Menu

മഴ മുന്നറിയിപ്പ്

ന്യൂനമർദം കന്യാകുമാരി കടലിൽ: മഴ എന്നു മുതൽ കുറയും?

ഇന്നലെ ശ്രീലങ്കയിൽ കരകയറിയിറങ്ങിയ തീവ്രന്യൂനമർദം ഇന്ന് രാവിലെ വീണ്ടും മാന്നാർ കടലിടുക്കിലെത്തി. വെൽ മാർക്ഡ് ലോ പ്രഷർ ആയി രാവിലെ ശക്തി കുറഞ്ഞ സിസ്റ്റം വൈകിട്ടോടെ വീണ്ടും ശക്തി കുറഞ്ഞ് ന്യൂനമർദമായി മാറിയിട്ടുണ്ട്. ന്യൂനമർദം ഇപ്പോൾ കന്യാകുമാരി കടലിലാണ് സ്ഥിതി ചെയ്യുന്നത്. നാളെയോടെ ന്യൂനമർദം വീണ്ടും ദുർബലപ്പെട്ട് ഇല്ലാതാകാനാണ് സാധ്യത.

നാളെ മുതൽ മഴ കുറയും
തെക്കൻ കേരളത്തിൽ കഴിഞ്ഞ രണ്ടു ദിവസമായി ഇടവിട്ട് പെയ്യുന്ന മഴ നാളെയോടെ കുറയും. ന്യൂനമർദം ദുർബലമായി അറബിക്കടലിലേക്ക് നീങ്ങിയാലും ഈർപ്പുമുള്ള കിഴക്കൻ കാറ്റ് ബംഗാൾ ഉൾക്കടലിൽ നിന്ന് കേരളത്തിലെത്തും. അടുത്ത 12 മണിക്കൂറിൽ തെക്കൻ കേരളം, തെക്കൻ തമിഴ്‌നാട്, പുതുച്ചേരി എന്നിവിടങ്ങളിൽ ഒറ്റപ്പെട്ട ശക്തമായ മഴ സാധ്യത നിലനിൽക്കുന്നു.

കടലിൽ കാറ്റ് തുടരും
മാന്നാർ കടലിടുക്കിൽ നാളെവരെ മണിക്കൂറിൽ 55 കി.മിഉം കന്യാകുമാരി കടലിലും തെക്കൻ തമിഴ്‌നാട് തീരത്തും മണിക്കൂറിൽ 50-55 കി.മി വേഗത്തിലും കാറ്റ് നാളെ വരെ തുടരുന്നതിനാൽ മത്സ്യത്തൊഴിലാളികൾ കാലാവസ്ഥാ വകുപ്പ് നൽകുന്ന മുന്നറിയിപ്പ് പാലിച്ചേ കടലിൽ പോകാവൂ. ചെറു വള്ളങ്ങൾക്ക് ഈ കാലാവസ്ഥ അനുകൂലമാകാൻ ഇടയില്ല.

ന്യൂനമർദ്ദം തീവ്രമായി : ശ്രീലങ്കയിൽ കരകയറും ; ശക്തമായ മഴ സാധ്യത

ബംഗാൾ ഉൾക്കടലിന്റെ തെക്കുകിഴക്കൻ മേഖലയിൽ രൂപപ്പെട്ട ന്യൂനമർദം ശക്തിപ്പെട്ട് തീവ്ര ന്യൂനമർദം (Depression) ആയി. ഈ സിസ്റ്റം പടിഞ്ഞാറ് വടക്കുപടിഞ്ഞാറ് ദിശയിൽ നീങ്ങുകയാണ്. നാളെയോടെ തെക്കുപടിഞ്ഞാറ് ബംഗാൾ ഉൾക്കടലിൽ എത്തും. കഴിഞ്ഞ 6 മണിക്കൂറിൽ കിലോമീറ്റർ13 കി.മി വേഗതയിലാണ് സിസ്റ്റം സഞ്ചരിക്കുന്നത്. ശ്രീലങ്കയിലെ ട്രിങ്കോമാലിയിൽ നിന്ന് 530 കി.മി ഉം കാരൈക്കലിൽ നിന്ന് 750 കി.മി ഉം അകലെയാണ് തീവ്രന്യൂനമർദം സ്ഥിതി ചെയ്യുന്നത്.

