Menu

കാലാവസ്ഥാ പ്രവചനം

ബംഗാൾ ഉൾക്കടലിലെ ന്യൂനമർദം നാളെ ശക്തിപെട്ടേക്കും

ബംഗാൾ ഉൾക്കടലിൽ രൂപപ്പെട്ട ചക്രവാതച്ചുഴി ന്യൂനമർദമായി മാറി. ഈ വർഷത്തെ ആദ്യ ന്യൂനമർദമാണിത്. തെക്കുകിഴക്കൻ ബംഗാൾ ഉൾക്കടലിൽ ഭൂമധ്യരേഖയോട് ചേർന്നാണ് ന്യൂനമർദം രൂപ്പപെട്ടത്. നാളെയോടെ ഇത് വീണ്ടും ശക്തിപ്പെട്ട് വെൽമാർക്ഡ് ലോ പ്രഷറായി മാറിയേക്കും.
ഈ സിസ്റ്റം പടിഞ്ഞാറ്-വടക്കുപടിഞ്ഞാറ് ദിശയിൽ സഞ്ചരിച്ച് ശ്രീലങ്കയ്ക്ക് സമീപത്തേക്ക് എത്തുമെന്ന് ശ്രീലങ്കൻ കാലാവാസ്ഥാ വകുപ്പ് പറഞ്ഞു. അടുത്ത മൂന്നു ദിവസത്തിനകം ഇത് തെക്കുപടിഞ്ഞാറൻ ബംഗാൾ ഉൾക്കടലിൽ ശ്രീലങ്കക്ക് സമീപമെത്തും.

പരിവർത്തന കാലം
ബംഗാൾ ഉൾക്കടലിൽ തുലാവർഷം വിടവാങ്ങിയ ശേഷമുള്ള അന്തരീക്ഷ പരിവർത്തന കാലമാണിത്. ഇന്ത്യൻ മഹാസമുദ്രത്തിൽ എം.ജെ.ഒ (മാഡൻ ജൂലിയൻ ഓസിലേഷൻ) ആക്ടീവ് ഫേസിലാണ്. ആഗോള മഴപ്പാത്തി എന്നാണ് ഇത് അറിയപ്പെടുന്നത്. ഇതിനാൽ ന്യൂനമർദം നാളെ ശക്തിപെട്ടേക്കും.

ഫെബ്രുവരി ആദ്യവാരം കേരളത്തിലും മഴ
കഴിഞ്ഞ ഏതാനും ദിവസം മുൻപത്തെ മഴ വിടവാങ്ങുന്ന പോസ്റ്റിലും വിഡിയോയിലും സൂചിപ്പിച്ച അടുത്തയാഴ്ചയിലെ മഴയാണിത്. ശ്രീലങ്കക്ക് സമീപം ചക്രവാതച്ചുഴിക്ക് സാധ്യതയുണ്ടെന്നായിരുന്നു അന്ന് മെറ്റ്ബീറ്റ് വെതർ പ്രവചിച്ചത്. എന്നാൽ കൂടുതൽ ശക്തിപ്പെട്ട നിലയിലാകും ഇത് ശ്രീലങ്കക്ക് സമീപമെത്തുക. അടുത്ത ബുധനാഴ്ചക്ക് ശേഷം കേരളത്തിൽ വീണ്ടും മഴക്ക് ഇത് കാരണമാകും. തെക്കൻ കേരളത്തിലും മധ്യ കേരളത്തിലുമാണ് ഇപ്പോഴത്തെ നിരീക്ഷണം അനുസരിച്ച് മഴക്ക് സാധ്യത. തമിഴ്‌നാട്ടിലും ഈ സിസ്റ്റം മഴ നൽകും. ഒറ്റപ്പെട്ട മഴ ഈ മാസം 30 മുതൽ തന്നെ കേരളത്തിന്റെ തെക്കൻ മേഖലയിലും തെക്കൻ തമിഴ്‌നാട്ടിലും പ്രതീക്ഷിക്കാം.

കേരളത്തിൽ നാളെയും മഴ സാധ്യത

കേരളത്തിൽ ഇന്നലെയും ഇന്നുമായി ലഭിച്ച മഴ നാളെ മുതൽ കുറഞ്ഞു തുടങ്ങും. വ്യാഴാഴ്ചയോടെ വീണ്ടും മഴ രഹിതമായ കാലാവസ്ഥ തിരികെയെത്താനാണ് സാധ്യതയെന്ന് മെറ്റ്ബീറ്റ് വെതർ നിരീക്ഷകർ പറഞ്ഞു.

