Menu

Global

കാനഡയിൽ ഹുറികേയ്ൻ : പതിനായിരങ്ങൾ ഇരുട്ടിൽ

കാനഡയുടെ കിഴക്കൻ തീരത്ത് അതിശക്തമായ ഹുറികേയ്ൻ ഫിയോനയെ തുടർന്ന് പതിനായിരങ്ങൾ ഇരുട്ടിലായി. ഇതുവരെ എട്ടു മരണം റിപ്പോർട്ട് ചെയ്തു. മണിക്കൂറിൽ 140 കി.മി വേഗതയിലുള്ള ശക്തമായ കാറ്റിൽ മരങ്ങൾ കടപുഴകിയതിനെ തുടർന്നാണിത്. സെന്റ് ലോറൻസ് കടലിലാണ് ഹുറികേയ്ൻ ഉള്ളതെന്ന് യു.എസ് നാഷനൽ ഹുറികേയ്ൻ സെന്റർ അറിയിച്ചു.
നൊവാ സ്‌കോടിയ, പ്രിൻസ് എഡ്വേർഡ് ദ്വീപ് എന്നിവിടങ്ങളിലാണ് കനത്ത കാറ്റും മഴയുമുണ്ടായത്. നൊവാസ്‌കോടിയയിലെ 79 ശതമാനവും പ്രിൻസ് എഡ്വേർഡ് ദ്വീപിലെ 95 ശതമാനം ഉപയോക്താക്കൾക്കും വൈദ്യുതി വിതരണം മുടങ്ങിയെന്നാണ് കമ്പനികൾ പറയുന്നത്. മൊബൈൽ ഫോൺ സർവിസിനെയും ഇതു ബാധിച്ചു. പലയിടത്തും റോഡുകൾ അടച്ചതായി പൊലിസ് പറഞ്ഞു.
ഹുറികേയ്‌നിനെ തുടർന്ന് കനേഡിയൻ പ്രധാനമന്ത്രി ജസ്റ്റിൻ ട്രൂഡോ വിദേശയാത്ര മാറ്റിവച്ചു. ജപ്പാനിലേക്കാണ് അദ്ദേഹം പോകേണ്ടിയിരുന്നത്.

മെക്സികോയിൽ ഭൂചലനം: സുനാമി മുന്നറിയിപ്പ്

മെക്സിക്കോ സിറ്റി: തിങ്കളാഴ്ച മെക്‌സിക്കോയുടെ മധ്യ പസഫിക് തീരത്ത് വൻഭൂചലനം. ഭൂചലനത്തിൽ ഒരാൾ മരിച്ചു. നിരവധി പേർക്ക് പരിക്കേറ്റു. 7.6 തീവ്രതയാണ് രേഖപ്പെടുത്തിയതെന്ന് യു.എസ് ജിയോളജിക്കൽ സർവേ വ്യക്തമാക്കി.
പ്രാദേശിക സമയം ഉച്ചക്ക് 1.5ഓടെയായിരുന്നു ഭൂചലനം. നിരവധി കെട്ടിടങ്ങൾ നിലംപൊത്തിയതടക്കം വ്യാപക നഷ്ടമാണ് റിപ്പോർട്ട് ചെയ്യപ്പെട്ടത്.

ഭൂചലനത്തെ തുടർന്ന് മെക്സിക്കൻ തീരപ്രദേശങ്ങളിൽ സുനാമി മുന്നറിയിപ്പ് നൽകിയിട്ടുണ്ട്. ഭൂകമ്പത്തിന്റെ പ്രഭവകേന്ദ്രത്തിന് 600ലേറെ കിലോമീറ്റർ അകലെയാണ് രാജ്യതലസ്ഥാനമായ മെക്സിക്കോ സിറ്റി. മുൻകരുതലായി മെക്സിക്കോ സിറ്റിയിൽ ആളുകളെ കെട്ടിടങ്ങളിൽനിന്ന് ഒഴിപ്പിച്ചു.

തായ് വാനിൽ ഭൂചലനം : ട്രെയിൻ ആടിയുലഞ്ഞു, സുനാമി മുന്നറിയിപ്പ് (വിഡിയോ)

തെക്കു കിഴക്കൻ തായ്‌വാനിൽ ശക്തിയേറിയ ഭൂചലനം അനുഭവപ്പെട്ടു. തലസ്ഥാനമായ തായ്പേയ്, തെക്കുപടിഞ്ഞാറൻ നഗരമായ കൗഷിയുങ്ങ് എന്നിവിടങ്ങളിലും ചലനം അനുഭവപ്പെട്ടു.

