Menu

തെക്കുപടിഞ്ഞാറൻ മൺസൂൺ (കാലവർഷം)

ബംഗാൾ ഉൾക്കടലിൽ ന്യൂനമർദ്ദം രൂപപ്പെട്ടു: കേരളത്തിൽ ഒറ്റപ്പെട്ട മഴ തുടരും

ബംഗാൾ ഉൾക്കടലിന്റെ മധ്യ പടിഞ്ഞാറ് ഭാഗത്തായി ന്യൂനമർദ്ദം രൂപപ്പെട്ടു. ഈ ന്യൂനമർദ്ദം അടുത്ത 73 മണിക്കൂറിൽ ആന്ധ്രപ്രദേശ് തീരത്തേക്ക് നീങ്ങാനാണ് സാധ്യത. ന്യൂനമർദ്ദത്തിൽ നിന്ന് ബംഗ്ലാദേശിന്റെ ഭാഗത്തേക്ക് മറ്റൊരു ന്യൂനമർദ്ദ പാത്തിയും രൂപപ്പെട്ടു. മെറ്റ്ബീറ്റ് വെതറിന്റെ നിരീക്ഷണത്തിൽ ന്യൂനമർദ്ദം കേരളത്തിൽ ഒറ്റപ്പെട്ട മഴ തുടരാൻ കാരണമാകും. ഈ മാസം 9 വരെ ഒറ്റപ്പെട്ട മഴയാണ് കേരളത്തിൽ പ്രതീക്ഷിക്കേണ്ടത്. അതിനുശേഷം കേരളത്തിൽ ഇടിയോടുകൂടിയുള്ള കിഴക്കൻ മഴ ശക്തിപ്പെടും. തുലാവർഷം എത്തുന്നതിന്റെ മുന്നോടിയായി ആണിത് .

കേരളത്തോടൊപ്പം തമിഴ്നാട്ടിലും കർണാടകയിലും മഴ ലഭിക്കാനാണ് സാധ്യത. കാലവർഷം പിൻവാങ്ങിയ ശേഷമേ കേരളത്തിൽ തുലാവർഷം എത്തുകയുള്ളൂ. കാലവർഷത്തിന്റെ പിൻവാങ്ങൽ എന്ന കൂടുതൽ സംസ്ഥാനങ്ങളിലേക്ക് വ്യാപിച്ചു. ജമ്മു കാശ്മീർ ,രാജസ്ഥാൻ ഗുജറാത്ത് , ഉത്തർപ്രദേശ്, മധ്യപ്രദേശ് ഹരിയാന, ഡൽഹി സംസ്ഥാനങ്ങളിൽ കാലവർഷം ഭാഗികമായി പൂർണമായോ വിടവാങ്ങിയിട്ടുണ്ട്. കേരളത്തിൽ ആണ് കാലവർഷം അവസാനമായി വിടവാങ്ങുക. ഇതിന് രണ്ടാഴ്ചയെങ്കിലും സമയം എടുക്കും എന്നാണ് ഇപ്പോഴത്തെ നിരീക്ഷണം. കാലവർഷം വിടവാങ്ങിയിട്ടില്ലെങ്കിലും ഇപ്പോൾ പെയ്യുന്ന മഴ തുലാവർഷത്തിന്റെ കണക്കിലാണ് ഔദ്യോഗികമായി രേഖപ്പെടുത്തുക.

കാലവർഷം വിടവാങ്ങൽ പുരോഗമിക്കുന്നു; കേരളത്തിൽ വൈകും

രാജ്യത്ത് കാലവർഷം വിടവാങ്ങൽ പൂർത്തിയാകാൻ വൈകും. സെപ്റ്റംബർ 20 നാണ് വടക്കു പടിഞ്ഞാറൻ ഇന്ത്യയിൽ നിന്ന് കാലവർഷം വിടവാങ്ങൽ തുടങ്ങിയത്. മധ്യ ഇന്ത്യയിലെ ന്യൂനമർദത്തെ തുടർന്ന് കാലവർഷ വിടവാങ്ങൽ പുരോഗമിക്കുന്നതിന് തടസം നേരിട്ടു. 114 ദിവസം നീണ്ടു നിന്ന മൺസൂൺ 26 സംസ്ഥാനങ്ങളിലും കനത്ത നാശനഷ്ടമുണ്ടാക്കിയാണ് വിടവാങ്ങുന്നത്. 2000 ത്തോളം പേരാണ് ഇത്തവണ മരിച്ചത്. സാധാരണ സെപ്റ്റംബർ 17 നാണ് കാലവർഷം വിടവാങ്ങൽ തുടങ്ങേണ്ട തിയതി. മൂന്നു ദിവസം വൈകിയാണ് ഇത്തവണ വിടവാങ്ങൽ തുടങ്ങിയത്. രാജസ്ഥാനിൽ ഒതുങ്ങിയ വിടവാങ്ങൽ ഒരാഴ്ചയോളം കാര്യമായ പുരോഗതി ഉണ്ടായില്ല.