ചൊവ്വാഴ്ച മുതൽ കേരളത്തിൽ മഴക്ക് സാധ്യതയുണ്ടെന്ന് മെറ്റ്ബീറ്റ് വെതർ ഒരാഴ്ചയായി റിപ്പോർട്ട് ചെയ്തിരുന്നു. ഇന്ന് രാവിലെ സംസ്ഥാനത്ത് വിവിധ ഭാഗങ്ങളിൽ മഴയുണ്ടായി. തെക്കൻ കേരളത്തിലാണ് കൂടുതൽ മഴ റിപ്പോർട്ട് ചെയ്തത്. മധ്യ കേരളത്തിലും വടക്കൻ ജില്ലകളിലും ഉച്ചയ്ക്ക് ശേഷം പലയിടത്തായി മഴ ലഭിച്ചു. കിഴക്കൻ മേഖലയിൽ ശക്തമായ മഴയും തീരദേശത്ത് ഇടത്തരം മഴയുമാണ് റിപ്പോർട്ട് ചെയ്തത്.

നാളെയും മഴ സാധ്യത
മാഡൻ ജൂലിയൻ ഓസിലേഷൻ (MJO) എന്ന ആഗോള മഴപ്പാത്തി ഇന്ത്യൻ മഹാസമുദ്രത്തിൽ നിലകൊള്ളുന്നതും മഡഗാസ്‌കറിനു സമീപത്തെ ചുഴലിക്കാറ്റുമാണ് കേരളത്തിൽ മഴക്ക് കാരണം. തമിഴ്‌നാടിനും കേരളത്തിനും കുറുകെ സഞ്ചരിക്കുന്ന ഈർപ്പമുള്ള കാറ്റ് മേഘരൂപീകരണത്തിന് ഇടയാക്കുന്നു. കേരളത്തിലും തമിഴ്‌നാട്ടിലും മഴ നൽകുകയും ചെയ്തു. ഈ സാഹചര്യം നാളെയും തുടരുമെന്നും കേരളത്തിൽ നാളെ (ബുധൻ) യും മഴ സാധ്യതയുണ്ടെന്നാണ് മെറ്റ്ബീറ്റ് വെതറിന്റെ നിരീക്ഷണം. തുടർന്ന് മഴ പടിഞ്ഞാറേക്ക് അറബിക്കടലിലേക്ക് മാറും. കേരളത്തിൽ വരണ്ട കാലാവസ്ഥയിലേക്കും മാറ്റം വരും.

അടുത്തയാഴ്ച മഴ വീണ്ടും തിരികെയെത്തും
നാളത്തോടെ ദുർബലമാകുന്ന മഴ അടുത്തയാഴ്ചയോടെ വീണ്ടും തിരികെയെത്തുമെന്നാണ് മെറ്റ്ബീറ്റ് നിരീക്ഷിക്കുന്നത്. എം.ജെ.ഒ സാന്നിധ്യം തുടരുന്നതിനാൽ ബംഗാൾ ഉൾക്കടലിൽ ചക്രവാതച്ചുഴി രൂപംകൊള്ളാനും ഇത് തെക്കൻ തമിഴ്‌നാട്ടിലും തെക്കൻ കേരളത്തിലും മഴ നൽകാനും സാധ്യതയുണ്ടെന്ന് ഞങ്ങളുടെ നിരീക്ഷകർ പറയുന്നു. ഈ മാസം 29 നും 31 നും ഇടിലാണ് മഴ സാധ്യത. ശ്രീലങ്കയോട് ചേർന്നാണ് ചക്രവാതച്ചുഴി രൂപം കൊള്ളാൻ സാധ്യതയുള്ളത്. തമിഴ്‌നാട്ടിലും തീരദേശ ആന്ധ്രയിലും ഈ സിസ്റ്റം മഴ നൽകുമെന്നാണ് പ്രതീക്ഷിക്കുന്നത്.

ന്യൂനമർദം തീവ്രമായി ; കേരളത്തിലും മഴ സാധ്യത

തെക്കു കിഴക്കൻ ബംഗാൾ ഉൾക്കടലിൽ കഴിഞ്ഞ ദിവസം രൂപപ്പെട്ട ന്യൂനമർദ്ദം ഇന്ന് തീവ്ര ന്യൂനമർദ്ദം (Depression) ആയി മാറി. ഇപ്പോൾ തീവ്ര ന്യൂനമർദ്ദം നാഗപട്ടണത്തിൽ നിന്ന് 480 കിലോമീറ്ററും ചെന്നൈയിൽനിന്ന് 520 കിലോമീറ്ററും അകലെയാണ് സ്ഥിതി ചെയ്യുന്നത്. ഇന്നുമുതൽ ന്യൂനമർദ്ദത്തിന്റെ സഞ്ചാര ദിശയിൽ മാറ്റം പ്രതീക്ഷിക്കാം. കഴിഞ്ഞദിവസം പടിഞ്ഞാറ് വടക്കു പടിഞ്ഞാറ് ദിശയിലാണ് ന്യൂനമർദ്ദം നീങ്ങിയിരുന്നത്. ഇന്നുമുതൽ ശ്രീലങ്കയുടെ ഭാഗത്തേക്ക് നീങ്ങും. അതിനാൽ തമിഴ്നാട് തീരത്തേക്ക് പ്രവേശിക്കില്ല. തുടർന്ന് കന്യാകുമാരി കടൽവഴി തിങ്കളാഴ്ചയോടെ അറബി കടലിലെത്തും. പിന്നീട് ഇന്ത്യൻ തീരത്തുനിന്ന് അകന്നുപോകും.