ചൈന സെൻട്രൽ വെതർ ബ്യൂറോയുടെ റിക്ട്ര്‍ സ്കെയിലിൽ 6.8 രേഖപ്പെടുത്തിയ ഭൂചലനമാണ് ഇന്ന് അനുഭവപ്പെട്ടത്. തുടർന്ന് ജപ്പാൻ കാലാവസ്ഥ ഏജൻസി (JMA), പസഫിക് സുനാമി വാണിംഗ് സെൻറർ എന്നിവ സുനാമി മുന്നറിയിപ്പ് പുറപ്പെടുവിച്ചു. എന്നാൽ ഇപ്പോൾ സുനാമി മുന്നറിയിപ്പ് പിൻവലിച്ചിട്ടുണ്ട്.
ശക്തമായ ഭൂചലനത്തെ തുടർന്ന് മൂന്ന് കെട്ടിടങ്ങൾ നിലം പൊത്തുകയും റോഡുകൾ തകരുകയും ചെയ്തു. പാലങ്ങളും റെയിൽവേ ട്രാക്കുകളും തകർന്നു. 6.4 രേഖപ്പെടുത്തിയ തുടർച്ചലനങ്ങളും മേഖലയിലുണ്ടായി. ആളപായം റിപ്പോർട്ട് ചെയ്യപ്പെട്ടിട്ടില്ല. ജല,വൈദ്യുത വിതരണത്തെ ഭൂചലനം ബാധിച്ചതായി തായ്‌വാൻ പ്രസിഡന്റ് പറഞ്ഞു.

പാപുവ ന്യൂ ഗിനിയിൽ ഭൂചലനം : സുനാമി മുന്നറിയിപ്പ്

കിഴക്കൻ പാപുവ ന്യൂ ഗിനിയിൽ ഞായറാഴ്ച 7.6 തീവ്രത രേഖപ്പെടുത്തിയ ഭൂചലനം ഉണ്ടായതായി റിപ്പോ‍ർട്ട്. തീരദേശ പട്ടണമായ മഡാങിന് സമീപമുള്ള കെട്ടിടങ്ങൾക്ക് കേടുപാടുകൾ സംഭവിച്ചതായി പ്രദേശവാസികൾ റിപ്പോർട്ട് ചെയ്തു. ഭൂചലനം റിപ്പോർട്ട് ചെയ്ത യുഎസ് ജിയോളജിക്കൽ സർവേ സുനാമി മുന്നറിയിപ്പ് നൽകിയെങ്കിലും ഭീഷണി നീങ്ങിയതായി അറിയിച്ചു.

എന്നാൽ ചില തീരപ്രദേശങ്ങളിൽ ഇപ്പോഴും ഉയർന്ന തിരമാലകൾക്ക് സാധ്യതയുണ്ടെന്നും മുന്നറിയിപ്പുണ്ട്. പപ്പുവ ന്യൂ ഗിനിയയുടെ ചില ഭാഗങ്ങളിൽ വൈദ്യുതി തകരാറുകളും കെട്ടിടങ്ങൾക്ക് കേടുപാടുകളും റിപ്പോർട്ട് ചെയ്യപ്പെട്ടിട്ടുണ്ട്. ഭൂചലനത്തിന്റെ പ്രഭവകേന്ദ്രത്തിനടുത്തുള്ള പട്ടണങ്ങൾ മുതൽ ഏകദേശം 300 മൈൽ (480 കിലോമീറ്റർ) അകലെയുള്ള പോർട്ട് മോറെസ്ബിയുടെ തലസ്ഥാനം വരെ വ്യാപകമായി ഭൂമികുലുക്കം അനുഭവപ്പെട്ടു.

കിഴക്കൻ ഹൈലാൻഡ് പട്ടണമായ ഗൊറോക്കയിലെ ഒരു സർവ്വകലാശാലയ്ക്ക് കേടുപാടുകൾ സംഭവിച്ചതിന്റെ ചിത്രങ്ങളും വീഡിയോയും പുറത്തുവന്നിട്ടുണ്ട്. ഭൂചലനത്തിൽ ഭിത്തികളിൽ വലിയ വിള്ളലുകൾ സംഭവിച്ചിട്ടുണ്ട്. ജനാലകൾ വീണു. മുൻ ഭൂചലനങ്ങളേക്കാൾ വളരെ ശക്തമായിരുന്നു ഇത്തവണത്തേതെന്നാണ് ഭൂകമ്പത്തിന്റെ പ്രഭവകേന്ദ്രത്തിന് ഏറ്റവും അടുത്തുള്ള ലെയിലും മഡംഗിലുമുള്ള പ്രദേശവാസികൾ എഎഫ്‌പിയോട് പറഞ്ഞത്. 

