കലമേഗി ചുഴലിക്കാറ്റ് (Typhoon Kalmaegi) നെ തുടര്‍ന്ന് വിയറ്റ്‌നാമില്‍ അഞ്ചു പേര്‍ കൊല്ലപ്പെട്ടു. മധ്യ വിയറ്റ്‌നാമിലാണ് ചുഴലിക്കാറ്റ് നാശം വിതച്ചത്. കലമേഗി ചുഴലിക്കാറ്റ് വ്യാഴാഴ്ച വൈകിട്ടാണ് വിയറ്റ്‌നാമില്‍ കരകയറിയത്. കനത്ത മഴയും കാറ്റും നാശംവിതച്ചതായി വിയറ്റ്‌നാം ഔദ്യോഗിക പത്രം വിയറ്റ്‌നാം ന്യൂസ് റിപ്പോര്‍ട്ട് ചെയ്തു. 135 പേരെ കാണാതായിട്ടുണ്ട്. മരണ സംഖ്യ ഉയര്‍ന്നേക്കാമെന്നാണ് റിപ്പോര്‍ട്ടുകള്‍.

ചുഴലിക്കാറ്റില്‍ 57 വീടുകള്‍ തകര്‍ന്നു. മിക്ക വീടുകളുടെയും മേല്‍ക്കൂര കാറ്റില്‍ പറന്നു പോയി. 3000 ത്തിലധികം വീടുകളുടെ മേല്‍ക്കൂര കാറ്റില്‍ തകര്‍ന്നു. 11 ബോട്ടുകള്‍ ശക്തമായ തിരമാലയില്‍ മുങ്ങുകയും രാജ്യത്തുടനീളം വൈദ്യുതി തടസ്സപ്പെടുകയും ചെയ്തു.

ഗിയ ലായ്, ഡാക് ലാക്, ക്വാങ് നഗായ് പ്രവിശ്യയിലാണ് ചുഴലിക്കാറ്റ് കനത്ത നാശം വരുത്തിയത്. സര്‍ക്കാര്‍ ഔദ്യോഗിക കണക്ക് പ്രകാരം മരണ സംഖ്യ അഞ്ചാണ്. 8000 പേരെ മാറ്റി പാര്‍പ്പിച്ചു. 12 ലക്ഷം വീടുകളില്‍ വൈദ്യുതി മുടങ്ങി.

രക്ഷാദൗത്യത്തിന് 2.8 ലക്ഷം സൈനികരെ വിവിധ പ്രദേശങ്ങളിലായി സര്‍ക്കാര്‍ വിന്യസിച്ചു. ഹനോയിലെ യു.എസ് എംബസി പൗരന്മാര്‍ക്ക് യാത്ര മുന്നറിയിപ്പ് നല്‍കി. വിയറ്റ്‌നാമില്‍ 4 മീറ്റര്‍ ഉയരത്തില്‍ തിരമാലകളടിച്ചു. ഈ വര്‍ഷം തെക്കന്‍ ചൈനാ കടലില്‍ നിന്ന് വിയറ്റ്‌നാമില്‍ കരകയറുന്ന 13ാമത്തെ ചുഴലിക്കാറ്റാണിത്. നിലവില്‍ കാറ്റിന്റെ ശക്തി കുറഞ്ഞെന്ന് വിയറ്റ്‌നാം കാലാവസ്ഥാ ഏജന്‍സി അറിയിച്ചു. കംബോഡിയ, ലാവോസ് ലക്ഷ്യം വച്ചാണ് ചുഴലിക്കാറ്റ് നിലവില്‍ സഞ്ചരിക്കുന്നത്.

Metbeat news