ശ്രീലങ്കയിലും, തമിഴ്‌നാട്ടിലും കേരളത്തിലും മഴ സാധ്യത

നിലവിൽ തിരുവനന്തപുരത്തിന് സമാന്തരമായി കിഴക്ക് ബംഗാൾ ഉൾക്കടലിലാണ് സിസ്റ്റം സ്ഥിതി ചെയ്യുന്നത്. ഇന്നു മുതൽ തീവ്ര ന്യൂനമർദം ശ്രീലങ്കയിൽ ശക്തമായ മഴ നൽകും. നാളെ (ചൊവ്വ) ശ്രീലങ്കയിൽ മഴ ശക്തിപ്പെടും. തമിഴ്‌നാട്ടിലും നാളെ ഒറ്റപ്പെട്ട ശക്തമായതോ, ഇടത്തരം മഴക്കോ സാധ്യതയുണ്ട്. ന്യൂനമർദം ഫെബ്രുവരി ഒന്നിന് ബുധനാഴ്ച ശ്രീലങ്കയിൽ കരകയറും. ഉച്ചയ്ക്ക് ശേഷമാണ് ശ്രീലങ്കയിൽ സിസ്റ്റം കരകയറുക. തുടർന്ന് തെക്കൻ തമിഴ്‌നാട്ടിലും കേരളത്തിന്റെ തെക്കൻ മേഖലയിലും മധ്യ കേരളത്തിലും ഒറ്റപ്പെട്ട മഴ പ്രതീക്ഷിക്കാം. കേരളത്തിൽ വടക്കൻ ജില്ലകളിൽ വരെ ഇന്ന് ഈർപ്പമുള്ള കാറ്റ് എത്തിത്തുടങ്ങിയിട്ടുണ്ട്. ഇത് അനുകൂല അന്തരീക്ഷസ്ഥിതിയുള്ള മേഖലകളിൽ മേഘരൂപീകരണത്തിന് കാരണമാകും. അതിനാൽ നാളെ മുതൽ തന്നെ കേരളത്തിൽ മഴ പലയിടങ്ങളിലായി ലഭിച്ചു തുടങ്ങുമെന്നാണ് ഞങ്ങളുടെ വെതർമാൻ പറയുന്നത്. പരക്കെ മഴ സാധ്യതയില്ല. അനുകൂല അന്തരീക്ഷസ്ഥിതിയുണ്ടാകുന്ന മേഖലകളിൽ പ്രത്യേകിച്ച് കൊല്ലം, തിരുവനന്തപുരം, കോട്ടയം, പത്തനംതിട്ട, ഇടുക്കി, പാലക്കാട്, എറണാകുളം ജില്ലകളുടെ കിഴക്കൻ മേഖലകളിലാണ് മഴ പ്രതീക്ഷിക്കുന്നത്.

ന്യൂനമർദം ശക്തിപ്പെട്ട് തീവ്രന്യൂനമർദമാകും, കേരളത്തിലെ മഴ സാധ്യത അറിയാം

കഴിഞ്ഞ ദിവസം ബംഗാൾ ഉൾക്കടലിൽ രൂപപ്പെട്ട ന്യൂനമർദം ഇന്നലെ ശക്തിപ്പെട്ട് വെൽ മാർക്ക്ഡ് ലോ പ്രഷർ ആയിട്ടുണ്ട്. ഇന്നു രാത്രി വൈകിയോട നാളെയോ ഈ ന്യൂനമർദം വീണ്ടും ശക്തിപ്പെട്ട് തീവ്രന്യൂന മർദം (ഡിപ്രഷൻ) ആകും. തെക്കുകിഴക്കൻ ബംഗാൾ ഉൾക്കടലിൽ ശ്രീലങ്കൻ തീരത്തു നിന്ന് ഏറെ അകലെയല്ലാതെയാണ് ന്യൂനമർദം ഇപ്പോൾ സ്ഥിതി ചെയ്യുന്നത്. ഇത് ശക്തിപ്പെട്ട ശേഷം വടക്കു തെക്കുവടക്ക് ദിശയിൽ ശ്രീലങ്കയ്ക്ക് നേരെ നീങ്ങാനാണ് സാധ്യത. പിന്നീട് കന്യാകുമാരി തീരം വഴി അറബിക്കടലിലെത്തും. തുടർന്ന് ഇന്ത്യൻ തീരത്തു നിന്ന് അകന്നു പോകും.

കേരളത്തിലെ മഴ സാധ്യത
ന്യൂനമർദം ഇപ്പോൾ മേഘങ്ങളെ കേന്ദ്രീകരിക്കപ്പെടുന്നതിനാൽ കേരളത്തിൽ വരണ്ട കാലാവസ്ഥ തുടരുകയാണ്. അടുത്ത ദിവസങ്ങളിൽ ന്യൂനമർദം ശക്തമായ ശേഷം ഇന്ത്യൻ തീരത്തേക്ക് അടുത്തുവരും. ഇതോടെ തെക്കൻ തമിഴ്‌നാട്ടിലും തെക്കൻ കേരളത്തിലും മഴക്ക് അനുകൂല സാഹചര്യമൊരുങ്ങും. ഞായർ മുതൽ തെക്കൻ കേരളത്തിൽ മഴ സാധ്യതയുണ്ട്. ഇതേ കുറിച്ച് വിശദമായി അറിയാൻ ഇതോടൊപ്പമുള്ള വിഡിയോ കാണുക.