കൈനന്തു പട്ടണത്തിൽ നിന്ന് 67 കിലോമീറ്റർ അകലെ 61 കിലോമീറ്റർ (38 മൈൽ) ആഴത്തിലാണ് ഭൂചലനം ഉണ്ടായതെന്ന് യു.എസ്.ജി.എസ് അറിയിച്ചു.അയൽരാജ്യമായ ഇന്തോനേഷ്യയിൽ 2004-ൽ ഉണ്ടായ 9.1 തീവ്രത രേഖപ്പെടുത്തിയ ഭൂചലനം സുനാമിക്ക് കാരണമായിരുന്നു. 
,

ഹിന്നാംനോർ: ദക്ഷിണ കൊറിയയിൽ കാർ പാർക്കിങ്ങിൽ വെള്ളം കയറി 7 മരണം

പസഫിക് സമുദ്രത്തില്‍ രൂപപ്പെട്ട ഈ വര്‍ഷത്തെ ഏറ്റവും ശക്തമായ ഹിന്നാംനോര്‍ ചുഴലിക്കാറ്റ് ദക്ഷിണ കൊറിയയില്‍ കനത്ത മഴക്കും പ്രളയത്തിനും കാരണമായി. ഏഴു പേര്‍ മരിച്ചതായാണ് റിപ്പോര്‍ട്ട്. ഭൂഗര്‍ഭ കാര്‍ പാര്‍ക്കിങ്ങില്‍ കുടുങ്ങിപോയവരാണ് വെള്ളം കയറിയതിനെ തുടര്‍ന്ന് മരിച്ചത്. കാര്‍ പാര്‍ക്ക് ചെയ്യാന്‍ പോയ ഇവര്‍ പൊടുന്നനെയുണ്ടായ മഴയില്‍ വെള്ളം കയറി അകപ്പെടുകയായിരുന്നു.
കെട്ടിടത്തിന്റെ താഴെ നില പൂര്‍ണമായും മുങ്ങി. അപ്പാര്‍ട്‌മെന്റിലെ കാറുകള്‍ സുരക്ഷിത മേഖലയിലേക്ക് മാറ്റാന്‍ അധികൃതരോട് പറഞ്ഞിരുന്നുവെന്ന് താമസക്കാര്‍ പറഞ്ഞതായി യൊന്‍ഹാപ് വാര്‍ത്താ വെബ്‌സൈറ്റ് റിപ്പോര്‍ട്ട് ചെയ്തു. 30 വയസുള്ള പുരുഷനെയും 50 വയസുള്ള സ്ത്രീയെയും രക്ഷാപ്രവര്‍ത്തകര്‍ പുറത്തെടുത്തു. ഇവരുടെ ആരോഗ്യനിലയില്‍ പുരോഗതിയുണ്ടായിട്ടുണ്ട്. കനത്ത മഴയെ തുടര്‍ന്ന് റിസോര്‍ട്ടുകള്‍ തകര്‍ന്നു. ഹിന്നാംനോര്‍ ചുഴലിക്കാറ്റിനെ തുടര്‍ന്ന് ദക്ഷിണ കൊറിയയുടെ തെക്കന്‍, കിഴക്കന്‍ തീരങ്ങളിലായി 10 പേര്‍ മരിച്ചിട്ടുണ്ട്. ബുസാനിലും ഉള്‍സാനിലും നിരവധി നഗരങ്ങള്‍ വെള്ളത്തിനടിയിലായി. റോഡുകള്‍ മുങ്ങുകയും കെട്ടിടങ്ങള്‍ തകരുകയും മരങ്ങള്‍ കടപുഴകുകയും ചെയ്തു. കാലാവസ്ഥാ വ്യതിയാനത്തെ തുടര്‍ന്ന് ദക്ഷിണ കൊറിയയില്‍ ഈയിടെ കനത്ത മഴയും കടുത്ത ചൂടും രേഖപ്പെടുത്തിയിരുന്നു. കഴിഞ്ഞ ഓഗസ്റ്റിലാണ് മഴയും പ്രളയവുമുണ്ടായത്. തലസ്ഥാനമായ സിയോളിലും പ്രളയമുണ്ടാകുകയും എട്ടു പേര്‍ മരിക്കുകയും ചെയ്തു.