എന്നാൽ ഇന്ന് ഡൽഹി ഉൾപ്പെടെ കൂടുതൽ സംസ്ഥാനങ്ങളിലേക്ക് വിടവാങ്ങൽ വ്യാപിച്ചു. ജമ്മു കശ്മീർ , ഹിമാചൽ പ്രദേശ്, പടിഞ്ഞാറൻ യു.പി, ഹരിയാന എന്നീ സംസ്ഥാനങ്ങളിലാണ് ഇന്ന് വിടവാങ്ങൽ എത്തിയത്. ഇതിൽ ഡൽഹിയിൽ പൂർണമായും വിടവാങ്ങി. കേരളത്തിൽ വിടവാങ്ങൽ പൂർത്തിയാകാൻ ഇനിയും മൂന്നാഴ്ചയെങ്കിലും സമയമെടുക്കും. കേരളത്തിൽ നിന്നാണ് മൺസൂൺ അവസാനമായി വിടവാങ്ങുന്നത്. ആദ്യം മൺസൂൺ എത്തുന്നതും കേരളത്തിൽ നിന്നാണ്.

ട്രിപ്പിൾ ലാനിന കാരണം
1950 ന് ശേഷം രണ്ടു തവണയാണ് ട്രിപ്പിൾ ലാനിന റിപ്പോർട്ട് ചെയ്തത്. ഈ വർഷവും ട്രിപ്പിൾ ലാനിനയാണ്. കഴിഞ്ഞ രണ്ടു വർഷങ്ങളിലെ ഒക്ടോബറിലും ലാനിന തുടർന്നിരുന്നു. ലാനിന തുടരുന്നത് കാലവർഷത്തിന്റെ വിടവാങ്ങൽ വൈകാനിടയാക്കും. കാലവർഷം വിടവാങ്ങിയ ശേഷമേ വടക്കു കിഴക്കൻ കാലവർഷം ( തുലാവർഷം) എത്തുകയുള്ളൂ.

കാലവർഷക്കെടുതി: രാജ്യത്ത് മരിച്ചത് 2000 പേർ, വിശദാംശങ്ങൾ വായിക്കാം

ഈ വർഷത്തെ കാലവർഷക്കെടുതികളിൽ രാജ്യത്ത് മരിച്ചത് 2000 ത്തോളം പേർ. തീവ്രമഴ, പ്രളയം, ഉരുൾപൊട്ടൽ, ഇടിമിന്നൽ, മണ്ണിടിച്ചിൽ എന്നിങ്ങനെ ജൂൺ 1 മുതൽ മരിച്ചവരുടെ കണക്കാണിത്. കേന്ദ്ര ആഭ്യന്തര മന്ത്രാലയത്തിന്റെ ഡിസാസ്റ്റർ മാനേജ്‌മെന്റ് ഡിവിഷനിലെ കണക്കു പ്രകാരം 396 ജില്ലകളെ ഈ വർഷം കാലവർഷക്കെടുതി ബാധിച്ചു.

ഏറ്റവും കുടുതൽ മരണം വടക്കൻ സംസ്ഥാനങ്ങളിൽ

ഏറ്റവും കൂടുതൽ പേർ മരിച്ചത് ഹിമാചൽ പ്രദേശിലാണ്- 320. ഇവിടെ മേഘവിസ്‌ഫോടനവും പ്രളയവും ഉരുൾപൊട്ടലും ഈ വർഷം ഉണ്ടായിരുന്നു. ധ്യപ്രദേശിൽ 280 പേരും മരിച്ചു. 159 പേരും മരിച്ചത് മിന്നലേറ്റാണ്. ഏറ്റവും കൂടുതൽ പേർ രാജ്യത്ത് മിന്നലേറ്റ് മരിച്ചതും മധ്യപ്രദേശിലാണ്. ഗുജറാത്തിലാണ് ഏറ്റവും കൂടുതൽ പേർ മിന്നലേറ്റ് മരിച്ച രണ്ടാമത്തെ സംസ്ഥാനം. 69 പേരാണ് ഇവിടെ മരിച്ചത്.
മൺസൂൺ കാലത്ത് രാജ്യത്തുടനീളം 536 പേർ മിന്നലേറ്റു മരിച്ചു. അയൽരാജ്യങ്ങളായ പാകിസ്താൻ, ബംഗ്ലാദേശ് എന്നിവിടങ്ങളിലും മഴയിലും പ്രളയത്തിലും വ്യാപക നാശനഷ്ടമുണ്ടായ വർഷമാണ് 2022. ബംഗ്ലാദേശിലും വടക്കുകിഴക്കൻ സംസ്ഥാനങ്ങളിലും പ്രളയമുണ്ടായി. പാകിസ്താനിൽ ഏറ്റവും വലിയ പ്രളയത്തിൽ 1500 ലേറെ പേർ മരിച്ചു.