കേരളത്തിലും ഒറ്റപ്പെട്ട ശകതമായ മഴ സാധ്യത
ശ്രീലങ്കയിലും തമിഴ്നാട്ടിലും ശനിയാഴ്ച മുതൽ ശക്തമായ മഴക്ക് ന്യൂനമർദ്ദം കാരണമാകും. ഞായറാഴ്ച ഉച്ചയ്ക്കുശേഷം കേരളത്തിലും ഒറ്റപ്പെട്ട പ്രദേശങ്ങളിൽ ശക്തമായ പ്രതീക്ഷിക്കാം. കോട്ടയം, ഇടുക്കി, പത്തനംതിട്ട , കൊല്ലം , തിരുവനന്തപുരം ജില്ലകളിലാണ് മഴ പ്രതീക്ഷിക്കുന്നത് തിങ്കളാഴ്ചയും ചൊവ്വാഴ്ചയും മധ്യകേരളത്തിലും കേരളത്തിലും ഒറ്റപ്പെട്ട ശക്തമായ മഴയ്ക്ക് സാധ്യതയുണ്ട്. കൂടുതൽ വിവരങ്ങൾ ഇതോടൊപ്പം ഉള്ള വീഡിയോയിൽ .

മന്ദൂസ് മന്ദഗതിയിലാകും, തീരം തൊടുംമുൻപ് ദുർബലമായേക്കും

മന്ദൂസ് ചുഴലിക്കാറ്റ് നാളെ ബംഗാൾ ഉൾക്കടലിൽ രൂപപ്പെടും. തമിഴ്‌നാടിന്റെ വടക്കൻ തീരത്തും പുതുച്ചേരിയിലും ആന്ധ്രപ്രദേശിന്റെ തെക്കൻ തീരത്തും മന്ദൂസ് കനത്ത മഴയും കാറ്റും നൽകും. വെള്ളിയാഴ്ചയോടെ മന്ദൂസ് ദുർബലമായി തമിഴ്‌നാട് തീരത്തേക്ക് നീങ്ങുമെന്നാണ് പ്രതീക്ഷിക്കുന്നത്. വ്യാഴാഴ്ച പുലർച്ചെയോടെ ഇപ്പോൾ വെൽമാർക്ഡ് ലോ പ്രഷറായ ന്യൂനമർദം തീവ്രന്യൂനമർദമാകും. തുടർന്ന് അതിവേഗം ശക്തിപ്പെട്ട് അതിതീവ്ര ന്യൂനമർദമാകും. പടിഞ്ഞാറ് വടക്കുപടിഞ്ഞാറ് ദിശയിലാണ് ന്യൂനമർദം നീങ്ങുന്നത്. വെള്ളിയാഴ്ച രാവിലെയോടെ ചുഴലിക്കാറ്റ് കരകയറാനാണ് സാധ്യത.

തമിഴ്‌നാട്ടിലും പുതുച്ചേരിയിലും തീവ്രമഴ സാധ്യത
തമിഴ്‌നാടിന്റെയും പുതുച്ചേരിയുടെയും തീരങ്ങളിൽ ശക്തമായ കാറ്റും മഴയും പ്രതീക്ഷിക്കാം. 80 കി.മി വേഗതയിലുള്ള കാറ്റാണ് പ്രതീക്ഷിക്കുന്നത്. കരകയറുമ്പോൾ 90 കി.മി കാറ്റിന് വേഗമുണ്ടാകും. കര കയറിയ ശേഷവും കാറ്റും മഴയും തുടരും.

മന്ദൂസ് മന്ദഗതിയിലാകും, തീരം തൊടുംമുൻപ് ദുർബലം
ചുഴലിക്കാറ്റായ ശേഷം മന്ദൂസ് മന്ദഗതിയിൽ നീങ്ങുമെന്നാണ് യൂറോപ്യൻ സെന്റർ ഫോർ മീഡിയം റേഞ്ച് വെതർ ഫോർകാസ്റ്റിങ്ങും ഗ്ലോബൽ ഫോർകാസ്റ്റിങ് സിസ്റ്റവും പ്രവചിക്കുന്നത്. അതിനിനാൽ തമിഴ്‌നാട് തീരത്ത് പ്രത്യേക ജാഗ്രത വേണ്ടിവരും. തായ്‌ലന്റ് ഭാഗത്തെ അതിമർദമാണ് തെക്കൻ ആൻഡമാൻ കടലിലെ അതിമർദവുമാണ് ഇതിനു കാരണമാകുക. ജി.എസ്.എഫും ഇ.സി.എം.ഡബ്ല്യു.എഫും പ്രവചിക്കുന്നത് പ്രകാരം മന്ദൂസ് കരകയറും മുൻപ് ദുർബലമാകും. എന്നാൽ മന്ദഗതിയിൽ നീങ്ങുന്ന ചുഴലിക്കാറ്റ് ദുർബലമാകാനോ ശക്തിപ്പെടാനോ ഉള്ള സാധ്യത നിലനിൽക്കാറുണ്ടെന്ന് കാലാവസ്ഥാ വിദഗ്ധർ പറയുന്നു. കേന്ദ്ര കാലാവസ്ഥാ വകുപ്പും മന്ദൂസ് കരകയറും മുൻപ് ദുർബലമാകുമെന്നാണ് പ്രവചിക്കുന്നത്. തീരത്തോട് ചേർന്ന സമുദ്രോപരിതാപനില കുറയുന്നതാണ് ഐ.എം.ഡിയെ ഈ നിഗമനത്തിലെത്തിക്കുന്നതെന്നാണ് സൂചന. വെള്ളിയാഴ്ചയും അതിതീവ്ര മഴ പുതുച്ചേരി, തമിഴ്‌നാട് തീരം, ആന്ധ്രപ്രദേശ് എന്നിവിടങ്ങളിൽ കാലാവസ്ഥാ വകുപ്പ് പ്രവചിക്കുന്നുണ്ട്.