ഹിന്നാംനോർ കരയോട് അടുക്കുന്നു; ജാഗ്രതയിൽ രാജ്യങ്ങൾ

ഈ വർഷത്തെ ഏറ്റവും ശക്തിയുള്ള ചുഴലിക്കാറ്റ് ഹിന്നാംനോർ ടൈഫൂൺ കരയിലേക്ക് അടുക്കുന്നു. നേരത്തെ കാറ്റഗറി 5 വരെയായിരുന്ന ഹിന്നാംനോർ ഇപ്പോൾ ശക്തികുറഞ്ഞിട്ടുണ്ട്. കിഴക്കൻ ചൈനയിൽ ചുഴലിക്കാറ്റ് മുന്നറിയിപ്പ് നൽകിയിട്ടുണ്ട്. തായ്‌വാൻ, ജപ്പാൻ, കൊറിയ രാജ്യങ്ങളെയാണ് ടൈഫൂൺ പ്രധാനമായും പ്രതികൂലമായി ബാധിക്കുക. ചൈനയിലെ ഷാങ്ഹായിയിൽ ഇന്ന് ബോട്ട്, ചങ്ങാടം സർവിസുകൾക്ക് വിലക്കേർപ്പെടുത്തി. 50,000 പൊലിസുകാരെ രക്ഷാപ്രവർത്തനത്തിന് നിയോഗിച്ചു. നാളെ വെൻസൗ നഗരത്തിൽ സ്‌കൂളുകൾക്ക് അവധി പ്രഖ്യാപിച്ചു. കിഴക്കൻ ചൈനയിലെ പ്രധാന ബിസിനസ് കേന്ദ്രമാണിത്.
ഹിന്നാംനോർ കിഴക്കൻ ചൈനയ്ക്കു സമീപത്തൂടെ വടക്കുദിശയിൽ നീങ്ങുമെന്നാണ് പ്രവചനം. കിഴക്കൻ ചൈനയിൽ ആളുകളെ ഒഴിപ്പിക്കുന്നുണ്ട്. ജപ്പാനിലെ ഒക്കിനാവയിൽ വിമാനങ്ങൾ റദ്ദാക്കി. കൊറിയൻ ഉപദ്വീപിൽ കനത്ത മഴയ്ക്കും ഹിന്നാംനോർ ഇടയാക്കും. കൊറിയയിൽ അടുത്ത ദിവസം കനത്ത മഴക്കും പ്രളയത്തിനും സാധ്യതയുണ്ട്. ഹോങ്കോങ്ങിലെ കാലാവസ്ഥാ നിരീക്ഷണ കേന്ദ്രത്തിന്റെ റിപ്പോർട്ട് അനുസരിച്ച് 175 കി.മി വേഗതയാണ് ഹിന്നാംനോറിനുള്ളത്. ചൈനീസ് കാലാവസ്ഥാ നിരീക്ഷണ കേന്ദ്രം യെല്ലോ ടൈഫൂൺ വാണിങ് നൽകിയിട്ടുണ്ട്. ഷെജിയാങ്, ഷാങ്ഹായ്, തായ്‌വാൻ എന്നിവിടങ്ങളിൽ കനത്ത മഴയുണ്ടാകുമെന്നും മുന്നറിയിപ്പുണ്ട്. കപ്പലുകൾക്കും മുന്നറിയിപ്പുണ്ട്. തായ്‌വാനിലെ തോയുവാൻ, ഹിഷിൻചു കൗണ്ടികളിൽ ജനങ്ങളെ ഒഴിപ്പിച്ചു. ന്യൂ തായ്‌പേയിലും 600 പേരെ ഒഴിപ്പിച്ചു. കനത്ത മഴയും കാറ്റും ഉണ്ടാകുമെന്ന് മുന്നറിയിപ്പുള്ളതായി തായ്‌വാൻ സെൻട്രൽ ന്യൂസ് ഏജൻസി റിപ്പോർട്ട് ചെയ്തു. തായ് വാനിൽ 40 വിമാനങ്ങൾ റദ്ദാക്കി. 100 ചങ്ങാട സർവിസുകളും റദ്ദാക്കിയെന്ന് ഗതാഗത, വാർത്താവിനിമയ മന്ത്രാലയം അറിയിച്ചു.