വ്യാപക കൃഷി നാശം

ഇന്ത്യയിൽ 15 ലക്ഷം ഹെക്ടർ കൃഷി നശിച്ചു. 70,000 കന്നുകാലികൾ ചത്തു. കേന്ദ്ര കാലാവസ്ഥാ വകുപ്പിന്റെ കണക്കനുസരിച്ച് വടക്കുകിഴക്കൻ സംസ്ഥാനമായ മണിപ്പൂരിൽ 48 ശതമാനം മഴക്കുറവുണ്ടായി. മിസോറമിൽ 20 ശതമാനവും ത്രിപുരയിൽ 23 ശതമാനവും മഴ കുറഞ്ഞു. ഡൽഹിയിൽ 37 ശതമാനം മഴ കുറഞ്ഞു. രാജ്യത്ത് ഏറ്റവും കൂടുതൽ മഴക്കുറവുള്ള രണ്ടാമത്തെ സംസ്ഥാനമാണ് ഡൽഹി. ഉത്തർ പ്രദേശിൽ മഴക്കുറവ് 35 ശതമാനമാണ്. ബിഹാർ, പഞ്ചാബ് സംസ്ഥാനങ്ങളിലും മഴ കുറഞ്ഞു. കൃഷിയെ പ്രധാനമായി ആശ്രയിക്കുന്ന ഉത്തരേന്ത്യയിലെ ഏഴിൽ ആറു സംസ്ഥാനങ്ങളിലും മൺസൂൺ വിടവാങ്ങുന്നതിനു പിന്നാലെ വരൾച്ചാ ഭീഷണിയിലാണ്. അതേസമയം രാജ്യവ്യാപക കണക്കെടുക്കുമ്പോൾ സെപ്റ്റംബർ 21 വരെ രാജ്യത്ത് 7 ശതമാനം മഴ കൂടുതലുണ്ട്.

കാലവർഷം കണക്കെടുപ്പ് രണ്ട് ദിവസം കൂടി ; 13 % മഴക്കുറവ്

കേരളത്തിൽ (തെക്കുപടിഞ്ഞാറൻ മൺസൂൺ) കാലവർഷത്തിന്റെ ഓദ്യോഗിക കണക്കെടുപ്പ് വെള്ളിയാഴ്ച പൂർത്തായാകും. ഇതുവരെ സംസ്ഥാനത്ത് 13 ശതമാനം മഴക്കുറവാണ് റിപ്പോർട്ട് ചെയ്തത്. സാങ്കേതികമായി ഇത് സാധാരണ മഴയാണ്. ജൂൺ 1 മുതൽ സെപ്റ്റംബർ 30 വരെയുള്ള മഴയാണ് കാലവർഷത്തിന്റെ കണക്കിൽ പെടുത്തുക. ഇന്നുവരെ കേരളത്തിൽ 2001.1 മില്ലി മീറ്റർ മഴയാണ് ലഭിക്കേണ്ടത്. ഇതുവരെ 1735.7 മില്ലി മീറ്റർ മഴ ലഭിച്ചിട്ടുണ്ട്. ആലപ്പുഴ (-29), കൊല്ലം (-20), തിരുവനന്തപുരം (-29) ശതമാനം മഴക്കുറവുണ്ട്. മറ്റു ജില്ലകളിലെല്ലാം സാധാരണ മഴയാണ് ഇതുവരെ റിപ്പോർട്ട് ചെയ്തത്.
കണ്ണൂർ (-10), എറണാകുളം (-17), ഇടുക്കി (-15), കാസർകോട് (-2), കോട്ടയം (-15), കോഴിക്കോട് (-12), മലപ്പുറം (-16), പാലക്കാട് (-5), പത്തനംതിട്ട (-15), തൃശൂർ (-17), വയനാട് (-8) ശതമാനം മഴ ലഭിച്ചു. 19 ശതമാനം മഴ കൂടുതലോ കുറവോ ലഭിച്ചാൽ സാധാരണ മഴയായാണ് കണക്കാക്കുക.