മഴക്ക് കാരണം ചക്രവാതച്ചുഴി, ബുധൻ വരെ മഴ തുടരും

കേരളത്തിൽ ബുധനാഴ്ചവരെ ഒറ്റപ്പെട്ട മഴ തുടരും. ഇന്ന് കേരളത്തിലെ എല്ലാ ജില്ലകളിലും മഴക്ക് സാധ്യതയുണ്ടെന്ന് മെറ്റ്ബീറ്റ് വെതർ അപ്‌ഡേറ്റ് ചെയ്തിരുന്നു. ഇന്ന് ഉച്ചയ്ക്ക് ശേഷം വിവിധ ജില്ലകളിൽ ഇടത്തരം, ശക്തമായ മഴ റിപ്പോർട്ട് ചെയ്തു. കിഴക്കൻ മേഖലയിൽ ഇടിയോടുകൂടെയുള്ള മഴയാണ് പെയ്തത്. എറണാകുളം, കോട്ടയം, ഇടുക്കി, പത്തനംതിട്ട, കൊല്ലം, ആലപ്പുഴ ജില്ലകളിൽ അടുത്ത 24 മണിക്കൂറിൽ ശക്തമായ മഴക്ക് സാധ്യതയുണ്ടെന്ന് Metbeat Weather Model Forecast പറയുന്നു. ഇന്ന് കേരളത്തിലെ എല്ലാ ജില്ലകളിലും രാത്രി വൈകി വരെ മഴ സാധ്യതയായിരുന്നു രാവിലത്തെ റണ്ണിൽ പറഞ്ഞിരുന്നത്. മെറ്റ്ബീറ്റ് വെതറിന്റെ മോഡൽ ഫോർകാസ്റ്റ് കാണാൻ ഞങ്ങളുടെ പുതിയ വെബ്‌സൈറ്റായ metbeatnews.com സന്ദർശിക്കാം.


മഴക്ക് കാരണം ചക്രവാതച്ചുഴി

അറബിക്കടലിന്റെ തെക്കുകിഴക്കൻ മേഖലയിൽ രൂപപ്പെട്ട ചക്രവാതച്ചുഴിയാണ് മഴക്ക് കാരണം. ചക്രവാതച്ചുഴിയും ബംഗാൾ ഉൾക്കടലിലെ കാറ്റിന്റെ ചുഴിയും മോഡലിൽ കാണാം. അറബിക്കടലിലെ ചക്രവാതച്ചുഴി അന്തരീക്ഷത്തിന്റെ താഴ്ന്ന ഉയരത്തിലാണ് രൂപപ്പെട്ടിരിക്കുന്നത്. ഇത് കേരളത്തിലേക്ക് അറബിക്കടലിൽ നിന്ന് ഈർപ്പത്തെ എത്തിക്കുന്നുണ്ട്. കിഴക്ക് മധ്യ ബംഗാൾ ഉൾക്കടലിൽ വടക്കൻ ആൻഡമാൻ കടലിനോട് ചേർന്നും അന്തരീക്ഷത്തിന്റെ താഴ്ന്ന ഉയരത്തിൽ മറ്റൊരു ചക്രവാതച്ചുഴിയും രൂപപ്പെട്ടിട്ടുണ്ട്. ഇത് കിഴക്കൻ മേഖലയിൽ ഇടിയോടെ മഴ നൽകാൻ പര്യാപ്തമാണ്. പടിഞ്ഞാറൻ തീരത്ത് ഇടിയില്ലാതെയും കിഴക്ക് ഇടിയുള്ള മഴക്കുമാണ് സാധ്യതയെന്ന് ഞങ്ങളുടെ വെതർമാൻ പറയുന്നു. ഈ സാഹചര്യം ബുധനാഴ്ച വരെ തുടരും. കഴിഞ്ഞ ദിവസം രാത്രിയിൽ അനുഭവപ്പെട്ട തണുപ്പും അടുത്ത നാലു ദിവസം കുറയും.