ചുഴലിക്കാറ്റാകില്ല
ന്യൂനമർദം ശക്തിപ്പെട്ട് കന്യാകുമാരി കടൽ വഴി തെക്കൻ കേരളത്തിലെ തീരത്തുകൂടെ കടന്നു പോകുമെങ്കിലും ചുഴലിക്കാറ്റാകാൻ സാധ്യതയില്ല. ഇനി വടക്കൻ ഇന്ത്യൻ മഹാസമുദ്രത്തിൽ ചുഴലിക്കാറ്റ് രൂപപ്പെടുമെങ്കിൽ അതിന് മോച്ച എന്ന പേരാണ് നൽകുക. ഇപ്പോഴത്തെ സിസ്റ്റം മോച്ചയാകില്ലെന്നാണ് ഞങ്ങളുടെ വെതർമാൻ നിരീക്ഷിക്കുന്നത്. ദക്ഷിണാർധ ഗോളത്തിലെ ഡോറിയാൻ ചുഴലിക്കാറ്റ് ശക്തിപ്പെട്ടതിനാൽ ബംഗാൾ ഉൾക്കടലിലെ ന്യൂനമർദത്തിന് ശക്തിപ്പെടാനാകില്ല. മറ്റു അന്തരീക്ഷ ഘടകങ്ങളും പൂർണമായി നിലവിൽ അനുകൂലമല്ല. അതിനാൽ ഏതാനും ദിവസം ശക്തമായ മഴ നൽകി ന്യൂനമർദം കടന്നു പോകുമെന്നാണ് മെറ്റ്ബീറ്റ് വെതർ നിരീക്ഷിക്കുന്നത്.

ന്യൂനമർദം കരകയറും മുൻപ് ദുർബലം, കേരളത്തിലെ മഴ സാധ്യത മങ്ങി

കഴിഞ്ഞ ദിവസം ബംഗാൾ ഉൾക്കടലിന്റെ തീരത്ത് രൂപം കൊണ്ട തീവ്ര ന്യൂനമർദം ഇന്ന് ദുർബലമായി. നിലവിൽ ന്യൂനമർദം വെൽ മാർക്ഡ് ലോ പ്രഷറായി മാറിയിട്ടുണ്ട്. നാളെ രാവിലെയോടെ ന്യൂനമർദമായി വീണ്ടും ശക്തികുറയും.
പ്രതീക്ഷിച്ച ശക്തമായ മഴ തെക്കൻ ആന്ധ്രപ്രദേശ്, വടക്കൻ തമിഴ്‌നാട് തീരങ്ങളിൽ നൽകാതെയാണ് ന്യൂനമർദം ദുർബലമായത്. നാളെ മുതൽ വടക്കൻ കേരളത്തിൽ പെയ്യുമെന്ന് കരുതിയ മഴ സാധ്യതയും മങ്ങി. എങ്കിലും ചെന്നൈ ഉൾപ്പെടെയുള്ള വടക്കൻ തമിഴ്‌നാട്ടിലും തെക്കൻ ആന്ധ്രാപ്രദേശിലും കർണാടകയിലും നാളെയും മഴ സാധാരണ തോതിൽ തുടരും. എവിടെയും പ്രത്യേക ജാഗ്രത പാലിക്കേണ്ടിവരില്ല. കേരളത്തിൽ വടക്കൻ ജില്ലകളിൽ ഒറ്റപ്പെട്ട ചാറ്റൽ മഴയുണ്ടാകും. തെക്കൻ കേരളവും മധ്യ കേരളവും വരണ്ട കാലാവസ്ഥയിൽ തുടരും. ഈ ന്യൂനമർദവും ദുർബലമായി ഇന്ത്യയുടെ കരഭാഗം കടന്ന് അറബിക്കടലിലെത്തും. ഈ മാസം 24 ന് മറ്റൊരു ചക്രവാതച്ചുഴിയും ആൻഡമാൻ കടലിൽ രൂപം കൊള്ളും. ഈ സിസ്റ്റവും ശക്തിപ്പെട്ട് ന്യൂനമർദമാകാൻ സാധ്യതയുണ്ട്. വിശദമായ വിവരങ്ങൾ അടുത്ത ദിവസങ്ങളിൽ ഇവിടെ അറിയാനാകും.
Photo : Ajay Sivan

കേരളത്തിൽ ശക്തമായ മഴ എത്രദിവസം വരെ തുടരും ?