കാലവർഷം പിൻമാറ്റം കേരളത്തിലെത്തിയില്ല
മൺസൂൺ മഴയുടെ കണക്കെടുപ്പ് രണ്ടു ദിവസം കൊണ്ട് അവസാനിക്കുമെങ്കിലും കേരളത്തിൽ മൺസൂൺ വിടവാങ്ങാൻ ഇനിയും 15 ദിവസമെങ്കിലും എടുക്കും. ഒരാഴ്ചയോളമായി മൺസൂൺ വിടവാങ്ങൽ രാജസ്ഥാനിൽ തന്നെ തുടരുകയാണ്. മധ്യ ഇന്ത്യയിൽ ഇപ്പോഴും മഴ ലഭിക്കുന്ന സാഹചര്യമാണുള്ളത്. ഖജുവാല, ബീകാനീർ, ജോധ്പൂർ, നാലിയ എന്നിവിടങ്ങളിലാണ് ഇപ്പോൾ കാലവർഷം പിൻവാങ്ങിയത്. 2-3 ദിവസത്തിനു ശേഷം മധ്യ ഇന്ത്യയിലെ കൂടുതൽ പ്രദേശങ്ങളിലേക്ക് കാലവർഷം വിടവാങ്ങൽ പുരോഗമിക്കും. ബംഗാൾ ഉൾക്കടലിന്റെ മധ്യപടിഞ്ഞാറൻ മേഖലയിൽ ആന്ധ്രാപ്രദേശ് തീരത്തായി അന്തരീക്ഷത്തിന്റെ താഴ്ന്ന നിലയിൽ ചക്രവാതച്ചുഴി തുടരുന്നതിനാൽ തമിഴ്‌നാട്ടിലും ആന്ധ്രാപ്രദേശിലും കർണാടകയിലും മഴ അടുത്ത ദിവസങ്ങളിലുമുണ്ടാകും. കേരളത്തിൽ ഒന്നോ രണ്ടോ പ്രദേശങ്ങളിൽ മഴ ലഭിക്കാം. ഒക്ടോബർ ആദ്യവാരം ബംഗാൾ ഉൾക്കടലിൽ ന്യൂനമർദം രൂപപ്പെടാനും സാധ്യതയുണ്ട്.

കേരളത്തിൽ ഇപ്പോഴത്തെ മഴ എത്രനാൾ തുടരും എന്നറിയാം

കേരളത്തിൽ ഇപ്പോൾ ലഭിക്കുന്ന മഴ ബുധനാഴ്ച വരെ തുടരാൻ സാധ്യത. തുടർന്ന് മഴയുടെ ശക്തി കുറയും. അടുത്ത തിങ്കളാഴ്ച മുതൽ വീണ്ടും കിഴക്കൻ മേഖലകളിൽ ഇടിയോടുകൂടി മഴക്ക് സാധ്യതയുണ്ട്. മ്യാൻമറിന് സമീപം സമുദ്രനിരപ്പിൽ നിന്ന് അഞ്ച് കിലോമീറ്റർ ഉയരത്തിൽ നിലകൊള്ളുന്ന ചക്രവാത ചുഴിയും, ഫിലിപ്പൈൻസിനു സമീപത്തെ ചുഴലിക്കാറ്റും പടിഞാറൻ കാറ്റിനെ ശക്തിപ്പെടുത്തിയതാണ് മഴക്ക് കാരണം. നാളെയും (ചൊവ്വ) കേരളത്തിൽ എല്ലാ ജില്ലകളിലും മഴ ലഭിക്കും. മഴക്ക് ഇടവേളകൾ ഉണ്ടാകും. ബുധൻ മുതൽ മഴയുടെ ശക്തി കുറയുമെന്നാണ് മെറ്റ്ബീറ്റ് വെതർ പറയുന്നത്. തുടർന്ന് മഴ അടുത്ത ആഴ്ച വീണ്ടും എത്തും. ഇടിയോടെ മഴയാണ് പിന്നീടുണ്ടാക്കുക. ഈ മാസം അവസാനവും സെപ്റ്റംബർ ആദ്യവും സാധാരണ മഴ ലഭിക്കും. കൂടുതൽ വിവരങ്ങൾക്ക് Metbeat Weather facebook പേജ് പിന്തുടരുക.

കേരളത്തിൽ മഴ തുടരുന്നു ; തിങ്കളാഴ്ച 3 മരണം

തിങ്കളാഴ്ച കനത്തമഴയിലും കാറ്റിലുമുണ്ടായ അപകടങ്ങളിൽ സംസ്ഥാനത്ത് ഒരു വിദ്യാർഥിയുൾപ്പെടെ മൂന്നുപേർ മരിച്ചു. കോഴിക്കോട് ദേവഗിരി കോളേജ് മൂന്നാംവർഷ ബിരുദവിദ്യാർഥി അശ്വിൻ തോമസ് (20), ഇടുക്കി അടിമാലി വെള്ളത്തൂവൽ മുതുവാൻകുടി കുഴിയാലിയിൽ കെ.സി. പൗലോസ് (56), പീരുമേടിന് സമീപം ഏലപ്പാറ കോഴിക്കാനം എസ്റ്റേറ്റ് സ്വദേശിനി ഭാഗ്യം (പുഷ്പ -50) എന്നിവരാണ് മരിച്ചത്. കോഴിക്കോട് മെഡിക്കൽ കോളേജ് കാമ്പസിന് സമീപത്തെ റോഡിൽ കനത്തകാറ്റിൽ പൊട്ടിവീണ തെങ്ങിൽ ഇടിച്ചാണ് ബൈക്ക് യാത്രികനായ അശ്വിൻ തോമസ് അപകടത്തിൽപ്പെട്ടത്. കെട്ടിടനിർമാണം നടക്കുന്നതിനിടെ മൺഭിത്തി ഇടിഞ്ഞ് ദേഹത്തുവീണാണ് പൗലോസ് അപകടത്തിൽപ്പെട്ടത്. ഏലപ്പാറയിൽ ലയത്തിലേക്ക് മണ്ണിടിഞ്ഞാണ് ഭാഗ്യം അപകടത്തിൽപ്പെട്ടത്.മ​ല​യോ​ര​മേ​ഖ​ല​യി​ൽ മ​ഴ​ക്കെ​ടു​തി തു​ട​രു​ന്നു. ക​ന​ത്ത​മ​ഴ​യി​ൽ കീ​ഴൂ​ർ​കു​ന്നി​ൽ കി​ണ​ർ ഇ​ടി​ഞ്ഞു​താ​ഴ്‌​ന്നു.