ന്യൂനമർദം നാളെയോടെ, കേരളത്തിലെ അന്തരീക്ഷസ്ഥിതി വിശദമായി വായിക്കാം

ഇന്ന് ആൻഡമാൻ കടലിനടുത്ത് ബംഗാൾ ഉൾക്കടലിൽ രൂപപ്പെടുമെന്ന് പ്രതീക്ഷിച്ചിരുന്ന ന്യൂനമർദം രൂപപ്പെട്ടില്ല. ചക്രവാതച്ചുഴി ഈ മേഖലയിൽ സമുദ്രനിരപ്പിൽ നിന്ന് 5.8 കി.മി ഉയരത്തിൽ നിലനിൽക്കുന്നുണ്ട്. എന്നാൽ നാളെയോടെ ഇത് ന്യൂനമർദമായേക്കുമെന്നാണ് ഇപ്പോഴത്തെ നിഗമനം. തുടർന്ന് പതിയെ ശക്തിപ്പെട്ട് തെക്കേ ഇന്ത്യ ലക്ഷ്യമാക്കി നീങ്ങും. ന്യൂനമർദം രൂപപ്പെട്ട് രണ്ട് ദിവസം കൊണ്ട് ശക്തിപ്പെട്ട് തീവ്രന്യൂനമർദം (ഡിപ്രഷൻ) ആയി മാറും. ഈ സിസ്റ്റം നിലവിൽ മണ്ടൂസ് ചുഴലിക്കാറ്റാകുമെന്ന് പ്രവചനമില്ല. സിസ്റ്റം ഏതു പാതയിൽ സഞ്ചരിക്കും എന്നതിനെ അടിസ്ഥാനമാക്കിയാകും ന്യൂനമർദം ചുഴലിക്കാറ്റാകുമോയെന്ന കാര്യത്തിൽ വ്യക്തതയുണ്ടാകൂ.


തിങ്കൾ വരെ മഴ വിട്ടുനിൽക്കും

കേരളത്തിൽ കഴിഞ്ഞ ദിവസത്തെ പോസ്റ്റിൽ വിശദീകരിച്ചതുപോലെ മഴ ഏതാനും ദിവസം കുറയും. തിങ്കൾ വരെ ഒറ്റപ്പെട്ട മഴ മാത്രമേ പ്രതീക്ഷിക്കുന്നുള്ളൂ. ന്യൂനമർദം കിഴക്കൻ കാറ്റിനെ തടസപ്പെടുത്തുന്നതും പടിഞ്ഞാറൻ കാറ്റിനെ അറബിക്കടലിലെ ചക്രവാതച്ചുഴി തടസപ്പെടുത്തുന്നതുമാണ് കാരണം. കഴിഞ്ഞ ആഴ്ച ബംഗാൾ ഉൾക്കടലിൽ നിന്ന് തമിഴ്‌നാട്ടിൽ കരകയറി കേരളത്തിനു മുകളിലൂടെ അറബിക്കടലിലെത്തിയ ന്യൂനമർദം ഇപ്പോൾ തെക്കുകിഴക്കൻ അറബിക്കടലിനോട് ചേർന്നുള്ള തെക്കുപടിഞ്ഞാറൻ മേഖലയിൽ സമുദ്രനിരപ്പിൽ നിന്ന് ഏകദേശം 4.5 കി.മി ഉയരത്തിൽ ചക്രവാതച്ചുഴിയായി നിലകൊള്ളുകയാണ്. കേരളതീരത്തോട് ചേർന്ന് മറ്റൊരു ചക്രവാത ചുഴി അന്തരീക്ഷത്തിന്റെ താഴ്ന്ന ഉയരത്തിൽ നിലകൊള്ളുന്നതിനാൽ പുലർച്ചെയും രാവിലെയും തീരപ്രദേശത്ത് ഏറെ നേരം നീണ്ടു നിൽക്കാത്ത മഴ പ്രതീക്ഷിക്കാം. ഇത് താൽക്കാലികമാണ്. ഇതു ഒഴിച്ചു നിർത്തിയാൽ ഏതാണ്ട് വരണ്ട കാലാവസ്ഥയിലേക്ക് ഇനിയുള്ള നാലു ദിവസം നീങ്ങുമെന്നാണ് നിരീക്ഷണം. തിങ്കളാഴ്ചക്ക് ശേഷം പുതിയ ന്യൂനമർദത്തിന്റെ ഭാഗമായി കേരളത്തിലും മഴ ലഭിച്ചേക്കാമെന്നാണ് മെറ്റ്ബീറ്റ് വെതർ നിരീക്ഷിക്കുന്നത്.