കേരളത്തിൽ ശക്തമായ മഴ രണ്ടു ദിവസം കൂടി തുടരും. വെള്ളിയാഴ്ച മുതൽ കിഴക്കൻ മേഖലയിൽ മഴ തുടരുമെങ്കിലും ഇപ്പോഴത്തെ തീവ്രതയുണ്ടാകില്ലെന്നാണ് മെറ്റ്ബീറ്റ് വെതറിന്റെ നിരീക്ഷണം. ബുധൻ, വ്യാഴം ദിവസങ്ങളിൽ ജാഗ്രത തുടരണം. വടക്കൻ കേരളത്തിലും മധ്യ കേരളത്തിലെ കിഴക്കൻ മലയോരത്തും ശക്തമായതോ അതിശക്തമായതോ ആയ മഴ തുടരും. വലിയ തോതിൽ പ്രളയത്തിലേക്ക് നീങ്ങുന്ന സാഹചര്യം ഉണ്ടാകാനിടയില്ലെന്നാണ് ഏറ്റവും പുതിയ കാലാവസ്ഥാ അവലോകനം. സംസ്ഥാനത്തെ മിക്ക മേഖലകളിലും ഇന്നു പകൽ കഴിഞ്ഞ ദിവസത്തെ അപേക്ഷിച്ച് മഴ കുറഞ്ഞിരുന്നു. നദികളിൽ ജലനിരപ്പ് വലിയതോതിൽ കൂടിയതുമില്ല. ഡാമിലേക്ക് നീരൊഴുക്ക് വർധിക്കുന്നുണ്ടെങ്കിലും തുറക്കേണ്ട സാഹചര്യത്തിലല്ല മേജർ ഡാമുകൾ.

കേരളത്തിനു സമാന്തരമായി നിലകൊള്ളുന്ന ബംഗാൾ ഉൾക്കടലിലെ ചക്രവാതച്ചുഴി അടുത്ത ദിവസങ്ങളിൽ വടക്കോട്ട് നീങ്ങാൻ സാധ്യതയുണ്ട്. അതിനൊപ്പം മഴയും കർണാടക, ഗോവ മേഖലയിലേക്ക് നീങ്ങും. ഇന്നും കർണാടകയിൽ കനത്ത മഴ ലഭിച്ചിരുന്നു. കർണാടകയിലെ മഴ വടക്കൻ കേരളത്തെ സ്വാധീനിക്കുമെങ്കിലും വടക്കൻ ജില്ലകളിൽ അസാധാരണ സാഹചര്യം ഉണ്ടാകാൻ ഇടയില്ല. കിഴക്കൻ മലയോര മേഖലകളിലെ ജാഗ്രത കേരളത്തിലെ എല്ലാ മേഖലകളിൽ ഞായറാഴ്ച വരെയെങ്കിലും തുടരുന്നതാണ് സുരക്ഷിതം. പൊതുജനങ്ങൾ സർക്കാർ ഏജൻസികൾ നൽകുന്ന നിർദേശം അനുസരിക്കുക. ഔദ്യോഗിക, സ്വകാര്യ കാലാവസ്ഥാ ഏജൻസികൾ നൽകുന്ന വിവരങ്ങൾ മനസിലാക്കി വയ്ക്കുക. മാറിത്താമസിക്കാൻ നിർദേശം ലഭിച്ചാൽ അമാന്തിച്ച് നിൽക്കരുത്. സുരക്ഷക്ക് മുൻതൂക്കം നൽകുക.
ശ്രദ്ധിക്കുക- അപ്‌ഡേഷനുകൾ അറിയാൻ ഞങ്ങളുടെ Metbeat Weather, weatherman kerala എന്നീ ഫേസ്ബുക്ക് പേജുകളും യുട്യൂബ് ചാനലുകളും metbeat.com, metbeatnews.com എന്നീ വെബ്‌സൈറ്റുകളും LIKE ചെയ്തും Subscribe ചെയ്തും പിന്തുടരുക.

വടക്കൻ കേരളത്തിൽ മഴ ശക്തം: വീടുകൾ തകർന്നു

സംസ്ഥാനത്ത് പല ജില്ലകളിലും ശക്തമായ മഴ തുടരുകയാണ്. കോഴിക്കോട് തിരുവമ്പാടിയിൽ ശക്തമായ മഴയിൽ വീട് തകർന്നു. താഴെ തിരുവമ്പാടി, കുനിയൻ പറമ്പത്ത് ഇടത്തിൽ ഗോപിയുടെ വീടാണ് തകർന്നത്.

കോഴിക്കോട് പതങ്കയം വെളളച്ചാട്ടത്തിൽ കഴിഞ്ഞ ദിവസം ഒഴുക്കിൽപ്പെട്ട് കാണാതായ യുവാവിനായി തെരച്ചിൽ തുടരുകയാണ്. ഇന്നലെ പ്രതികൂല കാലാവസ്ഥയെ തുടർന്ന് തെരച്ചിൽ നിർത്തി വച്ചിരുന്നു.ദുരന്ത നിവാരണ സേനയുടെ നേതൃത്വത്തിലാണ് തെരച്ചിൽ പുരോഗമിക്കുന്നത്. ഇന്നലെ വൈകീട്ടാണ് ഈസ്റ്റ് മലയമ്മ സ്വദേശി ഹുസ്‍നി വെളളച്ചാട്ടത്തിൽ അകപ്പെട്ടത്. ഫോട്ടോ എടുക്കാൻ ശ്രമിക്കുന്നതിനിടെ ആയിരുന്നു അപകടം.

