ഹോർമുസ് പ്രതിസന്ധി: വേനൽ ചൂടിനൊപ്പം കുപ്പിവെള്ള വിപണിക്കും സമ്മർദ്ദം, വിലകൂടും ?

ഇറാനെതിരായ അമേരിക്ക–ഇസ്രയേൽ സംയുക്ത ആക്രമണം രണ്ടാം ആഴ്ചയിലേക്ക് കടക്കുന്നതിനിടെ ലോകത്തിന്റെ പല ഭാഗങ്ങളിലും അതിന്റെ സാമ്പത്തിക പ്രത്യാഘാതങ്ങൾ പ്രകടമാകാൻ തുടങ്ങി. ഇന്ത്യയിലടക്കം നിരവധി രാജ്യങ്ങളിൽ ജനജീവിതത്തെയും വ്യവസായങ്ങളെയും ബാധിക്കുന്ന തരത്തിലുള്ള വിലക്കയറ്റം ചില മേഖലകളിൽ കണ്ടുതുടങ്ങി. അതിൽ പ്രധാനമായി ബാധിക്കപ്പെട്ട മേഖലകളിൽ ഒന്നാണ് കുപ്പിവെള്ള വ്യവസായം.

ഗൾഫ് മേഖലയിലെ സംഘർഷം ശക്തമായതോടെ ലോകത്തിലെ ഏറ്റവും പ്രധാനപ്പെട്ട സമുദ്രഗതാഗത പാതകളിൽ ഒന്നായ ഹോർമൂസ് കടലിടുക്ക് വഴി കപ്പൽ ഗതാഗതത്തിൽ തടസ്സങ്ങൾ ഉണ്ടായി. ഇതിന്റെ പ്രതിഫലനമായി പ്ലാസ്റ്റിക് ഉൽപ്പന്നങ്ങളുടെ നിർമ്മാണത്തിന് ആവശ്യമായ അസംസ്കൃത വസ്തുക്കളുടെ ലഭ്യതയും വിലയും ബാധിക്കപ്പെട്ടു. ഇതാണ് ഇന്ത്യയിലെ കുപ്പിവെള്ള വ്യവസായത്തെ നേരിട്ട് ബാധിച്ചത്.

പോളിമർ വില കുതിച്ചുയർന്നു

കുപ്പിവെള്ള ബോട്ടിലുകൾ നിർമ്മിക്കാൻ ഉപയോഗിക്കുന്ന പ്രധാന അസംസ്കൃത വസ്തുവാണ് പോളിമർ. ക്രൂഡ് ഓയിൽ മുതൽ വേർതിരിച്ചെടുക്കുന്ന സിന്തറ്റിക് പോളിമറുകളിൽ നിന്നാണ് പ്ലാസ്റ്റിക് കുപ്പികൾ നിർമ്മിക്കുന്നത്. ഗൾഫ് മേഖലയിലെ സംഘർഷം ശക്തമായതിനെ തുടർന്ന് ഈ പോളിമറുകളുടെ വില ഗണ്യമായി ഉയർന്നു. ഇറാനിലെ സംഘർഷം ആരംഭിച്ചതിന് ശേഷം പോളിമറിന്റെ വില ഏകദേശം 12 ശതമാനം വരെ വർധിച്ചതായി വ്യവസായ വൃത്തങ്ങൾ പറയുന്നു.

ഒരു ചെറിയ പ്ലാസ്റ്റിക് കുപ്പി നിർമ്മിക്കുന്നതിനുള്ള ചെലവ് മുമ്പ് ഏകദേശം 1.10 രൂപയായിരുന്നു. എന്നാൽ ഇപ്പോൾ അത് 1.45 രൂപയായി ഉയർന്നിരിക്കുകയാണ്. അതേസമയം പോളിമറിന്റെ കിലോഗ്രാമിന് വില 18 രൂപയിൽ നിന്ന് 32 രൂപയായി ഉയർന്നു.

