തെക്കുകിഴക്കൻ ബംഗാൾ ഉൾക്കടലിൽ രൂപം കൊണ്ട തീവ്ര ന്യൂനമർദം ഈ സീസണിലെ ആദ്യത്തെ വലിയ കൊടുങ്കാറ്റായ മൻ ത ചുഴലിക്കാറ്റായി മാറുന്നതിനാൽ ആന്ധ്രാപ്രദേശിൽ കടുത്ത കാലാവസ്ഥാ ഭീഷണി നിലനിൽക്കുന്നുണ്ട്. സംസ്ഥാനത്തെ 26 ജില്ലകളിൽ 23 എണ്ണത്തിനും കാലാവസ്ഥാ വകുപ്പ് (IMD) റെഡ്, ഓറഞ്ച് അലർട്ടുകൾ പുറപ്പെടുവിച്ചിരിക്കുകയാണ്.

കനത്ത മഴ, അതിവേഗ കാറ്റ്, വെള്ളപ്പൊക്ക സാധ്യത എന്നിവയെക്കുറിച്ച് മുന്നറിയിപ്പ് നൽകുകയും ചെയ്തിട്ടുണ്ട്. ആന്ധ്രാ തീരദേശത്തേക്ക് നീങ്ങുന്ന ഈ സംവിധാനം ഒക്ടോബർ 28 വൈകുന്നേരം കാക്കിനടയ്ക്കടുത്തുള്ള മച്ചിലിപട്ടണത്തിനും കലിംഗപട്ടണത്തിനും ഇടയിൽ കരയിലേക്ക് കടക്കാൻ സാധ്യത.

അധികൃതർ വലിയ തോതിലുള്ള തയ്യാറെടുപ്പുകൾ ആരംഭിച്ചു കഴിഞ്ഞു. അതേസമയം തീരദേശ പ്രദേശങ്ങളിലെ മത്സ്യത്തൊഴിലാളികളും നിവാസികളും വീടിനുള്ളിൽ തന്നെ തുടരാനും കടലിൽ പോകുന്നത് ഒഴിവാക്കാനും അധികൃതർ അഭ്യർത്ഥിച്ചിട്ടുണ്ട്.

അതേസമയം തമിഴ്‌നാട്, ഒഡീഷ എന്നിവിടങ്ങളിലെ നിരവധി ജില്ലകളിൽ ഇന്ന് കനത്ത മഴയ്ക്ക് സാധ്യത. "വടക്കൻ തമിഴ്‌നാട്ടിലെ ചില സ്ഥലങ്ങളിലും, തെക്കൻ തമിഴ്‌നാട്ടിലെ ഒറ്റപ്പെട്ട സ്ഥലങ്ങളിലും, പുതുച്ചേരി, കാരക്കൽ പ്രദേശങ്ങളിലും, ഒന്നോ രണ്ടോ സ്ഥലങ്ങളിൽ ഇടിമിന്നലോടും മിന്നലോടും കൂടിയ മഴയ്ക്ക് സാധ്യതയുണ്ടെന്ന്" പ്രാദേശിക കാലാവസ്ഥാ കേന്ദ്രം.

റാണിപേട്ട്, തിരുവള്ളൂർ, കാഞ്ചീപുരം, ചെന്നൈ എന്നിവിടങ്ങളിൽ ഒറ്റപ്പെട്ട സ്ഥലങ്ങളിൽ കനത്തതോ അതിശക്തമായതോ ആയ മഴയ്ക്ക് സാധ്യത എന്നാണ് കാലാവസ്ഥാ നിരീക്ഷണ കേന്ദ്രം നൽകുന്ന മുന്നറിയിപ്പ്. അതേസമയം വില്ലുപ്പുറം, ചെങ്കൽപ്പട്ടു, പുതുച്ചേരി എന്നിവിടങ്ങളിൽ കനത്ത മഴയ്ക്ക് സാധ്യതയുണ്ടെന്നും ഏജൻസി മുന്നറിയിപ്പ് നൽകുന്നു. അതനുസരിച്ച്, റാണിപേട്ട്, തിരുവള്ളൂർ, കാഞ്ചീപുരം, ചെന്നൈ ജില്ലകളിൽ ഐഎംഡി ഓറഞ്ച് അലർട്ടും വില്ലുപ്പുറം, ചെങ്കൽപ്പട്ടു, പുതുച്ചേരി മേഖലകളിൽ യെല്ലോ അലർട്ടും പുറപ്പെടുവിച്ചു.

Metbeat news