പാലക്കാട് നെല്ലിയാമ്പതിയിലും ശക്തമായ മഴയുണ്ടായി. പുലർച്ചെ തുടങ്ങിയ മഴ തുടരുകയാണ്. രണ്ട് വീടുകളിൽ വെള്ളം കയറി. കോട്ടയത്ത് ശക്തമായ മഴയിൽ മണ്ണിടിഞ്ഞ് വീടിന് മുകളിലേക്ക് വീണു. പാലാ ഇടനാട് പാറത്തോട് ശ്രീനിവാസന്റെ വീടിന് മുകളിലേക്കാണ് മണ്ണ് ഇടിഞ്ഞ് വീണത്. പാലയിൽ ശക്തമായ മഴ തുടരുകയാണ്.

കണ്ണൂർ പയ്യന്നൂരിൽ ശക്തമായ കാറ്റിലും മഴയിലും തെങ്ങ് കടപുഴകി വീണ് വീട് തകർന്നു. കുളങ്ങര യശോദയുടെ വീടാണ് പുലർച്ചെ തകർന്നത്.അപകടം നടക്കുമ്പോൾ യശോദയും മകൻ രാജേഷും ഭാര്യയും 2 കുട്ടികളും വീട്ടിലുണ്ടായിരുന്നു. വീട്ടുകാർ പരിക്കേൽക്കാതെ രക്ഷപ്പെട്ടു. കണ്ണൂർ ജില്ലയിൽ ക്വാറികളുടെ പ്രവർത്തനം ജൂലൈ 10 വരെ നിർത്തിവയ്ക്കാൻ കളക്ടർ ഉത്തരവിട്ടു. മഴ ശക്തമായി തുടരുന്ന സാഹചര്യത്തിലാണ് എല്ലാ കരിങ്കൽ ക്വാറികളുടെയും ചെങ്കൽ ക്വാറികളുടെയും പ്രവർത്തനം താൽക്കാലികമായി നിർത്തിവയ്ക്കാൻ നിർദേശം നൽകിയത്.

കേരളത്തിൽ രണ്ടു ദിവസം മഴ സജീവമാകും

കേരളത്തിലെ വിവിധ ജില്ലകളിൽ ഇന്നലെ ലഭിച്ച മഴ ഇന്നും നാളെയും ശക്തമായി തുടരാൻ സാധ്യത. കാലവർഷക്കാറ്റ് കൂടുതൽ അനുകൂലമായതും വടക്കൻ തമിഴ്നാട്ടിനു മുകളിൽ രൂപപ്പെട്ട ചക്രവാതചുഴിയും രായലസീമ മുതൽ കന്യാകുമാരി വരെ നീണ്ടു നിൽക്കുന്ന ന്യൂനമർദ്ദ പാത്തിയുമാണ് മഴക്ക് കാരണമാകുന്നത്. കന്യാകുമാരി മേഖലയിൽ അന്തരീക്ഷ ചുഴിയും ദൃശ്യമാണ്. മധ്യ ,തെക്കൻ , വടക്കൻ കേരളത്തിൽ മഴ തുടരാൻ ഇത് കാരണമാകും. ആലപ്പുഴ മുതൽ കാസർകോട് വരെയുള്ള ജില്ലകളിൽ ആകും കൂടുതൽ മഴ സാധ്യത. അറബിക്കടലിലും ലക്ഷദ്വീപിലും അടുത്ത 48 മണിക്കൂറിൽ ശക്തമായ മഴയ്ക്ക് സാധ്യതയുണ്ട്. ഞായറാഴ്ച വരെ കൂടുതൽ മഴ ലഭിച്ചശേഷം തിങ്കളാഴ്ച മുതൽ മഴ വീണ്ടും ദുർബലമായിരിക്കും. കേരളത്തിൽ രാത്രി പരക്കെ മഴയാണ് പ്രതീക്ഷിക്കുന്നത്. ചിലയിടങ്ങളിൽ ഇടിയോടുകൂടിയ മഴ ലഭിക്കും.