പാക് പ്രളയത്തിനു കാരണം കാലാവസ്ഥാ വ്യതിയാനം ;12 വർഷത്തിനിടെ രൂക്ഷമായ പ്രളയം

പാകിസ്താനിൽ 1061 പേരുടെ മരണത്തിനിടയാക്കിയ ഇപ്പോഴത്തെ പ്രളയം കഴിഞ്ഞ 12 വർഷത്തെ ഏറ്റവും വലിയ പ്രളയമെന്ന് കാലാവസ്ഥാ നിരീക്ഷകർ. 2010 ലെ പ്രളയത്തിൽ 1,700 പേർ മരിച്ചിരുന്നു. കാലാവസ്ഥാ വ്യതിയാനമാണ് പ്രളയത്തിന് കാരണമായ തീവ്രമഴക്ക് കാരണമായതെന്ന് പാകിസ്താൻ കാലാവസ്ഥാ വ്യതിയാന മന്ത്രി ഷെറിൻ റഹ്മാനും ശാസ്ത്രജ്ഞരും പറയുന്നു. സാധാരണ മൺസൂൺ മഴയിൽ ഇത്രയും ശക്തിയുണ്ടാകാറില്ലെന്നും പ്രളയം പതിവല്ലെന്നും കാലാവസ്ഥാ വ്യതിയാന മന്ത്രി പറഞ്ഞു.
ഈ വർഷം തന്നെ പാകിസ്താനിൽ വരൾച്ചയും കാട്ടുതീയും ഉണ്ടായാരുന്നു. കാലാവസ്ഥാ വ്യതിയാനത്തിന്റെ അനന്തരഫലമാണ് വരൾച്ചയും പ്രളയവും. 10 ലക്ഷം വീടുകളാണ് പ്രളയത്തിൽ നശിച്ചതെന്നാണ് ദേശീയ ദുരന്ത നിവാരണ ഏജൻസിയുടെ കണക്ക്. തെക്കൻ പാകിസ്താനിലാണ് കനത്തമഴയുണ്ടായത്. ഖൈബർ പക്തുൻഖ്വ പ്രവിശ്യയിലും സിന്ധ് പ്രവിശ്യയിലുമാണ് ഏറ്റവും കൂടുതൽ നാശനഷ്ടമുണ്ടായത്. മൂന്നര കോടി ജനങ്ങളെ പ്രളയം ബാധിച്ചു. ഭക്ഷണവും അവശ്യവസ്തുക്കളും ലഭിക്കാതെ ജനങ്ങൾ വലയുന്നതായും അന്താരാഷ്ട്ര സഹായം ലഭിച്ചു തുടങ്ങിയെന്നും വാർത്താ ഏജൻസി റിപ്പോർട്ട് ചെയ്തു. തുർക്കി, യു.എ.ഇ എന്നിവിടങ്ങളിൽ നിന്ന് കാർഗോ വിമാനങ്ങളെത്തി. ടെന്റുകൾ, ഭക്ഷണങ്ങൾ, നിത്യോപയോഗ വസ്തുക്കൾ എന്നിവയാണ് എത്തിച്ചത്. ചർസാദയിൽ നിന്ന് 1.8 ലക്ഷം പേരെയും ഖൈബർ പക്തുൻഖ്വയിൽ നിന്ന് 1.5 ലക്ഷം പേരെയും ഒഴിപ്പിച്ചു. പലരും റോഡരികിലെ ടെന്റുകളിലാണ് കഴിയുന്നത്. പ്രളയ ബാധിത ബലൂചിസ്ഥാൻ പ്രവിശ്യക്ക് 4.5 കോടി ഡോളറിന്റെ സഹായം പാക് പ്രധാനമന്ത്രി ഷെഹബാസ് ശരീഫ് ഞായറാഴ്ച പ്രഖ്യാപിച്ചു.
കാലവർഷത്തെ തുടർന്ന് വടക്കുപടിഞ്ഞാറൻ ഇന്ത്യയ്ക്കും തെക്കൻ പാകിസ്താൻ മേഖലയിലും തുടർന്ന ചക്രവാതച്ചുഴിയും ന്യൂനമർദവുമാണ് പാകിസ്താനിൽ പ്രളയത്തിന് കാരണമായത്. മണ്ണുകൊണ്ട് നിർമിച്ച വീടുകളാണ് പ്രളയത്തിൽ ഒലിച്ചുപോയത്. 10 ലക്ഷം പേർ ഭവനരഹിതരായി. 2010 ലെ പ്രളയത്തിൽ രാജ്യത്തിന്റെ ഭൂരിഭാഗം പ്രദേശത്തും പ്രളയമെത്തിയിരുന്നു. ചരിത്രത്തിലെ ഏറ്റവും വലിയ പ്രളയമായാണ് ഇത് രേഖപ്പെടുത്തുന്നത്.

