പ്രകൃതിയെ നശിപ്പിക്കുന്ന ഈ മാലിന്യങ്ങൾ വെറുതെ കളയല്ലേ, കൈയ്യിലെത്തും പണം

ഈ പ്രകൃതിയെ നശിപ്പിക്കാൻ പാകത്തിനുള്ള മാലിന്യ ബോംബ് നമ്മുടെ വീടുകളിൽ തന്നെയുണ്ട്. ഉപയോഗം കഴിഞ്ഞ് വലിച്ചെറിയുന്ന ഒരു മുട്ടു സൂചി പോലും ഭൂമിക്ക് അപകടമാണെന്ന് പറയാം. പ്ലാസ്റ്റിക്കുകൾ കത്തിക്കുന്നതും അവ വലിച്ചെറിയുന്നതുമൊക്കെ തലമുറകളേയാണ് ശാരീരികമായും മാനസികമായും വേട്ടയാടുക.

പുതിയ കണക്കനുസരിച്ച് വീടുകളിലേയും സ്ഥാപനങ്ങളിലേയും അജൈവ മാലിന്യം ഉപേക്ഷിക്കാൻ തദ്ദേശ വകുപ്പിൻ്റെ നേതൃത്വത്തിൽ ക്ലീൻ കമ്പനി ആരംഭിച്ച ഇക്കോ ബാങ്കിൽ ജില്ലയിൽ രണ്ടു മാസം കൊണ്ട് എത്തിയത് 3,893 കിലോ മാലിന്യമാണ്.ടിവി, ഫ്രിഡ്ജ്, കംമ്പ്യൂട്ടർ, ചെരുപ്പുകൾ, ബാഗുകൾ തുടങ്ങി പലതരം പ്ലാസ്റ്റിക് ഉൽപന്നങ്ങളാണ് ഇവിടെത്തിയത്. ഇതിൽ ടി.വി, ഫ്രിഡ്ജ്, കംമ്പ്യൂട്ടർ തുടങ്ങിയവ 7.2 കിലോയും, ബാഗ്, ചെരിപ്പ്, തെർമോക്കോൾ എന്നിവ 8 കിലോയും തുണി 58 കിലോയും നിഷ്‌ക്രിയ മാലിന്യം അതായത് പ്ലാസ്റ്റിക്, ലെതർ ഉൽപന്നങ്ങൾ, സിമൻ്റ് ചാക്ക് എന്നിവ 3815 കിലോയും, വേർതിരിച്ചെടുത്തത് 5 കിലോയുമാണുള്ളത്.

പുനരുപയോഗിക്കാൻ കഴിയുന്ന മാലിന്യം എത്തിക്കുന്നവർക്ക് നിശ്ചിത തുക

ശേഖരിക്കുന്നവരിൽ പുനരുപയോഗിക്കാൻ കഴിയുന്ന കാർഡ് ബോർഡ് അടക്കമുള്ള അജൈവമാലിന്യങ്ങൾ ഇക്കോ ബാങ്കിൽ എത്തിച്ചു നൽകുന്നവർക്ക് നിശ്ചിത തുക നൽകും. എന്നാൽ ട്യൂബ്, സിഎഫ്എൽ തുടങ്ങിയ മാലിന്യങ്ങൾ സംസ്‌കരിക്കാൻ അധികം ചിലവ് വരുമെന്നതിനാൽ മാലിന്യം തരുന്നവരുടെ പക്കൽ നിന്ന് ചെറിയ തുക ഈടാക്കും.

വീടുകൾ, സ്ഥാപനങ്ങൾ, നിർമ്മാണ, ആഘോഷ സ്ഥലങ്ങൾ തുടങ്ങി എവിടെയുമുണ്ടാകുന്ന അജൈവ മാലിന്യങ്ങൾ ഇക്കോ ബാങ്കിൽ നൽകാം. നിലവിൽ ഹരിത കർമ്മ സേനകൾ വഴി എല്ലാ പഞ്ചായത്തുകളിലും അജൈവ മാലിന്യങ്ങളും നഗരസഭകൾ വഴി ഇലക്ട്രോണിക് മാലിന്യങ്ങളും ശേഖരിക്കുന്നുണ്ട്. ഇതിന് പുറമേയാണ് ഇക്കോ ബാങ്കിൻ്റെ പ്രവർത്തനം. മാലിന്യങ്ങൾ തരം തിരിച്ച് സംസ്‌കരിക്കുന്നത് ഉൾപ്പെടെയുള്ള കാര്യങ്ങൾ ചെയ്യുന്നത് ക്ലീൻ കേരള കമ്പനിയായിരിക്കും.

English Summary:Discover how the Eco District's clean initiative has collected 3,893 kg of inorganic waste in just two months, promoting sustainable waste management practices.