ബംഗാൾ ഉൾക്കടലിൽ നാളെ ന്യൂനമർദം രൂപപ്പെട്ടേക്കും, തൽക്കാലം മഴ കുറയും

കഴിഞ്ഞ ആഴ്ച ബംഗാൾ ഉൾക്കടലിൽ രൂപപ്പെട്ട് കേരളത്തിനു കുറുകെ സഞ്ചരിച്ച് അറബിക്കടലിലെത്തി ദുർബലമായ ന്യൂനമർദത്തിനു പിന്നാലെ ബംഗാൾ ഉൾക്കടലിൽ നാളെ (ബുധൻ) വീണ്ടും ന്യൂനമർദം ഉടലെടുക്കും. ബംഗാൾ ഉൾക്കടലിൽ ആദ്യവാരവും രണ്ടാം വാരവും ന്യൂനമർദം ഉടലെടുക്കാൻ സാധ്യതയുണ്ടെന്ന് കഴിഞ്ഞ മാസം മെറ്റ്ബീറ്റ് വെതർ സൂചിപ്പിച്ചിരുന്നു. ആദ്യ ന്യൂനമർദം കേരളത്തിൽ രണ്ടു ദിവസം ഒറ്റപ്പെട്ട ശക്തമായ മഴ നൽകി ഇപ്പോൾ അറബിക്കടലെത്തി ദുർബലമായി. വടക്കുപടിഞ്ഞാറൻ അറബിക്കടലിനു മുകളിൽ സമുദ്രനിരപ്പിൽ നിന്ന് 4.5 കി.മി ഉയരത്തിൽ ചക്രവാതച്ചുഴിയായി ഈ സിസ്റ്റം തുടരുകയാണ്.

പുതിയ ന്യൂനമർദം നാളെ

തെക്കുകിഴക്കൻ ബംഗാൾ ഉൾക്കടലിൽ ആൻഡമാൻ കടലിനോട് ചേർന്നാണ് നാളെ പുതിയ ന്യൂനമർദം രൂപപ്പെടുക. തുടർന്ന് ഇത് വടക്കുവടക്കു പടിഞ്ഞാറ് ദിശയിൽ സഞ്ചരിച്ച് ശക്തിപ്പെട്ട് അതിതീവ്ര ന്യൂനമർദം വരെയാകാൻ നിലവിൽ സാധ്യതയുണ്ട്. മണ്ടൂസ് ചുഴലിക്കാറ്റാകാനും ഈ സിസ്റ്റം ശക്തിപ്പെട്ടേക്കും. തെക്കേ ഇന്ത്യയുടെ തീരം ലക്ഷ്യമാക്കി നീങ്ങാനാണ് സാധ്യത. ഈ സിസ്റ്റം കേരളത്തിലുൾപ്പെടെ മഴ നൽകിയേക്കുമെന്നാണ് നിലവിലെ നിരീക്ഷണം. സിസ്റ്റത്തിന്റെ സഞ്ചാരപാതയിൽ അവ്യക്തയുള്ളതിനാൽ കേരളത്തിലെ മഴ പ്രവചനം അടുത്ത ദിവസങ്ങളിലേ കൃത്യമായി പറയാനാകൂവെന്ന് ഞങ്ങളുടെ മീറ്റിയോറോളജിസ്റ്റ് പറയുന്നു.

അടുത്ത ദിവസങ്ങളിൽ മഴ കുറയും

ബംഗാൾ ഉൾക്കടലിൽ ന്യൂനമർദം രൂപപ്പെടുന്നതോടെ കിഴക്കൻ കാറ്റിന്റെ ഒഴുക്ക് തടസപെടുന്നത് കേരളത്തിലും തമിഴ്‌നാട്ടിൽ ഏതാനും ദിവസത്തേക്ക മഴ കുറയ്ക്കും. ന്യൂനമർദം തീരത്തേക്ക് അടുക്കുന്നതോടെ വീണ്ടും മഴക്ക് സാധ്യതയുണ്ട്. ഇടവേളക്ക് ശേഷം തമിഴ്‌നാട്ടിൽ മഴ ലഭിക്കും. തമിഴ്‌നാട്, ആന്ധ്രപ്രദേശ് തീരങ്ങളിൽ ഈ ആഴ്ച അവസാനമോ അടുത്തയാഴ്ച തുടക്കമോ ശക്തമായ മഴ പ്രതീക്ഷിക്കണം. കൂടുതൽ വിവരങ്ങൾ അടുത്ത ദിവസങ്ങളിൽ മെറ്റ്ബീറ്റ് വെതറിന്റെ വെബ്‌സറ്റുകളിലും സോഷ്യൽ മീഡിയ പ്ലാറ്റ്‌ഫോമുകളിലും ലഭ്യമാകും.