ഇന്തോനേഷ്യയിൽ മൂന്നു ഭൂചലനങ്ങൾ, സുനാമി മുന്നറിയിപ്പില്ല

ഇന്തോനേഷ്യയിലെ സുമാത്രക്ക് അടുത്ത് മൂന്നു തവണ ശക്തമായ ഭൂചലനം. ഇന്ന് പുലർച്ചെയാണ് ആദ്യ ഭൂചലനമുണ്ടായത്. സുനാമി മുന്നറിയിപ്പില്ലെന്ന് ഇന്തോനേഷ്യൻ മീറ്റിയോറോളജി ആന്റ് ജിയോഫിസിക്‌സ് ഏജൻസി അറിയിച്ചു.
സുമാത്ര ദ്വീപിനു സമീപം തിങ്കളാഴ്ച പുലർച്ചെയുണ്ടായ ഭൂചലനം റിക്ടർ സ്‌കെയിലിൽ 6.1 തീവ്രത രേഖപ്പെടുത്തി. മെൻടാവി ദ്വീപിനു സമീപമായിരുന്നു ഭൂചലനത്തിന്റെ പ്രഭവകേന്ദ്രം. രാവിലെ 10.30 ഓടെ സുനാമി മുന്നറിയിപ്പില്ലെന്ന് കാലാവസ്ഥാ വകുപ്പ് അറിയിച്ചു. തുടർന്ന് 5.4, 5.2 തീവ്രതയുള്ള തുടർ ചലനങ്ങളും ഒരു മണിക്കൂറിനുള്ളിലുണ്ടായി.
മെൻടാവി ദ്വീപിൽ ഏതാനും സെക്കന്റുകൾ ശക്തമായ ചലനം അനുഭവപ്പെട്ടെന്ന് ദുരന്തനിവാരണ ഏജൻസി അറിയിച്ചു. ദ്വീപിൽ ചെറിയ നാശ്‌നഷ്ടങ്ങളേ ഉള്ളൂവെന്ന് ഏജൻസി പറഞ്ഞു. ആളപായം സംബന്ധിച്ച റിപ്പോർട്ടുകളില്ല. 2009 ൽ 7.6 തീവ്രതയുള്ള ഭൂചലനം ഈ മേഖലയിലുണ്ടായിരുന്നു. ഇതിൽ 1,100 പേരാണ് മരിച്ചത്. നിരവധി പേർക്ക് പരുക്കേൽക്കുകയും ചെയ്തിരുന്നു. ഇന്തോനേഷ്യ വിവിധ ടെക്ടോണിക് പ്ലേറ്റുകളിലാണ് സ്ഥിതി ചെയ്യുന്നത്. പസഫിക് റിംഗ് ഓഫ് ഫയർ എന്നാണ് ഇന്തോനേഷ്യയെ വിളിക്കുന്നത്. അതിനാൽ ഇവിടെ ഭൂചലനം പതിവാണ്. ടെക്ടോണിക് പ്ലേറ്റുകൾ തമ്മിലുരസുകയോ തെന്നുകയോ ചെയ്യുമ്പോഴാണ് ഭൂചലനം സംഭവിക്കുന്നത്. 2004 ൽ സുമാത്രയിലുണ്ടായ ശക്തിയേറിയ ഭൂചലനമാണ് ലക്ഷക്കണക്കിനാളുകളുടെ മരണത്തിനിടയാക്കിയ സുനാമിക്ക് കാരണമായത്.

കാലാവസ്ഥ വ്യതിയാനം: സുദാനിൽ പ്രളയം; മരണം 80 കവിഞ്ഞു

കാലാവസ്ഥാ വ്യതിയാനങ്ങള്‍ ഭൂമിയില്‍ പലതരത്തിലാണ് അനുഭവപ്പെടുന്നത്. യൂറോപ്പിന്‍റെ തെക്ക് ഭാഗത്തും വടക്കേ അമേരിക്കന്‍ ഭൂഖണ്ഡത്തിന്‍റെ വടക്കന്‍ പ്രദേശങ്ങളിലും അതിരൂക്ഷമായ വളര്‍ച്ചയും ഉഷ്ണതരംഗവും അനുഭവപ്പെടുമ്പോള്‍ ആഫ്രിക്കന്‍ രാജ്യമായ സുദാനില്‍ കനത്ത മഴ പെയ്യുകയാണ്. ഇതേതുടര്‍ന്നുണ്ടായ വെള്ളപ്പൊക്കത്തില്‍ മരണം 83 ആയി ഉയര്‍ന്നു. മഴക്കാലത്തിന്‍റെ തുടക്കം മുതല്‍ രാജ്യത്ത് രേഖപ്പെടുത്തിയ മരണ സംഖ്യയാണിതെന്ന് അധിക‍ൃതര്‍ അറിയിച്ചു.
സാധാരണയായി ജൂണിലാണ് സുദാനിലെ മഴക്കാലം ആരംഭിക്കുന്നത്. ഇത് സെപ്തംബര്‍ അവസാനം വരെ നീണ്ട് നില്‍ക്കും. ആഗസ്റ്റ്, സെപ്തംബര്‍ മാസങ്ങളില്‍ രാജ്യത്ത് വെള്ളപ്പൊക്കവും സാധാരണമാണ്. കഴിഞ്ഞ വര്‍ഷത്തെ വെള്ളപ്പൊക്കത്തില്‍ 80 ല്‍ അധികം ആളുകള്‍ മരിച്ചിരുന്നു.
കിഴക്കന്‍ ആഫ്രിക്കന്‍ രാജ്യമായ സുദാനിലെ മിക്ക പ്രദേശങ്ങളും ഇപ്പോഴും വെള്ളത്തിനടിയിലാണ്. കഴിഞ്ഞ മെയ് മുതല്‍ കുറഞ്ഞത് 36 പേര്‍ക്ക് പരിക്കേറ്റതായി ബ്രിഗേഡിയര്‍ ജനറല്‍ അബ്ദുള്‍ ജലീല്‍ അബ്ദുള്‍ റഹീം പറഞ്ഞു. രാജ്യത്തുടനീളം 18,200 ഓളം വീടുകള്‍ പൂര്‍ണ്ണമായും നശിച്ചു.
ഏറ്റവും കുറഞ്ഞത് 25,600 വീടുകളെങ്കിലും ഭാഗീകമായി തകര്‍ന്നതായും ജനറല്‍ അബ്ദുള്‍ ജലീല്‍ അബ്ദുള്‍ റഹീം അറിയിച്ചു. രാജ്യത്തെ 1,46,200-ലധികം ആളുകളെ വെള്ളപ്പൊക്കം ബാധിച്ചതായി ഐക്യരാഷ്ട്രസഭ അറിയിച്ചു. സാമൂഹിക മാധ്യമങ്ങളില്‍ പ്രചരിച്ച വീഡിയോകളില്‍ ഗ്രാമപ്രദേശങ്ങള്‍ വെള്ളത്തില്‍ മുങ്ങിക്കിടക്കുന്നത് കാണാം.
രാജ്യത്തെ 18 പ്രവിശ്യകളിൽ ആറെണ്ണത്തില്‍ അധികൃതർ അടിയന്തരാവസ്ഥ പ്രഖ്യാപിച്ചു. പടിഞ്ഞാറൻ ഡാർഫർ മേഖലയും നൈൽ നദി, വൈറ്റ് നൈൽ, വെസ്റ്റ് കോർഡോഫാൻ, സൗത്ത് കോർഡോഫാൻ എന്നീ പ്രവിശ്യകളും വെള്ളപ്പൊക്കം ഏറ്റവും കൂടുതൽ ബാധിക്കപ്പെട്ടവയാണെന്ന് യുഎൻ ഓഫീസ് ഫോർ ദി കോർഡിനേഷൻ ഓഫ് ഹ്യൂമാനിറ്റേറിയൻ അഫയേഴ്സ് അഥവാ ഒസിഎച്ച്എ പറയുന്നു.
ആഫ്രിക്കന്‍ രാജ്യങ്ങളില്‍ ദിരുതാശ്വാസ പ്രവര്‍ത്തനത്തിലേര്‍പ്പെട്ടിരിക്കുന്ന യുഎന്‍ ഏജന്‍സികള്‍ ഫണ്ടിങ്ങിന്‍റെ അപര്യാപ്തത നേരിടുകയാണ്. ഈ വര്‍ഷം ഇതുവരെയായി 608 മില്യണ്‍ ഡോളര്‍ സുദാന് നല്‍കിയതായി ഒ.സി.എച്ച്എ പറഞ്ഞു. എന്നാല്‍ ഈ തുക ഒരു വര്‍ഷം ആവശ്യമായതിന്‍റെ മൂന്നിലൊന്ന് മാത്രമാണ്.