ജൂലൈയിൽ കേരളത്തിൽ മഴ കുറയുമെന്ന് IMD

ജൂലൈ മാസത്തിൽ രാജ്യത്ത് സാധാരണ തോതിൽ കാലവർഷം ലഭിക്കുമെന്ന് കേന്ദ്ര കാലാസ്ഥാ വകുപ്പിന്റെ പുതുക്കിയ പ്രവചനം. ദീർഘകാല ശരാശരി പ്രകാരം ജൂലൈയിൽ രാജ്യത്തുടനീളം ലഭിക്കേണ്ടത് 280.4 എം.എം മഴയാണ്. 1971 മുതൽ 2020 വരെയുള്ള കണക്ക് പ്രകാരമാണ് നിലവിലെ ദീർഘകാല ശരാശരി (എൽ.പി.എ) കണക്കാക്കിയത്. ദീർഘകാല ശരാശരിയുടെ 94 ശതമാനം മുതൽ 106 ശതമാനം വരെയാണ് സാധാരണ മഴ.

കേരളത്തിൽ കുറയും
ഐ.എം.ഡിയുടെ പ്രവചനമനുസരിച്ച് കേരളത്തിൽ ജൂലൈ മാസത്തിൽ സാധാരണയേക്കാൾ കുറവ് മഴയാണുണ്ടാകുക. ഒഡിഷ, പശ്ചിമബംഗാൾ, തീരദേശ കർണാടക, വിധർഭ മേഖലകളിലും കേരളത്തിനൊപ്പം മഴ കുറയും.

തമിഴ്‌നാട്ടിലും കർണാടകയിലും കൂടും

തമിഴ്‌നാട്, കർണാടക, ആന്ധ്രാപ്രദേശ്, മഹാരാഷ്ട്ര, ഉൾനാടൻ കർണാടക, തെലങ്കാന, ഗുജറാത്ത്, മധ്യപ്രദേശ്, ഉത്തർപ്രദേശ്, ഉത്തരാഖണ്ഡ്, പഞ്ചാബ്, ഡൽഹി, ത്രിപുര സംസ്ഥാനങ്ങളിലും സാധാരണയിൽ കൂടുതൽ മഴ ജൂലൈയിൽ ലഭിക്കുമെന്നാണ് ഐ.എം.ഡി പറയുന്നത്.

ജൂലൈ മഴ തകർക്കേണ്ട മാസം
നാലു മാസം നീളുന്ന കാലവർഷ സീസണിൽ ഏറ്റവും മഴ ലഭിക്കേണ്ടത് ജൂലൈയിലാണ്. രാജ്യവ്യാപകമായി 35 ശതമാനം മഴയും ലഭിക്കുന്നത് ജൂലൈയിലാണ്. രാജ്യത്ത് ജൂൺ അവസാനിച്ചപ്പോൾ എട്ടു ശതമാനം മഴക്കുറവാണ് രേഖപ്പെടുത്തിയത്.

കാലവർഷം പുരോഗതി ഇതുവരെ
ജൂലൈ ഒന്നിന് രാജ്യത്തെ 97 ശതമാനം പ്രദേശത്തും കാലവർഷം വ്യാപിച്ചു. പഞ്ചാബ്, ഹരിയാന, രാജസ്ഥാൻ എന്നിവിടങ്ങളിലാണ് വെള്ളിയാഴ്ച കാലവർഷം എത്തിയത്. വടക്കുപടിഞ്ഞാറൻ ഇന്ത്യയിൽ അടുത്ത രണ്ടു ദിവസത്തോടെ കൂടുതൽ മേഖലയിലേക്ക് കാലവർഷം എത്തും. ഇന്നലെ ദീസ, ചിറ്റോർഗഢ്, ബീകാനീർ, ഖാജുവാല എന്നിവിടങ്ങിലൂടെയാണ് നോർത്തേൺ ലിമിറ്റ് ഓഫ് മൺസൂൺ (എൻ.എൽ.എം) കടന്നു പോകുന്നത്.