തമിഴകത്തും കർണാടകയിലും മഴ
തമിഴ്നാട്ടിലെ കോയമ്പത്തൂർ ഉൾപ്പെടെയുള്ള ജില്ലകളിലും മഴ ലഭിക്കും. വൈകിട്ട് ഇടിയോടു കൂടിയുള്ള മഴയാണ് പ്രതീക്ഷിക്കേണ്ടത്. കർണാടകയിലും ഇന്ന് മഴയ്ക്ക് സാധ്യതയുണ്ട്. വടക്കുകിഴക്കൻ സംസ്ഥാനങ്ങളിൽ കഴിഞ്ഞ ദിവസങ്ങളിൽ തുടരുന്ന ശക്തമായ മഴ അടുത്ത ദിവസങ്ങളിലും തുടരാനാണ് സാധ്യത . അസം, മേഘാലയ, മണിപ്പൂർ , ബംഗാൾ സംസ്ഥാനങ്ങളിൽ ശക്തമായ മഴയും വെള്ളക്കെട്ടും ഉണ്ടാകും. ഇവിടെ ഉരുൾപൊട്ടൽ സാധ്യതയും നിലനിൽക്കുന്നു. ബംഗാൾ ഉൾക്കടലിൽ നിന്ന് വീശുന്ന ശക്തമായ കാറ്റ് ആണ് ഇവിടെ മഴക്ക് കാരണമാകുന്നത്. കേരളത്തെ കൂടാതെ പശ്ചിമ തീരത്തു മഴ തുടരാനാണ് സാധ്യത. നിലവിൽ ഗുജറാത്ത് വരെ കാലവർഷം പുരോഗമിച്ചിട്ടുണ്ട്. പ്രധാനമായും പശ്ചിമതീരം വഴിയാണ് ഇത്തവണ കാലവർഷം പുരോഗമിച്ചത്. ഈ ഭാഗങ്ങളിൽ തുടർച്ചയായി മഴ ലഭിക്കാനുള്ള സാധ്യതയാണ് ഇപ്പോൾ ഒരുങ്ങുന്നത്. ജൂണിൽ കാലവർഷം എത്തിയതിനുശേഷം ഇതാദ്യമായാണ് ഇത്തരത്തിൽ തുടർച്ചയായ മഴയ്ക്കുള്ള സാധ്യത ഒരുങ്ങുന്നത്. വടക്കൻ കേരളം മുതൽ ഗുജറാത്ത് വരെയുള്ള ഭാഗങ്ങളിൽ അടുത്ത 48 മണിക്കൂറിൽ ഒറ്റപ്പെട്ട ശക്തമായ മഴയ്ക്ക് സാധ്യതയുണ്ട്. അടുത്ത രണ്ടാഴ്ചയും ഈ മേഖലകളിൽ ഇതിൽ കഴിഞ്ഞ ആഴ്ചകളെ അപേക്ഷിച്ച് കൂടുതൽ മഴ ലഭിക്കാൻ സാധ്യതയുണ്ട്. 2022ലെ കാലാവസ്ഥ പ്രവചന പ്രകാരം കാലവർഷത്തിന്റെ ആദ്യ രണ്ടു മാസത്തിൽ കൂടുതൽ മഴക്കുറവ് അനുഭവപ്പെടുന്ന സംസ്ഥാനങ്ങളിലൊന്നാണ് കേരളം. എം ജെ ഒ ഉൾപ്പെടെയുള്ള അനുകൂല സാഹചര്യങ്ങൾ ഉരുത്തിരിയുന്ന തിനാൽ എന്നാൽ ഈ മാസം അവസാനം വരെ കേരളത്തിലും കൂടുതൽ മഴ നമുക്ക് പ്രതീക്ഷിക്കാം. കൂടുതൽ വിവരങ്ങൾക്കായി metbeatnews.com, metbeat.com, വെബ്സൈറ്റുകളും ഫേസ്ബുക്ക് പേജും പിന്തുടരുക. ഔദ്യോഗിക കാലാവസ്ഥ അറിയിപ്പുകൾക്കായി കേന്ദ്ര കാലാവസ്ഥാ വകുപ്പിന്റെ വെബ്സൈറ്റും പിന്തുടരുക .

കാലവർഷം ജൂൺ 7 മുതൽ സജീവമായേക്കും

Metbeat Weather Desk
കേരളത്തിൽ ഇന്ന് (വ്യാഴം) മുതൽ മഴ നേരിയ തോതിൽ ലഭിക്കും. രാത്രി മുതൽ പുലർച്ചെ വരെ തീരദേശങ്ങളിലും ഇടനാട്ടിലും ഒറ്റപ്പെട്ട മഴയ്ക്ക് സാധ്യതയുണ്ട്. എന്നാൽ കേരളത്തിൽ കാലവർഷത്തിന് ഭാഗമായി പരക്കെയുള്ള മഴക്ക് ഇനിയും കാത്തിരിക്കേണ്ടിവരും. കഴിഞ്ഞ പോസ്റ്റുകളിൽ വിദഗ്ദ്ധർ സൂചിപ്പിച്ചതുപോലെ ഈ മാസം ഏഴിന് ശേഷമാണ് കേരളത്തിൽ അൽപമെങ്കിലും മഴ ലഭിക്കുക.
കരയിൽ വ്യാപകമായി കയറാൻ പര്യാപ്തമായ നിലയിൽ പടിഞ്ഞാറൻ കാറ്റ് സ്ഥിരത പാലിക്കാത്തതാണ് ഇതിന് കാരണം. ഉച്ചകഴിഞ്ഞും വൈകുന്നേരവും മാത്രം കിഴക്കൻ പ്രദേശങ്ങളിലും മഴയുണ്ടാകും. ഇതേ സ്ഥിതി 6 വരെ തുടരും.