കാലാവസ്ഥ പ്രവചനം തെറ്റി; ഹംഗറിയിൽ ഉദ്യോഗസ്ഥരെ പിരിച്ചു വിട്ടു

കാലാവസ്ഥാ പ്രവചനത്തിന്റെ കാര്യത്തിൽ കാര്യക്ഷമത കൂടിയ ഹംഗറിയിൽ കാലാവസ്ഥാ പ്രവചനം തെറ്റിയത് വിവാദമായി. രണ്ടു കാലാവസ്ഥ നിരീക്ഷകരെ സർക്കാർ പിരിച്ചു വിടുകയും ചെയ്തു. ഹംഗറിയിലാണ് പ്രവചനത്തിൽ തെറ്റ് സംഭവിച്ചതിന് രണ്ട് കാലാവസ്ഥാ വിദഗ്ധരെ പിരിച്ചുവിട്ടത്. തെറ്റായ കാലാവസ്ഥാ പ്രവചനത്തെ തുടർന്നുള്ള സംഭവവികാസങ്ങൾ രാജ്യത്ത് വലിയ രാഷ്ട്രീയ വിവാദങ്ങൾക്ക് ഇടയാക്കിയതിനെ തുടർന്നാണ് ഉദ്യോഗസ്ഥരെ പിരിച്ചുവിടുന്നതിലേക്ക് കാര്യങ്ങൾ എത്തിയത്.

സെന്റ് സ്റ്റീഫൻസ് ഡേ ആഘോഷങ്ങളുടെ ഭാഗമായി ബുഡാപെസ്റ്റിൽ നടത്താനിരുന്ന കരിമരുന്ന് പ്രയോഗം തെറ്റായ കാലാവസ്ഥാ പ്രവചനത്തേത്തുടർന്ന് മാറ്റിവയ്ക്കേണ്ടിവന്നിരുന്നു. കഴിഞ്ഞ ശനിയാഴ്ചയായിരുന്നു പരിപാടി നിശ്ചയിച്ചിരുന്നത്. എല്ലാ തയ്യാറെടുപ്പുകളും പൂർത്തിയായിരുന്നു. എന്നാൽ വെടിക്കെട്ട് നടക്കുന്ന സമയത്ത് കാലാവസ്ഥ മോശമാകുമെന്ന് മുന്നറിയിപ്പുണ്ടായി. ഇതിനേത്തുടർന്ന് പരിപാടി മാറ്റിവെക്കുകയാണെന്ന് വെടിക്കെട്ട് നടക്കുന്നതിന് ഏഴ് മണിക്കൂർ മുൻപ് സർക്കാർ പ്രഖ്യാപിച്ചു. എന്നാൽ പ്രവചിച്ചതുപോലെ കാലാവസ്ഥയിൽ ഒരു മാറ്റവും ഉണ്ടായില്ല. ഇതാണ് കലാവസ്ഥാ ഉദ്യോഗസ്ഥരുടെ പിരിച്ചുവിടലിലേക്ക് നയിച്ചത്.

