ന്യൂനമർദം ; കേരളത്തിൽ ഇന്ന് അലർട്ടിൽ മാറ്റം, 3 ജില്ലകളിൽ ഓറഞ്ച് അലർട്ട്
സെപ്റ്റംബര്‍ രണ്ടിന് പുലര്‍ച്ചെ 5.30 ഓടെ ബംഗാള്‍ ഉള്‍ക്കടലില്‍ രൂപം കൊണ്ട ന്യൂനമര്‍ദത്തെ തുടര്‍ന്ന് കേരളത്തിലുള്‍പ്പെടെ മഴ സജീവമാകും. കേരളത്തില്‍ ഒറ്റപ്പെട്ട സാധാരണ മഴയാണ് പ്രതീക്ഷിക്കുന്നത്.
കഴിഞ്ഞ ദിവസങ്ങളിലെ മഴയില്ലാത്ത സാഹചര്യം തുടര്‍ന്നുള്ള നാലു ദിവസം പ്രതീക്ഷിക്കുന്നില്ല. ഉത്രാടത്തിനും തിരുവോണത്തിനും മഴ എല്ലാ ജില്ലകളിലും ഉണ്ടാകും. എന്നാല്‍ അതിശക്തമായ തുടര്‍ച്ചയായ മഴ പ്രതീക്ഷിക്കുന്നില്ല.
ഒഡിഷക്കു സമീപം ന്യൂനമര്‍ദം ശക്തിപ്പെടുന്ന സാഹചര്യമാണുള്ളത്. അതിനാല്‍ ഒഡിഷ തീരത്ത് മഴ ശക്തമാണ്. മ്യാന്‍മര്‍ തീരത്തോട് ചേര്‍ന്നാണ് ന്യൂനമര്‍ദം രൂപപ്പെട്ടത്.
പിന്നീട് ഒഡിഷ തീരം ലക്ഷ്യമാക്കി നീങ്ങുകയായിരുന്നു. പടിഞ്ഞാറ് വടക്കുപടിഞ്ഞാറ് ദിശയിലാണ് ന്യൂനമര്‍ദം നീങ്ങുക. അടുത്ത 24 മണിക്കൂറില്‍ ന്യൂനമര്‍ദം ഒഡിഷയില്‍ കരകയറാനാണ് സാധ്യത.
കേരളത്തില്‍ മഴയെ തുടര്‍ന്ന് വിവിധ ജില്ലകളില്‍ ഓറഞ്ച് , മഞ്ഞ അലര്‍ട്ടുകള്‍ കാലാവസ്ഥാ വകുപ്പ് പ്രഖ്യാപിച്ചു. വയനാട്, കണ്ണൂര്‍, കാസര്‍കോട് ജില്ലകളില്‍ കേന്ദ്ര കാലാവസ്ഥാ വകുപ്പ് ഓറഞ്ച് അലര്‍ട്ട് നല്‍കി. ഇന്ന് തൃശൂര്‍, മലപ്പുറം, കോഴിക്കോട് ജില്ലകളില്‍ മഞ്ഞ അലര്‍ട്ട് പ്രഖ്യാപിച്ചു.
നാളെ കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളില്‍ മഞ്ഞ അലര്‍ട്ടും നല്‍കിയിട്ടുണ്ട്.
