വീട്ടിലിരുന്ന യുവാവിനെ ചുഴലികാറ്റ് വലിച്ചു കൊണ്ടു പോയി, ബോധം വന്നപ്പോൾ 1307 അടി അകലെ

നമ്മൾ അനുഭവിക്കുന്ന എല്ലാ അന്തരീക്ഷ കൊടുങ്കാറ്റുകളിലും ഏറ്റവും അക്രമാസക്തമായ പ്രതിഭാസങ്ങളിൽ ഒന്നാണ് ടൊർണാഡോകൾ. ഓസ്‌ട്രേലിയ, യൂറോപ്പ്, ആഫ്രിക്ക, ഏഷ്യ, ദക്ഷിണ അമേരിക്ക എന്നിവയുൾപ്പെടെ ലോകത്തിന്റെ പല ഭാഗങ്ങളിലും ടൊർണാഡോകൾ ഉണ്ടാകാറുണ്ട്. ന്യൂസിലാൻഡിൽ പോലും ഓരോ വർഷവും ഏകദേശം 20 ടൊർണാഡോകൾ റിപ്പോർട്ട് ചെയ്യപ്പെടുന്നു. യുഎസിന് പുറത്ത് ഏറ്റവും കൂടുതൽ ടൊർണാഡോകൾ ഉണ്ടാകുന്ന രണ്ട് രാജ്യങ്ങൾ അർജന്റീനയും ബംഗ്ലാദേശുമാണ്.

ചെറു മൃഗങ്ങളേയും പക്ഷികളേയും ഈ കൊടുങ്കാറ്റ് വലിച്ചു കൊണ്ടു പോകും

പറന്നെത്തുന്ന ഏറ്റവും അക്രമാസക്തമായ ഈ ദുരന്ത കൊടുങ്കാറ്റ് പോകുന്ന വഴിയെല്ലാം നാശം വിതയ്ക്കും. ട്വിസ്റ്ററുകൾ എന്ന പേരിലും ഇവ അറിയപ്പെടുന്നു. മണിക്കൂറിൽ 480 കിലോമീറ്റർ എന്ന അതിവേഗത്തിൽ പോകുന്ന ടൊർണാഡോ പലതരം പ്രശ്നങ്ങളുണ്ടാക്കാറുണ്ട്. പക്ഷികളെയും ചെറുമൃഗങ്ങളെയുമൊക്കെ ഇവ വഹിച്ചെടുത്തു ദൂരെക്കൊണ്ടുപോയി ഇട്ട സംഭവങ്ങളും ഉണ്ടായിട്ടുണ്ട്. അപൂർവമായിട്ടാണെങ്കിലും മനുഷ്യരെയും ടൊർണാഡോകൾ പൊക്കിക്കൊണ്ടുപോയ സംഭവങ്ങളുണ്ട്. അക്കൂട്ടത്തിൽ ഏറെ ശ്രദ്ധേയമാണ് മാറ്റ് സട്ടറിന്റെ കഥ.

19 കാരനായ സട്ടറിനെ ഈ കൊടുങ്കാറ്റ് വലിച്ചു കൊണ്ട് പോയത് 1307 അടി അകലെ

യുഎസിലെ മിസോറിയിൽ ഒരു പത്തൊൻമ്പത്കാരന് സംഭവിച്ച ദുരന്തമാണ് ഇപ്പോൾ സോഷ്യൽ മീഡിയയിൽ ചർച്ച. യുഎസിലെ മിസോറിയിൽ അന്ന് ഒരു ഡസനിലധികം ടൊർണാഡോകളുണ്ടായി. അതിലൊന്ന് സട്ടറിന്റെ മുത്തശ്ശിയുടെ വീടിനെ ആക്രമിച്ചു. അകത്തുണ്ടായിരുന്ന സട്ടറിന്റെ തല ഈ ആഘാതത്തിൽ ഒരു വിളക്കിൽ പോയിടിച്ചു. അവന്റെ ബോധവും പോയി. പിന്നീട് ബോധം വന്ന് എഴുന്നേറ്റപ്പോൾ സട്ടർ, 1307 അടി അകലെ ഒരു പുൽമേട്ടിൽ വീണു കിടക്കുകയായിരുന്നു.