യൂറോപ്പിലെ ഏറ്റവും വലിയ കരിമരുന്ന് പ്രകടനം എന്ന് വിശേഷിപ്പിക്കുന്ന അതിബൃഹത്തായ കരിമരുന്ന് പ്രകടനമാണ് നടക്കേണ്ടിയിരുന്നത്. ഡാന്യൂബ് നദിയുടെ കരയിൽ അഞ്ച് കിലോമീറ്ററോളം പ്രദേശത്താണ് പരിപാടി നടക്കാറുള്ളത്. ഇവിടെ 240 കേന്ദ്രങ്ങളിലായാണ് വെടിക്കെട്ട് നടക്കുന്നത്. ഇരുപത് ലക്ഷത്തോളം പേരാണ് പരിപാടി കാണാൻ എത്താറുള്ളത്. വെടിക്കെട്ട് നടക്കേണ്ട സമയത്ത് കനത്ത മഴപെയ്യുമെന്നായിരുന്നു കാലാവസ്ഥാ വകുപ്പിന്റെ പ്രവചനം. ഇതേത്തുടർന്ന് പരിപാടി ഒരാഴ്ചത്തേക്ക് മാറ്റിവെക്കുകയായിരുന്നു. എന്നാൽ പ്രതീക്ഷിച്ച സ്ഥലത്തല്ല മഴയുണ്ടായത്. ബുഡാപെസ്റ്റ് അടക്കമുള്ള പ്രദേശത്ത് പെയ്യുമെന്ന് പ്രതീക്ഷിച്ച മഴമേഘങ്ങൾ രാജ്യത്തിന്റെ കിഴക്കൻ പ്രദേശങ്ങളിലേക്ക് നീങ്ങുകയും അവിടെ കനത്ത മഴപെയ്യുകയും ചെയ്തു. എന്നാൽ ബുഡാപെസ്റ്റിൽ ഒരുതുള്ളിപോലും പെയ്തുമില്ല.
മഴ പ്രവചനം പാളിപ്പോയതോടെ കാലാവസ്ഥാവകുപ്പ് ഞായറാഴ്ച സാമൂഹ്യമാധ്യമങ്ങളിലൂടെ ക്ഷമാപണം നടത്തിയിരുന്നു. തെറ്റാൻ സാധ്യതയുണ്ടെന്ന് തീരെ പ്രതീക്ഷിക്കാതിരുന്ന ഒരു കാലാവസ്ഥാ പ്രവചനമാണ് തങ്ങൾ നടത്തിയതെന്നും എന്നാൽ ഇത്തരം അനിശ്ചിതത്വങ്ങൾ കാലാവസ്ഥാ പ്രവചനത്തിന്റെ ഭാഗമാണെന്നും വിശദീകരണക്കുറിപ്പിൽ കാലാവസ്ഥാവകുപ്പ് പറഞ്ഞു. എന്നാൽ ക്ഷമാപണംകൊണ്ട് പ്രയോജനമുണ്ടായില്ല. പ്രവചനം തെറ്റിച്ച് രാജ്യത്തിന് വലിയ നഷ്ടവും നാണക്കേടും ഉണ്ടാക്കിയതിന് വകുപ്പ് തലൻമാരായ രണ്ട് ഉദ്യോഗസ്ഥരെ സർക്കാർ പരിച്ചുവിട്ടു.

അതേസമയം, കരിമരുന്ന് പ്രകടനത്തിനെതിരേ നേരത്തേതന്നെ രാജ്യത്ത് എതിർപ്പുകൾ ഉയർന്നിരുന്നു. അയൽ രാജ്യമായ യുക്രൈനിൽ യുദ്ധം നടക്കുന്നതിനിടെ വെടിക്കെട്ട് നടത്തരുതെന്നും രാജ്യത്ത് ചെലവുചുരുക്കൽ നടപടികൾ സ്വീകരിക്കണമെന്നും ആവശ്യപ്പെട്ട് ഒരുലക്ഷം പേർ ഒപ്പിട്ട നിവേദനം സർക്കാരിന് നൽകിയിരുന്നു. എന്നാൽ, തെറ്റായ പ്രവചനം നടത്തി പരിപാടി താറുമാറാക്കിയ കാലാവസ്ഥാ വകുപ്പിനെതിരേ സർക്കാർ അനുകൂലികൾ രംഗത്തെത്തുകയും ചെയ്തു.