സംസ്ഥാനത്ത് ഇന്ന് 13 പേർക്ക് കൂടി ഷിഗെല്ല രോഗബാധ സ്ഥിരീകരിച്ചു. കോഴിക്കോട് 4, മലപ്പുറം 3, കണ്ണൂർ 3, പാലക്കാട് 2, കൊല്ലം 1 എന്നിങ്ങനെയാണ് പുതിയ കേസുകൾ റിപ്പോർട്ട് ചെയ്തത്.

മഴക്കാലത്ത് വെള്ളക്കെട്ടുകളും വെള്ളപ്പൊക്കവും ഉണ്ടാകുമ്പോൾ മലിനജലവും ശുദ്ധജലവും തമ്മിൽ കലരാനുള്ള സാധ്യത കൂടുതലാണ്. ഇതോടെ ഷിഗെല്ല ഉൾപ്പെടെയുള്ള ജലജന്യ രോഗങ്ങൾ (Water-borne Diseases) വർധിക്കാനുള്ള സാഹചര്യം രൂപപ്പെടുന്നു.

അടുത്തിടെ വാർത്തകളിൽ ഇടംപിടിച്ച ഷിഗെല്ല (Shigella) ബാക്ടീരിയ മൂലമുള്ള അണുബാധ ഉൾപ്പെടെ വയറിളക്കം, ഛർദി, ജലദോഷം, പനി, ഡെങ്കിപ്പനി (Dengue Fever), എലിപ്പനി (Leptospirosis), വൈറൽ പനികൾ തുടങ്ങിയ നിരവധി രോഗങ്ങൾ മഴക്കാലത്ത് വ്യാപകമാകാറുണ്ട്.

പ്രദേശത്തെ കുടിവെള്ള സ്രോതസ്സുകൾ, ഹോട്ടലുകൾ, വീടുകളിൽ ഉപയോഗിക്കുന്ന ഭക്ഷ്യവസ്തുക്കൾ എന്നിവയിൽ നിന്നുള്ള സാമ്പിളുകൾ ശേഖരിച്ച് വിദഗ്ധ പരിശോധനയ്ക്കായി അയച്ചിരിക്കുകയാണ്. നിലവിൽ 51 പേർ രോഗലക്ഷണങ്ങളോടെ നിരീക്ഷണത്തിലാണ്.