പാക്കിങ് സാമഗ്രികളും വിലകൂടി

കുപ്പി മാത്രമല്ല, കുപ്പിയുടെ അടപ്പ്, ബ്രാൻഡ് ലേബൽ, പാക്കിങ് മെറ്റീരിയൽ എന്നിവ നിർമ്മിക്കാൻ ഉപയോഗിക്കുന്ന പ്ലാസ്റ്റിക് ഉൽപ്പന്നങ്ങളുടെയും വില ഉയർന്നിട്ടുണ്ട്. ഗൾഫ് മേഖലയിലൂടെ വരുന്ന അസംസ്കൃത വസ്തുക്കളുടെ വിതരണം തടസ്സപ്പെട്ടതും ഗതാഗത ചെലവ് കൂടിയതുമാണ് ഇതിന് കാരണം.

46,000 കോടിയുടെ വ്യവസായത്തിന് സമ്മർദ്ദം

ഇന്ത്യയിലെ കുപ്പിവെള്ള വിപണി ഏകദേശം 46,150 കോടി രൂപ വിലമതിക്കുന്ന വലിയ മേഖലയാണ്. അതിവേഗം വളരുന്ന ഈ വിപണിയിൽ വലിയ വ്യവസായ ഗ്രൂപ്പുകൾ മുതൽ ചെറിയ കമ്പനികൾ വരെ മത്സരിക്കുന്നുണ്ട്. എന്നാൽ അസംസ്കൃത വസ്തുക്കളുടെ വിലവർധന ഈ മേഖലയെ ആശങ്കപ്പെടുത്തുകയാണ്.

വേനൽക്കാലത്ത് ആവശ്യകത കൂടി

ഇതിനിടെ ഇന്ത്യയിൽ വേനൽക്കാലം ശക്തമാകുന്നതോടെ കുപ്പിവെള്ളത്തിനുള്ള ആവശ്യകതയും വർധിക്കുകയാണ്. ചൂട് കൂടുന്നതിനനുസരിച്ച് യാത്രകളിലും പൊതുസ്ഥലങ്ങളിലും കുപ്പിവെള്ള ഉപഭോഗം കൂടുന്നു. നിലവിൽ ഇന്ത്യയിൽ ഒരു കുപ്പി കുടിവെള്ളത്തിന്റെ ശരാശരി വില ഏകദേശം 20 രൂപയാണെങ്കിലും നിർമ്മാണ ചെലവ് വർധിച്ചതോടെ അടുത്ത മാസങ്ങളിൽ വില കൂടി ഉയരാൻ സാധ്യതയുണ്ടെന്നാണ് വ്യവസായ രംഗം വിലയിരുത്തുന്നത്.

ഉപഭോക്താക്കൾക്കും വ്യവസായങ്ങൾക്കും വെല്ലുവിളി

വേനൽ ചൂടും ഗൾഫ് മേഖലയിലെ സംഘർഷവും ചേർന്ന സാഹചര്യത്തിൽ കുപ്പിവെള്ള വിപണി സമ്മർദ്ദത്തിലായിരിക്കുകയാണ്. ആവശ്യകത ഉയരുന്നതിനൊപ്പം നിർമ്മാണ ചെലവും കൂടുന്നത് കമ്പനികൾക്ക് വെല്ലുവിളിയാകുമ്പോൾ, ഭാവിയിൽ ഉപഭോക്താക്കൾക്കും വിലക്കയറ്റത്തിന്റെ ഭാരം അനുഭവിക്കേണ്ടിവരുമെന്ന ആശങ്കയും ഉയരുന്നു.

English Summary : The escalating conflict between Iran and the US-Israel alliance has triggered a ripple effect across global markets, with India’s ₹46,150 crore bottled water industry now facing significant pricing pressure. As the crisis enters its second week, the disruption of the Strait of Hormuz—a vital maritime gateway—has severely impacted the supply and cost of essential raw materials.