ബംഗാൾ ഉൾക്കടലിൽ ന്യൂനമർദം ശക്തിപ്രാപിക്കുന്നു; 26ന് ചുഴലിക്കാറ്റാകാൻ സാധ്യത, ഇന്ന് 9 ജില്ലകളിൽ ഓറഞ്ച് അലർട്ട്

ബംഗാൾ ഉൾക്കടലിൽ രൂപപ്പെട്ട ന്യൂനമർദം ശക്തിപ്രാപിച്ച് ചുഴലിക്കാറ്റായി മാറാൻ സാധ്യതയെന്ന് കേന്ദ്ര കാലാവസ്ഥാ വകുപ്പ്. ഒക്ടോബർ 26-ന് രാവിലെ പടിഞ്ഞാറൻ മധ്യ ബംഗാൾ ഉൾക്കടലിൽ ചുഴലിക്കാറ്റായി മാറാനാണ് സാധ്യത. തുടർന്ന് വടക്കുപടിഞ്ഞാറൻ ദിശയിൽ നീങ്ങി വടക്കൻ ആന്ധ്രാപ്രദേശ്, തെക്കൻ ഒഡിഷ തീരങ്ങളിലേക്ക് നീങ്ങാൻ സാധ്യത.

തെക്കുകിഴക്കൻ ബംഗാൾ ഉൾക്കടലിലും മധ്യകിഴക്കൻ ബംഗാൾ ഉൾക്കടലിനോട് ചേർന്ന മേഖലയിലുമായി ഇന്ന് (ഒക്ടോബർ 23) പുലർച്ചെ 5.30-നാണ് ന്യൂനമർദം രൂപപ്പെട്ടത്. നാളെ (ഒക്ടോബർ 24) ഇത് ശക്തിപ്രാപിച്ച് ന്യൂനമർദമായി മാറിയേക്കും. ഒക്ടോബർ 25-ന് തീവ്ര ന്യൂനമർദമായും 26-ന് ചുഴലിക്കാറ്റായും ശക്തി വർധിക്കാനാണ് സാധ്യത. തുടർന്നുള്ള രണ്ട് ദിവസങ്ങളിൽ ആന്ധ്രാപ്രദേശ്, ഒഡിഷ തീരങ്ങളിലേക്ക് നീങ്ങുമെന്നും കാലാവസ്ഥാ വകുപ്പ് അറിയിച്ചു.

kevala Weather : ന്യൂനമർദ്ദം കേരള തീരത്തേക്ക് നീങ്ങാൻ സാധ്യത; 26 വരെ മഴയും കാറ്റും ശക്തമാകും
കേരളം, കന്യാകുമാരി, തമിഴ്‌നാട് മേഖലകൾക്ക് മുകളിലായി നിലവിലുള്ള ന്യൂനമർദം നാളെയോടെ അറബിക്കടലിൽ കേരള തീരത്തേക്ക് നീങ്ങാൻ സാധ്യത.
https://metbeatnews.com/low-pressure-area-to-intensify-rainfall-and-winds-until-october-26

കേരളത്തിൽ അതിശക്തമായ മഴയ്ക്ക് സാധ്യത

ന്യൂനമർദങ്ങളുടെ സ്വാധീനത്തിൽ കേരളത്തിലും മഴ ശക്തമാകാൻ സാധ്യതയുണ്ട്. തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി, കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിൽ കേന്ദ്ര കാലാവസ്ഥാ വകുപ്പ് ഓറഞ്ച് അലർട്ട് പ്രഖ്യാപിച്ചു. ഈ ജില്ലകളിൽ ഒറ്റപ്പെട്ടയിടങ്ങളിൽ അതിശക്തമായ മഴയ്ക്കും ഇടിമിന്നലിനും സാധ്യതയുണ്ട്.

കേരളത്തിലും മാഹിയിലും ഒക്ടോബർ 23 മുതൽ 26 വരെ വ്യാപകമായ മഴയ്ക്കാണ് സാധ്യത. ഒക്ടോബർ 23 മുതൽ 25 വരെ ഒറ്റപ്പെട്ടയിടങ്ങളിൽ അതിശക്തമായ മഴയും 26-ന് ഒറ്റപ്പെട്ട കനത്ത മഴയും ലഭിച്ചേക്കും.

കേരളത്തിലും മാഹിയിലും ലക്ഷദ്വീപിലും മണിക്കൂറിൽ 30 മുതൽ 40 കിലോമീറ്റർ വരെ വേഗത്തിൽ വീശുന്ന കാറ്റിനും സാധ്യതയുണ്ട്. കാറ്റിന്റെ വേഗം ചിലപ്പോൾ മണിക്കൂറിൽ 50 കിലോമീറ്റർ വരെയാകാം.

തമിഴ്നാട്ടിലും കനത്ത മഴയ്ക്ക് സാധ്യത

തമിഴ്നാട്, പുതുച്ചേരി, കാരയ്ക്കൽ മേഖലകളിൽ ഒക്ടോബർ 23 മുതൽ 24 വരെ വ്യാപകമായ മഴ ലഭിച്ചേക്കും. ഒക്ടോബർ 23 മുതൽ 26 വരെ ഒറ്റപ്പെട്ടയിടങ്ങളിൽ അതിശക്തമായ മഴയ്ക്കും 27, 28 തീയതികളിൽ കനത്ത മഴയ്ക്കും സാധ്യതയുണ്ട്. തീരദേശ കർണാടക, തെക്കൻ ഉൾനാടൻ കർണാടക, ആന്ധ്രാപ്രദേശ് തീരമേഖലകൾ എന്നിവിടങ്ങളിലും മഴയും ഇടിമിന്നലും പ്രതീക്ഷിക്കുന്നു.

അതേസമയം, സോമാലിയ തീരത്ത് നിലനിന്നിരുന്ന ന്യൂനമർദം തീരത്തേക്ക് നീങ്ങിയിട്ടുണ്ട്. തെക്കൻ കേരളത്തിലും കന്യാകുമാരി മേഖലയിലും നിലനിന്നിരുന്ന ചക്രവാതച്ചുഴിയുടെ സ്വാധീനത്തിൽ രൂപപ്പെട്ട ന്യൂനമർദം തെക്കുകിഴക്കൻ അറബിക്കടലിൽ തെക്കൻ കേരള തീരത്തിന് സമീപം സ്ഥിതി ചെയ്യുകയാണ്. ഈ കാലാവസ്ഥാ സംവിധാനങ്ങളുടെ സ്വാധീനത്തിൽ വരും ദിവസങ്ങളിൽ ദക്ഷിണേന്ത്യയിൽ മഴ ശക്തമാകാനാണ് സാധ്യത.

English Summary : The India Meteorological Department (IMD) has issued a weather warning following the formation of a low-pressure area over the southeast and adjoining east-central Bay of Bengal. The system is expected to intensify into a cyclone by the morning of October 26 over the Westcentral Bay of Bengal, moving towards the North Andhra Pradesh and South Odisha coasts.