ജൂണിൽ 53% മഴക്കുറവ്: ജൂലൈയിൽ സാധാരണ മഴ സാധ്യത

കേരളത്തിൽ ഈ വർഷത്തെ ജൂൺ അവസാനിക്കുന്നത് സാധാരണ പെയ്യുന്നതിന്റെ പകുതി പോലും മഴ പെയ്യാതെ. സംസ്ഥാനത്തു കാലവർഷത്തിന്റെ ഭാഗമായി ലഭിക്കേണ്ട മഴയിൽ 53% കുറവാണ് ഇതുവരെ രേഖപ്പെടുത്തിയത്. സാധാരണ 62.19 സെന്റിമീറ്റർ മഴയാണു ജൂണിൽ പെയ്യുന്നത്. ഇതു വരെ ലഭിച്ചത് 29.19 സെന്റിമീറ്റർ മാത്രം. ഇടുക്കി, പാലക്കാട്, വയനാട് ജില്ലകളിൽ വലിയതോതിൽ മഴക്കുറവ് ഉണ്ടെന്നു കാലാവസ്ഥ നിരീക്ഷണ കേന്ദ്രത്തിന്റെ കണക്കുകൾ വ്യക്തമാക്കുന്നു. പ്രധാന അണക്കെട്ടുകൾ ഉൾപ്പെടുന്ന ഇടുക്കി ജില്ലയിൽ 69% ആണ് മഴക്കുറവ്. സാധാരണ ജൂണിൽ 70.61 സെന്റിമീറ്റർ മഴ പെയ്യുന്ന ജില്ലയിൽ ഇത്തവണ 21.18 സെന്റിമീറ്റർ ആണ് ലഭിച്ചത്.

പാലക്കാട് 66%, വയനാട് 61% എന്നിങ്ങനെയും മഴ കുറഞ്ഞു. ഇത്തവണ കാലവർഷം നേരത്തേ എത്തിയെന്നും മേയ് 29ന് ആരംഭിച്ചു എന്നുമാണ് കേന്ദ്ര കാലാവസ്ഥ വകുപ്പ് പ്രഖ്യാപിച്ചത്. എന്നാൽ ജൂൺ 1 മുതൽ കേരളത്തിൽ കാലവർഷം ദുർബലമാവുകയും ആയിരുന്നു. കാലവർഷത്തെ ശക്തിപ്പെടുത്തുന്ന ആഗോള അന്തരീക്ഷ പ്രതിഭാസങ്ങളുടെ അഭാവമാണ് കാലവർഷം ദുർബലമാകാൻ ഇടയാക്കിയത്.

കഴിഞ്ഞ വർഷം ജൂൺ മുതൽ സെപ്റ്റംബർ വരെയുള്ള കാലയളവിൽ 13% മഴ കുറവായിരുന്നു. ഈ വർഷവും കാലവർഷത്തിൽ നേരിയ കുറവുണ്ടാകുമെന്നു ചില ഏജൻസികൾ പ്രവചിച്ചിട്ടുണ്ട്. ജൂണിൽ മഴ കുറയുമെങ്കിലും ജൂലൈയിൽ സാധാരണ മഴ ലഭിക്കുമെന്നാണ് മെറ്റ്ബീറ്റ് വെതറിന്റെ നിരീക്ഷണം. കാലവർഷം ഇന്ന് മുതൽ സജീവമാകുമെന്ന് കഴിഞ്ഞ ദിവസം മെറ്റ്ബീറ്റ് പോസ്റ്റ് ചെയ്തിരുന്നു.

