരകാശിയിൽ 1991-ലാണ് വലിയ ഭൂകമ്പം ഒടുവിലുണ്ടായത്. 6.8 തീവ്രതയുള്ള ഭൂകമ്പത്തിൽ 761 പേർ മരിച്ചു. 1999-ൽ ചമോലിയിൽ 6.6 തീവ്രതയുള്ള ഭൂകമ്പത്തിൽ 103 പേരും മരിച്ചു.