ജൂൺ 7 മുതൽ അന്തരീക്ഷ സ്ഥിതി മഴക്കനുകൂലമായി മെച്ചപ്പെടും.
കൂടുതൽ ഇടങ്ങളിലേക്ക് കൂടുതൽ സമയങ്ങളിലും ശക്തിയിലും മഴ ലഭിച്ച് മൺസൂൺ ഉണർവ് കൈവരിക്കും.
അതായത് ജൂൺ രണ്ടാം വാരം മൺസൂൺ കേരളത്തിൽ ഊർജിതമാകും. മഴക്കാല പ്രതീതി കൈവരും. എങ്കിലും ജൂൺ രണ്ടാം വാരത്തിൽ മഴ ചില ദിവസങ്ങളിൽ കുറയും. ജൂൺ, ജൂലൈ മാസങ്ങളിൽ ഇതിൽ മൺസൂൺ സാധാരണയേക്കാൾ കുറയാൻ സാധ്യതയുണ്ടെന്ന് metbeat weather കഴിഞ്ഞ മാസങ്ങളിൽ സൂചിപ്പിച്ചിരുന്നത് ഓർക്കുന്നുണ്ടാവുമല്ലോ. കേരളത്തിൽ കാലവർഷക്കാറ്റ് സജീവമായി എത്താത്ത സാഹചര്യമാണ് മഴ കുറയാൻ കാരണം. ആഗോള കാലാവസ്ഥാ പ്രതിഭാസമായ മാഡൻ ജൂലിയൻ ഓസിലേഷൻ (MJO) ഇപ്പോൾ ഇന്ത്യൻ മഹാസമുദ്രത്തിൽ നിന്ന് പുറത്തായതിനാൽ കാലവർഷം വടക്കോട്ട് പുരോഗമിക്കുന്നതിനും തടസ്സം ഉണ്ടാകും. എങ്കിലും അടുത്ത ഏതാനും ദിവസങ്ങളിൽ കാലവർഷം മുംബൈയിലും മഹാരാഷ്ട്രയുടെ മറ്റുഭാഗങ്ങളിലും എത്താൻ സാധ്യതയുണ്ട്. കഴിഞ്ഞദിവസം വടക്കൻ കേരളത്തിൽ കോഴിക്കോട് ഉൾപ്പെടെയുള്ള പ്രദേശങ്ങളിൽ പെയ്ത ശക്തമായ മഴ കാലവർഷത്തിന്റ ഭഗമല്ല. നേരത്തെ സൂചിപ്പിച്ചതുപോലെ ചക്രവാത ചുഴിയുടെ സ്വാധീനമാണ് കനത്തമഴക്ക് കാരണമായത്. കാലവർഷത്തിൻറെ ഭാഗമായി ഇടിയോടു കൂടിയുള്ള മഴയല്ല ഉണ്ടാവുക. രാത്രികാലങ്ങളിൽ സംവഹന മേഘങ്ങളുടെ സാന്നിധ്യം മൂലമാണ് ഇപ്പോൾ കേരളത്തിൽ പല ഭാഗങ്ങളിലും മഴ ലഭിക്കുന്നത്. കാലവർഷക്കാറ്റ് സജീവമാകുന്നതോടെ ഈയൊരു സാഹചര്യം മാറ്റം വരുകയും സാധാരണ രീതിയിലുള്ള കാലവർഷത്തിന് ഭാഗമായ മഴ ലഭിക്കുകയും ചെയ്യും.