കാലവർഷം സജീവമാകും , എങ്ങനെ എന്നറിയാം

ഒരിടവേളയ്ക്ക് ശേഷം തെക്കുപടിഞ്ഞാറൻ മൺസൂൺ (കാലവർഷം) പതിയെ സജീവമാവുകയാണ്. ആഗോള മഴപ്പാത്തി എന്ന് വിശേഷിപ്പിക്കപ്പെടുന്ന എം.ജെ. ഒയുടെ സാന്നിധ്യം പടിഞ്ഞാറൻ അറബിക്കടലിലും ബംഗാൾ ഉൾക്കടലിലും എത്തുന്നതാണ് കേരളത്തിൽ വീണ്ടും കാലവർഷം സജീവമാവാകാൻ കാരണം. മെയ് അവസാന വാരത്തോടെ കേരളത്തിൽ കാലവർഷക്കാറ്റ് എത്തിയെങ്കിലും പിന്നീട് ദുർബലമാവുകയായിരുന്നു. സാധാരണ കാലവർഷത്തെ സ്വാധീനിക്കുന്ന നിരവധി ഘടകങ്ങളിൽ ഒന്നായ MJO യുടെ അഭാവമാണ് കാലവർഷ കാറ്റിനെ കേരളത്തിൽ ദുർബലമാക്കിയിരുന്നത്. MJO ഏഴിലും എട്ടിലും (മാരിടൈം, അറ്റ്ലാന്റിക് സമുദ്രത്തിൽ ) ഒരു മാസത്തോളമായി തുടരുകയായിരുന്നു. MJO വീണ്ടും രണ്ട് , മൂന്ന് ഫേസുകളിലേക്ക് മാറുകയാണ്. അതായത് ഇന്ത്യൻ മഹാസമുദ്രത്തിൽ എം.ജെ ഒയുടെ സാന്നിധ്യം അടുത്ത ആഴ്ചകളിലും ഉണ്ടാകുമെന്ന് അർത്ഥം. ഇതിനാൽ മൺസൂൺ കേരളത്തിൽ ശക്തിപ്പെടാനും കൂടുതൽ മഴ ലഭിക്കാനു കാരണമാകുമെന്ന് ഞങ്ങളുടെ വെതർമാൻ പറയുന്നു. കൂടാതെ ജൂലൈ ആദ്യവാരത്തിന്റെ അവസാനത്തോടെ ന്യൂനമർദ്ദത്തിനും സാധ്യതയേറി. ബംഗാൾ ഉൾക്കടലിലാണ് ന്യൂനമർദ്ദം ഉണ്ടാവുക. MJO ബംഗാൾ ഉൾക്കടലിൽ എത്തുമ്പോഴാണ് ന്യൂനമർദ്ദം ഉണ്ടാകാൻ സാധ്യതയുള്ളത്. തുടർന്ന് തെക്കൻ ചൈന കടലിലേക്കും എം.ജെ. ഒ സഞ്ചരിക്കും. ആ സമയം പസഫിക് സമുദ്രത്തിൽ ശക്തിയേറിയ ചുഴലിക്കാറ്റുകൾ (ടൈഫൂണുകൾ) രൂപപ്പെടുകയും കേരളത്തിലും മഴ ശക്തിപ്പെടുകയും ചെയ്യും. ഇതിന്റെ സൂചനകൾ ഇപ്പോൾ പസഫിക് മേഖലയിൽ നിന്ന് ലഭിക്കുന്നുണ്ടെന്ന് മെറ്റ്ബീറ്റ് വെതറിലെ ഓഷ്യാനോഗ്രാഫർ പറഞ്ഞു. പസഫിക് സമുദ്രത്തിലെ ടൈ പൂണുകളുടെ സ്വാധീനം കേരളത്തിൽ ശക്തമായ മഴ ലഭിക്കാൻ കാരണമാകും എന്നാണ് നിരീക്ഷണം. ജൂലൈ മാസത്തിൽ സാധാരണയിൽ കുറവ് മഴയാണ് കഴിഞ്ഞ മാസങ്ങളിൽ പ്രവചിച്ചിരുന്നതെങ്കിലും ഇപ്പോഴത്തെ സാഹചര്യത്തിൽ ജൂലൈയിൽ സാധാരണതോതിൽ മഴ ലഭിക്കാനുള്ള സാധ്യതയാണ് കാണുന്നതെന്നും ഞങ്ങളുടെ നിരീക്ഷകരുടെ പാനൽ വിലയിരുത്തുന്നു.

മഴ പതിയെ സജീവമാകും

ഗുജറാത്ത് തീരത്ത് ചക്രവാത ചുഴി ദുർബലമായതോടെ കഴിഞ്ഞ 48 മണിക്കൂർ ആയി കേരളത്തിൽ കാലവർഷക്കാറ്റ് അനുകൂലമായിട്ടുണ്ട്. മിക്ക ജില്ലകളിലും സാധാരണ തോതിലുള്ള മഴ ഈ സമയം റിപ്പോർട്ട് ചെയ്തിട്ടുണ്ട്. ഇന്നും നാളെയും കേരളത്തിൽ എല്ലാ ജില്ലകളിലും പരക്കെന്നോണം മഴ ലഭിക്കും. വെള്ളിയാഴ്ചയ്ക്ക് ശേഷം മഴയിൽ നേരിയ കുറവ് അനുഭവപ്പെടുമെങ്കിലും ജൂലൈ ആദ്യവാരം തന്നെ വീണ്ടും മഴ ശക്തിയായി ലഭിക്കും. ന്യൂനമർദ്ദം രൂപപ്പെട്ടാൽ കേരളത്തിൽ കൂടുതൽ മഴയ്ക്ക് സാഹചര്യമൊരുങ്ങും എന്നാണ് ഇപ്പോഴത്തെ നിഗമനം. ജൂലൈ രണ്ടാം വാരത്തിലും കേരളത്തിൽ മികച്ച മഴ പ്രതീക്ഷിക്കാം.