കാലിൽ ചെറിയൊരു പരുക്കൊഴിച്ചാൽ ആ ചുഴലിയാത്രയിൽ സട്ടറിനു പറയത്തക്ക പ്രശ്നങ്ങളൊന്നും ഉണ്ടായില്ല. ഒരു ചുഴലിക്കാറ്റ് ഏറ്റവും കൂടുതൽ ദൂരത്തേക്ക് ഒരു വ്യക്തിയെ വഹിച്ചുകൊണ്ടുപോയതിന്റെ റെക്കോർഡ് അതോടെ സട്ടറിനു വന്നു ചേർന്നു.

ചുഴലിക്കാറ്റുകൾ യുഎസിൽ വളരെ കൂടുതലാണ്. 2021ൽ മാത്രം യുഎസിൽ വിവിധ മേഖലകളിലായി 1079 ചുഴലിക്കാറ്റുകൾ വീശിയടിച്ചെന്നാണ് കാലാവസ്ഥാ റിപ്പോർട്ടുകൾ പറയുന്നത്. ലോകത്ത് മറ്റെല്ലായിടത്തും കൂടി സംഭവിക്കുന്നതിന്റെ നാലു മടങ്ങു ചുഴലിക്കാറ്റുകൾ യുഎസിൽ പ്രതിവർഷം സംഭവിക്കുന്നു.

ചുഴലികാറ്റ് ഉണ്ടാകാനുള്ള കാരണങ്ങൾ

ചുഴലിക്കാറ്റുകൾ ഉണ്ടാകാനുള്ള ഏറ്റവും അനുയോജ്യ സാഹചര്യങ്ങൾ തറനിരപ്പിൽ ചൂടുള്ള വായു, ഉയർന്ന അന്തരീക്ഷത്തിൽ തണുത്ത വായു, ഇതിനിടയിൽ വിവിധ വേഗത്തിൽ വീശുന്ന കാറ്റുകൾ എന്നിവയാണെന്ന് കാലാവസ്ഥാ നിരീക്ഷകർ പറയുന്നു. ഈ സാഹചര്യങ്ങളെല്ലാം ഒത്തുചേർന്നയിടങ്ങളാണ് യുഎസിന്റെ ഗ്രേറ്റ് പ്ലെയിൻസ് എന്നറിയപ്പെടുന്ന സമതലങ്ങൾ. ടൊർണാഡോ ആലി എന്നാണ് ഇവ അറിയപ്പെടുന്നത്.

ജനം ചുഴലികാറ്റിനുള്ള സാധ്യത പ്രതീക്ഷിച്ച് തയ്യാറെടുത്തിരിക്കുന്നു

തെക്കുനിന്നുള്ള ചൂടുകാറ്റും, പടിഞ്ഞാറു നിന്നുള്ള തണുത്തകാറ്റും ടൊർണാഡോ ചുഴലിക്ക് അനൂകൂല സാഹചര്യം സൃഷ്ടിക്കുന്നു. യുഎസിൽ ഓരോ വർഷവും ശരാശരി 1000 ടൊർണാഡോകൾ ഉണ്ടാകുന്നുണ്ട്. രണ്ടാം സ്ഥാനത്തുള്ള കാനഡയിൽ പ്രതിവർഷം 100 എണ്ണമാണ് ഉണ്ടാകുന്നത്. യുഎസിലെ പല മേഖലകളിലെയും ആളുകൾ എപ്പോഴും ചുഴലിക്കാറ്റുകൾ സംഭവിക്കാനുള്ള സാധ്യത പ്രതീക്ഷിച്ചാണ് ഇരിക്കുന്നത്. വെതർ റിപ്പോർട്ടുകൾക്കും മറ്റും അവർ എപ്പോഴും ശ്രദ്ധ നൽകുന്നു.

English Summary: Discover how warm winds from the south and cool winds from the west create tornado conditions in the U.S., averaging 1,000 tornadoes annually.