ചാൾസ് രാജാവ്: കലാവസ്ഥ വ്യതിയാനത്തിന്റെ മുന്നണി പോരാളികളിൽ ഒരാൾ

ഏഴു പതിറ്റാണ്ട് ബ്രിട്ടൻ ഭരിച്ച എലിസബത്ത് രാജ്ഞിയുടെ മരണത്തോടെ ബിട്ടന്റെ രാജാവാകുന്ന ചാൾസ് മൂന്നാമൻ കാലാവസ്ഥാ വ്യതിയാനത്തെ നേരിടാൻ മുന്നിലുള്ള ലോക നേതാക്കളിലൊരാൾ. വർഷങ്ങളായി കാലാവസ്ഥാ വ്യതിയാനത്തെ കുറിച്ച് പ്രചാരണം നടത്തുന്നയാളാണ് ചാൾസ്. അതിനാൽ ബ്രിട്ടീഷ് രാജാവ് എന്ന നിലയിൽ അദ്ദേഹത്തിന് കൂടുതൽ കാര്യങ്ങൾ കാലാവസ്ഥാ വ്യതിയാനത്തെ നേരിടുന്നതിൽ ചെയ്യാനാകും. കഴിഞ്ഞ വർഷം നടന്ന COP26 ലും അദ്ദേഹത്തിന്റെ സാന്നിധ്യമുണ്ടായിരുന്നു. കഴിഞ്ഞ നവംബറിലാണ് ഗ്ലാസ്‌ഗോയിൽ ഉച്ചകോടി നടന്നത്. ആഗോള താപനത്തിനെതിരേ ലോകം യുദ്ധകാലടിസ്ഥാനത്തിൽ പ്രവർത്തിക്കണമെന്നാണ് അദ്ദേഹം അന്ന് ആഹ്വാനം ചെയ്തത്. കൊവിഡിനേക്കാൾ വലിയ വെല്ലുവിളിയാണ് കാലാവസ്ഥാ വ്യതിയാനമെന്നും അദ്ദേഹം അഭിപ്രായപ്പെട്ടു. കാർബൺ ബഹിർഗമനം കുറയ്ക്കാൻ അദ്ദേഹം ബ്രിട്ടനിലും പദ്ധതി ആസൂത്രണം ചെയ്തു.
രാഷ്ട്രീയത്തിൽ സാധാരണ രാജകുടുംബം ബ്രിട്ടനിൽ ഇടപെടാറില്ല. താൻ 10 വർഷം പ്രധാനമന്ത്രിയായിട്ടും എലിസബത്ത് രാജ്ഞിയുടെ രാഷ്ട്രീയ നയം എന്താണെന്ന് അറിയില്ലായിരുന്നുവെന്ന് മുൻ ബ്രിട്ടീഷ് പ്രധാനമന്ത്രി ടോണി ബ്ലെയർ പറഞ്ഞിരുന്നു.
ക്ലൈമറ്റ് ചേഞ്ചുമായി ബന്ധപ്പെട്ട് ഇന്ത്യയിലും ചാൾസ് രാജകുമാരനായിരിക്കെ കാംപയിൻ നടത്തിയിരുന്നു. ഇന്ത്യയിൽ ജീവകാരുണ്യ പ്രവർത്തനത്തിനും ക്ലൈമറ്റ് ചേഞ്ച് നേരിടാനുമാണ് അദ്ദേഹം ഊന്നൽ നൽകിയത്. 2019 നവംബർ 13 ന് മൂന്നു ദിവസത്തെ ഔദ്യോഗിക സന്ദർശനത്തിന് ഡൽഹിയിലെത്തിയ ചാൾസ്, കേന്ദ്ര കാലാവസ്ഥാ വകുപ്പിന്റെ ആസ്ഥാനത്തും സന്ദർശനം നടത്തിയിരുന്നു. മൗസം ഭവനിലെത്തിയ അദ്ദേഹം മുക്കാൽ മണിക്കൂർ ചെലവഴിച്ചിരുന്നു. ഐ.എം.ഡി ഡയരക്ടർ ജനറൽ മൃത്യുഞ്ജയ് മൊഹാപത്ര ചുഴലിക്കാറ്റ് മുന്നറിയിപ്പ് പ്രവചനം, നേരത്തെയുള്ള വാണിങ് വെതർ ഫോർകാസ്റ്റ് സിസ്റ്റം, നാഷനൽ വെതർ ഫോർകാസ്റ്റിങ് സെന്റർ എന്നിവയെ കുറിച്ച് വിശദീകരിച്ചു. റഡാർ, ഉപഗ്രഹ സംവിധാനങ്ങളെ കുറിച്ചും ശാസ്ത്രജ്ഞർ വിശദീകരിച്ചിരുന്നു.