ചക്രവാത ചുഴി: വടക്കൻ കേരളത്തിൽ മഴ സാധ്യത

ഒരാഴ്ച നീണ്ട ഇടവേളയ്ക്ക് ശേഷം ഇന്നു മുതൽ വടക്കൻ ജില്ലകളിലും വ്യാഴം മുതൽ മറ്റു ജില്ലകളിലും ഒറ്റപ്പെട്ട ഇടത്തരം മഴക്ക് സാധ്യത. ഇടിയോടെ കൂടിയും അല്ലാതെയും മഴ ലഭിക്കാമെന്ന് മെറ്റ്ബീറ്റ് വെതർ പറയുന്നു. വടക്കൻ കേരള തീരത്തോട് ചേർന്ന് വിവിധ അന്തരീക്ഷ ഉയരങ്ങളിലായി രൂപപ്പെട്ട ചക്രവാത ചുഴിയാണ് മഴക്ക് കാരണം. ഇത് കാലവർഷക്കാറ്റിനെ വ്യാപിക്കുന്നത് തടയുന്നതിനാൽ 2-3 ദിവസം കഴിഞ്ഞേ കാസർകോട്ടും മറ്റും കാലവർഷം എത്തുകയുള്ളൂ. വടക്കൻ കേരളത്തിലും കർണാടകയിലും ലഭിക്കുന്ന മഴക്കൊപ്പം ഇടിയും മിന്നലും ഉണ്ടാകാൻ സാധ്യതയുണ്ട്. മഴക്കൊപ്പം കാറ്റിനും സാധ്യത. ഈ മഴ കാലവർഷത്തിന്റെ ഭാഗമായി കാണാനാകില്ല. വടക്കൻ തീരത്തോട് ചേർന്ന് രൂപപ്പെട്ട ചക്രവാത ചുഴിയോട് ചേർന്ന് കേരളത്തിനും തമിഴ്നാടിനും കുറുകെ ബംഗാൾ ഉൾക്കടലിലേക്ക് ന്യൂനമർദ പാത്തി (ട്രഫ്) നിലകൊള്ളുന്നു. ഇതും വടക്കൻ കേരളത്തിലും വടക്കൻ തമിഴ്നാട്ടിലും മഴക്ക് കാരണമാകും. തിരുവനന്തപുരം മുതൽ ആലപ്പുഴ വരെയുള്ള ജില്ലകളിൽ പെയ്യുന്ന മഴ കാലവർഷത്തിന്റെ ഭാഗമാണ്. അതിനാൽ അവിടെ ഇടക്കിടെ മഴ ശക്തമായി തുടരും. തെക്കു കിഴക്കൻ അറബിക്കടലിൽ കാലവർഷക്കാറ്റിന് ശക്തി കൂടിയിട്ടുണ്ടെങ്കിലും കേരളത്തിലേക്ക് നേരിട്ട് പ്രവേശിക്കുന്നില്ല. ഈ സാഹചര്യത്തിന് അടുത്ത ദിവസങ്ങളിൽ മാറ്റം വരും. കടലിൽ കാലവർഷ പ്രതീതിയിൽ മഴ തുടരും. ധരാളം മേഘങ്ങൾ കടലിൽ രൂപപ്പെടുകയും അവ മഴയായി ചെയ്യുകയും ചെയ്യുന്നുണ്ട് . അതിനാൽ ലക്ഷദ്വീപ്, മാലദ്വീപ് എന്നിവിടങ്ങളിൽ മഴ തുടരും. ജൂൺ 3 മുതൽ 7 വരെ കേരളത്തിൽ എല്ലാ ജില്ലകളിലും സാധാരണ തോതിലോ അതിൽ കുറവോ മഴ പ്രതീക്ഷിക്കാം.

മഴ കുറയുന്നു; ഒറ്റപ്പെട്ടയിടങ്ങളിൽ ശക്തമായ മഴ

കേരളത്തിൽ മഴ അടുത്ത 3 ദിവസം കൂടി കുറഞ്ഞ നിലയിൽ തുടരും. വെള്ളി മുതൽ കൂടുതൽ പ്രദേശങ്ങളിലേക്ക് ഒറ്റപ്പെട്ട മഴ വ്യാപിക്കുമെങ്കിലും കഴിഞ്ഞ ആഴ്ചയെ അപേക്ഷിച്ച് മഴ ഈ ആഴ്ച കുറവായിരിക്കും. ജൂൺ 1 മുതൽ മഴ വീണ്ടും സാധാരണ രീതിയിൽ തിരികെ എത്തും എന്നാണ് മെറ്റ്ബീറ്റ് വെതറിന്റെ നിരീക്ഷണം.

ഒറ്റപ്പെട്ട മഴ തുടരും
ഇന്നലെയും സംസ്ഥാനത്ത് ഒറ്റപ്പെട്ട മഴ തുടർന്നു. മധ്യ കേരളത്തിലെ വിവിധ വെതർ സ്റ്റേഷനുകളിൽ ശക്തമായ മഴ റിപ്പോർട്ട് ചെയ്തു. വടക്കൻ കേരളത്തിൽ മഴ താരതമ്യേന കുറവായിരുന്നു. കൊച്ചി നേവൽ ബേസിൽ 13.9, അരൂക്കുറ്റി 12.1, എറണാകുളം 11.3 സെ.മീ മഴ ഇന്ന് രാവിലെ 8.30 ന് അവസാനിച്ച 24 മണിക്കൂറിൽ രേഖപ്പെടുത്തി. തിരുവനന്തപുരം വിമാനത്താവളം 78 എം.എം, ചേർത്തല 72, കുന്നംകുളം 65, 21 ലക്കുടി 62 എം.എം മഴ ലഭിച്ചു. ഇന്ന് ഇന്നലെ അപേക്ഷിച്ച് മഴ കുറയാനാണ് സാധ്യത. ആലപ്പുഴ മുതൽ തെക്കോട്ടുള്ള ജില്ലകളിൽ ഇന്ന് വൈകിട്ട് മുതൽ മഴക്ക് സാധ്യതയുണ്ട്. തെക്കൻ തമിഴ്നാട്ടിലെ കന്യാകുമാരി, നാഗർകോവിൽ എന്നിവിടങ്ങളിൽ ശക്തമായ മഴ പ്രതീക്ഷിക്കാമെന്ന് ഞങ്ങളുടെ വെതർ മാൻ പറയുന്നു.