ഉയർന്ന തിരമാലകൾക്ക് സാധ്യത

കാലവർഷക്കാറ്റ് സജീവമായതോടെ കടലിൽ കാറ്റിനും ഉയർന്ന തിരമാലകൾക്കും സാധ്യതയുണ്ട്. മത്സ്യത്തൊഴിലാളികൾ കേന്ദ്ര കാലാവസ്ഥാ വകുപ്പിന്റെ (IMD) മുന്നറിയിപ്പുകൾ പാലിച്ചു മാത്രമേ കടലിൽ പോകാവൂ. കേരളതീരത്ത് മൂന്നു മീറ്റർ വരെ ഉയരമുള്ള തിരമാലകൾക്കാണ് അടുത്ത ദിവസങ്ങളിൽ സാധ്യത. കാറ്റിന്റെ വേഗത 45 – 50 കി.മി. വരെ ആയേക്കും. തീരദേശത്ത് താഴ്ന്ന പ്രദേശങ്ങളിൽ വെള്ളം കയറാനും കടൽക്ഷോഭത്തിനും സാധ്യതയുള്ളതിനാൽ തീരദേശവാസികൾ ജാഗ്രത പാലിക്കണം. തൽസമയ കാലാവസ്ഥാ വിവരങ്ങൾക്കും മറ്റും Metbeat Weather, Weatherman Kerala ഫേസ് ബുക്ക് പേജുകളും വിശദമായ വായനക്ക് metbeatnews.com, metbeat.com വെബ് സൈറ്റുകളും യു ട്യൂബ് ചാനലുകളും പിന്തുടരുക. ഔദ്യോഗിക കാലാവസ്ഥ പ്രവചനങ്ങൾക്ക് IMD, KSDMA വെബ് സൈറ്റുകളും പിന്തുടരുക.

രണ്ടു ദിവസം മഴ സജീവമാകും; കടൽ പ്രക്ഷുബ്ധമായേക്കും

കേരളത്തിൽ നാളെ (വെള്ളി) മുതൽ തിങ്കൾ വരെ കാലവർഷം നേരിയ തോതിൽ സജീവമാകും. വടക്കൻ കേരളത്തിൽ ഒറ്റപ്പെട്ട ശക്തമായ മഴക്കും മധ്യകേരളത്തിൽ ഇടത്തരം മഴക്കും തെക്കൻ കേരളത്തിൽ ഒറ്റപ്പെട്ട ഇടത്തരം മഴക്കും സാധ്യതയുണ്ട്. കാലവർഷക്കാറ്റ് അറബിക്കടലിൽ സജീവമാകുന്നതാണ് മഴക്ക് കാരണം. കേരളത്തോടൊപ്പം പടിഞ്ഞാറൻ തീരത്ത് ഗുജറാത്ത് വരെയുള്ള ഭാഗത്തും ശക്തമായ തോ ഇടത്തരമോ ആയ മഴ പ്രതീക്ഷിക്കാം. തമിഴ്നാട്ടിലും കേരളത്തിന്റെ കിഴക്കൻ മേഖലകളിലും ഇടിയോടു കൂടിയുള്ള മഴക്കും സാധ്യതയുണ്ട്. അറബിക്കടലിൽ കാറ്റിന്റെ ഗതി ശക്തിപ്പെടുത്തുന്നതിനാൽ ജാഗ്രത പാലിക്കണം. ഉയർന്ന തിരമാലകൾ ക്കും കടൽക്ഷോഭത്തിൽ സാധ്യതയുണ്ട്. ഒമാനിലെ സലാലയിലും കൂടുതൽ മഴ ലഭിക്കാൻ അനുകൂല സാഹചര്യമാണ് നിലവിലുള്ളത്.

ഉയർന്ന തിരമാല സാധ്യത

കേരള തീരത്ത്  (വിഴിഞ്ഞം മുതൽ കാസർകോട് വരെ) 25-06-2022  രാത്രി 11.30 വരെ 2.8 മുതൽ 3.1 മീറ്റർ വരെ ഉയരത്തിൽ തിരമാലയ്ക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്ര സ്ഥിതി പഠന ഗവേഷണ കേന്ദ്രം (INCOIS) അറിയിച്ചു. മൽസ്യത്തൊഴിലാളികളും തീരദേശവാസികളും ജാഗ്രത തുടരുക.
കടൽക്ഷോഭം രൂക്ഷമാകാൻ സാധ്യതയുള്ളതിനാൽ അപകട മേഖലകളിൽ നിന്ന് അധികൃതരുടെ നിർദേശാനുസരണം മാറി താമസിക്കണം.  മൽസ്യബന്ധന യാനങ്ങൾ (ബോട്ട്, വള്ളം, മുതലായവ) ഹാർബറിൽ സുരക്ഷിതമായി കെട്ടിയിട്ട് സൂക്ഷിക്കുക. വള്ളങ്ങൾ തമ്മിൽ സുരക്ഷിത അകലം പാലിക്കുന്നത് കൂട്ടിയിടിച്ചുള്ള അപകട സാധ്യത ഒഴിവാക്കാം. മൽസ്യബന്ധന ഉപകരണങ്ങളുടെ സുരക്ഷ ഉറപ്പാക്കണം. ബീച്ചിലേക്കുള്ള യാത്രകളും കടലിൽ ഇറങ്ങിയുള്ള വിനോദങ്ങളും പൂർണ്ണമായും ഒഴിവാക്കണമെന്നും ജാഗ്രതാ നിർദ്ദേശത്തിൽ പറയുന്നു.