തുലാമഴ തിരികെ വരുന്നു, 17 മുതല്‍, തമിഴ്‌നാട് തീരത്ത് ന്യൂനമര്‍ദ സാധ്യതയും

കേരളത്തിലും തമിഴ്‌നാട്ടിലും തുലാവര്‍ഷ മഴ നവംബര്‍ 17 (തിങ്കള്‍) മുതല്‍ തിരികെയെത്തും. കിഴക്കന്‍ കാറ്റ് വീണ്ടും ശക്തിപ്പെടുന്നത് മൂലമാണിത്. മന്‍ ത ചുഴലിക്കാറ്റ് ദിശമാറ്റിയ കിഴക്കന്‍ കാറ്റ് ഇപ്പോഴും പൂര്‍ണതോതില്‍ പഴയ രീതിയിലേക്ക് മാറിയിട്ടില്ല.

ഇപ്പോള്‍ കേരളത്തിലും തമിഴ്‌നാട്ടിലും ഒറ്റപ്പെട്ട മഴ വൈകുന്നേരങ്ങളില്‍ ലഭിക്കുന്നുണ്ടെങ്കിലും ഇടിയോടു കൂടെ കൂടുതല്‍ പ്രദേശങ്ങളിലേക്ക് തുലാമഴ സജീവമാകാന്‍ ഈ മാസം 17 വരെ കാത്തിരിക്കേണ്ടി വരുമെന്ന് മെറ്റ്ബീറ്റ് വെതര്‍ നിരീക്ഷിക്കുന്നു.

വടക്കന്‍ ജില്ലകളിലും ഇന്ന് മഴ എത്തി

കഴിഞ്ഞ ദിവസങ്ങളില്‍ തെക്കന്‍ കേരളത്തില്‍ സജീവമായിരുന്ന മഴ ഇന്ന് വടക്കന്‍ ജില്ലകളിലും എത്തി. മുന്‍ അവലോകന റിപ്പോര്‍ട്ടുകളില്‍ ഇക്കാര്യം സൂചിപ്പിച്ചിരുന്നു. ഇന്ന് കോഴിക്കോട് ജില്ലയുടെ വിവിധ ഭാഗങ്ങളില്‍ വൈകിട്ട് മഴ ലഭിച്ചു. ഇന്നു മുതല്‍ വടക്കന്‍ കേരളം ഉള്‍പ്പെടെയുള്ള ജില്ലകളില്‍ ഒറ്റപ്പെട്ട മഴ ലഭിക്കും.

തമിഴ്‌നാട് തീരത്ത് ന്യൂനമര്‍ദം രൂപപ്പെടും

ബംഗാള്‍ ഉള്‍ക്കടലില്‍ തമിഴ്‌നാടിനും ശ്രീലങ്കയ്ക്കും ഇടയിലായി അടുത്തയാഴ്ച ന്യൂനമര്‍ദം രൂപപ്പെടാനും അത് ശക്തിപ്പെട്ട് ചുഴലിക്കാറ്റ് വരെ ആകാനും സാധ്യതയുണ്ട്. ഈ സിസ്റ്റം തമിഴ്‌നാട്ടില്‍ പരക്കെ ശക്തമായ മഴക്ക് കാരണമാകും. കേരളത്തില്‍ വടക്കന്‍ ജില്ലകള്‍ ഉള്‍പ്പെടെ ശക്തമായ മഴ ഈ ന്യൂനമര്‍ദത്തെ തുടര്‍ന്ന് ലഭിക്കുമെന്നാണ് പ്രതീക്ഷിക്കുന്നത്്.

കേരളത്തിലും തമിഴ്‌നാട്ടിലും മഴ കുറവ്

ഇത്തവണ വടക്കുകിഴക്കന്‍ മണ്‍സൂണ്‍ (തുലാവര്‍ഷം) കേരളത്തിലും തമിഴ്‌നാട്ടിലും ഇതുവരെ ദുര്‍ബലമാണ്. നവംബര്‍ മാസത്തില്‍ ഇതുവരെ തുലാവര്‍ഷത്തില്‍ 81 ശതമാനം മഴക്കുറവുണ്ട്. എന്നാല്‍ അടുത്തയാഴ്ചയോടെ മഴ കൂടുമെന്നാണ് പ്രതീക്ഷ. നവംബര്‍ 10 വരെയുള്ള തമിഴ്‌നാട്ടിന്റെ കണക്കനുസരിച്ച് വരണ്ട മഴക്കാലമാണ് അവിടെയും. സാധാരണയായി തമിഴ്‌നാട്ടില്‍ ഈ കാലയളവില്‍ ലഭിക്കേണ്ടത് 181.7 എം.എം മഴയാണ്. എന്നാല്‍ ഇതുവരെ ലഭിച്ചത് വെറും 15.1 എം.എം മഴയാണ്. കേരളത്തില്‍ നവംബറില്‍ ഇതുവരെ ലഭിച്ചത്. 18 എം.എം മഴയാണ്.

തമിഴ്‌നാട്ടില്‍ ദുര്‍ബലമായ മഴക്കാലം

തമിഴ്‌നാട്ടില്‍ സമീപകാലത്തെ ഏറ്റവും ദുര്‍ബലമായ മണ്‍സൂണ്‍ ആണിത്. 2021 ല്‍ തമിഴ്‌നാട്ടില്‍ 425 എം.എം മഴയും 2023 ല്‍ 233 എം.എം ഉം 2024 ല്‍ 140 എം.എം മഴയും ലഭിച്ചിരുന്നു.