കേരളത്തിൽ ഇപ്പോഴത്തെ മഴ എത്രനാൾ തുടരും എന്നറിയാം

കേരളത്തിൽ ഇപ്പോൾ ലഭിക്കുന്ന മഴ ബുധനാഴ്ച വരെ തുടരാൻ സാധ്യത. തുടർന്ന് മഴയുടെ ശക്തി കുറയും. അടുത്ത തിങ്കളാഴ്ച മുതൽ വീണ്ടും കിഴക്കൻ മേഖലകളിൽ ഇടിയോടുകൂടി മഴക്ക് സാധ്യതയുണ്ട്. മ്യാൻമറിന് സമീപം സമുദ്രനിരപ്പിൽ നിന്ന് അഞ്ച് കിലോമീറ്റർ ഉയരത്തിൽ നിലകൊള്ളുന്ന ചക്രവാത ചുഴിയും, ഫിലിപ്പൈൻസിനു സമീപത്തെ ചുഴലിക്കാറ്റും പടിഞാറൻ കാറ്റിനെ ശക്തിപ്പെടുത്തിയതാണ് മഴക്ക് കാരണം. നാളെയും (ചൊവ്വ) കേരളത്തിൽ എല്ലാ ജില്ലകളിലും മഴ ലഭിക്കും. മഴക്ക് ഇടവേളകൾ ഉണ്ടാകും. ബുധൻ മുതൽ മഴയുടെ ശക്തി കുറയുമെന്നാണ് മെറ്റ്ബീറ്റ് വെതർ പറയുന്നത്. തുടർന്ന് മഴ അടുത്ത ആഴ്ച വീണ്ടും എത്തും. ഇടിയോടെ മഴയാണ് പിന്നീടുണ്ടാക്കുക. ഈ മാസം അവസാനവും സെപ്റ്റംബർ ആദ്യവും സാധാരണ മഴ ലഭിക്കും. കൂടുതൽ വിവരങ്ങൾക്ക് Metbeat Weather facebook പേജ് പിന്തുടരുക.

കേരളത്തിൽ ശക്തമായ മഴ എത്രദിവസം വരെ തുടരും ?

കേരളത്തിൽ ശക്തമായ മഴ രണ്ടു ദിവസം കൂടി തുടരും. വെള്ളിയാഴ്ച മുതൽ കിഴക്കൻ മേഖലയിൽ മഴ തുടരുമെങ്കിലും ഇപ്പോഴത്തെ തീവ്രതയുണ്ടാകില്ലെന്നാണ് മെറ്റ്ബീറ്റ് വെതറിന്റെ നിരീക്ഷണം. ബുധൻ, വ്യാഴം ദിവസങ്ങളിൽ ജാഗ്രത തുടരണം. വടക്കൻ കേരളത്തിലും മധ്യ കേരളത്തിലെ കിഴക്കൻ മലയോരത്തും ശക്തമായതോ അതിശക്തമായതോ ആയ മഴ തുടരും. വലിയ തോതിൽ പ്രളയത്തിലേക്ക് നീങ്ങുന്ന സാഹചര്യം ഉണ്ടാകാനിടയില്ലെന്നാണ് ഏറ്റവും പുതിയ കാലാവസ്ഥാ അവലോകനം. സംസ്ഥാനത്തെ മിക്ക മേഖലകളിലും ഇന്നു പകൽ കഴിഞ്ഞ ദിവസത്തെ അപേക്ഷിച്ച് മഴ കുറഞ്ഞിരുന്നു. നദികളിൽ ജലനിരപ്പ് വലിയതോതിൽ കൂടിയതുമില്ല. ഡാമിലേക്ക് നീരൊഴുക്ക് വർധിക്കുന്നുണ്ടെങ്കിലും തുറക്കേണ്ട സാഹചര്യത്തിലല്ല മേജർ ഡാമുകൾ.

കേരളത്തിനു സമാന്തരമായി നിലകൊള്ളുന്ന ബംഗാൾ ഉൾക്കടലിലെ ചക്രവാതച്ചുഴി അടുത്ത ദിവസങ്ങളിൽ വടക്കോട്ട് നീങ്ങാൻ സാധ്യതയുണ്ട്. അതിനൊപ്പം മഴയും കർണാടക, ഗോവ മേഖലയിലേക്ക് നീങ്ങും. ഇന്നും കർണാടകയിൽ കനത്ത മഴ ലഭിച്ചിരുന്നു. കർണാടകയിലെ മഴ വടക്കൻ കേരളത്തെ സ്വാധീനിക്കുമെങ്കിലും വടക്കൻ ജില്ലകളിൽ അസാധാരണ സാഹചര്യം ഉണ്ടാകാൻ ഇടയില്ല. കിഴക്കൻ മലയോര മേഖലകളിലെ ജാഗ്രത കേരളത്തിലെ എല്ലാ മേഖലകളിൽ ഞായറാഴ്ച വരെയെങ്കിലും തുടരുന്നതാണ് സുരക്ഷിതം. പൊതുജനങ്ങൾ സർക്കാർ ഏജൻസികൾ നൽകുന്ന നിർദേശം അനുസരിക്കുക. ഔദ്യോഗിക, സ്വകാര്യ കാലാവസ്ഥാ ഏജൻസികൾ നൽകുന്ന വിവരങ്ങൾ മനസിലാക്കി വയ്ക്കുക. മാറിത്താമസിക്കാൻ നിർദേശം ലഭിച്ചാൽ അമാന്തിച്ച് നിൽക്കരുത്. സുരക്ഷക്ക് മുൻതൂക്കം നൽകുക.
ശ്രദ്ധിക്കുക- അപ്‌ഡേഷനുകൾ അറിയാൻ ഞങ്ങളുടെ Metbeat Weather, weatherman kerala എന്നീ ഫേസ്ബുക്ക് പേജുകളും യുട്യൂബ് ചാനലുകളും metbeat.com, metbeatnews.com എന്നീ വെബ്‌സൈറ്റുകളും LIKE ചെയ്തും Subscribe ചെയ്തും പിന്തുടരുക.